گۆڤارا مەتین گۆڤارا مەتین
دیدار: هۆشەنگ تاجر
بسپۆرەکێ کاروبارێن تورکیا دیار دکەت، سەرەرای پێشبینییا گەلەک ژ چاڤدێران و کۆمپانییێن راپرسییان، کو ل سەر ڤێ باوەریێ بوون دێ ئەردۆغان تووشی شکەستنێ بیت، لێ ئەردۆغان سەرکەفت و تورکیا د ٥ ساڵێن بهێت دا ب سەرۆکاتییا ئەردۆغانی دێ بزاڤا هندێ کەت دا پەیوەندییێن خۆ ل گەل وەلاتێن عەرەبی ب تایبەتی ژی مسرێ و سعوودییێ باش بکەت و سەبارەت ب هەرێما کوردستانێ ژی تورکیا د دەمەکێ کورت دا چو گوهۆڕینەکا وەسا د سیاسەتا خۆ ل هەمبەر هەرێما کوردستانێ ناکەت، چونکی هەڤسەنگییێن سیاسی ل رۆژهەلاتا ناڤین وەسا دخوازن تورکیا گرنگییەکا تایبەت بدەتە هەرێما کوردستانێ و پەیوەندییێن ئابۆری و سیاسی یێن د ناڤبەرا تورکیا و هەرێما کوردستانێ دا دێ بەردەوام بن چونکی ئەو یەک د بەرژەوەندییا تورکیا دایە.
مستەفا شەفیق چاڤدێرێ سیاسی و بسپۆرێ کاروبارێن تورکیا د دیدارەکا تایبەت دا بۆ مەتین دیار کر: «ل گۆر خرابییا رەوشا سیاسی و ئابۆری یا تورکیا پێدڤی بوو ڤێجارێ ئەردۆغان د هەلبژارتنان دا تووشی شکەستنێ ببیت، پڕانیا پێشبینییێن بەری هەلبژارتنان ژی وەسا بوون، ب تایبەتی ژی پشتی بیڤەلەرزا ڤێ دویماهییێ رەوشا ئابۆری یا تورکیا گەلەک خراب بوو، ل ئالییێ دی پەیوەندییێن تورکیا ل گەل وەلاتێن ئێکەتییا ئەورۆپا، ئەمریکا و ب تایبەتی ژی ل گەل وەلاتێن ئەندامێن ناتۆ گەلەک خرابن، ئانکۆ ئەردۆغان د رەوشەکا گەلەک خراب دا بوو و پێدڤی بوو ڤێجارێ د هەلبژارتنان دا سەرکەفتی نەبیت، لێ بەرۆڤاژی هەمی پێشبینییان ئەردۆغان سەرکەفت، ئەو یەک ژی نیشا ددەت د جڤاکێ تورکیا دا هندەک فاکتەرێن جودا هەنە و بووینە ئەگەرێ سەرکەفتنا ئەردۆغانی د هەلبژارتنان دا، فاکتەرێ هەری گرنگ و سەرەکی ژی ئەوە د ڤان دەمێن دویماهیێ ل تورکیا دا پێلەکا نەتەوەپەرستییێ پێشکەفتییە، بێگومان ڤێ یەکێ کاریگەرییەکا گەلەک مەزن ل رێژەیا پشکدارییا خەلکی و هەروەسا ل ئەنجامێن هەلبژارتنان کرییە.
چاڤدێرێ سیاسی ئەو یەک ژی نەڤەشارت: «دەمەکە ل تورکیا گەلەک بەحسێ بابەتێ مان و نەمانا تورکیا دهێتە کرن، د دیرۆکا تورکیا دا هەردەم بەحسێ هندێ هاتییە کرن، وەلاتێن دەودورێن تورکیا یێن وەکو، رۆسیا، یونان، بولغارییا، ئیران و کورد هەمی دوژمنێ تورکیا نە، وان دڤێت تورکیا نەهێلن، ب تایبەتی ژی د ڤان ساڵێن دویماهییێ دا پەیوەندیێن تورکیا ل گەل ئەمریکا د باش نینن و ل ئالیێ دی ل سووریێ و رۆژئاڤایێ کوردستانێ گەلەک گوهۆڕین دروست بووینە، ب تایبەتی ژی ل رۆژئاڤایێ کوردستانێ رەوشەکا نوی بۆ کوردان هاتە پێش، هەروەسا ل هەرێما کوردستانێ ژی کوردان شییان تا رادەیەکێ پێگەهێ خۆ بهێز بکەن، ئەو یەک ژی بێگومان د بەرژەوەندییا تورکیا دا نینە، ژ بەر ڤان خالان ژی بابەتێ مان و نەمانا تورکیا وەکو پرسەکا ستراتیژی کەفتە د رۆژەڤێ دا، نەتەوەپەرستێن تورکیا ڤان بابەتان هەمییێ وەکو مەترسیەکا مەزن ل سەر مانا خۆ دبینن، چەندین خالێن دی یێن گرنگ ژی هەنە، کو وەسا کرن ئەردۆغان سەرکەڤیت، ژ وان ژی ئۆپۆزسیۆنا تورکیا وەکو پێدڤی د هەوا پرۆپگاندا هەلبژارتنان دا کار نەکرن، وان وەسا هزر دکر ئەردۆغان گەلەک لاوازە و د هەلبژارتنێن هەری دویماهییێ یێ باژێرڤانییان دا ژی تووشی شکەستنێ هاتییە، ل ئالیێ دی ئەمریکا و پڕانییا وەلاتێن ئێکەتییا ئەورۆپا ژی پشتەڤانی ل کلچدار ئۆغلۆیی دکرن، هەر شەش پارتییێن ئۆپۆزسیۆنێ ژ بەر هندێ وەسا هزر دکرن دێ ڤێجارێ سەرکەڤن، لێ دڤێت ئەم باش بزانین نە د دیرۆکا ئۆسمانییان و نە ژی د دیرۆکا کۆمارا تورکیا دا هەتا نها کەسەک عەلەوی نەشییایە پلێن بلند بدەستڤە بینیت، ل ئالیێ دی ئەردۆغانی ژی شییا پشتەڤانییا هەدەپێ بۆ کلچدار ئۆغلۆیی وەکو بابەتێ تیرۆرێ د بەرژەوەندییا خۆ دا بکار بینیت، ئەوێ یەکێ کاریگەرییەکا مەزن ل هەستێ نەتەوەپەرستان کر و مە دیت کا چاوا ڤێجارێ رێژەیا پشکدارییا وەلاتییان د هەلبژارتنێن تورکیا دا زێدە بوو».
سەبارەت ب هندێ ئایا پشتی هەلبژارتنان دێ هەلوەستێ ئەردۆغانی ل هەمبەر کوردان ل باکوورێ کوردستانێ چاوا بیت ژی مستەفا شەفیق راگەهاند، د هەلبژارتنێن ڤێجارێ دا ژی هەم ئاکپارتییێ و هەم ژی ئەردۆغانی ل گەلەک پارێزگەهێن باکوورێ کوردستانێ شییاینە دەنگێن باش بدەستڤە بینن و رێژەیا دەنگێن خۆ بپارێزن، لێ ژ بەر پشتەڤانییا هەدەپێ یا بۆ کلچدار ئۆغلۆیی ڤێجارێ د هەلبژارتنان دا دەنگێن کلچدار ئۆغلۆیی ل پارێزگەهێن باکوورێ کوردستانێ زێدە بووینە، چونکی ئەم دزانین دێ ل مەها ئادارا ساڵا ٢٠٢٤ هەلبژارتنێن پاژێرڤانییان ل تورکیا و باکوورێ کوردستانێ هێنە کرن، ژ بەر هندێ ژی هەتا ئەو هەلبژارتن بهێنە کرن ئەز باوەر ناکەم، هەلوەستێ نها یێ توند یێ ئەردۆغانی ل هەمبەر هەدەپێ بهێتە گوهۆڕین، چونکی مە دیت پشتی سەرکەفتنا خۆ ئەردۆغانی ب رەنگەکێ توند ئێرشی هەدەپێ کر و ژ بۆ سەلاحەدین دەمیرتاشی ژی دیار کر ئەو کەسەک تیرۆرستە و ب چو رەنگەکێ ناهێتە ئازاد کرن، ژ بەر هندێ ئەز وەسا دبینم هەتا هەلبژارتنێن باژێرڤانییان ئەردۆغان چو گوهۆرینەکا بەرچاڤ د سیاسەتا خۆ دا ل هەمبەر هەدەپێ ناکەت».
ناڤهاتی د بەردەوامییا ئاخڤتنا خۆ دا ئەو یەک ژی دیار کر: «د ڤان هەلبژارتنان دا نەتەوەپەرستان ب رەنگەکێ باش پشتەڤانییا ئەردۆغانی کرن و بوونە فاکتەرەک گرنگ و کاریگەر د سەرکەفتنا وی دا، ئەم دزانین ئەردۆغانی بەری نها دەست ب قۆناغا چارەسەرییا پرسا کوردی ل تورکیا کربوو و هندەک تشت ژی هاتنە کرن، لێ پاشی ژ بەر گەلەک ئەگەران ئەو یەک هاتە راوەستاندن. لێ ل ئالیێ دی نها تورکیا د قەیرانەکا مەزن یا ئابۆری دایە، پەیوەندییێن تورکیا ل گەل وەلاتێن ئێکەتییا ئەورۆپا و ئەمریکا ژی باش نینن، ژ بەر هندێ پشتی هەلبژارتنێن باژێرڤانییان ل ساڵا ٢٠٢٤ و ل گۆر ئەنجامێن وێ رەنگە ئەردۆغان ژی هندەک گوهۆڕینان د سیاسەتا خۆ یا دەرڤە دا بکەت، لێ هەتا هەلبژارتنان دێ سیاسەتا وی یا توند ل هەمبەر هەدەپێ بەردەوام بیت».
بسپۆرێ کاروبارێن تورکیا سەبارەت ب هەلوەستێ ئەردۆغانی ل هەمبەر رۆژئاڤایێ کوردستانێ ژی راگەهاند: « کا چاوا من بەری نها گۆت دێ هەلوەستێ ئەردۆغانی ل هەمبەر هەدەپێ توند بیت وەسا دێ هەلوەستێ وی ل هەمبەر پەیەدێ و هێزێن سووریا دیموکرات ژی هەر توند بیت، ئەردۆغان بەری نها گەلەک جاران گەفا ئێرشەکا سەربازی یا نوی ل دژی رۆژئاڤایێ کوردستانێ دکر، هەتا ساڵا بۆری ژی گەلە بزاڤکرن دەست ب ئۆپەراسییۆنەکا نوی ل دژی رۆژئاڤایێ کوردستانێ بکەت، لێ ئەمریکا و وەلاتێن هەڤپەیمان رێ نەدان تورکیا دەست ب ئۆپەراسییۆنەکا نوی بکەت، وی دەمی ئێک ژ ئارمانجێن سەرەکی یێن ئەردۆغان ژ گەفێن بۆ دەستپێکرنا ئۆپەراسییۆنەکا سەربازی بۆ بابەتێ هەلبژارتنان بوو، لێ ئەز باوەرم ناکەم ئێدی تورکیا کارەکێ وەسا بکەت، ئەز وەسا دبینم دێ ستراتیژییا نوی یا تورکیا و ئەردۆغانی پتر ل سەر بنەمایێ رێککەفتنێن سیاسی ل گەل رۆسیا، سووریێ و هەتا ئیرانێ بیت، تورکیا دێ سیاسەتا خۆ یا گوهۆڕینا دیمۆگرافییا رۆژئاڤایێ کوردستانێ ژی ب رەنگەکێ مەزن برێڤە بەت، د دەمێ پرۆپگاندا هەلبژارتنان دا ژی ئەردۆغانی گەلەک جاران دیار کر ئەو دێ هەری کێم ئێک ملیۆن پەنابەرێن سوورییێ ل دەڤەرێن ئارام یێن سووریێ بجه کەن، هەر کەس ژی باش دزانیت دەڤەرێن ئارام یێن، کو ئەردۆغان بەحسێ وان دکەت ئەو دەڤەرێن باکورێ سوورییێ و رۆژئاڤایێ کوردستانێ نە یێن بەری نها تورکیا داگیر کری وەکو عەفرینێ، سەرێکانیێ و گەلەک جهێن دی».
مستەفا شەفیق ئاماژە ب هندێ ژی کر: «ئەردۆغان دێ گەلەک کار ل سەر هندێ کەت دا بشێت ب رێیا رۆسیا رژێما بەشاری ژی رازی بکەت دا ل دژی پەیەدێ پێکڤە بکار بکەن، تورکیا دێ ب هەمی رەنگەکێ بزاڤا هندێ کەت دا پەیەدێ گەلەک لاواز بکەت یان ژی ژناڤ ببەت، لێ ئەو یەک ژی گەلەک ب ساناهی نابیت، چونکی گەلەک هەڤسەنگیێن سیاسی و ئالۆز ل دەڤەرێ هەنە، ئێک ژ وان بابەتان ناکۆکییێن تورکیا و ئیرانێ نە، ئایا ئیران دێ وەسا رێ دەت دا تورکیا بشێت ل سووریێ و دەڤەرێ پتر پێگەهێ خۆ بهێز بکەت، هەروەسا ل سوورییێ ژ بلی تورکیا و رۆسیا هێزێن ئەمریکا هەنە، ئەمریکا ژی هەتا نها ئاستەنگیێن مەزن ل هەمبەر ستراتیژییا تورکیا دروست کرینە، ئایا دێ ئەمریکا رازی بیت تورکیا پلانێن خۆ ل باکوورێ سوورییێ و رۆژئاڤایێ کوردستانێ بجه ئینیت یان نە، ئەو یەک ژی بێگومان رەوشەک ئالۆزە، ب کورتی دێ گەلەک ئاستەنگی ل هەمبەر ستراتیژییا تورکیا ل سووریێ دروست بن، لێ تورکیا ژی دێ ب هەمی رەنگەکێ کار کەت دا نەهێلیت پەیەدە ل رۆژئاڤایێ کوردستانێ بهێز کەڤیت و دێ ژ بۆ هندێ ل گەل حوکمەتا سوورییێ ژی دانوستاندنان کەت».
ل دۆر هندێ کا دێ سیاسەتا تورکیا پشتی سەرکەفتنا ئەردۆغانی ل هەمبەر هەرێما کوردستانێ چاوا بیت ژی مستەفا شەفیق راگەهاند: « دەمێ ئاکپارتی ل تورکیا هاتە سەر دەستهەلاتێ دەست ب قۆناغەکا نوی ل گەل کوردێن باکوور کر، وی دەمی بۆ تورکیا و ب تایبەتی ژی بۆ ئاکپارتییێ و ئەردۆغانی گەلەک ئاشکرا بوو بێ هەرێما کوردستانێ بابەتێ چارەسەرکرنا پرسا کوردی ل تورکیا و باکوورێ کوردستانێ دێ یا ب ساناهی نەبیت، ژ بەر هندێ ژی سەرەرای فشارێن نەتەوەپەرستان لێ ئەردۆغانی دەست ب قۆناغا چارەسەرییا پرسا کوردی کر و پەیوەندییێن تورکیا و هەرێما کوردستانێ ژی وی دەمی گەلەک باش بوون، لێ نها رەوش هاتییە گوهۆڕین، چونکی نها چ تشتەک ب ناڤێ قۆناغا ئاشتییێ ل تورکیا نینە و هەروەسا گەلەک گوهۆرینێن مەزن ژی هەم ل دەڤەرێ و هەم ژی د ناڤ تورکیا بخۆ دا رویداینە، ب تایبەتی ژی هەلبژارتنێن ڤێجارێ یێن تورکیا گەلەک جودا بوون، ب رەنگەکێ ئاشکرا شەرەک مەزن د ناڤبەرا ئیسلامی و عەلمانییان دا بوو، ئەو یەک ژی دێ کاریگەرییەکا خۆ یا مەزن ل سیاسەتا چەند ساڵێن بهێت یا تورکیا ب تایبەتی ژی یا ئەردۆغانی ل هەمبەر کوردان کەت، هەتا دو ساڵێن دی ئەز باوەر ناکەم تورکیا سیاسەتەکا وەسا توند ل هەمبەر هەرێما کوردستانێ برێڤە ببەت، هەکە تورکیا شییا پەیوەندییێن خۆ ل گەل شامێ، تەهرانێ و بەغدایێ باش بکەت وی دەمی دێ کار بۆ هندێ کەت دا هەرێما کوردستانێ ئەو سەنگا جاران د هەڤسەنگییێن سیاسی ل دەڤەرێ دا نەبیت، لێ ئەو یەک ژی ب ساناهی نابیت، چونکی ژ بلی تورکیا گەلەک فاکتەرین دی یێن کاریگەر ل دەڤەرێ هەنە، بۆ تورکیا ژی وەسا ئاسان نابیت بشێت د دەمەکێ کورت دا پەیوەندییێن خۆ ل گەل سوورییێ، بەغدا و ئیرانێ ئاسایی بکەت، هەبوونا ئالۆزییان و ناکۆکییێن ل دەڤەرێ ژی دێ وەسا کەت تورکیا ژ بۆ بەرژەوەندییێن خۆ و بهێزکرنا پێگەهێ خۆ گرنگییەکا جودا بدەتە هەرێما کوردستانێ).
ناڤهاتی ئاماژە ب هندێ ژی کر: «کاریگەرییا ئیرانێ ل سەر مەیدانا شیعە ل ئیراقێ ب هەمی رەنگەکێ ئالۆزییان ژ بۆ ستراتیژییا تورکیا دروست دکەت، هەتا هەلوەستێ ئیرانێ وەسا بیت تورکیا ژی دێ یا نەچار بیت گرنگییەکا مەزن بدەتە سوننە و کوردان ل ئیراقێ، ئەو یەک ژی بێگومان دێ وەسا کەت دەلیڤە بۆ هەرێما کوردستانێ پتر ببن دا بشێت د هەڤسەنگییێن سیاسی ل ئیراقێ و دەڤەرا دا پێگەهێ خۆ هەبیت، لێ ئەو یەک تنێ تێر ناکەت و ل گۆر باوەرییا من خالا هەری گرنگ ژ بۆ هەرێما کوردستانێ ئەوە، دڤێت هەر دو هێزێن سەرەکی یێن ل هەرێما کوردستانێ دەست قۆناغەکا نوی بکەن، دڤێت ئێدی پارتی و ئێکەتی ل هەمبەر بەغدا، تورکیا و ئیرانێ خۆدان سیاسەتەکا ئێکگرتی بن، نابیت پارتی ب رەنگەکێ سەرەدەریێ ل گەل بەغدا و ئەنقەرە بکەت و ئێکەتی ژی ب رەنگەکێ دی، براستی ژی ئەو یەک مەترسییەکا خۆ یا گەلەک مەزن بۆ پاشەرۆژا هەرێما کوردستانێ یا هەی، دڤێت ئێدی ل هەرێما کوردستانێ سیاسەتەکا ئێکگرتی ل هەمبەر ئەنقەرە، بەغدا و تەهرانێ هەبیت، ئەو یەک گەلەک گرنگە، دەمێ کورد ل هەرێما کوردستانێ د سیاسەتا دەرڤە دا ئێکگرتی بن وی دەمی دێ هەلوەستێ وان وەلاتان ژی ل هەمبەر هەرێما کوردستانێ ب رەنگەکێ باش هێتە گوهۆڕین».
سەبارەت ب سیاسەتا چەند ساڵێن بهێت یا تورکیا ل هەمبەر وەلاتێن عەرەبی ژی ناڤهاتی دیار کر : «د چەند ساڵێن بۆری دا تورکیا دەستێوەردان د کاروبارێن ناڤخۆیی یێن وان وەلاتان کر یێن ئالۆزی تێدا هەبوون، ب تایبەتی ژی ل سوورییێ، لیبیا، ئیراقێ و ڤێ دویماهیکێ ژی تورکیا بوو پشکەک ژ ئالۆزییێن د ناڤبەرا ئازەربایجان و ئەرمەنستانێ دا، لێ ئەو یەک وەسا کر تورکیا پتر تەنگاڤ ببیت، ژ بەر دەستێوەردانێن تورکیا ژی هەمی وەلاتێن عەرەبی خۆ ژ تورکیا دویر کرن، هەروەسا ئەمریکا و وەلاتێن ئێکەتییا ئەورۆپا ژی نەرازیبوونا خۆ ل هەمبەر تورکیا دکرن و ئەو یەک ژی بۆ ئەگەرێ هندێ تورکیا تووشی قەیرانەکا گەلەک مەزن بوو، کاریگەرییا وێ قەیرانێ هەتا نها ژی ل سەر تورکیا هەیە و تورکیا د قەیرانەکا مەزن یا ئابۆری دایە، د دو ساڵێن بۆری دا ئەردۆغانی خواست هندەک گوهۆڕینان بکەت و پەیوەندییێن خۆ ل گەل وەلاتێن عەرەبی و ئەو وەلاتێن دی یێن پەیوەندییێن وان ل گەل تورکیا خراب ببوون باش بکەت، لێ هەتا نها ژی ئەو یەک نەهاتییە کرن، چونکی ل ئالییەکێ ئیرانێ نەهێلا تورکیا پێگەهێ خۆ پتر ل دەڤەرێ بهێز بکەت و ببیتە مەترسی بۆ بەرژەوەندییێن وێ و ل ئالییێ دی ئەمریکا و وەلاتێن ئێکەتییا ئەورۆپا دیتن تورکیا مەترسییێ بۆ وان دروست دکەت، ژ بەر هندێ ژی رێگری ل تورکیا کرن».
بسپۆرێ کاروبارێن تورکیا ئەو یەک ژی دیار کر: «بێگومان دێ ئەردۆغان دەست ب سیاسەتەکا نوی کەت، د گۆتارا خۆ یا پشتی هەلبژارتنان دا ژی ئەردۆغانی ب رەنگەکێ ئاشکرا دیار کر، وان دڤێت پەیوەندییێن خۆ ل گەل وەلاتێن دەڤەرێ باش بکەن، ب تایبەتی ژی تورکیا دڤێت پەیوەندییێن خۆ ل گەل سعوودیێ و وەلاتێن دی یێن کەنداڤی باش بکەت، چونکی وەکو من گۆتی تورکیا د قەیرانەکا مەزن یا ئابۆری دایە، پێدڤییا تورکیا ب هندێ هەیە ئابۆرییا خۆ بهێز بکەت، بێگومان د ڤێ چارچۆڤێ دا تورکیا دێ گرنگییێ دەتە بهێزکرنا پەیوەندییێن خۆ یێن ئابۆری ل گەل هەرێما کوردستانێ ژی، چونکی ئەو یەک د بەرژەوەندییا تورکیا دایە، د دەمەکێ کورت دا تورکیا نەشێت هەمی تشتان بکەت لێ هەمی بزاڤێن تورکیا دێ بۆ هندێ بن د چەند ساڵێن بهێت دا پەیوەندییێن خۆ ل گەل ئیراقێ، ئیرانێ، سعوودییێ و وەلاتێن دی باشتر بکەت، لێ ئەو یەک ژی ب ساناهی نابیت، چونکی گەلەک وەلاتێن دەڤەرێ هەنە وان ناکۆکی ل گەل تورکیا هەنە، ب تایبەتی ژی ئیران، چونکی نها ناکۆکییێن مەزن د ناڤبەرا ئیرانێ و ئازەربایجانێ دا هەنە و وان ناکۆکییان کاریگەریا خۆ ل پەیوەندییێن ئیرانێ و تورکیا ژی کریە».
مستەفا شەفیق ئاماژە ب هندێ ژی کر: «هەرێما کوردستانێ و ب گشتی بابەتێ کوردان بۆ ئەمریکا و وەلاتێن ئێکەتییا ئەورۆپا گرنگە، مە دیت د چەند ساڵێن بۆری دا ژی وان گرنگی دانە هەرێما کوردستانێ، هەرێما کوردستانێ ژی ل گۆر سەنگا خۆ د هەڤسەنگییێن سیاسی ل دەڤەرێ دا خۆدان رۆل بوویە، هەرچەندە بەغدا، ئیرانێ و تورکیا د چەند ساڵێن بۆری دا بەردەوام بزاڤا هندێ کرینە دا رۆلێ هەرێما کوردستانێ گەلەک لاواز بکەن یان ژی نەهێلن، لێ هەڤسەنگییێن سیاسی ل رۆژهەلاتا ناڤین و هەبوونا هێزێن جیهانی ل ڤێ دەڤەرێ وەسا کریە، هەرێما کوردستانێ ژی د هەڤسەنگییێن سیاسی دا خۆدان رۆل بیت، ژ بەر هندێ ژی تورکیا ژ بۆ پاراستنا بەرژەوەندییێن خۆ هەردەم بزاڤ کرییە ل گۆر راستییێن هەی سەرەدەریێ ل گەل هەرێما کوردستانێ بکەت، د دەمەکێ کورت دا ژی ئەز باوەر ناکەم هەلوەستێ تورکیا ب رەنگەکێ خراب ل هەمبەر هەرێما کوردستانێ بهێتە گوهۆڕین، راستە دێ تورکیا بزاڤا هندێ کەت دا پەیوەندیێن خۆ یێن سیاسی و ئابۆری ل گەل بەغدا باش بکەت و هەکە بشێت کارەکێ وەسا بکەت دێ هەرێما کوردستانێ پشتگوه هاڤێژیت، لێ هەڤسەنگییێن سیاسی ل دەڤەرێ گەلەک جودانە و رێ نادەن تورکیا یا دڤێت د دەمەکێ کورت دا بکەت، هەبوونا وێ رەوشێ ژی وەسا دکەت هەم تورکیا و هەم ژی ئیران و وەلاتێن دی حسابەکا تایبەت بۆ هەرێما کوردستانێ بکەن).
ناڤهاتی د دویماهییا ئاخڤتنا خۆ دا ئەو یەک ژی دیار کر: «خالا هەری گرنگ و کاریگەر ژ بۆ تورکیا بابەتێ پەیوەندییێن ئیرانێ نە، چونکی ل ئیراقێ و سوورییێ ئیران وەلاتەک کاریگەرە، تورکیا ژی دڤێت ل وان هەر دو وەلاتان خۆدان پێگەهەکێ خۆ یێ تایبەت بیت، هەروەسا نها ئیرانێ دڤێت ل گەل سعوودییێ پەیوەندییێن خۆ ئاسایی بکەت، ئەو یەک ژی دێ کاریگەرییا خۆ ل سەر هەمی دەڤەرێ هەبیت، بابەتێ دی ژی ناکۆکییێن ئیرانێ و ئازەربایجانێ نە، رۆژهەلاتا ناڤین دەڤەرەک گەلەک جودا و تایبەتە، هەر گوهۆرینەک روی بدەت کاریگەریا خۆ ل هەمی وەلاتێن دی دکەت، ژ بەر هندێ ژی ناکۆکیێن د ناڤبەرا تورکیا و ئیرانێ دا وەسا بچویک نینن، کو ب ساناهی بهێنە چارەسەر کرن، ب ساڵانە تورکیا و ئیرانێ ناکۆکییێن مەزن هەنە و هەتا نها ژی ناکۆکییێن وان بەردەوامن، هەبوونا وان ناکۆکییان ژی رەنگڤەدانا خۆ ل سەر رۆژهەلاتا ناڤین هەبوویە، چونکی هەر ئێک ژ تورکیا و ئیرانێ ژ بۆ بەرژەوەندییێن خۆ و لاوازکرنا ئێکتر گەلەک کارتێن جودا بکارئیناینە و ئەو یەک ژی بوویە ئەگەرێ هندێ گەلەک گوهۆڕینێن مەزن ل دەڤەرێ روی بدەن، خالا دی ژی بێگومان بابەتێ ئەمریکا یە، ئەمریکا ژی وەلاتەک گەلەک کاریگەرە ل رۆژهەلاتا ناڤین و هەبوونا ئەمریکا ژی وەسا کرییە هەڤکێشێن هەی ب رەنگەکێ جوداتر ژ داخوازییێن تورکیا و ئیرانێ بەردەوام بن، ڤێجا ئەڤ رەوشا هەی و هەر گوهۆڕینەک ل دەڤەرێ روی بدەت دێ کاریگەرییا خۆ ل سەر سیاسەتا تورکیا هەبیت، بێگومان وەکو من بەری نها ژی دیار کری هەر گوهۆڕینەک ژی ل رۆژهەلاتا ناڤین روی بدەت کاریگەرییا خۆ ل هەمی وەلاتێن دی دکەت، ژ وان ژی هەرێما کوردستانێ».
