دۆزا نەتەوەیی یا کوردستانێ، خەون و ئارمانج و حەز و خواستێن سیاسی و جڤاکی يێن گەلێ کوردستانێ نە کو بزاڤ و خەباتێ بۆ دکەن داکو ناسنامەیا خۆ یا نەتەوەیی بپارێزیت و سەربخۆیا خۆ ب دەستڤە بینیت و چارەنڤیسێ خۆ دەستنیشان بکەت.

هەر د کەڤن دا گەلێ کوردستانێ ب هەمی پێکهاتەیێن خۆ یێن ئەتنی و ئایینی و جڤاکی ڤە، خەبات و بەرخۆدان بۆ کوردستانا ئازاد کریە و شیایە هەبوونا خۆ یا جڤاکی و نەتەوەیی بپارێزیت، بەلێ کوردستان هاتە داگیرکرن و پارچەپارچەکرن و لێکڤەکرن.

ل سەدەیێ بیستێ، پشتی سەرکردەیێ نەتەوەیی بارزانیێ نەمر پارتییا دیموکراتا کوردستانێ دامەزراندی و ب زەلالی دەستنیشانا ئارمانجا نەتەوەیی کری و سەرکێشییا بزاڤا سیاسی و شۆرشگێری کری، بزاڤا رزگارخوازی یا نەتەوەیی ل کوردستانێ گەشەکر و شێوازەکێ نوی ب خۆڤە دیت. ئێدی سنوورێ شۆرشێ ژ سەرهلدانا ناوچەیەکا بچویک، رەهەندێ نەتەوەیی وەرگرت و بەر ب سەرتاسەریێ ڤە چوو و هەمی پێکهاتێن جڤاکێ کوردستانێ ب خۆڤە گرتن.

   بارزانیێ نەمر دبيژیت: «کوردستان ئێک پارچەیە، ئەو سنوورێن کوردستانێ ژێکجودا دکەن دەستکردن، لەوان ب باوەر ڤە دبێژم ئەم دەستبەرداری ئێک بوهوست ژ ئاخا کوردستانێ نابین». بارزانیێ نەمر ئەڤ فەموودە د رێبازا پارتی دا جێگیرکریە و کریە مادەیەکێ کارپێکەر.

پارتییا دیموکراتا کوردستانێ ب سەرۆکاتییا بارزانیێ نەمر و پاشی ب سەرۆکاتییا سەرۆک مەسعود بارزانی ئێکەمین و تاکە رێکخستنا سیاسی یە ب دروستی دەربڕینێ ژ ماف و ئارمانجێن نەتەوەیی یێن کوردستانێ کرین و دکەت و نوینەرایەتییا راستەقینەی یا گەلێ کوردستانێ دکەت و خۆ ل دۆزا وی یا رەوا دکەتە خۆدان و خەبات و تێکوشینێ بۆ دکەت و خۆگۆریکرن و قوڕبانییان بۆ ددەت.

د پەیمانا مللی یا کۆنگرەیێ دامەزراندنێ دا ل ١٦ی تەباخا ١٩٤٦ێ هاتییە: «ب رێکا خەباتا سیاسی کار دکەین ژبۆ دروستکرنا دەولەتا هەڤگرتییا دیموکراتا کوردستانێ ل عیراقێ کو هەر ئێک ژ ویلایەتێن موسل و هەولێر و کەرکوک و سليمانیێ و خانەقینێ ب خۆڤە بگریت». د بەندێ ئێکێ یێ پرۆگرامێ پارتی یێ کۆنگرەیێ ئيکێ ژی دا هاتییە: «ژ ئارمانجێن سیاسی سەربخۆیا تەمام یا کوردستانێ کو ب ڤان رێکێن خوارێ دێ ب وێ ئارمانجێ گەهین:

 ١-خەبات پێناڤی دروستکرنا دەولەتەکا هەڤگرتی د عیراقێ دا ب ناڤێ دەولەتا هەڤگرتییا دیموکراتا کوردستانێ… هتد».

 ل کۆنگرەیێ چاردێ کو ل ٣-٦ ی چریا دویێ ٢٠٢٢ێ برێڤەچووی، ئارمانجێن نەتەوەیی ل بەندێ چارێ یێ پرۆگرامی ب ڤی رەنگی دیارکرینە:

«ئێکەم: بجهئینانا مافێ چارەنڤیسێ نەتەوا کورد و گەلێ کوردستانێ ب رێکێن خەباتا ئاشتییانە و دیموکراتی.

دووەم: پشتەڤانییا دۆزێن رەوا یێن کوردان ل پارچەیێن دی یێن کوردستانێ ژبۆنا بجهئینان و دابینکرنا مافێن وان یێن نەتەوەیی و نیشتیمانی ب رێکێن خەباتا ئاشتییانە و دیموکراتی».

ل درێژاهییا تەمەنێ خۆ، پارتییا دیماکراتا کوردستانێ ل سەر رێبازا نەتەوەیی یا کوردستانێ برێڤە چوویە و هەر دەستکەفتییەکێ نەتەوەیی ل سەر دەستێ پارتی و بارزانی بوویە.

 شۆرشا ١١ ئیلۆنا ١٩٦١ یا نیشتیمانی یا رزگاریخواز، ب سەرۆکاتییا بارزانیێ نەمر رێکەفتننامەیا ١١ی ئادارا ١٩٧٠ێ، ئۆتونۆمی  بۆ کوردستانێ ب دەستڤەئینا. شوڕەشا گولانێ یا رزگاریخواز ل سالا ١٩٧٦ێ ب سەرۆکاتییا مەسعود بارزانی و سەرهەلدانا گەلێ کوردستانێ ل ئادارا ١٩٩١ێ، هەرێما کوردستانێ و فیدرالیەتا هەرێما کوردستانێ ب دەستڤەئینا، و ل سەر هەمان رێباز و ل سەر پشنیارا سەرۆک بارزانی ل ٢٥ ئیلۆنا ٢٠١٧ێ ریفراندۆما سەرخۆبوونا کوردستانێ ب سەرکەفتییانە هاتەکرن.

  مە باوەڕ یا هەی، مادەم کوردستانێ دلسۆز و خەمخۆرێن دۆزا وێ یا نەتەوەیی کو هەڤڕێ یێن رێبازا بارزانی نە هەنە و هەست ب بەرپرسیارییا خۆ یا نەتەوەیی دکەن و ب ئەرک رادبن، کوردستان هەر دێ ب ئارمانجێن خۆ یێن نەتەوەیی گەهیت.