مسته‌فا بارزانی؛ ناڤه‌که‌ کو روح و هێزا قووناغه‌کا چاره‌نڤیسساز ب خۆ ڤه‌ دگریت. ئەوی، بۆ مه‌ و بۆ هه‌ر که‌سه‌کێ کو تێهنیێ ماف و دادپه‌روه‌ریێ بیت، مێژوو به‌ر ب کنارێن ڕۆناھیێ ڤە بر. بارزانی ئاراسته‌یا مێژوویێ ل ستەمکاران تێکدا و سه‌لماند کو ماف و پێداگری ل سه‌ر مافی، نه‌ سازش ل سه‌ر دهێته‌کرن و نه‌ پاشڤه‌کێشان ژێ دهێته‌کرن.

چارده‌ی ئادارێ ل ده‌ف مه ‌یێن دویکه‌فتیێن ڕێبازا بارزانی، نه‌ ب تنێ سه‌رهاتییا زه‌لامه‌کی یه‌، به‌لکو ڕۆژا ژیانەڤه‌یا وی زاتی یه‌ یێ کو هشیارییا نه‌ته‌وەیی ل ده‌ف کوردێن هه‌ر چار پارچەیان سه‌رژنوی دارشتییەڤه‌. وی هه‌ر ژ گه‌نجاتییا خۆ، ب هه‌سته‌کا کویرا پڕی به‌رپرسیاره‌تی، مه‌یدانا خه‌باتێ ئاڤا کر. بارزانی میراتگرێ بنه‌مالەکێ بوو کو رهـ و ریشالێن وان د زانستی و تێکۆشانێ دا چووبوونەخوار؛ بنه‌مالە‌ک کو نه‌ڤی ل دویڤ نه‌ڤی، بوونه‌ قوربانی تاکو نه‌ته‌وه‌یه‌کی د ناڤ وێرانه‌یێن بێده‌نگیێ و قەید و به‌ندێن داگیرکه‌ران و به‌رژە‌وه‌ندییێن چاڤبرسییان دا، ڕاستڤە که‌ن‌.

مسته‌فا بارزانی، ئه‌و گه‌نجێ چاڤنه‌ترس بوو کو ب تنێ ب هەڤکارییا کۆمەکا مێرخاسێن جانفیدا، به‌رسینگێ سوپایێ ستەمکارێ حکوومه‌تێن ئێك ل دویڤ ئێکێن ئیراقێ گرت کو دڤیان ب هێزا ئاگر و ئاسنی، ئاخا مە داگیر بکەن و خه‌لکێ مه‌ بکەنە کۆیله‌. وی، (بارزان) کره‌ کەلهەکا موکوما خۆڕاگریێ و ڕەت کر کو ملکەچی فه‌رمانێن وان کەسان بت یێن کو ژ خواست و ئازارێن گه‌لێ کورد بێئاگەهـ بوون.

بارزانی زه‌لامه‌ک بوو کو هەتا د ده‌مێ ده‌سته‌سه‌ری و سەرگۆنیێ دا ژی، چریسکا خه‌باتێ د ناخێ خه‌لکی دا ب گه‌شاتی هێلای. ژ به‌ر ڕۆنییا داخوازییێن وی و هێزا لۆژیکا وی، نه‌یارێن وی نه‌دشیان ب پڕوپاگه‌نده‌یێن ژە‌هراوی وی ل بەر چاڤێن خەلکی بێخن و ب گه‌ف و ترسناندنان ژی نەدشیان پشتا وی بلەرزینن. ئه‌و، وزه‌به‌خش و بزوێنه‌رێ وێ ته‌وژمێ بوو یا کو خه‌ونا (حوکمڕانیا گه‌ل بۆ گه‌لی) کره‌ ڕاستی.

ژ وێ ڕۆژا بارزانی ده‌ست دایه‌ خه‌باتێ، شوینتلێن وی د ناڤ هه‌موو شۆڕە‌ش و ده‌ستکه‌فتێن ڤی نه‌ته‌وه‌ی دا دیارن‌. ئه‌و ب تنێ، مێژوویه‌کا زیندی یه‌؛ مێژوویه‌ک کو ب هزر و زەند و باسکێن وی ب خۆ و ب قوربانیدانا وان تێکۆشه‌رێن ڕێبازا وی هه‌لبژارتی، نه‌خشاندییه‌.

بارزانی هه‌ڤچه‌رخێ کۆمه‌کا ده‌ستهه‌لات و سیاسه‌تێن پڕی زۆرداری بوو کو دشیان هه‌ر چیایه‌ک و که‌سایه‌تیه‌کێ بهه‌ژینن، لێ چ ژ وان نه‌شیان وی بێده‌نگ بکه‌ن یان ئیراده‌یا وی تێکبشکێنن؛ نه‌ ب ته‌ماعکرن و سۆزێن بریقه‌دار، نه‌ ب ترساندن و ناڤزراندنێ، نه‌ ب هه‌ولا تێکدانا ڕێزێن گه‌لی و پارتا وی و هەتا نه‌ ب پیلانا تیرۆرکرنا وی ب خۆ و خۆشتڤییێن وی ژی.

د سیمایێ بارزانی دا، سه‌رکردایه‌تییه‌کا ژێهاتی د گه‌ل دنیانه‌ڤیان و دەهمەنپاکییه‌کا بێ وێنه ‌دا تێکه‌ل ببوو. بیروباوه‌رێن وی ل سه‌ر بنه‌مایێ باوه‌ری و پاقژیێ بوون؛ ئاسۆیێ تێهزرینا وی هند دویر و به‌رفره‌هـ بوو کو هه‌می ئه‌و ئاسۆیێن ته‌نگ و ناله‌بار داپۆشیبوون یێن کو نه‌یارێن وی و ئه‌وێن پشت داینێ، تێدا لێک کۆم ببوون.

ژیان و ته‌مه‌نێ بارزانی، داستانه‌کا ده‌گمه‌نه‌ و دوباره‌بوونا وێ ئەستەمه‌. هه‌می چرکه‌یێن ته‌مه‌نێ خۆ بۆ خه‌بات و فێرکرنا ڕێکا دادپه‌روه‌ریێ ته‌رخان کرن. ئه‌و بۆ نه‌ته‌وه‌یا خۆ ژیا و پشتی ته‌مه‌نه‌کی ژ کۆلنه‌دانێ، ڕێبازه‌کا ڕۆن بۆ مه‌ ب جھ هێلا کو ژ داخوازکرنا (ماف)ی ده‌ستپێ دکه‌ت و ب (سه‌رفرازی)یێ ب دویماهی دهێت. زه‌لامه‌ک ب ڤێ شکۆمەندییێ، ئه‌و چەڤەنگێ پیرۆزه‌ یێ کو ئه‌م ل چارده‌ی ئادارێ، یادا ژ دایکبوونا وی دکه‌ینه‌ڤه‌.