چیرۆکا هندەک دەقان و دەنگڤەدانا وان ب نڤیسین و بەلاڤکرنێ ب دویماهی ناهێت، بەلکو پشتی بۆرینا سالێن دویر و درێژ ژ نوی جارەکا دی داڤێن وێ دگەهنە ئێک و وێنە کاملان دبیت. بەری بیست و هەشت سالان، دەمێ ئەز قوتابیێ زانکۆیێ و د دەستپێکێن کارێ خۆ یێ ئەدەبی دا، وەکو شاگردەکێ ژ نوی بابەتێن رێباز و میتۆدێن رەخنەیی ل زانکۆیێ خواندین و سەرقەلەمکێن رەخنەیا دەروونی و ئینتیباعی وەرگرتین، من گۆتارەکا رەخنەیی ل دۆر هەلبەستێن رەحمەتی سەلمان کۆڤلی نڤیسی و ب بۆرینا سالان من هزر کر ئەو بەرپەڕ هاتە قولپاندن و چیرۆک ب دویماهی هات. لێ رێکەفتەکا درەنگ و نەچاڤەرێکری ژ نوی تمامەتیا ڤێ چیرۆکێ ل گەل بەرسڤەکا نەبەلاڤکریا کۆڤلی ئێخستە بەرچاڤێن من، کو دیارە ب درێژاهیا ڤان هەمی سالان ئەو بەرسڤ وەکو بەرپەڕەکێ ڤەشارتی مابوو د قۆقلکا دارێ دا!

پائیزا سالا 2008ێ بوو، دەمێ کۆڤارا پەیڤ یا ئێکەتیا نڤیسەرێن کورد – تایێ دهۆکێ د هژمارە 9 دا گۆتارەکا من یا رەخنەیی ل ژێر ناڤونیشانێن «دۆلار، سەلمان کوڤلی، دۆلار» ل بەرپەرێن خۆ هەمبێز کری. هینگێ ئەو جارا دویێ بوو کۆڤارا پەیڤ دەرگەهێن خۆ بۆ من ڤەدکەت و گۆتارێن من بەلاڤ دکەت. بەری هینگێ من گۆتارەکا رەخنەیی ل سەر شرۆڤەکارێن مەم و زینێ نڤیسی بوو (ئەمینێ ئۆسمان، پەرویزێ جیهانی، و هەژارێ موکریانی). ب راستی ژی ئەو گۆتار ژ دەستپێکێن نڤیسینێن من یێن رەخنەیی بوون و پتر خوینگەرمیا قوتابیەکێ زانکۆیێ پێڤە دیار دبوو، کو حەز دکر دەنگێ خۆ یێ رەخنەیێ تاقی بکەت، نەکو بەرهەمێ رەخنەگرەکێ سەرسپی و خودان سەربۆر بوو!

د وێ گۆتارێ دا من رۆناهی ئێخست بوو سەر حەفت هەلبەستێن کۆڤلی، یێن کو تێدا ب رەنگەکێ ئاشکرا بەحسێ «دۆلار»ی کرین و ئەڤ بابەتە ئازراندی. هینگێ من بزاڤ کر ڤێ دوبارەکرنێ ب ئاوایەکێ دەروونی و ب رەنگەکێ ئینتیباعی بخوینم و من گرێدانەک د ناڤبەرا هەبوونا ڤێ پەیڤێ (دۆلار) و هندەک ئالۆزیێن جڤاکی و ئابۆری یێن وی سەردەمی دا چێکر، بەلکو ئەز وێڤەتر چووم و من وەسا دانا کو ب ڤێ رێکێ ناخێ هەلبەستڤانی یان هەلویستێ وی یێ دەروونی د گاڤێن هەژیانا شعری دا دیار دبیت. ئەڤرۆ و پشتی بۆرینا ڤان هەمی سالان، ئەز وێ بزاڤێ وەک ئەزموونەکا گەنج دبینم، کو رەنگە هندەک دژواری تێدا دیار بیت، لێ ل گەل ژیێ نڤیسەری و زمانێ رەخنەیا وی سەردەمی دگونجیا.

هینگێ من نەدزانی هەلبەستڤانی بەرسڤەک ل دۆر وێ گۆتارێ نڤیسی بوو و وەکو دەستخەت مابوو نەبەلاڤکری، هەتا ڤێ دویماهیێ من ئەو دەستخەت د پاشکۆیێ نامەیەکا ماستەرێ دا دیتی، کو ماستەرنامە ل دۆر هەلبەستڤان سەلمان کۆڤلی بوو. ب راستی، پشتی ڤان سالێن دویر و درێژ دەمێ چاڤێ من ب ڤێ دەستخەتێ کەتی، من سەحنەکرێ وەکو ب تنێ بەرسڤەک بیت ژ هەلبەستڤانەکی بۆ گۆتارا قوتابیەکی؛ بەلکو من وەکو بەلگەنامەیەکێ لێ نێری کو ژ بیردانکا رەوشەنبیری یا باژێرێ دهۆکێ زای. تێدا سروشتێ پەیوەندیا د ناڤبەرا بەرەبابەکێ گەنج دا دیار دبیت یێ کو ئالاڤێن خۆ یێن رەخنەیی تاقی دکرن، و هەلبەستڤانەکێ خودان ناڤ و پێگەهـ کو بەرەڤانی ژ ئەزموون و دیتنا خۆ دکر د چارچووڤەیەکێ رەوشەنبیریێ هەستیارێ هینگێ دا.

ئەڤ دەستنڤیسا کۆڤلی تێگەهشتنا وی یا وێ گاڤێ نیشان ددەت کو رەنگە ب ئاوایەکێ دژوار ژی هاتبیتە دەرەهیکرن و هزر دکەت «دەستەکێ دەرەکی» ل پشت نڤیسینا من هەیە! لێ ئەڤرۆ هەر ب ئەرک دبینم وێ دەستخەتێ بەلاڤ بکەم. ئەو ژی نە ژبۆ ڤەژاندنا بگرەوڤەکێشەکا کەڤن و نە ژی بۆ بەرەڤانیکرنێ ژ گۆتارەکا خۆ یا دێرین، بەلکو بۆ پاراستنا بیردانکا مە یا رەوشەنبیری. ب باوەریا من ئەڤ جۆرە بەلگەنامەیە تشتەکی ل دۆر سروشتێ رەخنەیا کوردی و هەستیاریا هەلبەستڤانان و ئالۆزیا پەیوەندیا د ناڤبەرا دەق و دەوروبەرێن وی یێن جڤاکی دا ل وی سەردەمی بۆ مە ئاشکرا دکەت، ئەڤە ب دیتنا من گەلەک گرنگە.

هێژای گۆتنێ یە بێژم، دیدارا من یا ئێکێ ل گەل هەلبەستڤانی دو سالەکان بەری وێ گۆتارێ بوو، ئانکو سالا 1996ێ؛ دەمێ من هەلبەستا خۆ «دو بەرپەرک ژ دەفتەرکا خەباتکەرەکی» نیشا رەحمەتی دای و بۆ من هەلسەنگاندی، پاشی دیوانا خۆ «جیهانا گوها» ب دياری پێشکێشی من کری و ئەز هاندایم کو بەردەوام بنڤیسم. وی ب دەستێ خۆ ئەڤ تێبینیا پۆزەتیڤ بۆ من نڤیسی: «هەر بژی و سەرکەفتی بی، بەردەوامیێ ب خواندن و نڤيسینێ بدە، بێ شک پاشەرۆژێ دێ بیە هەلبەستڤانەکێ بەرکەتی. ل گەل سلاڤان». هینگێ ژی ب راستی، ژ کەیفان دا، دا کەوەک ب پەر ڤە چیتە د دەڤێ من دا، نوکە ژی ب شانازی ڤە من ئەو هەلبەست ب وێ تێبینیا بەری 30 سالان ڤە ل نک خۆ پاراستیە. من ئەڤە گۆت، نەکو دا هەڤبەرکرنێ دناڤبەرا دو هەلویستان دا بکەم، بەلکو بۆ بەرچاڤکرن و تەمامکرنا وێنەیێ وێ پەیوەندیا دناڤبەرا دو بەرەبابان دا د دو گاڤێن جودا دا. یا ژهەمیێ گرنگتر ژی، دا وی بەرپەرێ ڤەشارتی ژ بیردانکا مە یا ئەدەبی و رەوشەنبیری بدانمە بەر دەستێ خواندەڤانان.

ئەڤە ژی دەقێ بەرسڤا کۆڤلی یە وەکو دەستخەت هاتیە نڤیسین، ب هندەک راستڤەکرنێن زمانڤانیێن سڤک ڤە، بێی کو دەستکاری د ناڤەرۆکێ دا بهێتە کرن.

هەکە هەمی چویچکان هژیر خواربان، چو بۆ پاسییان نەدمان

پێشەکی:

زانایێن دەروونی پەیڤەکێ بکاردئینن دبێژنێ (الاسقاط)، ئانکو پالدانا گونەهـ و کارێن نەهەژی و کریار و گۆتنێن لەنگێن خۆ بال خەلکەکی ڤە. د کوردەواریێ ژی دا ب دەهان پەند و گۆتنێن مەزنان ل سەر وان کەسێن ژ خۆ ب شک هەنە: (مێمێ یا دلێ خۆ ئەز دبێمێ) و هەنە (دیکل د پاخلێ دا) و هەنە (نە ل گۆڤەندێ، پێ ل سەمایێ)! هەنە ژی (ب مالا داوەتێ ناکەڤن و کاچکێن خۆ هلدگرن).

هەر چەوا بیت (یێ زلی د چاڤێ هەڤالێ خۆ را دبینیت و گێسنی نەبینیت د چاڤێ خۆ را) و (یێ خانیێ وی شویشە بیت، بەرا ناهاڤێتە خانیێن خەلکی)، دو پەندێن گرنگن بۆ بابەتێ من، کو پەندا ئێکێ یا کوردی یە، یا دویێ د بنیات دا فەرەنسی یە، مە ژی وەکو مللەتێن دی وەرگرتیە و بکارئینایە.

هەردو پەند سەد دەر سەد ژ خودانێ بابەتێ (دۆلار، سەلمان کوڤلی، دۆلار) یێ د کۆڤارا پەیڤ هژمار 9 دا بەلاڤبووی دگرن. بەلێ ژبەری ئەز بچمە سەر وێ نڤیسینێ یا کو ب هزرا خودانی (رەخنە)!، و ب هزرا خودانێن کۆڤارێ (سەرنڤیسەر و دەستەکا نڤیسینێ) بابەتەکێ هەژی بەلاڤکرنێ و ل بن سیبەرا ئازادیا دەربرینێ و هزر و بیران هاتیە پەسەندکرن! من دڤێت سەرهاتیەکا کورت بۆ وێ دەستەکا هێژا ڤەگێرم داکو رۆلێ خۆ جارەک دی (بۆ خاترا خاترا) ژبیر نەکەن و بزانن ئەڤرۆ سەلمان کۆڤلی، سوبەهی ئەو! ژ بەر کو بێ بەخت و بێ مروەت دێ هەر هەبن.

دو سەرهاتیێن گرنگ، قەت ژ بیرا من ناچن

گرنگیا وان ژی یا د هندێ را کو سنج (اخلاق) ب بلندی دهێتە بەرچاڤ. هەرچەندە دڤیا ل پێش نهو هاتبانە گۆتن. بەلێ وە دیارە تشت زوی ژ بیرا مرۆڤی دچن، هینگێ دهێنە بیرێ دەمێ (ڤێ دکەڤن مەترەق). هەردو سەرهاتی ئەڤەنە:

١. هۆزانڤان (هزرڤان) بابەتەکێ رەخنەیی ل بن ناڤێ (ئالۆزی ل نک سەلمان کۆڤلی) د رۆژنامەیا بزاڤ دا بەلاڤکر. ئەدیب و هۆزانڤانێ ب راستی ئەدیب و هۆزانڤان (عبدالرحمن مزوری) گەلەک پێ نەخۆش بوو، خۆ ل وی برادەری توورە کر و گۆتێ تو چو ژ رەخنێ نزانی، ئەڤە ژی توهمەتن تە ب نڤیسەرەکێ پاقژ و خۆراگر ڤە ناین. ئەڤ سەرهاتیە برایێ هۆزانڤان (هزرڤان)ی ب خۆ بۆ من ڤەگێرا بوو.

٢. دناڤبەرا سەیدایێ ئەدیب و نڤیسەر (رەشید فندی) و هۆزانڤانێ ب راستی هۆزانڤان (عبدالرحمن مزوری) رەخنەکا دژوار دهاتەکرن ل سەر بەرپەرێن رۆژنامەیا (هاوکاری). ئەز یێ حازر، برادەرەکی ڤیا بۆ سەیدایێ (رشید فندی) خۆ حولی کەت و تەمەلوقێ بکەت، گۆت (مزوری تشتەکی نزانیت، سەرگەرمەکێ مەغروورە، هۆزانێن وی هەمی ددزینە). سەیدایێ (رەشید فندی) لێ ڤەگێرا و گۆتێ (راستە ئەو یێ ژ من سلە، بەلێ هەر هەڤال و برایە، هۆزانڤانەکێ باشە و رەوشەنبیرەکێ کوردێ ب ناڤودەنگە).

ب راستی ئەڤە سنج و رەوشتێ هەر ئەدیب و نڤیسەرەکییە، یێ باوەری ب ناما خۆ هەی، یێ قەلەمێ وی بۆ مللەتێ وی و رەوشەنبیریا مللەتی وی چیرچیرێ دکەت. کانێ ئەو هەردو (موقف)، کانێ ئەوا دەستەکا کۆڤارا (پەیڤ) وەرگرتی بەرامبەر درەو و توهمەتێن ئێکێ نەتێ و نەژێ، یێ دویر ژ ئەدەبی و ئەدیباتیێ، یێ چار پەیڤ لێکداین و ل بن ناڤێ رەخنێ ل کۆڤارا ژێگۆتی بەلاڤکری؟! کانێ هەلویستێ سەیدایێ (رەشید فندی) بەرامبەر نڤیسەرکێ ب هەمی شیانێن خۆ بزاڤێ دکەت بەلگە و گرۆڤەیان بینیت، کو سەیدایێ رەشید یێ خەلەتە و ئەو یێ راستە؟! کانێ هەلویستێ سەیدایێ (عبدالرحمن مزوری) یێ پێ نەخۆش بووی درەو و توهمەت ب دویڤ ئەدیبەکێ کورد ڤە بێنە کرن؟!

من ئەڤ پسیارە ژ ئێک ژ وان برایێن ئەو بابەت پەسەندکری کر، بەرسڤا وی ئەو بوو (من چەند رێزەکێن سەری ب تنێ خواندن)! و یا راست، وان برایێن هێژا – وەکو دیار- ئەو بابەت نەخواندیە، بەلێ (ل سەر خاترا خاترا) یێ هاتیە پەسەندکرن.

هەرچەندە درەوێن دنیایێ هەمیێ نەشێن وێ راستیێ ڤەشێرن کو ئەو دەلیڤەیێن خودانێ ڤێ نڤیسینێ رەتکرین خۆزیا خودانێن وان درەوان بۆ دهاتە خوار و دیوانا (جیهانا گوها) کو تلا ئێکێ راستگۆیە د ناڤچاڤێن هەژۆک و خودانێن بەرژەوەندیان را، دێ مینیت دەنگێ راستەقینەیێ هەژار و بەلنگازێن مللەتێ مە و مۆرا رەشا ب ناڤچاڤێن بەرپرس و دەستهەلاتدارێن مللەت ژبیرکری ڤە.

کریە دۆلارحەبین:

برادەری ڤیایە بدەتە سەلماندن کو (خودانێ دیوانا جیهانا گوها) دۆلار ب دەستنەکەتیە، لەوانەکێ یێ د خەونێن خۆ دا دیتی، ژ بەر ناڤێ وی یێ ئینای، یا ژبیرکری کو ئەو دیوان دەنگێ راستەقینەیێ هەر کوردەکێ خۆراگر و دلسۆزە، ئامیرێ ریسواکرن و رویسکرنا دۆلار و کورسی حەبینایە، لەعنەتا هەژار و برسی و رویسایە ل دەولەمەند و کەتخۆر و دزیکەر و بەرپرس و دەستهەلاتدارێن بێ دل و بێ مروەت و بێ شەرم یێن ل بەرچاڤێن برسیان تەلیسێن دۆلاری دادگرتن، شەڤێن سۆر دبۆراندن، تەلار ئاڤا دکرن و ترومبێلێن ئاخر مۆدێل دکرین.

یا ژبیرکری، ئەو ئامیرێ من کریە پێلاڤ، هەژی سەرێ موستەحەقان دیتی، من یێ ژ خەون و حەزێن وان ئینایەدەر، کریە تف و بەردایە رویێ وان کەسێن مللەتێ هەژار و بەلنگاز ژبیرکری، خەبات و خوینا شەهیدێن مللەتی گوهارتین ب وی ئامیری.

یا ژبیرکری، من ئەو ئامیر یێ کریە (گۆلک) و ئەوێن بدویڤکەتین یێن کرینە (سامری)، کو هەر گۆلکپەرێسەک ژ قەسر و تەلار و ترومبێل و خۆشیێن تێدا بێتە نیاسین، تنێ (سامری)یان پێ نەخۆشە ب وی شێوەی بهێنە ناساندن و رسواکرن، چونکو ناڤونیشانێن وان من وەسا یێن ئاشکراکرین، کۆرە ژی ڤێ بکەڤن.

بيرئینانەک:

برادەر و ئەوێن ئەو پالدای باش دزانن کو یێ چو توخیب بۆ رەخنەیا خۆ نەداناین و خۆ ژ چو ئاستان نەدایە پاش و ژێ نەترسیای، ژ سەرکردایەتیا بزاڤا رزگاریخوازا مللەتی، ئەندامێن مەکتەبا سیاسی و وەزیران و لق و مەلبەند و بەرپرسێن حزبی و ئیداری هەتا دەزگەهێن حزبی و حکومی رەخنە لێ گرتی؛ هزر و بیر و بۆچوونێن خۆ بێ ترس و شەرم دیارکرین، ئەڤ کەسە نە پشتگەرمێ بنەمال و خێلا خۆیە، نەژی پشتگەرمێ لایەنەکێ دەستهەلاتدارە، بەلکو پشتگەرمێ راستگۆیی و خۆراگری و دلسۆزیا خۆیە. پشتگەرمێ پاقژیا دل و دەستێن خۆیە. دگەل بەرپرسی و فەراشی ب ئێک زمان و ب ئێک دل، بێی خۆ کێمکرن و بێی مەلاقی دئاخڤیت. نێزیکێن برادەری دزانن ئەو دەلیڤە یێن بۆ من هلکەتین و یێن هاتینە رەتکرن ژ لایێ من ڤە، خۆزیا هندەکان بۆ دهاتە خوار و د خەونێن خۆ دا نەددیتن. ئاها بێمننەتیا من و پشتگەرمیا من ژ ڤێرێ یە، کو ئەڤرۆ ب شانازی ئەز ڤەدگێرم و خۆ پێ سەربلند و بێ مننەت دکەم.

بەلگە و گرۆڤەیێن من هەرسێ دیوانێن من و ئەو بەرهەمێن بەلاڤبووین د کۆڤار و رۆژنامەیێن کوردی یێن ژ بەری سەرهلدانێ و پشتی وێ دانە، ئەو قەسر و قوسیر و ترومبێل و ملک و ئەملاکن ئەوێن من هەین! یان ئەو ناڤمالیە ئەوا چاڤێن حەسویدان پێ نەرابن!

 بۆچی بەرسڤ:

ب راستی بابەتێ برادەری یێ دویر ژ رەخنا ئەدەبی، نە ل وی ئاستیە پێدڤی بەرسڤێ بیت، بەلێ ژبەرکو بابەت یێ ل کۆڤارەکێ بەلاڤبووی، نەکو ب تنێ ل دهۆکێ دهێتە خواندن، بەلکو ل (سوریا) و (ئەوروپا) ژی، و خواندەڤایێ وان وەلاتان (کۆڤلی) ژ نێزیک نانیاسن، نە دویرە بابەتێ ژێ گۆتی سەرنجا هندەکان راکێشیت، هزرەکا خراب ژ خودانێ (وەرنە ئەڤینێ – جیهانا گوها – و دەمێ چوارگۆشە) بکەن، ژ بەر هندێ من بریارا بەرسڤدانا وی برادەری دا.

کێ برادەر پالدایە

چەند پەیڤەکێن مامۆستایێ هێژا و قەدرگران (ئەمینێ ئوسمان) ڤی برادەری د نڤیسینا خۆ دا ڤەگێراینە مینا (دەلنگهلدان – طلهلدان – .. هتد) ئەڤ پەیڤە ل ناڤ ئەدیب و نڤیسەران دبەلاڤن، نە ل زانکۆیێ، نەژی ل چو جهێن دی. ژ بەر هندێ دیارە برادەری ب شیرەت بابەت نڤیسیە، شیرەتکاری ئەو پەیڤ ژێرا گۆتینە. پشتراستیا من ژ ڤێ گۆتنێ ئەوە برادەر رۆژەکێ ژ رۆژان نەهاتیە دیوانا ئەدیب و نڤیسەران، رۆژەکێ ژی دگەل ئەدیبەکی یان هۆزانڤانەکێ ناسیار نەهاتیە دیتن. یا ژ هەمیان گرنگتر ئەوە، برادەری ژ (محاضرة)کا سەیدایێ خۆ یێ زانکۆیێ پێڤەتر نەدیتیە، ب ژیێ خۆ ڤە یێ بچویکە و یێ ل دەستپێکێ.

نزانیت بەرپرسیاریا نڤیسەری چەندا مەزنە، هەر پەیڤەک ل سەر دهێتە هژمارتن. نەخاسمە دەمێ یازدە هۆزانان یێن ژ بەری سالا 1992 هاتینە نڤیسین دکەتە (ب تنێ ئێک) و دەهێن دی دادعویریت، دەمێ دبێژیت (ئەگەر تەماشای بەرهەمێ وی یێ دویماهیێ بکەین (جیهانا گوها) ئەڤ راستیە دێ باش بۆ مە خۆیا بیت، کو بەرهەمەکێ پێکهاتیە ژ کۆمەکا هۆزانان، تێدا حەفت هۆزان دگرێداینە ب دۆلاری ڤە – ب رەنگەکی یان یێ دی- ئەڤە ژی ب راستی نە تشتەکێ کێمە. ب تنێ بۆ زانین، هۆزانەک تێ نەبیت، یێن دی هەمی د ناڤبەرا سالێن 92 هەتا 95 دا هاتینە ڤەهاندن. کو دیارە یێ ب ڤی رەنگی دیوان خواندبیت، یێ یازدە هۆزانان دکەتە ئێکا ب تنێ! دێ خودانێ خۆ بەختێ گەور بیت یێ بابەت پێ نڤیسی!

لەورا ئەز ژ دل ئاخینکا بۆ وی ئەدیب و هۆزانڤانی رادهێلم یێ جهێ وی مایە ڤالا، کو ل بیرهاتنێن هوسا دبیتە مێڤانێ قەدرگران و هێژایێ بیرهاتنێن من، و سەرهاتیا کچکا برایێ وێ بوویە موختارێ گوندی دهینتە بیرا من.

ئەگەرێن نڤیسینا بابەتێ ژێ گۆتی

ب هزرا من، چەند ئەگەرەک هەنە بووینە پالدەرێ وی برادەری، ژ وان:

١. وەک (رد الجمیل): ژ بەر کو بەری پتر ژ دو سالان، وی قەستا من کریە دا هۆزانێن وی بهەلسەنگینم، کێش و سەروایان نیشا بدەم. من ژی ل دویڤ شیانێن خۆ تەخسیری نەکر و دانەیەکا دیوانا (جیهانا گوها) بۆ کرە دیاری.

٢. بۆ شکاندنا وێنەیێ هۆزانڤانەکێ شیای خۆ راگریت، خودانێ بیروبۆچوونێن خۆ بیت، نە هڕوبا، نە بەرژەوەندی، نە لێشداندن نەشیابنێ، د سەردەمەکی دا هەمی تشت بووینە متایێ فرۆشتنێ ل نک خەلکەکی هەتا بیروباوەر و خوها ئەنیێ و رویمەتێ.

٣. بێژیتە بەرپرسان، دەولەمەندان، دەستهەلاتداران، ڤی هۆزانڤانی چو د وە نەهێلایە، هۆزانێن وی هەمی جڤین و نەفرەت و لەعنەتن بۆ قەسر و تەلارێن وە، بۆ ترومبێلێن وە، بۆ نەخۆراگری و هەژۆکیا وە. ژ بەر کو هوین ژ مژویلی نەشیاینە هۆزانێن وی بخوینن، ئەڤە من پێشوەڤە خواندن، یا مای هوین دزانن!

٤. ژ بەر کو وی ژ نێزیک پەیوەندیا ب دۆلاری ڤە هەی، ئانکو هزرکریە ئەڤ هۆزانە ب رەنگەکی نە یێ دی ژ وی ژی دگرن.

و ب هزرا من (مربط الفرس) خالێن (٣-٤)ن.