گۆڤارا مەتین گۆڤارا مەتین
بەرهەڤکرن: مەتین
زمانناسینا ئەنتەرنێتێ Internet Linguistics ، بیاڤەکە ژ بیاڤێن زانستێن زمانی، کو بۆ ئێکەم جار زمانزانێ ئینگلیز دێیڤید کریستال David Cristal د پەرتووکا خۆ یا بناڤێ (زمان و ئەنتەرنێت Language and the Internet ) دا بەحس لێکری. زمانناسینا ئەنتەرنێتێ، لدۆر وان شێواز و فۆرمێن زمانەڤانی یە، یێن لژێر کاریگەرییا ئەنتەرنێتێ و سوشیال میدیایێ پەیدا بووین و رۆژانە پەیدا دبن، مینا نامەیێن کورت SMS و ژوورێن گەنگەشە و چاتکرنێ، کو رێژەیەکا بلند یا خەلکێ جیهانێ پێڤە یێ مژویلە.
ڤەکۆلینێن زمانەڤانی، یێن گرێدایی ب ئەنتەرنێتێڤە، ل چار رەهەندێن سەرەکی دهێنە ئەنجامدان: زانستێ زمانێ جڤاکی، پەروەردە و فێرکرن، زانستێ شێوازێن نڤیسینێ و زمانێ پراکتیکی.
پێشڤەچوونا بەردەوام یا تەکنەلۆجیایێ، گوهۆڕینێن مەزن د ئەنتەرنێتێ و باندۆڕا وێ دا کرینە و ئیدی و پشتی جیهانێ قەبارەیێ ئێک مۆباییلا دەستی وەرگرتی، هەمی زمانێن جیهانێ، لگۆری زیندیبوونا خۆ، دێ کارلێکییا خۆ هەبیت.
لگۆری، زمانزان دێیڤید کریستال، هەمی زمان نەشێن د خۆڕاگر بن و خۆ بپارێزن. بۆ نمۆنە زمانێن چینی و کوری نە، کو شەڕەکێ گەرم دکرن داکو پەتییا زمانێن خۆ بپارێزن، بەلێ نەشیاین د خۆراگر بن و نها ب سەدان پەیڤ و تێرمێن ئنگلیزی دزمانێن وان یێن ئەنتەرنیتێ دا دهێنە دیتن!. ئەڤجا زمانێن دی، یێن چ پارێزبەندی و پلان و نەخشە بۆ نەبن، دێ چ ب سەرێ وان هێت؟
زانا دبینن، ئەڤ پێلا ئەنتەرنێتێ دێ یا بەردەوام بیت و دێ کارن ب زمانەکێ جودا و ب شێوازەکێ جودا یی نڤیسینێ ل سوشیال میدیایێ گەنگەشێ بکەن.
ژێدەر: – journals.openedition.org/lexis/1831
