ڕەنگە بۆ مرۆڤی یا ب زەحمەت بیت کو ئەو ب خۆ کارێ خۆ بهەلسەنگینیت، ژ لایەکێ دی، یا ب ساناهییە مرۆڤ دیتنا کەسێن دی وەربگریت و ب چاڤێ وان ل کارێ خۆ بنێڕیت. ئەڤ چەندە ژی د بیتە دو ئاراستە:

ئێک: دەما یێن دی ب باشی پەسنا کارێ مرۆڤی دکەن، مرۆڤ پێ کەیفخۆش دیت.

دو: لێ دەما ب نەباشی کارێ مرۆڤی پەسن دکەن و ڕەخنەیەکا نێگەتیڤ لێ دگرن، دڤێت ئەڤ ڕەخنەگرتنە و تێبینییە، ببنە هاندەر، دا کو مرۆڤ پێداچوونەکێ د کارێ خۆ دا بکەت و  ئەڤان دو پرسیاران ژ خۆ بکەت: ئەرێ دێ چاوا شێم بەری خەلکەک هەلسەنگاندنا کاری من بکەت، ئەز ب خۆ هەلسەنگاندنا کارێ خۆ بکەم؟ ئەرێ من کارێ خۆ وەکی پێدڤی ئەنجام دایە یان نە؟

هەر دەم، ئێک ژ رێنمایێن گرنگ یێن ڕێزدار د. سالار عوسمان، بەرپرسێ پشکا ڕەوشەنبیری و ڕاگەهاندنا پارتی دیموکراتی کوردستان، ئەوە کو بەرپرسێ هەر سازییەکێ بەری هەر کەسەکێ دی پێدڤییە هەلسەنگاندنا کارێ وێ سازیێ بکەت یا ئەو ب ڕیڤە دبەت، ئانکو دڤێت ئەو ب خۆ بەری هەر کەسەکی دی هەلسەنگاندنا کارێ خۆ بکەت.

ئەم ل گۆڤارا مەتین، بەری هەر هەژمارەک بچیتە چاپێ و پشتی دهێتە چاپکرن، هەلسەنگاندنێ ژ لایەنێ کوالیتییا چاپکرنێ، جۆر و هەمەڕەنگییا بابەتێن هەژمارێ و دیزاینێ دهەلسەنگینن و تێبینیێن ستافی ل سەر وەردگرین، دا کو د هەژمارێن د دویڤ ڕا ئەوان تێبینییان ل بەرچاڤ وەربگرین.

 ژ بەر ڤێ چەندێ ژی، بەرپرسیارییا مرۆڤی ل سەر کارێ ئەنجام ددەت، بەری بگەهیتە بەر چاڤ و دەستێن خواندەڤانی، دەست پێ دکەت، چونکی پێدڤییە پێڤەرێ ئێکێ و دویماهیێ یێ هەر کارەکی «ویژدانا مرۆڤی» بیت.

دلسۆزی د کاری دا، ئێک ژ خالێن هەری گرنگە و ئەڤە وێ چەندێ ناگەهینیت کو مرۆڤ یێ بێ شاشییە، چونکی چو کارێن مرۆڤ دکەت، ب تمامیی یێ بێ کێماسی نینە. دلسۆزی ئەوە کو مرۆڤ هەمی شیانێن خۆ بکار بینیت و ب ئەنقەست سستییێ نەکەت و ب کێمترین ئاست ڕازی نەبیت.

لەوما دبینین کو پێدڤییە خۆهەلسەنگاندنا کەسی پێش هەلسەنگاندنا خەلکی بکەڤیت. مەبەست ژ خۆهەلسەنگاندنێ نە بەردەوام لێگەڕیانە ل شاشییان، بەلکو نێڕینا بابەتیانەیە بۆ کارێ مرۆڤ دکەت، دا کو مرۆڤ بێژیتە ناخێ خۆ: ل ڤێرێ مە سەرکەفتن ئینا، ل ڤێرێ مە شاشی کر، ل ڤێرێ مە دشییا کارەکێ چێتر ئەنجام بدەین.

ئەو مرۆڤێ کو ب بەردەوامی پێداچوونێ د کارێ خۆ دا دکەت، پێدڤی ب چاڤدێرییا کەسێن دی نینە، ژ بەر کو ئەو د ناخێ خۆ دا، خودان چاڤدێرییەکە کو نە ب ترسێ، بەلکو ب بەرپرسیارییێ کار دکەت. ئەڤە ژی ئەو جوداهییە یا د ناڤبەرا کەسەکێ دا کو کار دکەت، ژ بەر کو کەسەک یێ چاڤدێرییا وی دکەت و کەسەکێ دی کو کار دکەت، چونکی خودان باوەرییە کو ئەوا ئەو دکەت ژ هەژی هندێ یە ب دلسۆزی بهێتە بجهئینان.

ئەو کەسێ دلسۆز د کارێ خۆ دا، ئەوە یێ کو چێدبیت تویشی خەلەتییان ببیت، بەلێ ل خەلەتییا خۆ دزڤڕیت و سەرڕاست دکەت. چێدبیت کەسەک د بزاڤا ئێکێ دا سەرنەکەڤیت، بەلێ شکەستنێ ناکەتە ئەگەر بۆ ڕاوەستیانێ ژ پێداچوونەڤێ.

د گۆڤارەکا ڕەوشەنبیرییا گشتی یا وەکی گۆڤارا «مەتىن» دا، ئەڤ چەندە گەلەک یا گرنگتر لێ دهێت؛ چونکی ئەم سەرەدەریێ ب تشتەکی ناکەین کو ب دویماهیهاتنا هەژمارێ ئێکسپایەر دبیت یان دەم ب سەرڤە دچیت، بەلکو ئەم سەرەدەریێ ل گەل  فەلسەفە، کۆلتوور، زمان، دیرۆک، ئەدەب، هونەر و هزران دکەین. هەر دەقەکێ ئەم د گۆڤارێ دا بەلاڤ دکەین، دبیتە پشکەک ژ ڕەوشەنبیرییا گشتی بۆ خواندەڤانان. هەر وەرگێڕانەک دشێت پەنجەرەیەکێ د ناڤبەرا دو کۆلتووران دا ڤەکەت. هەر گۆتارەک دشێت خواندەڤانەکێ بەر ب هزرکرنێ د بابەتەکێ دی دا ببەت کو بەری هینگی چو جاران هزر تێدا نەکری.

ژ بەر ڤێ یەکێ، بەرێخوەدانا مە بۆ هەر هەژمارەکێ پشتی دەرکەفتنا وێ، ب چەند پرسیاران دەست پێدکەت. ئەرێ مە چ بابەتێن نوی و ب مفا د ڤێ هەژمارێ دا بەلاڤکرینە؟ ئەرێ دەلیڤەیەکا باش دایە گەنجان؟ ئەرێ مە پاراستنا فرەڕەنگییێ کرییە؟ ئایا گۆڤار مایە وەفادار بۆ وێ ئارمانجا کۆلتووری ئەوا ژ بۆ وێ دهێتە وەشاندن؟ ئەڤ جۆرێ پێداچوونێ، وەکی بەرێخوەدانا هەلبەستڤانییە بۆ هەلبەستا خۆ پشتی ژ نڤیسینا وێ ب دویماهی دهێت: چ وێنەیێ هەلبەستکی دشیان دا بوو چێتر بیت؟ کی هەڤۆک پێدڤی ب پێداچوون و داریژتنەکا زێدەتر بوو؟ ل کیڤە وێنە یێ نویتر بوو؟ ل کیڤە زمان یێ ب هێز یان لاواز بوو؟

ئەڤ پسیارە نە ژ بەر هندێ نە کو ئەم ژ کارێ خۆ د ڕازی نینن، بەلکو گرۆڤن کو مە دڤێت ئاستێ گۆڤارێ بپارێزین و پێشتر بێخین.

ب دیتنا مە، ئەو سازییا ل بەراهیێ پێداچوونێ د ناخێ خۆ دا نەکەت، ب دەربازبوونا دەمی، دەست ب دوبارەکرنا خۆ دکەت. لێ ئەو سازییا بەردەوام بپرسیت: مە چ کرییە؟ و پێدڤی بوو مە چ ب کربایە؟ ئەرێ ئەم د نویبوونێ دا د بەردەوامین یان نە؟

هەلبەت واتەیا ئەڤێ چەندێ ئەو نینە کو ئەم گوهدارییا کەسێن دی، ژ خواندەڤان و ڕەخنەگران، ناکەین، بەلکو ئەم هەر دەم مفای ژ ڕەخنەیا وان وەردگرین.

گۆڤارا مەتین، ب تنێ بەرپەڕێن کۆمکری و چاپکری نینە، بەلکو بزاڤەکا ب کۆمە، هەر ئێک ژ مە پشکەکێ ژ دەمێ خۆ، هش و هزرا خۆ و ویژدانا خۆ بۆ دمەزێخیت. لەوڕا، دا کو گۆڤار یا بەردەوام بیت و بەر ب پێشڤە بچیت، ستافێ وێ هەردەم ئەڤێ پرسیارێ ژ خۆ دکەت: ئەم چ بکەین، داکو ئاستێ گۆڤارێ باشتر لێ بکەین؟