گۆڤارا مەتین گۆڤارا مەتین
بەرهەڤکرن، مەتین:
دویماهییا ئەڤساڵە دێ هەلبژارتنێن جڤاتا پارێزگەهان ل عیراقێ هێنە کرن، ئەندامێن کورد ل پەرلەمانێ عیراقێ و چاڤدێرێن سیاسی وەسا دبینن، هەلبژارتنێن ڤێجارێ ل دەڤەرێن کوردستانی یێن دەرڤەیی ئیدارا هەرێما کوردستانێ د رەوشەکا نەئاسایی دا دهێنە کرن، چونکی گەلەک دەڤەر ل ژێر کۆنترۆلا چەکدارێن حەشدا شەعبی دانە، ژ بەر هندێ ژی هەلبژارتنێن ڤێجارێ چارەنڤیسسازن و دڤێت هەمی هێزێن کوردی ل سەر بنەمایێ ستراتیژییەکا نەتەوەیی کار بکەن، زێدەبوونا کورسییێن کوردان د جڤاتا پارێزگەهان ل مویسل و کەرکووکێ دا، دێ بیتە ئەگەرێ بهێزبوونا پێگەهێ کوردان.
نەجوا کاکەیی؛ ئەنداما پەرلەمانێ عیراقێ سەبارەت ب هەلبژارتنێن پارێزگەهان ب تایبەتی ژی ل کەرکووکێ بۆ کۆڤارا مەتین دیار کر: «نها رەوشەکا گەلەک جودا ل کەرکووکێ هەیە، ب تایبەتی ژی پشتی رویدانێن ١٦ى ئۆکتۆبەرێ دەستهەلاتەکا جودا ل کەرکووکێ هەیە، یا راست پارێزگارێ کەرکووکێ ل سەر خەلکی هاتییە سەپاندن و ژ بەر هندێ ژی رۆژانە پارێزگارێ کەرکووکێ زۆردارییێ ل کوردان دکەت، ل ژێر دەستهەلاتا وی پارێزگاری: رۆژانە مافێ وەڵاتییێن کورد دهێتە خوارن، چەند ساڵن زۆرداری ل جۆتیارێن کورد دهێتە کرن، وەکو نوینەرێن کەرکووکێ، مە هەتا نها شییایە ب رەنگەکێ باش بەرگرییێ ژ مافێن جۆتیاران و خەلکێ خۆ بکەین، پارتی دیمۆکراتی کوردستان هەردەم پشتەڤانی ل مافێن هەمی خەلکێ کەرکووکێ یا کری، ئەڤ هەلبژارتنە بێگومان بۆ کوردان گەلەک دگرنگن، چونکی ب رێیا ڤان هەلبژارتنان دێ پارێزگارەکێ نوی بۆ کەرکووکێ هێتە دانان، ژ بەر هندێ گەلەک گرنگە هەمی هێزێن کوردی ل کەرکووکێ ستراتیژییەکا خۆ یا نەتەوەیی هەبیت، ئەز وەسا دبینم هەکە رێککەفتنەکا تایبەت د ناڤبەرا هێزێن کوردستانی دا نەبیت دێ کورد تووشی زیانەکا مەزن بن، چونکی د نموونا قانوونا بۆدجەی دا ژی بۆ مە ئاشکرا بوو، پیلانێن مەزن ل دژی کوردان و هەرێما کوردستانێ دهێنە گێران، ژ بەر هندێ ژی دڤێت دەستپێکێ پارتی و ئێکەتی و پاشی ژی هێزێن دی ژ بۆ سەرکەفتنا کوردان ل کەرکووکێ پێکڤە کار بکەن».
ئەنداما پەرلەمانێ عیراقێ ژ فراکسییۆنا پارتی دیموکراتی کوردستان ئەو یەک ژی دیار کر: «دڤێت دەزگەهێن ڕاگەهاندنێ ب رەنگەکێ باش کار ل سەر ڤان هەلبژارتنان بکەن، چونکی دەستهەلاتا نها یا ل کەرکووکێ گەلەک خرابی ل خەلکێ مە کرییە، دڤێت ب رێیا ڤان هەلبژارتنان جارەکا دی کورد ل کەرکووکێ بهێز کەڤن و ب تایبەتی ژی دڤێت پارێزگارێ کەرکووکێ کورد بیت، دا دویماهی ب پیلانێن شۆفینییان ل هەمبەر گەلێ مە ل کەرکووکێ بهێت، ژ بەر هندێ ژی هەلبژارتنێن ڤێجارێ یێ جڤاتا پارێزگەهان ب تایبەتی ژی ل کەرکووکێ گەلەک گرنگە، ئەز هێڤیدارم هەمی وەڵاتییێن کورد ل کەرکووکێ و دەڤەرێن دی یێن کوردستانی ل دەرڤەیی ئیدارا هەرێما کوردستانێ ب رەنگەکێ باش پشکدارییێ د هەلبژارتنان دا بکەن، دڤێت زۆلم و زۆردارییا نها ل سەر گەلێ مە ل کەرکووکێ ب دویماهیک بهێت، هەلبژارتنێن ڤێجارێ دشێن ببنە ئەگەرێ دەستپێکرنا قووناغەکا نوی بۆ خەلکێ مە ل کەرکووکێ، وەکو نوینەرێن خەلکێ مە ئەم ل پەرلەمانێ عیراقێ یا پێدڤی دکەین و هەکە پرانییا جڤاتێ جارەکا دی بکەڤیتە دەستێ کوردان دێ رەوش ب تەمامی هێتە گوهۆڕین، دڤێت ب رێیا هەلبژارتنان ئەو رەوشا پشتی رویدانێن ساڵا ٢٠١٧ ل سەر کەرکووکێ هاتییە سەپاندن، ب دویماهیک بهێت، خەلکێ مە دشێت ب رێیا هەلبژارتنان ببیتە ئەگەرێ دەستپێکرنا قووناغەکا نوی، بێگومان ژ بۆ هندێ ژی گەلەک یا گرنگە خەلکێ مە ل کەرکووکێ ب رەنگەکێ باش خۆ بۆ ڤان هەلبژارتنان بەرهەڤ بکەن، چونکی سەرکەفتنا کوردان د هەلبژارتنێن ڤێجارێ یێن جڤاتا پارێزگەهان دێ بیتە ئەگەرێ گوهۆڕینێن مەزن و بێگومان ئەو یەک ب تەمامی د بەرژەوەندییا گەلێ مە دایە، چونکی دەستهەلاتا نها چو تشتەکێ باش بۆ کوردان ناکەت، ب رێیا هەلبژارتنان خەلکێ مە دشێت رێ بۆ گەلەک گوهۆڕینان خۆش بکەت و هەر گوهۆڕینەک ژی دروست ببیت دێ ئەنجامێن خۆ یێن باش بۆ مە هەمییان هەبیت».
ناڤهاتییێ ئەو یەک ژی نەڤەشارت نها ل کەرکووکێ زۆرداری ل نەتەوا تورکمان و پێکهاتێن دی ژی دهێتە کرن، پارتی دیمۆکراتی کوردستان هەردەم دیار دکەت، ب خۆسەپاندنێ چو پرسەک ناهێتە چارەسەرکرن، دڤێت ل سەر بنەمایێ دەنگێ وەڵاتییان و قەبویلکرنا ئێکتر سیستەمەک نوی ل کەرکووکێ بهێتە ئاڤاکرن، مخابن سیستەمێ نها خۆ ل سەر خەلکی سەپاندییە و ژ بەر هندێ ژی رەوشا کەرکووکێ رۆژ ب رۆژێ خرابتر لێ دهێت، گەلێ مە ل کەرکووکێ ژ رەوشا نها گەلەک نەرازینە، دڤێت هێزێن سیاسی یێ کوردی ژی ل گۆڕ راستییا نها سیاسەتێ بکەن، پارتی دیمۆکراتی کوردستان ژ بۆ بەرژەوەندییێن نیشتمانی یێ گەلێ کورد هەتا نها شییایە گەلەک کارێن باش بکەت، بێگومان گەلێ مە دێ پشتەڤانییێ ل سیاسەتا پارتی کەن، چونکی د هەلبژارتنێن هەری دویماهیێ یێن پەرلەمانێ عیراقێ دا ژی پارتی ل کەرکووکێ دو بەربژار هەبوون و هەر دو ژی شییان رێژەیەکا مەزن یا دەنگان بدەستڤە بینن و بچنە پەرلەمانی، نها ژی مە دڤێت د هەلبژارتنێن ڤێجارێ یێ جڤاتا پارێزگەهان ل کەرکووکێ دا ژی ب پشتەڤانییا خەلکێ خۆ ئەم جڤاتەک نوی ئاڤا بکەین دا نوینەرێن کورد بشێن هەم خزمەتا کوردان و هەم ژی خزمەتا هەمی خەلکێ دی ل کەرکووکێ بکەن، ژ بۆ هندێ ژی سەرکەفتنا نوینەرێن پارتی دیمۆکراتی کوردستان د ڤان هەلبژارتنان دا گرنگە، بێگومان سەرکەفتنا کوردان د ڤان هەلبژارتنان دا دێ بیتە ئەگەرێ هندێ رێگری ل گەلەک پیلانێن نەحەزێن گەلێ کورد بهێتە کرن».
ل ئالییێ دی، رێبوار تالەبانی؛ سەرۆکێ بەرێ یێ جڤاتا پارێزگەها کەرکووکێ ژی بۆ کۆڤارا مەتین دیار کر: «بەری هەر تشتەکێ رەوشا نها ل کەرکووکێ بۆ هەلبژارتنان یا گونجای نینە، چونکی ل کەرکووکێ و دەڤەرێن دی دەستهەلاتەکا سەربازی یا هەی، کو پشتی رویدانێن ١٦ى ئۆکتۆبەرێ خۆ ل سەر خەلکێ مە سەپاندییە، دڤێت بەری هەلبژارتنان هەموو هێزێن کوردی بزاڤا هندێ بکەن دا رەوشەکا کەرکووکێ و دەڤەرێن دی یێن کوردستانی ئەوێن ل دەرڤەیی ئیدارا هەرێما کوردستانێ بهێنە ئاساییکرن، نابیت ژ بلی خەلکێ رەسەن یێ کەرکووکێ و دەڤەرێن دی چو کەسەک پشکدارییێ د هەلبژارتنان دا بکەت، نابیت عەرەبێن هاواردە وەکو وەڵاتییێن کەرکووکێ پشکداریێ د هەلبژارتنان دا بکەن، ئەو یەک دێ ئەنجامێن خۆ یێن گەلەک خراب بۆ کوردان هەبیت، گەلەک یا گرنگە رێ نەهێتە دان ژ بلی خەلکێ رەسەن یێ کەرکووکێ و دەڤەرێن دی یێن کوردستانی یێن دەرڤەیی ئیدارا هەرێما کوردستانێ چو کەسێن دی پشکدارییێ د هەلبژارتنان دا بکەت، ژ بۆ هندێ ژی ئەز جارەکا دی دبێژم رەوش بۆ هەلبژارتنان ل کەرکووکێ گونجای نینە و دڤێت بەری هەر تشتەکێ هەمی ملیشاتێن نها ل کەرکووکێ دەرکەڤن و رەوشا وی باژێری یا ئاسایی بیت، چونکی د رەوشەکا نە ئاسایی دا خەلک نەشێن ب رەنگەکێ ئازادانە پشکداریێ د هەلبژارتنان دا بکەن، ژ بەر هندێ ژی برێڤەچوونا هەلبژارتنان د رەوشەکا وەسا دا ل کەرکووکێ و دەڤەرێن دی یێن کوردستانین چو ئەنجامەکا باش بۆ مە کوردان نابیت».
ناڤهاتی د پشکەکا دی یا ئاخڤتنا خۆ دا ئەو یەک ژی راگەهاند: «ئاریشێن ماددێ ١٤٠ وەکو خۆ ماینە و نەهاتینە چارەسەرکرن، دەستهەلاتەکا سەربازی یا هەی و رۆژانە زۆرداری ل خەلکێ مە دهێتە کرن، دڤێت هەموو هێزێن کوردی پێکڤە کار بکەن دا بەری هەلبژارتنان هندەک گوهۆڕین د رەوشا کەرکووکێ و دەڤەرێن دی دا دروست ببن، چونکی دەمێ ئالۆزی هەبن و دەستهەلاتەکا سەربازی ژی هەبیت، بێگومان هەلبژارتنان چو ڕامانەکا خۆ نابیت، ئەز وەسا دبینم هەکە نها هەلبژارتن بهێنە کرن و کورد هەمی کورسییێن پارێزگەها کەرکووکێ ببەن ژی، دیسان چو مفایا خۆ بۆ کوردان نابیت، چونکی دەستهەلاتا سەربازی رێ نادەت جڤاتا پارێزگەهێ خزمەتا وەڵاتیان بکەت، چونکی پشتی رویدانێن ١٦ى ئۆکتۆبەرێ گەلەک کارێن خراب ل کەرکووکێ هاتینە کرن، زۆردارییەکا مەزن ل کوردان هاتییە کرن، هەتا ملیشیاتێن حەشدا شەعبی ل کەرکووکێ بن، بێگومان خەلک نەشێن ب رەنگەکێ ئازادانە پشکدارییێ د هەلبژارتنان دا بکەن، ئانکو ب کورتی هەبوونا چەکدارێن حەشدا شەعبی دێ بیتە ئاستەنگییەکا گەلەک مەزن ل هەمبەر برێڤەچوونا هەلبژارتنان ب رەنگەکێ ئازاد ل کەرکووکێ و دەڤەرێن دی یێن گرێدایی ماددێ ١٤٠، ل گۆڕ باوەرییا من نها هەلبژارتن ل کەرکووکێ بهێنە کرن ژی بۆ کوردان دێ گەلەک یا خراب بیت، چونکی چەندین خالێن گرنگ هەنە، دێ کاریگەرییا خۆ ل سەر دەنگێ کوردان ل کەرکووکێ کەت».
سەبارەت ب وان خالان ژی سەرۆکێ بەرێ یێ جڤاتا پارێزگەها کەرکووکێ دیار کر: «نها ناکۆکییێن گەلەک مەزن د ناڤبەرا هێزێن کوردستانی دا هەنە، دڤێت بەری هەلبژارتنان هەمی هێزێن کوردستانی ل سەر بنەمایێ ستراتیژییەکا نیشتمانی پێکڤە کار بکەن، دڤێت رێککەفتنەک ل کوردستانێ بهێتە کرن و پاشی هێزێن کوردستانی کار بۆ هەلبژارتنان ل کەرکووکێ بکەن، مخابن هەکە رەوش وەکو نها بیت، ئەو ناکۆکییێن ل کوردستانێ د ناڤبەرا پارتیێن سیاسی دا هەنە، دێ بیتە ئەگەرێ هندێ هەم رێژەیا دەنگێن کوردان کێم ببیت و هەم ژی کوردان ئەو پێگەهێ جاران ل کەرکووکێ نەبیت، دڤێت کورد ب هەمی رەنگەکێ کار بکەن دا وەکو بەری رویدانێن ١٦ى ئۆکتۆبەرێ ل کەرکووکێ بهێز کەڤن، مخابن تشتێ نها دیارە رەوشەکا وەسا نینە، ئەو یەک ژی نیشا ددەت د رەوشەکا وەسا ئالۆز دا هەکە هەلبژارتن بهێنە کرن دێ کورد تووشی زیانەکا مەزن بن، خالا دی یا گرنگ ژی عەرەب ب هەمی رەنگەکێ کار دکەن دا نەهێلن چو گوهۆڕینەک د رەوشا کەرکووکێ دا دروست ببیت، چونکی هەر گوهۆڕینەک روی بدەت دێ د بەرژەوەندییا کوردان دا بیت، ژ بەر هندێ ئەو نها ب هەمی رەنگەکێ کار دکەن دا نەهێلن کورد جارەکا دی ل کەرکووکێ بهێز کەڤن، مخابن وەکو من گۆتی نها ناکۆکییێن گەلەک مەزن د ناڤبەرا پارتییێن کوردستانی دا هەنە، هەکە بەری هەلبژارتنان هەمی هێزێن کوردستانی ل هەولێرێ پێکڤە ل سەر بنەمایێ بەرژەوەندییێن نیشتمانی بگەهنە رێککەفتنەکێ و پێکڤە کار بکەن دێ بۆ کەرکووکێ و ب گشتی بۆ کوردان یا باش بیت، لێ هەتا نها تشتەک وەسا نینە و ژ بەر هندێ ژی ئەز دبێژم هەکە نها هەلبژارتن ل کەرکووکێ بهێنە کرن دێ بۆ کوردان ب تایبەتی ژی دێ بۆ خەلکێ رەسەن یێ کەرکووکێ و دەڤەرێن دی یێن ماددێ ١٤٠ یا خراب بیت، دڤێت بەری هەلبژارتنان رەوشا کەرکووکێ و دەڤەرێن دی یێن گرێدایی ماددێ ١٤٠ بهێنە ئاساییکرن، بێگومان دەستهەلاتا نها یا عیراقێ کارەک وەسا ناکەت، دڤێت کورد ب هەمی هێزا خۆ کار بکەن دا پێگەهێ خۆ یێ جاران ل کەرکووکێ بدەستڤە بینن، بێگومان ئەو یەک ژی دێ گەلەک یا ب زەحمەت بیت».
شێروان دوبەردانی ئەندامێ پەرلەمانێ عیراقێ سەر ب فراکسیۆنا پارتی دیمۆکراتی کوردستان ژی دیار کر: «هەلبژارتنێن ڤێجارێ بێگومان گەلەک گرنگن، هەلبژارتن ب تایبەتی ژی ل کەرکووک، مویسل و دیالە، چونکی هەلبژارتن دێ ل وان دەڤەران دهێنە کرن یێن کوردستانێ نە و مخابن نها ل ژێر کۆنترۆلا چەکدارێن حەشدا شەعبی دانە، د هەلبژارتنێن هەری دویماهیێ یێن جڤاتا پارێزگەهان، کو ل ساڵا ٢٠١٣ێ هاتنە کرن، وی دەمی پارتی دیمۆکراتی کوردستان شییا پتر ژ ٣٠٠ سێ سهد هزار دەنگان بدەستڤە بینیت، پێگەهێ کوردان هەتا بەری خیانەتا ١٦ى ئۆکتۆبەرێ ژی گەلەک بهێز بوو، لێ مخابن پشتی خیانەتا ١٦ى ئۆکتۆبەرێ گەلەک ژ دەڤەرێن کوردستانی کەفتنە ژێر کۆنترۆلا هێزێن عیراقێ و چەکدارێن حەشدا شەعبی، بێگومان نها ژ شەنگالێ بگرە هەتا مەخموور و کەرکووکێ ل ژێر کۆنترۆلا چەکدارێن حەشدا شەعبی دانە و رەوشەکا نەئاسایی ل وان دەڤەران هەیە، ئاشکرایە نها ب هەمی رەنگەکێ کار دهێتە کرن دا کورد ل وان دەڤەران هەر لاواز بن و بهێز نەکەڤن، ژ بەر هندێ ژی حەشدا شەعبی ب هەمی شییانێن خۆ بزاڤا هندێ دکەت نەهێلیت هەلبژارتن ببنە ئەگەرێ گوهۆڕینان، چونکی هەر گوهۆڕینەک ل وان دەڤەران روی بدەت، دێ بیتە ئەگەرێ بهێزبوونا کوردان و ئەو یەک ژی د بەرژەوەندییا حەشدا شەعبی دا نینە».
ناڤهاتی د پشکەکا دی یا ئاخڤتنا خۆ دا ئاماژە ب ڤێ یەکێ ژی کر: «رەوشا نها ل مویسلێ هەکە ئەم بەحس بکەین رەوشەکا گەلەک جودایە، چونکی پشتی ئێرشێن داعشێ و خیانەتا ١٦ى ئۆکتۆبەرێ رێژەکا مەزن یا خەلکی ژ دەڤەرێن خۆ کۆچبەر بووینە، نها ژی حەشدا شەعبی و هێزێن عیراقی بزاڤان دکەن دا ئەو خەلکە پشکدارییێ د هەلبژارتنان دا نەکەن، چونکی ئەو ژی باش دزانن هەکە رێژەیا پشکدارییا کوردان زێدە بیت، دێ ئەو یەک بیتە ئەگەرێ سەرکەفتنا کوردان، چونکی د هەلبژارتنێن هەری دویماهییێ یێن پەرلەمانێ عیراقێ دا پارتی ل مویسلێ ئێکەم بوو و شیا پتر ژ ١٥٠ هزار دەنگان بدەستڤە بینیت، بێگومان ئەو یەک ب دلێ حەشدا شەعبی نینە، چونکی نها حەشدا شەعبی دڤێت ب چەند لیستهیێن جودا پشکدارییێ د هەلبژارتنان دا بکەت، لێ وەکو پارتی دیمۆکراتی کوردستان ئەم ب هەمی رەنگەکێ خۆ بۆ هەلبژارتنێن بهێت یێن جڤاتا پارێزگەهان بەرهەڤ دکەین، سەرکەفتنا پارتی دیمۆکراتی کوردستان ل مویسلی دهێتە ڕامانا سەرکەفتنا کوردان، چونکی هەر کەس باش دزانیت نها پارتی تنێ هێزەکە ل وان دەڤەران بەرەڤانییێ ل مافێن کوردان دکەت».
سەبارەت ب ستراتیژییا هێزێن کوردستانی ل پارێزگەها مویسلێ ژی ئەندامێ پەرلەمانێ عیراقێ دیار کر: « هەمی خەلکێ مە داخواز دکەن کورد ڤێجارێ ب ئێک لیست پشکدارییێ د هەلبژارتنێن جڤاتا پارێزگەهان ل دەڤەرێن کوردستانی یێن دەرڤەیی ئیدارا هەرێما کوردستانێ دا بکەن، بهلێ مخابن دیارە برادەرێن ئێکەتییێ بریارا خۆ داینە، وان دڤێت ل گەل جەماعەتێن پەکەکێ و هێزێن حەشدا شەعبی وەکو ئێک لیست پشکدارییێ د هەلبژارتنان دا بکەن، ژ بەر هندێ ژی ئەم وەکو پارتی دیمۆکراتی کوردستان دێ ب رەنگەکێ باش کار کەین، دڤێت ئەم خۆ بۆ هەلبژارتنێن ڤێجارێ باش بەرهەڤ بکەین، پارتی ل وان دەڤەران پتر ژ دو هزار شەهید داینە، ب هزاران خەلکێ مە ئاوارە بووینە، بهلێ خەلکێ مە دلسۆزە و دێ پشتەڤانییێ ل لیستا پارتی دیمۆکراتی کوردستان کەن، دڤێت ئەم وەسا کار بکەین دا جارەکا دی پارتی سەرکەفتنەکا مەزن و دیرۆکی تۆمار بکەت، ئەو یەک بۆ پاشەرۆژا کوردان ل پارێزگەها مویسلێ ژی دێ گەلەک یا گرنگ بیت».
شێروان دوبەردانی ئەو یەک ژی نەڤەشارت: «ڤێجارێ دێ هەڤڕکییەکا گەلەک مەزن ل پارێزگەها مویسل هەبیت، چونکی هەر ژ نها ڤە گەلەک لایەنان خۆ بەرهەڤ کرینە، دێ ڤێجارێ گەلەک لیستهیێن جودا جودا هەڤڕکییێ ل سەر ٢٦ کورسییێن پارێزگەها مویسلێ کەن، هەروەسا سێ کورسی ژی بۆ کۆتا نە، ژ بەر هندێ ژی ئەم هێڤیدارین هەم ل پارێزگەها مویسل و هەم ژی ل دەڤەرێن دی یێن کوردستانی یێن دەرڤەیی ئیدارا هەرێما کوردستانی کورد بشێن کورسییێن باش بدەستڤە بینن، سەرکەفتنا کوردان، ب تایبەتی ژی سەرکەفتنا پارتی دیمۆکراتی کوردستان د هەلبژارتنێن ڤێجارێ دا دێ کاریگەرییەکا خۆ یا مەزن بۆ پاشەرۆژا کوردان ل دەڤەرێن کوردستانی یێن دەرڤەیی ئیدارا هەرێما کوردستانێ هەبیت، ژ بەر هندێ ژی ئەز وەسا دبینم ڤێجارێ هەم ل پارێزگەها مویسل و هەم ژی ل کەرکووکێ دێ هەڤڕکییەکا گەلەک مەزن هێتە کرن، ڤێجا دهێتە خواستن هەم پارتی دیمۆکراتی کوردستان و هەم ژی ئالییێن دی بۆ سەرکەفتنا ئیرادا گەلێ مە کار بکەن، هەکە پارتی دیمۆکراتی کوردستان و کورد بشێن د هەلبژارتنێن ڤێجارێ دا هەم ل مویسلێ و هەم ژی ل کەرکووکێ و دەڤەرێن دی هژمارەکا بەرچاڤ یا کورسییان بدەستڤە بینن ئەو یەک دێ بیتە ئەگەر گەلەک پیلانێن دوژمنان ل دژی گەلێ مە ژناڤ بچن، ژ بەر هندێ ژی بهێزبوونا کوردان ب تایبەتی ژی بهێزبوونا پارتی دیمۆکراتی کوردستان ل دەڤەرێن کوردستانی یێن دەرڤەیی ئیدارا هەرێما کوردستانێ دێ بیتە ئەگەرێ هندێ هەڤسەنگییێن سیاسی د بەرژەوەندییا گەل مە دا بهێنە گوهۆڕین، ئەو یەک ژی بێگومان سەرکەفتنەکا مەزنە و دێ کاریگەرییەکا خۆ یا مەزن ل سەر پێگەهێ کوردان ل بەغدا ژی هەبیت».
سەیدۆ چەتۆ شنگالی سەرۆکێ بەرێ یێ جڤاتا پارێزگەها نەینەوا ژی دیار کر: «هەلبژارتنێن ڤێجارێ ب تایبەتی ژی بۆ پارێزگەها نەینەوا دێ گەلەک گرنگ بن، چونکی بەری نها هژمارا کورسیێن جڤاتا پارێزگەها نەینەوا ٣٩ بوون و ڤێجارێ دێ بنە ٢٩، بێگومان دەمێ هژمارا کورسییان کێمتر لێ بهێت دێ وی دەمی هەڤڕکی زێدەتر لێ هێت و ئەو یەک ژی دێ وەسا کەت هەر ئالییەک پتر کار بۆ بدەستڤەئینانا کورسییێن جڤاتا پارێزگەها نەینەوا بکەت، چونکی وەکو پارێزگەهـ، نەینەوا دویەم پارێزگەها هەری مەزن یا عیراقێ یە، هەروەسا گەلەک پێکهاتێن نەتەوەیی و ئایینی ل نەینەوا هەنە، وان ژی دڤێت د هەلبژارتنێن ڤێجارێ دا پێگەهێ خۆ بهێز بکەن، ژ بەر هندێ ژی ئەز دبێژم دێ هەلبژارتنێن ڤێجارێ گەلەک جوداتر بن ژ هەلبژارتنێن ساڵا ٢٠١٣، ل پارێزگەها نەینەوا ٣١ یەکەیێن ئیداری هەنە و ١٦ ژ وان دکەڤنە دەڤەرێن ماددا ١٤٠، ژ بەر هندێ ژی ئەڤ هەلبژارتنە دێ گەلەک گرنگ بن، دێ دیار بیت کا کیژ هێزێ پتر کاریگەرییا خۆ یا هەی، ئەو یەک ژی دێ بیتە ئەگەرێ رویدانا گوهۆڕینێن مەزن، وەکو نموونە د هەلبژارتنێن هەری دویماهییێ یێ جڤاتا نوینەرێن عیراقێ ل بازنێ شنگالێ هەر سێ بەربژارێن پارتی دیمۆکراتی کوردستان شیان سەرکەڤن و بچنە پەرلەمانی، نها ژی مە دڤێت دیسان پارتی دیمۆکراتی کوردستان وەکو هێزا ئێکێ سەرکەڤیت و نوینەرێن وێ بچنە جڤاتا پارێزگەها نەینەوا».
ناڤهاتی د پشکەکا دی یا ئاخڤتنا خۆ دا ئاماژە ب ڤێ یەکێ ژی کر: «پارتی بۆ ڤان هەلبژارتنان ژی بەرهەڤییێن باش کرینە، د هەلبژارتنێن جڤاتا پارێزگەهان یا نەینەوا ل سالا ٢٠١٣ پارتی هێزا ئێکێ بوو، هەروەسا د هەلبژارتنێن ساڵا ٢٠٢١ێ یا جڤاتا نوینەرێن عیراقێ ژی پارتی ل پارێزگەها نەینەوا هێزا ئێکێ بوو و شیا ٩ نههـ کورسییان بدەستڤە بینیت و ژ بۆ ڤان هەلبژارتنان ژی ئەم ب باوەرین دیسان دێ پارتی دیمۆکراتی کوردستان ل سەر ئاستێ جڤاتا پارێزگەها نەینەوا بیتە هێزا ئێکێ، راستە نها گەلەک هەڤپەیمانی هاتینە دروستکرن و دێ ڤێجارێ هەڤڕکییەکا گەلەک دژوار هەبیت، لێ مە باوەری ب جەماوەرێ خۆ یێ هەی، پارتی دیمۆکراتی کوردستان هەتا نها گەلەک خزمەتا خەلکی کرییە و خەلک باش دزانیت دێ دەنگێ خوە دەنە کیژ لیستێ، سەرکەفتنا پارتی د ڤان هەلبژارتنان دا دێ بیتە ئەگەرێ هندێ پتر خزمەتا خەلکێ پارێزگەها نەینەوا و ب تایبەتی ژی یا ئێزدیان بهێتە کرن، ئەز وەسا دبینم دێ بەربژارێن ڤێجارێ یێ پارتی ژی ئەو کەس بن یێن جهێ باوەرییا خەلکی بن، کەسێن بسپۆر بن دا خەلک ژی دەنگێ خۆ بدەتە وان، رێژەیا کوردان ل پارێزگەها نەینەوا د ناڤبەرا ٣٠ هەتا ٣٣٪ یە، د هەلبژارتنێن بەری نها کوردان ١٣ کورسی هەبوون و هێڤیدارم ڤێجارێ ژی کورد بشێن سەنگا خۆ یا بەری نها بپارێزن دا پتر خزمەتا خەلکی بهێتە کرن».
سەرۆکێ بەری یێ جڤاتا پارێزگەها نەینەوا ئەو یەک ژی دیار کر: «سیستەمێ هەلبژارتنان یێ ڤێ جارێ لیستا ڤەکرییە، ئێک بازنە یە، ئەو یەک ژی دێ بۆ کوردان گەلەک باش بیت، هەکە کەسەک د ناڤ خەلکی دا پێگەهێ خۆ هەبیت و کەسەک خوشتڤی بیت دێ شێت رێژەیەکا زێدە یا دەنگان بدەستڤە بینیت، ژ بەر ڤێ یەکێ ژی گەلەک گرنگە کەسێن هەژی، شارەزا بهێنە بەربژار کرن دا خەلک دەنگێ خۆ بدەتێ، وەکو من گۆتی بەری نها ژی پارتی شییا ب رێیا بەربژارکرنا کەسێن هەژی رێژەیەکا زێدە یا دەنگان بدەستڤە بینیت و ببیتە هێزا ئێکێ و ئەز باوەرم دیسان دێ پارتی هەر بیتە هێزا ئێکێ ل پارێزگەها نەینەوا، پارتی ئەزموونەکا گەلەک باش یا هەی، د هەلبژارتنێن سالا ٢٠٢١ یێ جڤاتا نوینەرێن عیراقێ ژی ئەو یەک باش هاتە سەلماندن، خەلکێ مە ژی دزانیت پارتی چەند خەمخورە و خزمەتا وان کرییە، ئەز وەسا دبینم پارتی د هەلبژارتنێن ڤێجارێ ل پارێزگەها نەینەوا دا دێ شێت سەرکەفتنەکا مەزن تۆمار کەت».
