بەری ئەم بەرهەڤکارییان بۆ هەر هەژمارەکا نوی يا گۆڤارا مەتین بکەین، ئەم وەکو ستافێ مەتین، پەڕبەندێن ئەوان بابەتێن کو بۆ گۆڤارێ، ژ لایێ نڤیسەر و ڤەکۆلەرێن هێژا ڤە هاتین و پێشوەخت هاتینە ڤاڤارتن و پۆلینکرن ڤەدکەين، ئەم خالەکا گرنگ دئێخینە پێشچاڤێن خۆ کو ئەڤ نڤيسينە ئەمانەتن و ئەرکێ مەیە خزمەتکرنا نڤیسەر و خواندەڤانان بکەین. مەبەستا مە، نە تژیکرنا بەرپەڕێن گۆڤارێ یە ب هەر بابەتەکێ هەیی و بەردەست؛ بەلکو ئەم ڤێ گۆڤارێ ب منبەرەک دبینین بۆ هەمبێزکرنا هزر و ئەزموون و ديدگەهان؛ لەوڕا ژی ئەم هەر دەم بزاڤێ دکەین بابەتێن پڕ مفا و سەرنجراکێش بەلاڤ بکەین، داکو جهێن خۆ بگرن و بکەڤنە بەر دەستێ خواندەڤانان.

ئێک ژ خالێن، ئەم دبینین، نیشانێن سەرکەفتنا گۆڤارێ، ئەوە کو ڕۆژ بۆ ڕۆژێ بابەتێن دگەهنە مە زێدە دبن، ژ بلی نڤیسەرێن خۆشتڤی یێن دەڤەرێ، هەژمارەکا باش یا نڤیسەرێن کورد یێن باژاڕێن دی و پارچەیێن دی یێن کوردستانێ و دیاسپۆرایێ ژی بۆ گۆڤاری دنڤیسن. ژ بەر ڤی ئەگەرێ، هندەک دەق بۆ چەند هەیڤان ژ بەلاڤکرنێ گیرۆ دبن. پاشڤەمانا بابەتان د پەڕبەندێن مە دا، رامانا وێ ئەو نينە کو ئەو بابەت هاتينە ڕەتکرن یان گرنگی پێنەهاتيیە دان یان هاتینە پشتگوههاڤێتن، بەلكو ئەگەر یێ گرێدایییە ب سروشتێ کارێ رۆژنامەڤانیێ و جۆرێ بابەتێن ل بەر دەستێن مە، ئانکو نە ب زۆريیا بابەتێن دگەهنە گۆڤارێ یە. ئەرکێ مەیە، ئەم هەموو بابەتان بخوینين و یێن گونجايی بۆ هەر هەژمارەیەکێ هەلبژێرين، ل گەل بەرچاڤ وەرگرتنا هەڤسەنگیێ د جۆرێن بابەتان و گۆشەیێن گۆڤارێ دا.

گۆڤارا مەتین د هەر هەژمارەیەکێ دا، بزاڤێ دکەت تێکهەلەیەکێ ژ بابەتێن رەوشەنبیرییا گشتی، ئەدەبی، هزری، دیرۆکی، هونەری، ڕەخنەیی، وەرگێڕانێ، زانستێن مرۆڤایەتی و هەموو بیاڤێن دی یێن رەوشەنبیریێ دانیتە بەردەستێن خواندەڤانێن بهاگران، ب شێوەیەکی کو ل گەل مەرجێن  بەلاڤکرنێ و سیاسەتا گۆڤارێ بگونجن. لەوڕا، نە د ئیمکان دایە، هەموو ئەو بابەتێن دگەهنە مە بهێنە بەلاڤکرن، بەلێ هەر بابەتەکێ دگەهيتە گۆڤارێ هێژايی خواندن و هەلسەنگاندنێ یە.

ئێک ژ وان پرنسيپێن ئەم گرنگيێ پێ ددەين، ئەوە کو ئەم سەحدەکەنە ناڤەرۆکا نڤيسينێ بەری سەح بکەینە ناڤێ نڤيسەری. ئەم گرنگيیا ناڤی، ئەزموونێ و سەربۆرێ دزانين و ڕێزێ ل ئامادەبوونا ڕەوشەنبيرى يا وان نڤيسەران دگرين کو ب سالێن دویر و درێژ ب پێنڤیسێن خۆ خزمەتا رەوشەنبیرییا کوردی کرییە، لێ ئەڤە وێ چەندێ ناگەهینیت کو ناڤ ب تنێ پێڤەرێ بەلاڤکرنێيە. ڕەنگە دەقەکێ گرنگ یێ نڤيسەرەکێ گەنج و نویپێگەهشتی بگەهيتە مە کو بۆ جارا ئێکێ بیت بنڤیسيت و ڕەنگە بابەتەک ژ ناڤەکێ دیار بگەهيتە مە، بەلێ ل گەل سروشتێ گۆڤارێ یان وى ئاستێ ئەم دخوازین نەگونجيت. د هەردو بارودۆخان دا، ب تنێ دەق ب خۆ دبیتە دادوەر.

ژ بەر ڤێ چەندێ و ب دروستی، ئەم گرنگيیەکا تایبەت ددەينە گەنجان، نڤيسينێن وان و بەهرەیێن وان، چونکی ڕەوشەنبيرى ب بێ دەنگێن نوی پێشناکەڤیت. ئەو نڤيسەرێ ئەڤرۆ دەقێ خۆ یێ ئێکێ بەلاڤ دکەت، ڕەنگە پشتى چەند سالان ببيتە ئێک ژ وان ناڤێن دیمەنێ ڕەوشەنبيریێ دروست دکەن. ژ بەر هندێ، ئەم ناخوازین گۆڤار ب تنێ بۆ نڤيسەرێن ناڤدار بیت، بەلکو مە دڤێت ببيتە پەنجەرەیەک ژی بۆ بەهرەیێن گەنج يێن ل دەرفەتەکێ دگەڕیێن و بۆ وان دەنگان يێن کو تشتەکێ نوی ڤێ هەى.

ژیرییا چێکری.. ئامرازەکە، نە نڤيسەرە!

ئەم نوکە یێن د سەردەمەکی دا کو ئامرازێن نڤيسينێ ب لەز یێن دهێنە گوهۆڕین، نە یا بەرعەقلە ژی کو گۆڤارا مەتین ڤێ ژیریێ پشتگوهـ بکەت و نەشێت ڤێ چەندێ بکەت ژی. ئەم نە ل  دژى بکارئينانا ڤێ تەکنەلۆژيايا سەردەمين، ئەم نابێژینە چو نڤيسەران: ژیرییا چێکری بکار نەئينن؛ چونکی ئەم د وێ باوەڕیێ داینە کو تەکنەلۆژیا و ئامرازێن نوی دکارن هاريكارييا نڤيسەری، ڤەکۆلەری و وەرگێڕی بکەن و کارێ وان د لێگەڕيانێ، ڕێکخستنا هزران، پێداچوونێ، پێشنيارکرن و دارشتنا بابەتان و بکارئينانێن دی يێن پڕ مفا، ب ساناهی بکەن..

بەلێ ئاریشە ل وێرێ دەستپێ دکەت، دەما ئەڤ ژیری یە ژ ئامرازەکێ هاریکار بۆ ببیتە نڤيسەر یان ببیتە جهگرێ نڤيسەری ب خۆ.

جارهەنە دەق دگەهنە مە کو وەسا دیار دبن هەر وەکو ب تەمامى ب ڕێکا ژیرییا چێکری هاتيە بەرهەڤکرن و ئێکسەر ناڤێ خۆ ل بن ناڤونیشانی دانایە و بۆ گۆڤارێ هاتيە هنارتن بێی کو خودانێ وێ خۆ ماندی بکەت و بابەتی بخوینیت، پێداچوونا زمانی بۆ بکەت یان سەر ژ نوی دابرێژیتەڤە. یا خراپتر ژ ڤێ ئەوە، دەمێ خودانێ دەقی، داخوازێ ژ دەستەیا گۆڤارێ دکەت کو ئەوی ب خۆ ئەو گۆتار یان ڤەکۆلين یا نڤیسی و دانێ ب هندێ نادەت کو پترییا بابەتێ وی  ب ژیرییا چێکری یێ هاتییە ئەنجامدان!

ل ڤێرێ، مە دڤێت هەلوەستێ خۆ ب هەمی زەلالى و ڕۆهن بەرچاڤ بکەین: ئەم ل دژى ژیرییا چێکری نينين، بەلکو ئەم ل دژى نەبوونا نڤيسەری نە د ناڤ دەقی دا.

پێدڤییە نڤيسەرێن ڕاست و دروست شوینتلێن خۆ د وى دەقێ دنڤیسن دا بجهـ بهێلن و بلا ئەو دەق ب هاریکارییا ژیرییا چێکری هاتبیتە نڤیسین، دا کو خۆ ژ پێزانينێن بۆ هاتینە نڤیسین پشتڕاست بکەت، پێداچوونێ بۆ زمانێ وێ بکەت و دەستکاریێ و ڕاستڤەکرنێ بۆ مژارێن ل گەل هزر و ئارمانجا وى نە گونجن ژێ ببەت، سەر ژ نوی ژی دابرێژیتەڤە. ئامویر دکاريت ڕستەیێن لێکدای و جوان دروست بکەت، بەلێ نەشێت وێ روحێ و ئەزموونا کەلەکەبوویی و هزر و هەستێن تایبەت يێن نڤیسەری ببەخشيتە دەقى.

ژ بەر ڤێ چەندێ، ئەم نابێژین کو تو یێ نڤيسەر ژیرییا چێکری بکار نەئینە، بەلێ ڕێکێ نەدە کو تو یێ نڤیسەر د وێ نڤیسینێ دا نەبی.

ل دووماهيێ، دوپات دکەینەڤە کو دەرگەهێن گۆڤارا مەتین دێ دڤەکری بن بۆ هەموو پێنڤیسێن داهێنەر یێن خودان ئەزموون و نوی پێگەهشتی ژی، داکو ئەم هەموو ڤی کاروانێ رەوشەنبیری بەر ب ئاسۆیێن بلندتر و گەشترڤە ببەین.