فیلیپ جی. کرایینبرۆک ژدایکبوویێ ١٩٤٨ێ یە، ئەکادیمییەکێ هۆلەندییە و تایبەتەمەندە د ڤەکۆلینێن ئێرانی (ئێرانناسی) دا. ل درێژاهییا کارێ خۆ یێ ئەکادیمی، چەندین پەرتووک و گۆتار ل سەر نەریت و کەلتوور کوردی بەلاڤکرینە.

کرایینبرۆک ل سالێن ١٩٦٦ – ١٩٧٠ێ ل زانکۆیا ئەمستەردام دەست ب خواندنا زمانێن فارسی، عەرەبی و تورکی کر. پشتی هنگی ل سالا ١٩٧٢ێ ل زانکۆیا ئۆترێخت Utrecht باوەرنامەیا ماستەر (MSc) د ڤەکۆلینێن ئێرانی دا وەرگرت. ژ بۆ بەردەوامیدانێ ب خواندنا خۆ، ل سالێن ١٩٧٢ – ١٩٧٣ێ پەیوەندی ب قوتابخانەیا خواندنێن رۆژهەلاتی و ئەفریقی (SOAS)  ل زانکۆیا لەندەن ڤە کر. ل سالا ١٩٨٢ێ باوەرنامەیا دکتۆرایێ ژ زانکۆیا لایدن Leiden University یا هولەندی وەرگرت.

ل زانکۆیا ئۆترێخت وانە ل سەر ڤەکۆلینێن ئێرانی گۆتینە و ل سالا ١٩٨٥ بوو ب مامۆستایێ پایەبلند (Senior Lecturer) د هەمان بیاڤ دا ل وێ زانکۆیێ.

کرایینبرۆک د ناڤبەرا سالێن ١٩٨٨ – ١٩٩٣و ژبەر حەزا وی یا مەزن بۆ زمان و کەلتوورێ کوردی ل قوتابخانەیا (SOAS) ل لەندەن دەست ب گۆتنا وانەیان ل سەر کوردۆلۆجیێ کر. ل سالا ١٩٩٠ێ سەرنج و حەزا وی چوو سەر نەریت و کەلتوورێ ئێزیدییان. ل سالا ١٩٩٢ێ ب گەشتەکێ هاتە هەرێما کوردستانێ و پەیوەندیێن باش ل گەل کەسایەتی وو رۆشەنبیرێن کوردێن ئێزیدی دروست کرن. ل سالا ١٩٩٦ێ  وەکوو پرۆفیسۆرێ ڤەکۆلینێن ئێرانی ل زانکۆیا گۆتینگن (Göttingen)  ل ئەلمانیا دەست ب کار بوو. ل سالا ٢٠١٦ێ  ژ کارێ خۆ یێ فەرمی ل زانکۆیا گۆتینگن خانەنشین بوو.

ژ بەرهەمێن وی یێن گرنگ پەرتووکا «The Kurds: A Contemporary Overview» (کورد: نێرینەکا گشتی یا هەڤچەرخ) کو ئێکە ژ ژێدەرێن ئەکادیمی یێن گرنگ د بوارێ کوردناسیێ دا، کو ژ لایێ پرۆفیسۆر فیلیپ جی. کرایینبرۆک Philip G. Kreyenbroek و ستیفان سپێرل Stefan Sperl  ڤە ل سالا ١٩٩٢ێ هاتییە بەرهەڤکرن و بەلاڤکرن.

ئەڤ پەرتووکە کۆمەکا گۆتارێن ئەکادیمی یێن جودا جودا ب خۆ ڤە دگریت کو تێدا رەوشا کوردان د سەدێ بیستێ دا بەرچاڤ دکەت.

تەوەرێن سەرەکی یێن پەرتووکێ:

کەلتوور و زمان و ناسنامە: کرایینبرۆک د ڤێ پەرتووکێ دا گرنگییەکا تایبەت ب دەولەمەندییا زمانێ کوردی و شێوەزارێن وی یێن جۆدا ددەت و ب دیرۆک و ئەدەبیاتا زارەکی یا کوردی ددەت کو چاوا ئەڤ فاکتەرە بویینە پارێزەرێن ناسنامەیا نەتەوەیی یا کوردی.

رەوشا سیاسی و جوگرافی: پەرتووک ب هویربینی بەحسێ دابەشبوونا کوردستانێ ل سەر دەولەتێن (تورکیا، عێراق، ئێران، و سووریا) دکەت و سەرەدەری و سیاسەتێن ڤان دەولەتان هەمبەر دۆزا کوردی د هەلسەنگینیت.

ئایین و پێکهاتە: (کو پسپۆریا سەرەکی یا کرایینبرۆکی خۆ ب خۆیە) د ناڤ پەرتووکێ دا گرنگییا هەبوونا فرەهییا ئایینی د جڤاکێ کوردی دا هاتییە دان بەحسکرن، ب تایبەت رەوشا کوردێن ئێزیدی و ئەهلێ حەق (یارسانی) و نەریتێن وان یێن جڤاکی.

دیرۆکا هەڤچەرخ: پەرتووک ل سالێن دەستپێکێ یێن نۆتان هاتییە بەلاڤکرن، کو د وی دەمی دا هەرێما کوردستانێ د قۆناغەکا هەستیار دا بوو (پشتی کۆچا ملیۆنی یا سالا ١٩٩١ و دامەزراندنا دەڤەرا دژە-فڕینێ)، وێ چەندێ ب گۆڕانکاریێن گرنگ د هەژمێریت.

گرنگیا پەرتووکێ:

ئەڤ بەرهەمە بۆ خواندەڤان و ڤەکۆلەرێن رۆژئاوایی ل وی سەردەمی ببوو دەروازەکێ زانستی یێ بێلایەن بۆ تێگەهشتنا ئاریشە و دۆزا گەلێ کورد، نەک ب تنێ ژ لایێ سیاسی ڤە، بەلکو ژ لایێ مرۆڤناسی Anthropology، کەلتووری و جڤاکی ڤە ژی.