گۆڤارا مەتین گۆڤارا مەتین
سەرنڤیسەر
– ئەرێ ژیرییا دەستکرد دشێت نڤیسەرێن راست و درست چێبکەت؟
– ئەرێ ئێدی AI، ئاسۆیێن نڤیسەران سنوردارکرینە یان بەرفرەهتر لێکرینە!
– ئەرێ نڤیسەر د چ تەکنیکێن نڤیسینێ دا، دێ شێن مفای ژ AI وەربگرن؟
دێ ب ژیرییا دەستکرد دەست ب ڤێ گۆتارێ کەم و دێ بزاڤێ کەم بەرسڤا ڤان هەر سێ پرسیارێن کو ئەڤرۆ د سەرێ هەر نڤیسەرەکی دا هەنە بەرسڤ بدەم.
نها، ئەم د سەردەمەکی دا دژین، ژیرییا دەستکرد هەمی بیاڤێن ژیانێ کونترۆلکرینە و مرۆڤ ب ئێک تکاندن ئان کلیک، دگەهیتە وێ ئەوا وی بڤێت. لێ ل گەل ڤێ وەرارا بێسنور یا ژیرییا دەستکرد ل گەل خۆ ئینای، پرسیارەکا گەوهەری دهێتە پێش ئەو ژی: ئەری ژیرییا دەستکرد دشێت کەسەکێ نە نڤیسەر بکەتە نڤیسەرەکێ داهێنەر؟ رەنگە بەرسڤا ڤێ پرسیارێ تا رادەیەکێ یا سەرنجراکێش بیت. راستە بۆ هندەکان کو ب رەنگەکێ سەرڤەیی سەرەدەریێ ل گەل مژاران دکەن، بەرسڤ یا ئەرێنی بیت، بەلێ بابەت نە هوسا یێ ب ساناهی یە.
ئەم رۆژانە دبینین، کو هندەک خودان پێنڤیس، هەبوونا خۆ ب رێکا بەرهەم و نڤیسینێن خۆ دسەلمینن و ناڤێن باش و بەرچاڤ بۆ خۆ چێکرینە چونکی ل گەل پێڤاژوویا پێشکەفتنێ دچن، ئەڤرۆ ژی مفایەکێ باش ژ ژیرییا دەستکرد وەردگرن و ژ داهێنانا خۆ نەڤەقەتیاینە. بەلێ یا سەیر ئەوە، هندەک ناڤ هەنە، پێنڤیس و کیبۆڕدێن خۆ پتر ژ سنورێ شیانێن خۆ دنڤیسن و مرۆڤ ژێ تینیتەدەرێ کو مامێ ژیرییا دەستکرد هاریکارێ وان یێ سەرەکییە!
ب دیتنا من، د ڤێ قووناغێ دا ژیرییا دەستکرد نەشێت ب رۆلێ نڤیسەرەکێ راست و درست، ئانکو نڤیسەرێ مرۆڤ، راببیت ژبەرکو نڤیسەرێ داهێنەر خۆدان ژیرییەکا مرۆڤی یا نە دەستکردە و ئەو داهێنانێن بووینە شاکارێن جیهانی، ڤەڕیژا ژیرییا مرۆڤی بووینە. دیسان مرۆڤێ نڤیسەر هەست هەنە، بەلێ ژیرییا دەستکرد یا بێ هەستە. مرۆڤێ نڤیسەر خەمگین دبیت، کەیفخۆش دبیت، د ترسیت و حەزداریێ دکەت… هتد ژ هەستێن مرۆڤینی.
ژ ئالییەکێ دی، مرۆڤێ نڤیسەر کەتواری ب دیتنا خۆ یا تایبەت و نوی دبینیت، بەلێ ژیرییا دەستکرد مینا خۆدیکەکێ یە بۆ دیتنێن بەرێ هاتینە نڤیسین و پێ هاتییە داگرتن و ئەپڵۆدکرن.
ژیرییا دەستکرد (نە) وەکو بکارئینانا وی پێنڤیسی ئان کیبۆردێ ددەستێ نڤیسەری دا یە، کو ب رێکا وان نڤیسەرێ ژیر، هەست و بیر و بۆچوونێن خۆ پێ دادڕێژیت، بەلکو ل گەل ژیرییا دەستکرد ، نڤیسەر دشێت هەست و بیر و خەیال و بۆچوونێن خۆ پێ سەقا و تیژتر لێ بکەت و دەمێ خۆ ژی پێ ڤەبگریت ئانکو ب کێمترین دەم، جوانترین هزر و بیرێن خۆ پێ بەرهەم بینیت.
هەروەسا نڤیسەر، دشێت ژیرییا دەستکرد وەکو خزمەتکارەکێ گوهدار و بێ پۆرەپۆر و گلی گازندە بکاربینیت و مرۆڤ ب ژیرییا خۆ دشێت داهێنانەکا باشتر ژ یا بەرێ بکەت. دیسان نڤیسەر ب رێکا تەکنیکێن ژیرییا دەستکرد دێ ل سەر شاشی و خەلەتیێن نڤیسینێ زاڵبیت، ب تایبەتی ل گەل زمان و شێوەزارێن خزمەتا وان هاتییە کرن مینا ئینگلیزی و عەرەبی و زمانێن دی یێن زیندی یێن جیهانێ، کو ئیدی نڤیسەری پێدڤی ب سەردانا فەرهەنگان نابیت داکو ژ پەیڤێن درست و رامانێن گونجایی بگەڕێت، بەلکو ژیرییا دەستکرد ئەڤان خزمەتان و ب دەهان کارێن دی ژی، وەکو پاکێجەکا تەکۆز (متکامل) یا تژی ژ کەرستەیێن نڤیسینێ پێشکێشی نڤیسەری دکەت.
ئەگەر ئەم جوداهیێن دناڤبەرا مرۆڤێ داهێنەر و ژیرییا دەستکرد دا بەرچاڤ بکەین دێ بینین، مرۆڤ روحێ ددەتە تێکستی و داهێنانەکا ئاڤاکری ل سەر هەست و نەست و کارلێکیێن هزری بەرهەم دئینیت و دشێت رامانێن دناڤبەرا رێزان دا ژی وەربگریت و شرۆڤە بکەت، بەلێ ژیرییا دەستکرد ب ئاراستە و سەنتەکا ژ لایێ مرۆڤیڤە پرۆگرامکری کار دکەت و چەند داتا و زانیاری بۆ هاتبنە دان، هند خزمەتا مرۆڤی دکەت و نەشێت ب هەستەکێ راستەقین یێ مرۆڤینی بەرهەمەکێ داهێنەرانە پێشکێش بکەت.
هەر چەوا بیت، د شیانا مرۆڤێ ژیر دا یە، ژیرییا دەستکرد بۆ خۆ ملکەچ بکەت و مینا وی ماردێ ژ فانووسا سیحری دەردکەڤیت، ل گۆڕی چیرۆکێن ئەفسانەیێ، بکەتە شاگرد و خزمەتکارەکێ بەردەستێ خۆ و گەلەک کار و ئەرکان پێ ئەنجام بدەت. بەلێ ل دویماهیێ دڤێت پەنجە مۆرێن مرۆڤی ل سەر تێکستێ داهێنەر هەبن ئەگەر نە، دێ کارەکێ بێ روح بیت و ئەو ناڤێ مە ئاماژە پێدای، دێ ژ نڤیسینێ چک بیت و داهێنانا وی دێ زوها بیت چونکی پشتدانییەکا زێدە ژ سنورێ خۆ ددەتە ژیرییا دەستکرد.
