گۆڤارا مەتین گۆڤارا مەتین
هونەر بیاڤەکی بەرفرەهـ و گرنگە کو هونەرمەند ب ڕێیا وی دشێت پەیاما خوە بگەهینتە هەمی قوڕنەتێن دونیایێ، دبت ئەڤ پەیامە هلگرا هزر و بیرێن ئاشتی و مرۆڤایەتیێ بت، یان گەهاندنا ئێش و ئازارێن گەلەکێ بندەست و پەریشان بت بۆ تەڤایا جیهانێ. هونەرێ شێوەکار زمانێ بکارئینانا رەنگانانە، ئافڕاندنا هەست و خەیالێن کەسەکی نە بەرانبەر سروشتی، چێکرنا بۆشاییا ژ دەرڤەیی د کەڤالێ خوە دا، ئەڤ یەکە ژی ل نک هونەرمەندێ شێوەکاری سیروان شاکر ب رۆهنی خویا دکت، دیسان وەک رەنگڤەدان د 21 پێشانگەهێن کەسایەتی دا یێن وی ڤەکرین دیار دبن، لەوما مە ب فەر دیت ڤێ هەڤپەیڤینێ ل گەل بکن..
هونەرمەندێ شێوەکار سیروان شاکر ل دۆردەستپێکا خوە ل گەل هونەرێ شێوەکاری کا کەنگی چاوا دەستپیکریە گۆت: د ژیێ 14 سالیێ دا من دەست ب هونەری كر، پشتی چەندین بزاڤێن لاساییكرنا تشتان و هندەك جاران كەڤالێن جیهانی، هەتا گەهشتیمە قووناغا شەشێ ئامادەیی و من بڕیار دا بچمە كۆلیژا هونەرێن جوان ل بەغدا. خەونا من بجهـ هات و ئەز بوومە ئێك ژ قوتابیێن كۆلیژا هونەرێن جوان/ پشكا شێوەكاری ل سالا 1989 و ل وێرێ من دەست ب رێبازا خۆ یا هونەری كر.
چاوا شێوازێ خوە یێ هونەری ب بۆرینا دەمی پێش دئێخت؟ ئەرێ گوهۆڕینێن مەزن د شێوازێ وی دا هەنە؟ هونەرمەندی گۆت: بێگومان دڤێت جار جارە دەربڕینێ ژ هزرێن خۆ بكەم، داكو بەردەوام بن ل سەر كارێ هونەری، ژ بەر كو گوهۆڕین بۆ بەردەوامیا بزاڤا هونەری گەلەكا گرنگە. هونەرێ من د چەندین قوناغان ڕا بۆریە، وەكو: بۆشایا دەرڤە یا سروشتی و ئەفسانەیا خەونا بەرهەمدار و چەندین گوهۆڕینێن دی، هەتا گەهشتیمە هزرا وێنەكێشانێ و موزیكێ د ئێك خال دا، ئەو ژی هزرا هەستێ یە كو شەنگستە نەك بابەت.
ل دۆر کەرەستە و تەکنیکا د کارێن خوە یێن هونەری دا بکاردئینت سیروان شاکر گۆت: د هونەری دا چەندین تەكنیكا بكاردئینم، ل ڤێ دووماهیێ من قوماشێ قورمچی بكارئینا، ئەو ژی شێوازەكە من داهێنایە ژ پێخەمت گەهشتنا هندەك راستیێن هونەری یێن نەدیار، هەروەسا پێشكێشكرنا هزرەكا نوی بۆ بینەران ل دۆر ڤان تەكنیكان، ژبلی قووناغێن تێدا بۆریم دگوهۆڕینا چەندین تەكنیكان ژ كێركێ، ئانكو كێركا وێنەكێشانێ و وێنەكێشان ب تلێ دپتر ژ پێنج پێشانگەها هەتا گەهشتیمە ڤێ قووناغێ (تەكنیكا قوماشی).
رۆلێ هونەرێ شێوەکاری د ناڤ جڤاکێ دا چیە؟ چاوا هونەر دێ شێت کارتێکرنێ ل خەلکی بکت؟ شێوەکاری گۆت: ل دویڤ ئاخفتنا (سوزان لانجەر) فەیلەسۆفا هەڤچەرخ کو دبێژیت: چو شارستانیەتێن پاقژ بێ هونەر نینن ، ژ بەر كو هونەرە شارستانیێ دهەلسەنگینت و تایبەتمەندیێن شارستانیێ ب خۆ دگرت، بێگومان كارتێكرنەكا مەزن یا هەی ل سەر جڤاكی ژ لایێ هزری و رەوشەنبیری، ژ بەر كو هەستا مرۆڤایەتیێ رێكدخیت و پێشڤەدبەت بەر ب ئاسۆیێن نوی و تێگەهێ دروست یێ جوانیێ نیشا مە ددەت كو ژ خۆیەتیێ دەردكەڤیت بۆ خۆیەتیێ.
ل دۆر کا وی دڤێت چ پەیامێ د کەڤالێن خوە دا بگەهینتە خەلکی؟ سیروانێ شێوەکار دبێژت: من پەیامەكا دیاركری نینە، یان ئەم دشێین بێژین من چەندین تشت یان ئارمانجێن هەین و من دڤێت برێكا وان هزرەكا نوی ل دۆر هونەری و تێگەهێن جوانیێ بگەهینم، چونكو جوانی ژێدەرێ مروڤاتیێ ب خۆ یە. ب رێكا تێگەهشتنا ڤی تێگەهی دچمە جیهانەكا دی و هەستێن مروڤاتیێ و ئارمانج پشکداركرنا هەستایە ب شێوەكێ گەلەكێ جوان.
ئەزموونەکا هونەری هەیە کو گەلەک پێ داخبار بوویە یان کارتێکرن لێ کر بت؟ سیروان شاکر دبێژت: ئەز ب چەندین قوتابخانە و رێبازێن هونەری داخباربوویمە، لێ ژ هەمیان پتر داخبار بوویمە ب هونەرێن هەڤچەرخ یان رێبازێن هەڤچەرخ، ژ بەر كو تایبەتمەندیەكا خۆیەتی پتر ژ بابەتی هەیە، وەك (سوزان لانجەر) سەركێشا فەلسەفا هەڤچەرخ دبێژیت: (هونەر بابەتەک ب تنێ هونەری یە، نەشێن ب شێوەكێ راستەوخۆ ب واقعی ڤە بهێتە گرێدان)، ئانكو هونەر د خۆیەتیا تە دایە و دڤێت د خۆیەتیا خۆ دا لێ بگەری.
ژ بۆ کو چاوا بۆشاییا ژ دەرڤەیی (الفضاء الخارجي) د ناڤ کارێن خوە دا دبینت و ئەرێ پەیوەندیەک د ناڤبەرا بۆشاییێ و جوانیێ (الفضاء والجمال) دا هەیە؟ شێوەکاری گۆت:
دەمێ بۆشایێ چێ دكەی و جوان دكەی، ئەڤە خۆیەتی وەکهەڤ دکەت ل گەل دیتنێ، هونەر چرکەکە ژ بۆ هشیاری یان هەستكرنا ب تشتەکی یە، بۆشایی رێكەكا گرنگ بوو بۆ گەهشتنا جوانیا راستەقینە یا د سروشتی دا، ئەو سروشتەكی تایبەتە ژ بۆ ئاشوپ و هەستێن من یێن هونەری، و ئەو كەسێ وە ل من كری کو بەر ب ڤی رێبازێ بچم ماموستایێ من (سعدی عباس) بوو، ئەوی تشتەكێ نامۆ د كارێن من دا یێن گرێدایی بۆشایێ ددیت و ل دەسپێكا رێبازا من یا هونەری ئەز هاندام ل سەر ڤێ رێكێ بچم.
ل دۆر چاوانیا هلدبژارتنا رەنگان د تابلۆیێن خوە یێن هونەری دا و ئەوێ پەیوەندیا د ناڤبەرا رەنگان و بۆشاییا ژ دەرڤەیی هەیی سیروان دبێژت: بارا پتر هەلبژارتنا من بۆ رەنگان و دروستكرنا كەڤالەكێ هونەری ب دیالۆكا خۆیەتی گرێدایە، ئانكو پێدڤی ب هزركرنەكا زۆرم، داكو بگەهمە قەناعەتەكا خۆیەتی و جۆرەكێ رەنگان بهەلبژێرم و بڕیارا دووماهیێ ل دۆر بجهئینانا كەڤالێ بدەم، ژبلی چوونا د ناڤ جیهانا ئاشوپی دا و هەمئاهەنگیا رەنگان و پاشی دانانا وان ل سەر قوماشی، ب ڤی شێوەیی ئەركەكێ ب زەحمەت ژ پێخەمەت بجهئینانا کارەكێ دیارکری گەهشتمە ئەنجامدانان.
ئەو چاوا تەکنەلۆژیایێ د کارێن خوە یێن هونەری دا بکاردئینت؟ ئەرێ هندەک تەکنیکێن تایبەت هەنە بووینە جهێ سەرنجراکێشانا وی؟ د ڤی واری دا سیروان یێ شێوەکار دبێژت: دبیت تەكنەلوژیا پیچەكێ ژ من دویر بیت، چونكو من دڤێت هەمی تشتان ب دەستێن خۆ بكەم، ئانكو هەستكرن ب شێوەكێ راستەوخۆ بیت، بێ بكارئینانا فاكتەرێن دەرەكی، لێ هندەك تەكتیكێن گرنگێن هەین و ب تایبەتی ئەگەر د نوی بن بەلێ نە ب هاریكاریا تەكنەلوژیایێ، چونكو هەمی كارێن خۆ ب دەستێ خۆ ئەنجام ددەم، لێ كارێن من یێن دووماهیێ پێدڤی دەمەكێ درێژتر بوون ژ كارێن بەرێ، هەروەسا رەنگی ژی پێدڤی ب هویراتیەکا پترە ژ بەرێ.
ل دۆر کا هەتا نوکە وی چەند پێشانگەهـ ڤەکرینە چ تایبەت یان ژی هەڤپشک و چەند ژ وان ناڤخوەیی و چەند ژ دەرڤە بووینە؟ هونەرمەندێ شێوەکار گۆت: من گەلەك پێشانگەهێن هونەری یێن كەسایەتی یێن ڤەكرین كو نیزیكی 21 پێشانگەهانە ل دەڤەرێن جودا: دهۆك، سلێمانی، هەولێر، ئەلمانیا، جورجیا، دانیمارك، ئەمریكا. هەروەسا یێن هەڤپشک ژی من پشكداری د پتر ژ 100 پێشانگەهان دا ل دهۆك، هەولێر، بەغدا، سلێمانی، ئەلمانیا، دانیمارك، سویسرا، یابان، چین، كوریا باشور، ئیران و توركیا د ناڤبەرا سالێن (1992-2025) دا كریە.
ژیانناما سیروان شاكر رشید
– ژ دایكبوون: 1968 باژێرێ ئاكرێ – دهۆك.
– بارێ خێزانی: خێزاندارە و سێ زارۆك هەنە.
– دەرچوویێ كۆلیژا هونەرێن جوان – زانكۆیا بەغدا 1994 پشكا هونەرێن شێوەكاری – بەشێ وێنەكێشان.
– پێشانگەهێن كەسایەتی 1994- 2023:
21 پێشانگەهێن كەسایەتی ل دهۆك، هەولێر، سلێمانی، جورجیا، دانیمارك، ئەمریكا، ئەلمانیا.
– پێشانگەهێن هەڤپشك 1994- 2025:
پتر ژ 100 پێشانگەهێن هەڤپشك: دهۆك، هەولێر، بەغدا، سلێمانی، توركیا، ئیران، ئیمارات، سویسرا، كوریا باشور، چین، یابان، دانیمارك، ئەلمانیا.
– كارێن نوكە:
- ماموستا ل پەیمانگەها هونەرێن جوان – دهۆك.
- ماموستا ل زانكویا نەورۆز – دهۆك.
- گرێبەست د گەل زانكۆیا دهۆك – دهۆك.
- سەروكێ گروپێ هونەرێ هەڤچەرخ.
كارێن پێشتر ئەنجامداین:
- گرێبەست د گەل زانكۆیا جیهان (2015-2021).
- سەرنڤیسەرێ گۆڤارا هونەر (2005- 2011).
- ماموستا ل رێكخراوا (UNDP) (2017-2018).
- شیرتكار ل رێكخراوا دیاكونیا سویدی (2007-2009).
- سەروكێ پشكا هونەرێن شێوەكاری ل پەیمانگەها هونەرێن جوان د ناڤبەرا سالێن (1999-2014).
- هاریكارێ رێڤەبەرێ پەیمانگەها هونەرێن جوان – دهۆك (2014-2023).
ئەندامەتی:
- ئەندامێ سەندیكا هونەرمەندێن كوردستانێ و ئێك ژ دامەزرێنەرێن وێ (2000).
- ئەندامێ سەندیكا رۆژنامەڤانێن كوردستانێ.
