ئەگەر دویربینا خۆ هەلبگرین و سەیری بوویەر و رویدانێن بۆری یێن د ناڤبەرا چەرخ و قۆناغان دا یێن ل کوردستانێ پەیدا بووین بکەین، ئەگەر ل ناڤەرۆکا وان رستە، پەیڤ و نڤیسینان دا بچینە خوارێ، زۆر راستی، دیرۆک و هندەک سەیری دێ دیار بن یێن کو بێ جوداهی حکومەتێن ئیراقێ یێن ئێک ل دویڤ ئێک ب سەرێ مللەتێ کورد ئیناین، راستییا ڤێ چەندێ ژی کو ئەڤ کارەسات و دەردەسەرییە ب سەرێ کوردان و کوردستانێ ئیناین بۆ وێ چەندێ دزڤریت کو هندەک خال و رۆنکرن پێ دڤێن داکو خواندەڤان و خەلک بزانن بۆچی و چاوا ئەڤ کارەساتە هەمی ب سەرێ کوردان ئیناینە؟

د بەرسڤێ دا دێ بێژین: ئەگەرێ سەرەکی کو کوردن و خودان رەهـ و ریشالێن دیرۆکی، چاکی، مێرانی، خورستی، زیرەکی و شارەزایینە و زێدەباری ڤان هەمی خالان کو خالەکا سەرەکی یە و هەر دیسان خالەکا بەرچاڤە کو خودایێ مەزن متایەک و بەرهەمەک باش و ئاڤەکا شرین و زەلال و سەقایەکێ ناوەند و چار وەرزی و جوگرافیایەکا گونجایی دایە وەلاتێ کوردان و ئەڤ جۆرە وەلاتە یان ئەڤ ئەردە دهێنە ب ناڤ کرن ب پاکیزە (العزرا‌ء).

ئەو بەرهەمێن خۆمالی تێرا تاکێ کورد و خێزانا وی ژی دکر و هەر وەسا پشکەک ژ ڤان بەرهەمێن خۆمالی دهاتنە فرۆتن و مفایێن مەزن یێن دارایی ژێ دهاتنە وەرگرتن، ئانکو وەکی مە ئاماژە پێ دای کو کوردستان مینا سەبەتەکا خوارنێ بوو.

لڤێرە دێ باسێ مە ل دۆر ئەوێ چەندێ بیت کو پشتبەستنا مللەتێ کورد ل کوردستانێ ل سەر چاندنێ و ژێدەرێن ئاڤێ و پێتڤی و کەلوپەلێن ناڤخۆیی و خوەزایی بوو و زۆر مفا ژێ وەرگرتن و وەلاتێ مە کوردستان یا زەنگینە ب هەمی جۆرێن دار و گیا و گول و بەرهەم و دارێن بەرهەمهێنەر و دارێن دی مینا دارێن (بەڕوی، کەڤوت، مازی، دیندار، کەزان، بێمک، گوهیشک، هەلهەلۆک، چنار، کوروسک، فستەق، باهیڤ، زەیتوین) و یێن ئاڤی وەکی (خۆخ، مژمژە، دەهان جۆرێن سێڤا، دەهان جۆرێن تری، حولیک، گێلاس، گویز، هرمیک، هژیر، ئالوبالو و دەهان جۆرێن دی). هەروەسا زۆر جۆرێن گل و گیایێن دی ژی هەنە ل کوردستانێ، مینا (سیسی، توفک، تۆلک، سێ بسک، پیڤاز، لیش، شیرکتک، قوراد، سیر، کەنگر، کیزرک، کێلیک، کەڤلەپیر، ترشۆک، قیڤار، پیڤۆک، شەپرزە، پیز، پێگورگ، کیزماز، پینگ، پێمریشک، پتاتۆشک، دومبەلان، صوریاز، رێڤاس، پێرپینە، سبت، کاری، کەلەندۆر، جاترک، خەندەلک، گیازاڤاک، گێژنک، باییک، هەلز، سپنگ، گیا عەرەبک، بێزا، بیتانۆک، بەلالیسک یان بابەلیسک، بیک، سەرکولافک یان کڤارک، پیشۆک، ب دەهان جۆرێن دی) و ئەگەر ئەم بنڤیسین دێ دەهان لاپەر تژی بن ژ ئاڤ و شێوە و رەنگێ ڤان جۆرە گیایێن ناڤخۆی ئانکو خۆبخۆیی ل کوردستانێ.

ئەگەر ئەم نڤیسینەکێ یان ڤەکۆلینەکێ دروست بکەین ل سەر وان داهاتیێن ژ بەرهەمێن خوەزایێن کوردستانێ بەرهەم دهێن دێ بینین ئەگەر ئەڤ بەرهەمێن پەروە و بێ زەحمەت دێ بنە ب بهایێ ملیارێن دولاران، هەر ژ کەڤن دا مللەتێ کورد ب تنێ ژین و ژیارا وان ل سەر ڤان بەرهەمان بوون. بۆ نموونە ل پار من گوهـ ل بهایێن ڤان تشتا بوون و دیتن کو بهایێ کەنگرۆک ئانکو سیسی یێ ژ (١٢,٠٠٠)دوازدە هزار دینارا پتر بوو ل چیایی و ل بازاری ب پتر ژ (٣٠,٠٠٠) سیهـ هزار دیناران بوو و نمونەکا دی بهایێ کیلۆیا مازییا تەڕ یا چیایێن سەربەرزێن کوردستانێ ب بهایێ (٣,٥٠٠) سێ هزار و پێنچ سەد دیناران بوو و یێ رۆژەکێ ب تنێ بچیتە مازییا دێ پتر ژ دەهـ کیلۆیان کەت و تشتێ سەرەنجراکێش ل سەر ڤێ چەندێ کو هەر رۆژەکێ دێ چەند کیلۆ گرامان مفا کەی ئانکو دێ داهاتەکێ باش بۆ تە هێت بێی هیچ مەزاختی و واستییانەکێ.

ل هندەک جاران بوویەرێن نەچاڤەرێکری بەر ب مللەت و وەلات و حکومەتان ڤە دهێن کو ژ بەر زۆر ئەگەران چ یێن سروشتی بن یان ژی یێن نەسروشتی بن یان ژی ئەگەرێن پەیدابوونا شەڕ و ئاوارەییێ یان ژی ئەگەرێن لافاو و بیڤەرلەز و باهۆز و بارۆڤێن هەوایی و بابەلیسکێن ب هێز یان ژی ڤولکان و هشکەسالی و زۆر پرس و ئەگەرێن دی.

زۆر گۆتن و پەیڤ و رستە و ئاخفتن ل سەر ڤان پرسێن جودا جودا هەنە و ئەڤ هەمی ئەگەرە یێن مە باس کرین بۆ ب سەرئێخستنا وەلاتان و مللەتان دا هەنە لێ هەردەم کوردستان و مللەتێ کورد کەفتیە بەر ستێرکا چەکێ دوژمنی کو دوژمنان ب هەمی جۆرێن توند و زولم و زۆرداریێ مامەلەکا شاش و خراب و کەشەفرێت دگەل مللەتێ کورد کریە و تا قۆناغێن ڤان سەردەمان ژی دوژمنان ل سەرێ بەرنامەیێ خۆ ژ هەمی ئالییان ڤە ب تنێ دوژمناتییا کوردان کریە، زۆر جاران ئەم دبێژین و ڤەدگێڕین کو ئەو ئەنفالێن کو دوژمنان ب چەکی ب سەرێ مللەتێ کورد ئیناین و ئەو نەهامەت و زولم و ستەمە ب تنێ پەیوەندی ب ئالیەکێ دەستنیشانکری ڤە نینە بەلکو ئەو دوژمنکارییە یا فرەئالییە. پتریا جاران د راگەهاندنا مە دا داخویانی دەردکەفتن و دبێژن مە ب تنێ ئەنفالەک هەبویە، لێ ئەنفالێن هەین یێن سیاسی و کۆمەلایەتی و لەشکەری و ئابووری و پەروەردەیی و زانستی و رەوشەنبیری و کەلتوری و مەزهەبی و ئایینی و جوگرافی و چاندنی و دارایی و …هتد. دوژمنان و ب تایبەت حوکمرانێن ئیراقێ یێن ئێک ل دویڤ ئێک بەرنامە دانان و پیلان گێڕان و پلان دانان کو کوردان ژ زانایان بکەنە نەزان و ژ داهێنەران بکەنە نەداهێنەر و ژ خورستیێ بکەنە مللەتێ لاواز و بێ شیان و ژ بەرهەمهێنەریێ بکەنە مللەتەکێ بەرخۆر(مستهلک) و ژ مللەتەکێ شارەزا بکەنە نەشارەزا و ژ مللەتەکێ ب پەروەردە بکەنە مللەتەکێ بێ پەروەردە و ژ مللەتەکێ مرۆڤدۆست بکەنە مللەتەکێ دوژمنکار و ژ مللەتەکێ ئارام و ئەمین بکەنە مللەتەکێ هۆڤ و دەڤبخوین و ژ مللەتەکێ چاندنێ بکەنە مللەتەکێ کو ل بەر دەستێ وانا بیت کو مینا چویچک و بالندان د هێلینان دا ماکا وان ب دومێ خۆ خوارنێ بکەتە ددەڤێ وانان دا. ئانکو هەردەم ل بەر چاڤێن وانا بن و دا کو هەر دەم محتاجی بەر دەستێ دوژمنی بن.

ئەڤ پەیڤ و رستێن مە ل سەری دیار کرین پترییا وان دوژمنان ل ل کوردستانا ئیراقێ دژی گەلێ کورد جێ بەجێ کربوون. لێ ب سایا سەرێ پێشمەرگێ قارەمان و خوینا هزاران شەهیدێن کورد و کوردستانێ کو ل بن هەر دارەکا بەڕوی یان مازی یێن چیایێن کوردستانێ خوینا گەنجەکێ کوردپەروەر ل بن رێشتی یە و ئەو دارا بەڕوی و مازی یا موکوم و خورستی ب خوینا گەنجێن کوردان دهاتە ئاڤدان و گەشە دکر کو ئەو گەنجە بێ گونەهـ دکوشتن و بەرزە دکرن و ب شێوازێن هۆڤانە خەلکێ سڤیل و بێ گونەهـ دکوشتن و هەمی رێکێن نەمانێ بۆ کوردان و هەمی نەتەوە و ئایینان ل ئیراقێ دگرتنە بەر ب تایبەت بۆ کوردان کو دوژمنان کار دکر کو نەخشێ دەڤەرێ و ئیراقێ و کوردستانێ بگوهۆڕیت و دا کو هەمی تەرازییێن هێزێ و ئابووری و دارایی بکەتە د دەستێ خۆ دا و خو بکەتە ئیمپراتۆر و ب ڤان هەمی رێکان نەشیان کونترولێ ل سەر رەوشێ بکەن و دویماهیک پلێت و وەرەقا د دەستێن دوژمنان دا ژی بکارئینای دەرکرنا بریارا ئەنفالان ل دژی مللەتێ کورد بوو کو بریارا هەوێن ئەنفالان ژ حکومەتا ئیراقا خوینمێژ و ئەژدەها دەرکەفت دژی مللەتێ کورد کو ب هزاران خێزان و خەباتکەر بەر ب ئوردیگەهێن ب خورتی چێکری یێن بەحرکێ و پشکا هەرە مەزن یا خەلکێ مە یێن کوردپەروەر و دلسۆز و مەزلوم بەر ب سنوورێن تورکیا و ئیرانێ کەفتنە رێ و کاروانێ خۆ قورتالکرنێ گرتنە بەر و بەر ب چارەنڤێسەکێ بەرزە ڤە چوون و پشکەکا زۆر بوونە ئاوارە و ل ترکیا و د کەمپ و چادرگەهان دا ئاکنجی بوون کو روژانە د دەستێن جەندرمە و میت و تیم ئوزال و کارگێری یا چادرگەهێ دا ژیانەکا سەخت و دژوار دبرە سەر و روژانە دیمەنێن سەخت و نەخوشێن ژین و ژیارا ئاوارێن چادرگەهێن ترکیا ل کەمپا دیاربەرکر و کەمپا مۆشێ و چادرگەها مێردینێ و ب تایبەت چادرگەها مێردینێ ل پێش چاڤ بوون و زۆر یا فەرە ئەڤ دیمەنە هەمی ببنە سیناریۆ و چیرۆک و فلم و ب شێوەکێ باشتر و بەرچاڤتر ئەڤ خەباتا پیرۆز بمینیت و بۆ بەرەباب و نفشێن داهاتی ژی بهێنە نیشاندان داکو دیرۆکا مللەتی خۆ ژ بیر نەکەن، لێ دوژمنان هەولدانێن بەردەوام دکرن کو کوردان ب بدەستڤەئینانا پاریێ روژێ بۆ خۆ و خێزانا خۆ مژویل بکەن.

هەر دیسان ژ ئالیێ گەشتیاری و ئاڤەدانکرن و پێشکەفتن و شارستانییەتێ ڤە ب تنێ هندەک پرۆژێن هاتینە دروستکرن کو ئەو ژی بۆ خزمەتکرنا دوژمنان بوو، هەر دیسا هندەک رێک و پر هاتینە دروست کرن ب تنێ یێن لەشکەری. هەر پرۆژەکێ وان ب ناڤێ پروژێن خزمەتگوزاری چێکربن ژی، ئیلا مەرەما دوژمنکارانە ل دژی مللەتێ مە ل پشت بوویە، ڤێجا چ ژ ئالیێ تێکدانا پرسێن گشتی و یێن (حیوی) بن مینا دیموگرافیەت(گهورینا ناسنامەیی) توپوگرافیەت(گهورینا دەڤەرێ و ئاڤاهی) یان ژ لایێ ئەنتۆلۆجیا(زانستێ هەبوونێ) و سایکوبوتونی(زانستێ دوژمناتی و لبەرێک رەشکرنێ) و ئبستمۆلۆجیا ئانکو (زانستێ زانینێ) بت یان ژی ژ ئالیێ جیۆپۆلۆتیکی ڤە بت.

رژێمێن گۆر ب گۆر و رۆخیایێن ئیراقێ هەمی زانست و رێک و پیلان بکار ئیناینە ژ بۆ ژ بن برن و نەهێلانا کوردان، ژ بۆ لاوازکرنا کوردستانێ و ئابوورێ کوردستانێ کو کوردان ئابوورەکێ ب هێز هەبوو و پشتبەستنا ئیراقێ ل سەر بەرهەمێن کوردستانێ بوو و ژ بۆ ڤان پرسێن ل سەری مە باس لێ کرین یێن جودا جودا ب بۆچوونا ترسناکترین و خرابترین و دوژمنترین سیستەم کو ئیراقێ دانای و پلانا خۆ ل سەر دانای و پیلانا خۆ ل سەر گێرایی ئەوە کو حکومەتا ئیراقێ سیستەمەکێ ترسناک دارێت و جێ بەجێ کر ئەو بوو کو سیستەمێ کۆمەلگەهێن ئاکنجیکرنا ب خوورتی (مجمعات سکنیە) دانان و ئیراقێ مفایێن زۆر مەزن کرن ئەو ژی لیدانا گورزەکێ کوشندە بوو ل شۆرەشێن کوردان و هێزا پێشمەرگێ کوردستانێ و قایلکرنا خەلکێ مە ب دو ژۆرێن زۆر سادە یێن بەری و مووچەکێ زۆر کێم نە مرن و نە ژین و رژێما ئیراقێ شیا مللەتێ کورد ژ مللەتەکێ بەرهەمهێنەر و زیرەک و شارەزا و خورستی بکەتە مللەتەکێ بەرخۆر و نەزان و نەزیرەک.

دیاردەیا دی یا ترسناک کو کار بۆ هاتبوو کرن سیستەمێ کۆمەلگەهێن ئاکنجی بوونێ ل هەمی پارێزگەهێن کوردستانێ(دهۆک، هەولێر، سلێمانی و کەرکووک) دانان کو ب راستی وەکو ژێدەرێن دیرۆکی یێن دیارکری کو حکومەتا ئیراقێ ب هەمی رێک و پلانان نەشیا کونترولێ ل سەر کوردستانێ بکەت؛ چونکە ئابوورەکێ بهێز هەبوو و جهەکی زێڕین و ئاڤەکا مشە و بەرهەمێن سروشتی و چاندنەکا ب کوالێتی و خەلکەکێ دلسۆز و شۆرەشگێر و خەباتکەر هەبوو و ئەڤی ئەردی ئانکو خاکا کوردستانا پیرۆز و چیایێن خەباتکەر و رووبارێن خێر و و بەرەکەتێ هەمی شیانێن خۆ بۆ گەلێ کورد بەرپا و ئامادە دکرن و خەلکی ب هزاران دینار و دۆلار فایدە دکرن و ئابوورێ کوردستانێ رۆژ بۆ روژێ پتر ب هێز دکەفت و گەشە دکر. هەر دیسان دوژمنان چاڤ ل ئابوورێ ب هێز و کوردستانەکا ب هێز نەرابوون، ل بیرا مەیە کو هزاران سەیارێن لۆری و بوزنگ و پیکاپان ژ کوردستانێ بەر و بۆمێ جۆتیارێن مە یێن چیایی و خورستی و یێن چاندنێ بەر ب بەغدا و هەمی پارێزگەهێن ئیراقێ ڤە دبرن و ئەگەر کوردستان نەبایە سێڤ و تری و هەمی جۆرێن بەرهەم و بەر و بۆمێ کوردستانێ نەبایە ئیراق دا (مەحتل) بیت و بێ بەهر بیت ژ هەر تشتەکی. ژ بلی بەرهەمێن گەنم و دان و دکاک و رێچال و سپیاتی و گەشتیاری و هەمی پرسێن دی، ژ بۆ چاڤ پێ نەرابوون و هەر دیسان ترس ژ کوردستانێ و نەحەزییا کورد و کوردستانێ، رژێما ئیراقێ و حکومەتا وی سەردەمی کو تمامکەرا سیاسەتێن شاش و لەنگ بوون هزرەکا مەترسیدار و دوژمنکارانە ل دژی کوردستانێ دانا کو ئەو ژی دانانا کۆمەلگەهێن نیشتەجێ بوونێ (مجمعات سکنیە) کۆمەلگەهێن بخورتی چێکرین ل هەمی پارێزگەهێن ئیراقێ بوون و ل دەستپێکێ کورد ژ گوندێن دویر ئینانە کۆمەلگەهێن ب خورتی چێکرین بۆ نموونە کۆمەلگەها (بیگوڤا، باتیفا، بیرسڤێ، هیزاوا، باگێرا، کۆرا، دێرالۆک، قەدش، باتێل، گرشین، گرێ گەورێ، هەوزەرک، بەدەلییا، مسێریک، باستکێ، مەرینا، کەلەبەدر، شارییا، شێخدر، قەسرۆک و …هتد.

بریارێن ئەنتیکە و سەیر ژ ئیراقێ دەردکەتن دژی مللەتێ کورد. هەمی حکومەتێن ئیراقێ یێن ئێک ل دویڤ ئێک بریارێن ترسناک دژی مللەتێ کورد دەردکرن و ئێک ژ وان بریارێن ترسناک و دوژمنکارانە سنوورێ هەرێما کوردستانێ و ب تایبەت پارێزگەها دهۆک ب درێژاهییا (١٢٠٠) هزار و دوسەد کیلۆمەتران و ب پانییا (٣٠) سیهـ کیلۆمەتران چۆل بکەت و هەمی گوند ژی رابن بێ جوداهی و گۆت دێ گوندێن هەڤچەرخ بۆ دروست کەین دا کو خزمەتگوزارییا بگەهینین وان وەلاتییان و ب ڤێ سیاسەتا خۆ یا چەپەل هەمی سنوورێن ئیراق و سوریا و ئیران و تورکیا گرتن و ژ گوندنشینان پاقژکرن. ل سالێن (١٩٧٤، ١٩٧٦) هەمی ئاکنجیێن گوند و باژێرکێن ل پارێزگەهێن دیالا و کەرکووک و سلێمانی و هەولێر و مویسل و دهۆک کو دبوونە (١٢٢٢) گوند و باژێرک ڤەگوهاستن و راکرن و عەرەب ل وان گوند و باژێر و باژێرکان ئاکنجی کرن و هەمی مال و سامان و زەڤی و ئەرد رادەستی عەرەبان کرن.

هەر ل دەستپێکا دیرۆکا ئیراقێ ب دەهان ژێدەر هەنە کو مویسل و دەڤەرێن کەرکووک و شنگال و شێخان دەڤەر و خاکا کوردانە لێ هەمی حکومەتێن ئیراقێ یێن پاشایەتی و کۆماری یێن ئێک ل دویڤ ئێک هەر ئەو سیاسەتا هەی یاکو حکومەتێن بەری وان هەی و وان بەرنامە و پلان رادەستی هەڤدو دکرن ژبلی کو هندەک پیلان و پلانێن دی ژی ل سەر زێدە دکرن.

ژ بەر بابەتێن گرێدایی بەرژەوەندییێن ئیراقێ ڤە ئێکسەر لیژنەکا بالا ژ چەندین کەسانێن پلەدار و پلە بەرز ژ لایێ حکومەتا ئیراقێ ڤە ل سالا (١٩٧٨) هاتە دروستکرن کو پلەبەرزێن وێ لیژنێ پێکدهات ژ سەرکردێ فەیلەقا ئێک یا سوپایێ ئیراقێ کو ئەو سەرۆکێ لیژنێ بوو و ب ئەندامەتییا هەرسێ پارێزگەرێن دەڤەرا ئوتونۆمی و سەرکردێن فرقەیێن (٢، ٤، ٧، ٨ و ١٢) و هێزا زیقار و ئەمین سریێ شوعبێن هەرسێ پارێزگەهان هاتبوو پێک ئێنان و کارێ ڤێ لیژنێ ئەو بوو کو ل کوردستانێ وەکو وان دگۆتنێ دەڤەرێن ئوتونۆمی (منطقة الحکم الذاتی) کو گوندێن هەڤچەرخ دروست بکەن و ب بهانەیا کو حکومەت نەشێت خزمەتگوزارییان بگەهینیتە گوندێن دویر و وەلاتیێن ل وان گوندان د ئاکنجی. بۆ ڤێ مەرەمێ حکومەتێ زۆر خەرجی یێن مەزن و زەبەلاح ل گوندێن هەڤچەرخ (قری عصریە) دروست کرن و ب ملیۆن و ملیاران دینار لێ خەرج کرن و مەرەما وانا ئەو بوو کو دێ کۆمەلگەهێن هەڤچەرخ دروست کەن کو دگوتنێ (مجمعات سکنیە: کۆمەلگەهێن نیشتەجێبوونێ) و مەرەمێن حکومەتا ئیراقێ دوبارە و ئاشکەرا بوون کو ئەو ژی لێدانا شۆرەشێ و مللەتێ کورد بوو کو وان دڤیان هەمی دەڤەرێ کونترول بکەن و خەلکی بکێشنە بن دەستێ خۆ

تەعریب ئانکو ب عەرەب کرن و ئاوارەکرن و نەفی کرن بەردەوام هەبوو و هەردەم حکومەتێن ئیراقێ سیاسەتا ناڤبری ل دژی مللەتێ کوردێ جوامێر و ئارام ئەنجام ددان. هەر دیسان ب بریارا جڤاتا سەرکردایەتی یا شورەشێ (مجلس قیادة الثورة العراقیة) یا بەعسیا ب بریارا خۆ یا ژمارە (١٦)ێ ل ئادارا سالا (١٩٧٨)ێ هەمی دەڤەرێن شێخان ئێخستنە بەر هەوێن (عەرەبکرن، ئاوارەکرن و نەفیکرنێ) و هەمی گرێبەستێن کەڤنێن چاندنێ یێن رەسەن یێن کوردان هەلوەشاندن و فۆرمێن نوی بۆ دروست کرن و سەنەدێن نووی بۆ دروست کرن و جۆتیارێن عەرەب ل شوینا کوردان دانان و هەمی کورد ژ سەر جهێن وان نەفی کرن و برنە باشوورێ ئیراقێ. وەکی زنجیرە و قوناغ ئێک ل دویڤ ئێک حکومەتا ئیراقێ بریار ل دویڤ بریارێ ل دژی کوردان ددان و ل هەمی دەڤەرێن کوردستانێ وەکی (مەخمور، تلکێف، قەراج، دیبەگە، گوێر، فەئیدیێ، زومار، رەبیعە و …هتد) حکومەتا ئیراقێ ناسنامە و سەنەدێن ملک و مالێن وان ژێ دستاندن. هەمی دەڤەر و شار و شارۆچکێن کوردستانێ بریارا ژمارە (١٦) یا لیژنا کۆمەلگەهـ و گوندێن هەڤچەرخ ل سەر جێ بەجێ دکرن و زەلام و چەندەک و بەرپرسێن حکومەتا ئیراقێ مینا هۆڤێن هێرشبەر و ئەلهویێن نکلخوار و گورگێن دەڤبخوین هەمی دەڤەر و ناوچە و باژێر و باژێرۆکێن کوردستانێ ڤەگرتن و عەرەب کرن و نەفی و ئاوارەکرن. ل دەستپێکێ پیلان و پلانێن حکومەتا ئیراقێ و ب تایبەت یا بەعسییان جێ بەجێ دکرن و پاشان دەست ب پلانێن خۆ یێن دی دکرن.

کۆمەلگەهێن یان گوندێن هەڤچەرخ یان کۆمەلگەهێن نیشتەجێبوونێ ژ چەند گوندان یان چەند کۆمەلگەهێن دۆرماندۆر یان گوندێن دویر ژ دەڤەرێن سنووری یان دەڤەرێن دویر کو ب عەرەبی دبێژنێ (مناطق نائیة) ئانکو دەڤەرێن دویر و بێ خزمەتگوزاری کو ب تنێ خزمەتگوزارییێن وان دەڤەران یێن سروشتی نە و ئەو گوندنشین یان دەڤەر یان خەلکێ ئاکنجی ب تنێ پشتبەستنێ ددەنە سەر خۆ ب خۆ ئانکو (جهود ذاتیة) و حکومەت یان دەستهەلاتدار دێ وان گوندان کۆمڤەکەن و ئینن دەڤەرێن نێزیک یان دێ چەندین گوندان د ئێگ گوند یان دەڤەر دا کۆم کەن و دبێژنێ (مجمعات سکنیە) و ب هندەک ئیدیەما دبێژنێ (گوندێن هەڤچەرخ).

حکومەتێن ئیراقێ ب چ شێوان و چ رێکان نەشیان کونترولێ ل سەر دەڤەرێ ئانکو کوردستانێ بکەن و نەشیان کونترولێ ل سەر شۆرەشێ و مللەتێ کورد بکەن و هەمی شۆرەش و بەرخۆدانێن کوردان و ب تایبەت ل کوردستانا باشوور پشتبەستنا خۆ دایە سەر خۆ ب خۆ ل سەر چاندن و جۆتیاری و داهێنان و پیشەسازییا سادە لێ شۆرەشڤانان شیان مفایی ژ ژینگەهـ و دارستان و بازرگانی و داهێنان و هەروەسا بازرگانیێ ببینن و خۆ و زارۆک و مال و گوند و دەڤەر و پێشمەرگە ب خودان دکرن.

ئەڤا ل سەری مە نڤێسایی ب تنێ دلۆپەک ژ ئوقیانوسەکا پری مەینەت و دەردەسەری بوو، لێ کورد ب سەرکەفتن. ئارام و ئاڤەدان بیت کوردستان و بلند بیت ئالایێ پیرۆزێ کوردان.

 

ژێدەر:

 ١-پەرتووکا کەلها نزارکێ بەرگێ ٢. خالد احمد بادی.

٢-صرخە الوطن المقسم. سمیر محمد ئاکرەیی.

٣- الحملە علی بادینان و اوضاع اللاجئیین، رؤوف کامل عقراوی و تقدیم فلک الدین کاکەیی.