گۆڤارا مەتین گۆڤارا مەتین
سەرنڤیسەر
د دیرۆکا مللەتان دا، هند وەرچەرخانێن چارەنڤیسساز هەنە. ٢٢ێ نیسانا ساڵا ١٨٩٨ێ ئێک ژ رۆژێن پیرۆزە د دیرۆکا کوردان دا کو قەت ناهێن ژبیرکرن. ل وێ رۆژێ، مقداد مەدحەت بەدرخان ئێکەم رۆژنامەیا کوردی ب ناڤێ «کوردستان» ل چاپخانا دار ئەلهیلال ل قاهیرەیا پایتەختێ مسرێ دەرئێخست.
ژ سەدەما کاودانێن سیاسی یێن دەڤەرێ، کو مخابن هەتا نها ژی ئەو بارودۆخ هەر هەنە، رەوشا کوردان هەرتم د بگرە و بکێشێ دا بوو و نەزانینێ و پاشکەڤتنێ پەڕێ خۆ ب بسەر گەلێ کورد دادابوو، بەلێ میقداد بەدرخانی باوەڕی ب وێ چەندی هەبوو، کو ب دەستڤەئینانا مافان نە بتنێ دی ب رێکا چەک و شەڕی بیت، بەلکو پێدڤییە هشیاری و زانین د نێڤ گەلێ کورد دا بەڵاڤ ببیت داکو چاڤێن وی ڤەببن و مافێن خۆ بزانیت و بزاڤا نەهێلانا ستەم و زوڵمێ ل سەر خۆ بکەت و ئێدی بندەستی و تەپەسەریێ نە پەژرینیت.
چما ل مسرێ؟ مسر ل دویماهییا سەدەیێ نۆزدێ، د گوپیتکا گەشەیا خۆ یا رەوشەنبیری دا بوو و ژ دەستهەڵاتا عوسمانی دویر ببوو؛ لەوڕا میقداد بەدرخانی، قاهیرە وەکی جهێ نموونەیی بۆ دەرئیخستنا رۆژنامەیا کوردستان دیت و گاڤەکا سەرکەڤتی بوو.
رێز و سڵاڤ ل گیانێ وی وهەمی وان کەسێن د پێڤاژوویا رۆژنامەڤانییا کوردی دا خەبات کری.
