بازرگانیکرن ب ئایینی

سەرنڤیسەر

بازرگانیکرن با ئایینان، بازرگانییا هەری خۆ خەرجە (ئبن روشدێ فەقیهـ و فەیلەسۆف)

ل درێژاهییا دیرۆکێ ئایین، هەر ئایینەک، ژ لایێ هندەک کەسانڤە، کو خۆ دکەنە نوینەر و وەکیلێن خودێ، یێ هاتییە بکارئینان و ل سەر رێرەوا دروستا ئایینی، کو پێدڤیبوونەکا روحی یا مرۆڤییە، لاداینە و دین کرینە کەرستە و ئامرازەک بۆ لڤاندنا هەست و نەستێن مرۆڤان ب مەرەما گەهشتنێ ب ئارمانج و بەرژەوەندییەکا بەرتەسک یا دونیایی.

ل سەدەیێن ناڤین، چیرۆکا چەکێن لێبۆرینێ (صکوک الغفران) بەربەڵاڤبوو، کو هەر کەسەکێ چەکەکێ بکڕیت دێ جهەکی بۆ خۆ ل بەهەشتێ دابین کەت. ل وی سەردەمی هەمی ئەورۆپا پێ سەوداسەر بوو. داهاتێ وان چەکان بۆ هندەک ئەسقوفان بوو، بەلێ پشکا شێری بۆ گەنجینەیا پاپا لیۆ یێ ١٠ێ بوو. گەلەک چیرۆک ژ بۆ قاییلکرنا خەلکی هات بوونە ڤەهاندن، داکو ب رێکا وان چەکان بگەهنە لیخۆشبوونا تەمام یا خۆدێ مەزن.

ل ساڵین هەشتێیان ژ سەدەیێ بۆری ژی، ب فەرمانا ئایەتوڵلا خومەینی، کلیلێن دەرگەهێ بەهەشتێ ب سەر سەربازێن ئیرانی دا کو د جەنگەکێ خوینەلۆ دا بوون ل گەل رژێما گۆڕبگۆڕا عیراقێ، هاتنە دابەشکرن. ل ئالیێ دی، رژێما بەعسا خوینمێژ، سەربازێن خۆ ب درویشمێن عروبەت و پاراستنا دەروازەیێ رۆژهەلاتی یێ (ئوممەیا) عەرەبی هان ددان. د ئەنجام دا گیانێ هزاران سەربازێن هەردو ئالییان ب هەروە چوو و د شەڕگەهان دا بوونە تەرم.

ئەڤرۆ ژی، هەر ل سەر هەمان رێچکەیا چەکێن لێبۆرینێ و کلیلێن بەهەشتێ،  لێ ب شێوەیێن جودا، هەوڵێن ب دەستڤەئینان و ڕاکێشانا سۆزا خەلکی یا بەردەوامە، و مزگینییا بەهەشتێ پێ دفرۆشن!

پرسیار لڤێرە ئەوە، ئەرێ ، ژ بلی دەهـ سەحابەیێن، کو مزگینییا بەهەشتێ پێ هاتییە دان، کێ یێ دیتر بۆ خۆ ١٠٠٪ چوونا بەهەشتێ دابینکرییە هەتا کەسەک سۆزا گەهشتنا بەهەشتێ پێ بپەخشیت!؟

چوونا بەهەشتێ یانکو دیارکرنا کا کی بەهەشتییە و کی نە بەهەشتییە، ب تنێ کارێ خودێ مەزنە، فەرموودەیەکا راست یا پێغەمبەرێ خودێ (س)، کو ژ لایێ ئەبو هورەیرەی ڤە هاتییە ڤەگێڕان و دبێژیت، «پێغەمبەری (س) گۆت: خۆ بکێشنە ڕاستییێ و ل دویڤ بگەڕێن و بزانن کەس ژ وە ب کار و کریارێن خۆ قورتال نابیت، گۆتن: خۆ تو ژی یا پێغەمبەرێ خودێ؟ گۆت: حەتا ئەز ژی ئەگەر خودێ من ب بەر ڕەحما خۆ و کەرەما خۆ نەئێخیت.» ^(١)

واتەیا ڤێ فەرمۆدەیا پێغەمبەرێ خۆدێ (س) ئەڤە يە: ئەو عبادەتێ ئەم دکەين نە هەمبەر بهايێ بەهەشتێ یە وەک بها و نرخ.

(1) أخرجه مسلم، كتاب صفات المنافقين وأحكامهم، باب لن يدخل أحد الجنة بعمله بل برحمة الله تعالى (4/ 2169)، رقم: (2816) و کوردیکرنا فەرمۆدەیێ یا بەرێز (مەلا ئەنوەر کانیاباسکی).