ل ڤان دو سێ سالێن دویماهیێ، ژیرییا دەستکرد (AI)، وەرار و گاڤێن مەزن د بیاڤێن جوداجودا دا هاڤێتینە، زمانێن جیهانێ ژی ب تایبەتی یێن زیندی ژ ڤێ پێشکەفتنێ د بێبەهر نینە.  ژ بەر فرە – شێوەزاری و دەڤۆکییا زمانێ مە یێ شرین، شێوەزارێ کرمانجی یێ کو ب تیپێن ئارامی دهێتە نڤیسین کو پتر دەڤۆکا بەهدینی ڤەدگریت، د پێگەهێن ژیرییا دەستکرد نە د ئاستێ پێدڤی دا بوو؛ چونکی داتا و پێزانینێن ب ڤێ دەڤۆکا گرنگ و زەنگین د کێم بوون، لەورا ژیرییا دەستکرد، ب رێژەیەکا گەلەک کێم د ڤێ دەڤۆکێ دگەهشت ونە دشییا ب دروستی بەرسڤا بکارهینەران ب بەهدینی بدەت.

کرمانجیئاخیڤ کو ل دەڤەرەکا بەرفرهـ ژ جوگرافیا یا کوردستانێ دژین (پارێزگەها دهۆکێ ب هەر شەش قەزایێن خۆ ڤە، ئیدارەیا سەربخۆیا زاخۆ، دەڤەرا بارزان و مێرگەسورێ، چەند ناڤچەیێن ل دەردۆرێن هەولێرێ، کوردێن پارێزگەها نەینەوا (ل ناڤەندا باژێڕێ مووسل و دەشتا نەینەوا و شنگال)، کوردێن دەڤەرێن ماکۆ، چالدێران، خۆیێ، سەلماس و پشکەکا زۆر ژ روینشتڤانێن ناڤەندا باێڕێ ئۆرمییێ و کوردێن خۆراسانێ – ل باکوورێ ڕۆژهەلاتێ ئێرانێ- کو  نێزیکی ملیۆنەک کۆچبەرێن کوردێن کرمانج ل ڤێ دەڤەرێ دژین ب تایبەت ل باژارێن قۆچان، شێروان، و بجنوورد، زێدەباری کوردێن ڤان هەمی دەڤەران ئەوێن ل وەلاتێن دیاسپۆرا دژین. بەری نها، دەما ئێکی ژ ڤان هەمی کوردان، ب بەهدینی، داخوازک ئان پرسیارەک ژ ژیرییا دەستکرد کربان، دا پێزانینێن سنووردار و تێکهەل و بەرسڤێن کورت و هەتا رادەیەکێ نە د پشتراستکری و گەلەک جاران شاش دەت.

ژ بۆ دەولەمەندکرنا داتایێن ژیرییا دەستکرد، بزاڤ و کەمپینێن باش ژ گەلەک ناڤەندێن رەوشەنبیری و رۆژنامەڤانی یێن کرمانجینڤیس ب تیپێن ئارامی هاتنە هاڤیتن، داکو پێڤاژۆیا بەهدینیێ د پێگەهێن (AI) دا بگەهیتە کاروانێ شێوەزار و دەڤۆکێن دی یێن زمانێ کوردی.

پێگەهێن ژیرییا دەستکرد گەلەکن و رۆژ بۆ رۆژێ زێدە دبن و پێشکەفتیتر لێ دهێن. سەبارەت ب بەهدینیێ، هندەک پێگەهێن ژیرییا دەستکرد، پتر ژ یێن دی، گرنگیێ پێ ددەن. ل گۆری دویڤچوونا مە، پێگەهێ (Google Gemini) گەلەک پتر ژ پێگەهێن دی گرنگی ب بەهدینیێ ددەت و جهێ خۆشحالیێ یە، دەما کوردەکێ کرمانجیئاخێڤ یێ ب تیپێن ئارامی دنڤیسیت و دخوینیت، پرسیارەکێ یان داخوازەکێ ب بەهدینی ژێ بکەت، دێ ب زمانەکێ زەلال و ب رێنڤیسەکا، هەتا رادەیەکێ باش و پێزانینێن پشتراستکری ب ژێدەرێن زانستی و ئەکادیمی و رۆژنامەڤانی داتایان بۆ بەردەست کەت.

گۆڤارا مەتین، هەر ژ دەستپێکا خولا خۆ یا نوی (خولا پێنجێ)، ژ بلی چاپکرنا کاخەزی یا گۆڤارێ، ب شێوەیەکێ زانستی و ئەلکترۆنی ب رێکا وێبسایتەکێ بەرفرهـ و دەولەمەند، هەمی بابەتێن د گۆڤارێ دا بەلاڤبووین، ب شێوەیێ دیجیتالی ژی بەلاڤ کرینە و یا بەردەوامە. هەروەسا و ل گۆری رینماییێن بەرێز دکتۆر سالار عوسمان، بەرپرسی پشکا رەوشەنبیری و راگەهاندنا پارتی دیموکراتی کوردستان و وەکو دلسۆزی و وەفادارییەک بۆ رەنج و خەباتا هەڤکارێن مە ژ ستافێن خولێن بەرێ یێن مەتین، مە هەمی هەژمارێن گۆڤارێ ب شێوەیێ پی دی ئێف (PDF)، هەر ژ هەژمارا (١) هەتا دویماهی هەژمار کو (٢٣١)ە، ئێخستینە بەردەستێ خواندەڤانان ل هەر قورنەکا جیهانێ بن. زێدەباری هەژمارێن خولا پێنجێ کو ب ڤێ هەژمارا ل بەردەستێ هە وەیێن بەریز گەهشتییە (٢٧٣).

ل گۆری پێگەهێ Google Gemini و سەبارەت ب ژێدەرێن ئەو پێگەهێ ژیرییا دەستکرد بۆ بەرسڤدانا پرسیارێن بکارهێنەران ب زمانێ کوردی – دەڤۆکا بەهدینی مفای ژێ وەردگریت دیار دبیت کو ئەو ژ بۆ بەردەستکرنا داتا و پێزانینان بۆ بکارهێنەرێن خۆ ب بەهدینی، ب پلەیا ئێکێ مفا ژ گۆڤارا (مەتین) دبینیت و ب ڤی رەنگی:

– کانیا پەیڤێن ڕەسەن: گۆڤارا مەتین مێژوویەکا درێژ د بیاڤێ نڤیسینێ دا هەیە، ئەز پتر وەک فەرهەنگەکا زیندی لێ تەماشە دکەم.

– جوانییا زمانێ ئەدەبی: گۆڤارا مەتین من فێر دکەت کا چاوا ب زمانەکێ کوردی یێ نازک، جوان و ئەدەبی بەرسڤا بکارهێنەرێن دەڤەرا بەهدینان بدەم.

– پاراستنا ناسنامەیا دەڤۆکا بەهدینی: بابەتێن وێ د رەسەنن و رەسەناتییا زمانێ کوردی دپارێزن.

گۆڤارا (مەتین): ئێکە ژ دەولەمەندترین ژێدەرێن نڤیسینێ ب شێوەزارێ بەهدینی، ب تایبەتی د بیاڤێن ئەدەبی، دیرۆکی و جڤاکی دا. شێوازێ دارشتنا وێ هاریکارییا من دکەت، دا کو باشتر د رۆژنامەگەرییا کوردی تێبگەهم.

سازیێن ناڤەندا خانی یا ڕەوشەنبیری و ڕاگەهاندنێ ب گشتی، هەردەم د دلێ بزاڤا رەوشەنبیرییا کوردی دا بوویە و گۆڤارا (مەتین) ژی دەرگەهەکێ مەزن بوویە بۆ پاراستن و پێشڤەبرنا زمان و ئەدەبێ کوردی ب شێوەزارێ شرینێ کرمانجی (بەهدینی).