ل سالا 1934 ل برۆکسل (بەلجیکا) ژ دایک بوویە لێ د بنەرەت دا فرەنسی یە و ژ خێزانەکا ئەرمەنی بوویە.

پسپۆر بوویە د بوارێن: جوگرافیناسیا سیاسی، نڤیسەر، هۆزانڤان، و شەهرەزا د بیاڤێ جیوپۆلەتیکێ دا.

جێرارد شالیان ئێکە ژ کەسایەتیێن دیار یێن ئەورۆپی د بیاڤێ شەرێن پارتیزانی و بزاڤێن ئازادیخواز د جیهانێ دا. وی ب  سالان ژیانا مەیدانی و ڤەکۆلین ل دەڤەرێن کو قەیران تێدا هەین کرینە وەك ڤیەتنام، فەلەستین، ئەریتریا، ئەفغانستان و کوردستانێ.

د سالێن 1970 دا، بۆ دەمەکی هاتبوو کوردستانا عێراقێ و ژ نێزیک ل گەل پێشمەرگە و سەرکردەیێن بزاڤا کورد گۆتوبێژ کرن. هەر ئەو ئەزموون بوونە ئیلهام و نیگاهـ بۆ نڤیسینا پەرتووكا وی یا ناڤدار «,1980 A People Without a Country » (گەلێن بێ وەلات)،  د ڤێ پەرتووکێ دا، شالیان ب هزر و تێگەهشتنەکا مەیدانی و شیکاری، دیرۆک و خەباتا کوردان ژ سەردەمێ عوسمانیان هەتا دویماهیا سەدسالا بیستێ ڤەکۆلین کرینە. هەر دیسان ژ هەژی گۆتنێ یە کو پەرتووکەکا دی ژی ب زمانێ فرەنسی ل سەر کوردان نڤیسییە بناڤێ: (Les Kurdes et le Kurdistan,1979: کورد و کوردستان) زیدەباری چەندین گۆتار و ڤەکولینێن دی کو ل سەر پرسا کوردان ئەنجام داینە.

ل سالێن  1970دا بۆ دەمەکی، ل دەڤەرێن کوردنشینێن عێراقێ ژیایە و ل گەل پێشمەرگەیان  چاڤپێکەفتن و دیدار کرینە و ل گەل وان بوویە، لەوما ڕاپۆرتێن وی نە ب تنێ تیۆری نە بەلکو بەرهەمێ ئەزموونا ڕاستەوخۆ یا مەیدانی نە. 

هەروەسا ئەو وەکو مامۆستا هاتییە داخوازکرن بۆ زانکۆیێن مەزنێن فەڕەنسا و ئەمریکا و گەلەك گۆتار ل دۆر جیوپۆلەتیکێ، ستراتیژییا لەشکری و نەتەوەیێن بێ دەولەت پێشکێش کرینە.

شالیان د وێ باوەرێ دا بوو کو هێزێن جیهانی د سەد سالێن بیستێ دا ب سیاسەتێن خۆ یێن کۆلۆنیالی، نەتەوەیێن وەك کوردان بێ وەلات و بێ دەستهەلات هێلاینە. 

ئەڤ دۆستێ کوردان ل ٢٠ێ تەباخا ئەڤ سالە  ئانکو ٢٠٢٥ێ وەغەرا دویماهیێ کر و پتر ژ ٢٠ پەرتووک و هەژمارەکا مەزن یا ڤەکۆلینان ل پشت خۆ هێلان.