ل پشت داخوازا پارچەبوونێ .. چ هەیە؟

سەرنڤیسەر

هندەک دەنگێن، ب ناڤ کورد، یێن نەشاز و نە بەرپرس و دویر ژ هەست و پرەنسیپێن کوردایەتییا دروست هەنە، ب بەهانەیێن نە ڕەوا و نە بەرعاقل، داخوازا پارچەکرنا هەرێما کوردستانێ دکەن. ل جهەکێ دی ژی، نەحەزێن کوردان ژ کرێگرتییێن تائیفەگەریێ ب داخۆیانییێن خۆ یێن ئاگرخۆشکەر و ب هاندانا هندەک ناڤەندێن هەرێمایەتی پشتەڤانییا وی بۆچوونا سه‌قەت و چڤێل دکەن. هەلبەت مەرەما، یێن ب ناڤ کورد، نە پەژراندن و چاڤپێنەڕابوونا وانە ب سەرکەفتنێن پارتییا دیموکراتا کوردستانێ و حکومەتا هەرێما کوردستانێ ب سەرۆکایەتییا پارتی، د هەمی قاد و بیاڤان دا. دیسان ژ بەر ترسا وانە، کو د هەلبژارتنێن پاشەرۆژێ دا ئەو پێگەهێ لاوازێ داخوازکەرێن پارچەبوونێ هەیی ژی، لاوازتر لێ بهێت و ئێدی ببنە حزبا چارێ و وێڤەتر. پشتی دانانا گەلەک پەرپێک و تەگەران هەمبەر پێشڤەچوونێن پارتی و حکومەتا هەرێما کوردستانێ، دەست ب بزاڤا دروستکرنا دەرزان کرییە ژ بۆ بجهئینانا پیلانێن سەر خۆ دا، دەڤەرەکا کوردستانی یا گرنگ ژ قەوارەیێ هەرێمێ ڤەکەن.

به‌لێ، ب دیتنا مە، مەبەستا ئێکێ و دویماهیێ یا لایەنێ دی یێ نە کوردستانی، بۆ نموونە، داخۆیانییا نووری ئەلمالکی یا ل ناڤەڕاستا هەیڤا خزەیرانا ئەڤ ساڵە بۆ کەناڵەکێ عیراقی دای، کو تێدا ب ئاشکەرا و بەروڤاژی دستوورێ عیراقی و خواستا پڕانییا گەلێ کوردستانێ دەما دبێژیت: “من پشتەڤانی کرییە و نها ژی پشتەڤانیێ دکەم، کو دەڤەرا کوردستانێ یان ببیتە دو ئیدارە یان دو هەرێم …!” هەلبەت هەمی مەرەما وی لاوازکرنا قەوارەیێ هەرێما کوردستانێ و بەرتەسککرنا جوگرافییا وی یە. ئەڤه‌ پشتی وێ چەندێ دهێت، کو خاکفرۆشان نیڤا ئاخا هەرێمێ، ب کەرکووکا دلێ کوردستانێ ڤە ژی، ب بازرگانیکرنەکا ڕویڕەش فرۆتی، بێی کو هیچ دەستکەفتەکێ ب دەست بێخن، ژ بلی بجهئینانا پیلانێن نەحەزێن گەلێ کوردستانێ.

لڤێرە دێ ئاخڤتنەکا سەرۆک مەسعود بارزانی ئینینە بیرا تەڤ نەحەزان دەما دبێژیت: “دێ ب توندی ل بەرامبەر هەر جۆرە بزاڤ و دەستدرێژی و خەمسارییەکێ ژ بۆ تێکدان و نەهێلانا هەرێما كوردستانێ ڕاوەستین. بۆ مە هەرێما كوردستانێ نە ب تنێ هێڵا سۆرە، بەلكو هێڵا مەرگی و یان كوردستان یان نەمانە”.