ماریانا چارونتاکی  Marianna Charountaki ، ڤەکۆلەرەکا یۆنانی و پرۆفیسۆرا پەیوەندییێن نێڤدەولەتییە. پتریا کارێن وێ ل دۆر سیاسەتا دەرڤە یا ئەمریکا و جهێ کوردان ل رۆژهەلاتا ناڤینن. وێ خواندنا خوە یا زانکۆیێ ل بوارێ پەیوەندییێن نێڤدەولەتی و خواندنێن رۆژهەلاتا ناڤین ل ئەسینا، ساسێکس و ئێگزیتەر ب دووماهی ئینایە و پاشان دەست ب وانەگۆتن و ڤەکۆلینیێ ل زانکۆیێن ئینگلستانێ کریە.

گرنگیا چارونتاکی ژ وێ ئێکێ دهێت، کو ئەو پرسا کوردان نە بتنێ ژ رەهەندەکێ ئێتنیکی یان مێژوویی، بەلکو د چارچووڤێ پەیوەندییێن نێڤدەولەتی و هەڤکێشەیێن گوهۆڕینێن جیهانی دا شرۆڤە دکەت. وێ د پەرتووکا خوە یا گرنگ دا ب ناڤێ( کورد و سیاسەتا دەرڤەیا یا ئەمریکا: رۆژهەلاتا ناڤین ژ ١٩٤٥ێ وەرە  (The Kurds and US Foreign Policy: International Relations in the Middle East since 1945)  دیار کریە کو سیاسەتا ئەمریکا ل گەل کوردان، هەرتم ل گۆری بەرژەوەندییێن مەزنتر یێن هەرێمی بوویە. ب باوەرییا وێ، واشنتۆنێ د دەم و قۆناغێن جودا دا کورد وەک ئامراز بکارئیناینە و هەر گاڤا ڤێ هەڤپەیمانییا دەمکورت ل گەل بەرژەوەندییێن وێ یێن جیوپۆلیتیکی نەگوجابیت، ئەمریکایێ کورد پەراویز کرینە و خستینە د کەنارەکی دا.

ب دیتنا چارونتاکی، ڤەکۆلین ل سەر سیاسەتا دەرڤە یا ئەمریکا بێی کو گرنگیێ بدەینە پرسا کوردان، کێم و نەتمامە، چونکو کوردان د پتریا گوهۆڕینێن گرنگ یێن رۆژهەلاتا ناڤین دا – ژ شەڕێ سار و هەتا شەڕێن ئیراقێ و قەیرانا سووریێ – رۆلەکێ ئێکلا کەر گێڕایە. شرۆڤەیێن وێ بزاڤا نیشاندانا وێ چەندێ دکەن کا چاوا مللەتەکێ بێ دەولەت، بوویە پشکەک ژ یاریێن دیپلۆماسی یێن زلهێزێن جیهانێ. 

کارێن ماریانا چارونتاکی ئەڤرۆ، ل گەل ڤەکۆلەرێن وەک دەیڤد مەکدۆوڵ David McDowall و مارتن ڤان برۆینەسن  Martin Van Bruinessen، وەک ژێدەرێن باوەردار د بوارێ کوردناسیێ دا دهێنە ناسین. رێبازا وێ یا شرۆڤەیی و زانستی وێ یەکێ مسۆگەر کریە کو پرسا کوردان ل ئاستێ پەیوەندییێن نێڤدەولەتی و نە ب تنێ د خواندنێن ئێتنیکی یان خوجەهی دا گرنگی پێ بهێتەدان.