چەوانییا پاراستنا ساخلەمییا بیردانكێ

بەرهەڤکرن: مەتین

جان و لەش تەمامكەرێن ئێكن. جان پێدڤی ب هەمان رێكارێن چەوانییا پاراستن و ساخلەمییا لەشی یە، ئەڤ پێشنیازێن ل خوارێ دیاركری، د گرگن بۆ پاراستنا هزر و بیردانكێ؛

 هەستێن خۆ دەرببرن و ژ دلێ خۆ دەربێخن:

دەرئێخستنا ئاخفتنا دل و مێشكێ تە؛ ئێك ژ وان رێكێن ب ساناهینە، كو د دەستێن تە دا بیت بۆ ساخلەمڕاگرتنا بیردانكێ. گوهداریا كەسێ بەرامبەری تە، دبیتە ئەگەرێ وێ چەندێ، ئێدی تو هەست ب تنێبوونێ نەكەی و ئاخفتنا تە ژی، ئەگەرە بۆ ڤالابوونا مێشكی و گەشەیا وی. ب ڤێ رێكێ دێ هەست پێ كەی یێن بەرامبەر هەڤپارێن ئارێشە و پرسگرێكێن تە نە. ب ڤی رەنگی دێ شێی پتر كونترۆلا نەخۆشی یێن خۆ كەی.

بزاڤكرن و چالاكی:

بزاڤا تە یا فیزیكی یا رۆژانە، دبیتە ئەگەرێ بەردەوامیا چالاكبوونا ماددەیێن كیمایی د مێشكی دا و پولینكرن و ڤاڤارتنا هەمی وان ئاریشە و پرسگرێكێن ژیانا تە یا رۆژانە. لڤین و هاتن و چوونا تە ئەگەرە بۆ وەستیانێ، وەستیان ژی؛ ئەگەرە بۆ خەوا گران. خەوا گران و كویر، ئانكو فۆرمات و بێهنڤەدانا مێشك و بیردانكێ. زانا تەكەزییێ ل وێ چەندێ دكەن، كو پێدڤیە مرۆڤ د ئێك حەفتیێ دا ب كێمی رۆژانە 30 خۆلەكان مەشێ بكەتن. هەر ژ بەر ڤێ چەندێ پێدڤییە، ئەم رۆژانە هندەكێ ژ دەمێ خۆ بدەینە وەرزشێ.

پاراستنا هەڤسەنگییا خوارنێ:

پەیوەندیەكا گەلەك گرنگ و موكم دناڤبەرا بیردانك و خوارنا تەیا رۆژانە دا هەیە. كاریگەریا ڤەخوارنا قەهوێ و شەكرێ، ئێكسەر ل سەر لەشی دهێتە دیتن. كا چەوا خوارنێ گرنگی بۆ لەشی هەیە، ب هەمان شێوە كاریگەری ل سەر بیردانكێ ژی هەیە، ئانكۆ؛ هەمان ئەو خوارنێن بۆ پاراستنا لەشی دهێنە ب كارئینان، بۆ مێشكی ژی د گونجای و ب كێر هاتینە. هەر سێ دانێن خوارنێ د دەمێن وان دا و خوارنا زێدە یا فێقی و كەسكاتیان، ئەرزاق و نان، بندەق و هەمی چەرەزات، بەرهەمێن شیری، ماسیێ ب ڕوین و ڤەخوارنا زێدە یا ئاڤێ، ئەگەرن بۆ وێ چەندێ، كو مێشكێ تە پتر یێ چالاك بیت و پتر كارێ خۆ بكەتن.

گرنگیێ ب پاراستنا پەیوەندیێن خۆ یێن جڤاكی بدە:

هەبوونا پەیوەندیێن خۆرت، ب تایبەت د ناڤ ئەندامێن خێزانێ دا، مرۆڤی ژی دو دلی و سترێسێ د پارێزیت. ئەڤ چەندە دێ بیتە ئەگەرێ؛ هەستكرن ب گرنگیێ و هاریكارە بۆ وێ چەندێ، تو ژ لایێ هزری ڤە ل سەر خۆ بی و مێشكێ تە گەلەك هزرێ ل سەر دەروونێ خۆ نەكەتن. دەما تو نە شێی پرسگرێكێن خۆ چارەسەر بكەی و مێشكێ تە پێڤە مژویل ببیت، وی دەمی یێن بەرامبەر دشێن دیتنێن، باشتر بۆ هەوە پێشنیاز بكەن و بارێ هەوە سڤك بكەن. ئەڤە ژی ئەگەرە، بۆ ئارامییا مێشكی و پاراستنا بیردانكێ. دگەل ڤێ چەندێ ژی، هەر پێدڤیە تو ماوەیەكێ دەستنیشانكری بۆ خۆ ب خۆ تەرخان بكەی.

 بێهنڤەدان:

بێهنڤەدانێن كورت یان ژی جه گوهورین، دبیتە ئەگەرێ وێ چەندێ، كو ژ رویێ هزری ڤە ساخلەمیا تە باشتر ببیت و بیردانكا تە یا پاراستی بیت. بێهنڤەدانا دەمكی بۆ 5 خۆلەكان پشتی ئەنجامدانا هەر كارەكی یان ژی بێهنڤەدانەكا كورت و گەریان ب پیاسێ، چ ب تنێ یان ژی ب هەڤال بن، گوهدانا موزیكێ، خواندنا پەرتووكان، كێشانا نەخشە و نیگاران، مێشكێ تە ژ ئاریشە و پرسگرێكێن كەسایەتی دویر دكەتن.

ژ خۆ رازی بوون:

هەول بدە خۆ بە، هەر ئێك د بوارەكی دا یێ زیرەك و چالاكە. شیان هەمی د دابەشكرینە و هەر ئێك ب شێوەیەكی. كەسێ شیان و تایبەتمەندیێن كەسەكێ دی نینن. هەر ئێك وەكی خۆ یە. نە بوونا تایبەتمەندیەكێ ل دەڤ خۆ ب كێماسی نە بینە! بۆ ئارمانجێ، ئەگەر گوهێ تە ل ئاخفتنێن یێن بەرامبەر بیت، دێ درەنگتر گەهیە ئارمانجا تە یا دەستنیشانكری و بەرۆڤاژی.

ژێدەر: – Zihin Sağlığını İyileştirmenin Yolları | Blog (cunkubaskasenyok.com)