ل گەل نێزیکبوونا ب دوماهیهاتنا سالەکێ و هاتنا سالەکا نوو، ئەو ھەستێن ب رامان و هیڤییان تێکهل د ناخێ مە دا و ل گەل پێداچوونەکا لۆژیکی بۆ رۆژێن سالا ٢٠٢٥ێ کو دێ نیزیک ل ناڤ مە بار کەت و ب ئومێد ڤە دێ پێشوازیێ ل سالا ٢٠٢٦ێ کەین. ھەر جارەکا ئەم مالئاڤاهیێ ژ سالەکا ژیانا خۆ دکەین، ئەم ل گەل خۆ وان تشتا یێن مە ئەنجام داین و یێن مە نەشیای ئەنجام بدەین ل بیرا خۆ دئینین، لێ ئەم ئیرادەیا خۆ ژ دەست نادەین و نە ژی دەستان ژ خەونێن خۆ بەرددەین. پێشوازیکرنا سالەکا نوو ھەردەم بۆ مە رامانا دەلیڤە و پەنجەرەکا دییە بۆ رۆناھیێ دا کو هیڤیێن بجهـ نەهاتی یان پرۆژەیێن پاشئێخستی تەمام بکەین. ب خۆشحالی ڤە د سالا 2025ێ دا، پارێزگەھ یا چالاک بوویە و لڤینەکا بەرچاڤ و تایبەت ژ چالاکیێن رەوشەنبیری، زانستی، ئەدەبی و ھونەری ب خۆ ڤە دیتن. گەلەک فێستیڤال، کۆڕێن ئەکادیمی، دیدارێن ئەدەبی، رێورەسمێن ئیمزاکرنا پەرتووکان و پێشانگەھێن ھونەری یێن جوداجودا ھاتنە گێران. ئەڤ بزاڤە نە ب تنێ رێکخستنا چالاکیێن دەمکی نیشا ددەت، بەلکو گیانێ باژێرەکی دەردبڕیت کو باوەری ب وێ چەندێ ھەیە کو رەوشەنبیری کریارەکا بەرخودانێ یە و ئەدەب و ھونەر و زانین ئامرازێن ئاڤاکرنێ نە و گرنگییا وان ژ چو کەرتێن دی کێمتر نینە.

د ناڤ ڤێ گەشەیا رەوشەنبیری دا، ئەم ب ھیڤییەکا مەزن ڤە ل بەندا وێ چەندێ نە کو ئەڤ چالاکییە د سالا نوو دا د بەردەوام بن و پتر لی بهێن، چونکو رەوشەنبیری نە ب تنێ خۆشی و کەیفە، بەلکو پێدڤی و پرەکە کو دەمێ بۆری ب نوکە و ناسنامێ ب نفشێن نوو ڤە گرێددەت. لەوڕا ئەم ھیڤیدارین کو بیاڤێ رەوشەنبیری و ئەدەبی گرنگییەکا پتر پێ بھێتە دان و پشتەڤانییەکا ژ ھەژی بۆ ھەلبەستڤان، نڤیسەر، ھونەرمەند و وەرگێران بھێتە کرن، دا کو د بەرهەمئینان و داھێنانا خۆ دا بەردەوام بن.

ل دھۆکێ و ل سەرانسەری کوردستانێ، ھەژمارەکا باش یا ئەدیب و داھێنەران ھەنە کو خودی پرۆژەیێن ئەدەبی یێن گرنگن، ژ دەستنڤیسێن ئامادە بۆ چاپێ ژ رۆمان و دیوانێن هەلبەستان و کۆمێن چیرۆکان و ڤەکۆلین، ھەتا وەرگێڕانێن بەرھەمێ جیھانی و وەرگێڕانا ئەدەب و هونەرێ کوردی بۆ سەر زمانێن زیندی کو ل ھیڤییا دیتنا رۆناھیێ نە. لێ ژ بەر کو رەوشا ژیارا گەلەک ژ وان یا زەحمەتە و ئەڤ چەندە ژی کانییا خەونێن وان چک و ھشک دکەت، گەھشتنا وان بۆ خەون و هیڤییان پاش دئێخیت؛ چونکو ئەدەب و داهێنان و ئەفراندنێ پێدڤی ب ئارامییا دەروونی و پشتەڤانیا مادی و مەعنەوی ھەیە، دا کو بیرۆکە ببیتە کریار، خەون ببنە شوونوار.

ل ڤێرە، رۆلێ دامەزراوەیێن رەوشەنبیری و رۆژنامە و گۆڤاران دیار دبیت کو هەردەم پشتەڤانێن  دیمەنێ رەوشەنبیری نە. د ڤی چارچۆڤی دا، ئەم حەز دکەین ل سەر گۆڤارا مەتین رابوەستین کو ل دەڤەرێ ئێک ژ گرنگترین مینبەرێن رەوشەنبیری یە. گۆڤارا مەتین د سالێن بۆری دا شییایە پارێزگاریێ ل سەر بەرهەڤبوونا خۆ بکەت و ناڤەرۆکەکا رژد پێشکێش بکەت و بیاڤێن  رەوشەنبیرییا گشتی و گەلەک نڤیسەر و ئەکادیمیستێن ناڤدار و خودان شییان ل دۆر خۆ کۆم بکەت.

ئەم ھیڤیدارین کو گۆڤار ب ھەمان کوالیتییا خۆ یا نوکە دەرچوونا وێ یا بەردەوام بیت،  داکو بشێین د سالا نوو دا (مەتین)ێ ب هەردو شیوازێن کاغەزی و ئەلکترۆنی پێشبێخین. چونکو جیھانا ئەڤرۆ ب لەز یا بەر ب بەلاڤکرنا دیجیتاڵ ڤە دچیت و ئەو ناڤەرۆکا کو ب رێکا سەکۆیێن ئەلکترۆنی یێن بەردەست یێن بووینە پێدڤیەک و کەس نەشێت پشتگوھ بھاڤێژیت؛ لەورا ئەم دخوازین سەکۆیێن خۆ یێن ئەلکترۆنی نوو بکەین، بازنێ بەلاڤبوونا کۆڤارێ بەرفرەھتر لێ بکەین، دا کو بگەھیتە رێژەیەکا پتر یا خواندەڤانێن ناڤخۆ و دەرڤەی کوردستانێ. 

ھەروەسا ئەم دخوازین کو کۆڤارا مەتین ببیتە سەکۆیەکا راستی و زیندی بۆ نڤیسەر، ئەکادیمی و ڤەکۆلەران، و ئەم لاپەرێن وێ بۆ ھەر قەلەمەکێ جدی و دەنگەکێ داھێنەر ڤەکەین. چونکو ژینگەھا رەوشەنبیری ب تنێ دەمێ دەرگەھ ل ھەمبەر ھەموویان دھێنە ڤەکرن، و دەمێ نڤیسەر ھەست دکەت کو لایەنەک ھەیە رێزێ ل بزاڤێن وی دگریت و دەقێ وی د ھەمبێزا خۆ دگریت، گەش دبیت. ئەم ژی ژ ئالیێ خۆ ڤە دێ د پشتەڤانیکرنا وان و بەلاڤکرنا بەرھەمێن وان یێن ب قیمەت دا کێماسیێ ناکەین، ژ باوەریا مە ب وێ چەندێ کو بەردەوامیا تەڤگەرا رەوشەنبیری ل دەڤەرا مە بەرپرسیاریەکا جڤاکی یە.

رەوشەنبیرییا کوردی یا رەسەن ھەژی وێ چەندێ یە کو بھێتە پاراستن و بەلاڤکرن و چەندین دەرگەھان بۆ خۆ ببینیت، دا کو جوانی و دەولەمەندییا خۆ بۆ جیھانێ دیار بکەت. گۆڤارا مەتین، ب وێ دیرۆکا خۆ یا زەنگین و  ب سەنگ، هیڤیخوازین – وەک ھەردەم – ئێک ژ وان رۆناهیێن کو رێکێ ل ھەمبەر داھێنەران رۆهن دکەت یا بەردەوام بیت و کار ل سەر چەسپاندنا ناسنامەیا رەوشەنبیری ب رێکا پەیڤ، گۆتار، ڤەکۆلین و دەقێن ئەدەبی بکەت.

ل دووماهییا ڤێ سالێ و دەستپێکا سالەکا نوو، چو نینە بێژین ژبلی ئاراستەکرنا سوپاسییان بۆ هەموو نڤیسەرێن کو ب بابەت و مژارێن خۆ مەتین خەملاندی، داکو ب هەڤڕا ڤێ خزمەتێ پێشکێشی خواندەڤانێن ھێژا یێن گۆڤارێ بکەین، ب هیڤییا هندی کو  سالا نوو سالەکا تژی ژ نووبوون و سەرکەفتنان بیت، سالەک بیت کو تێدا پرۆژە و خەونێن بجهنەهاتی رۆژێ ببینن.

ھەر سال ھوون ب خێر و شادی بن و رەوشەنبیرییا کوردی پتر گەشێ بکەت.