گۆڤارا مەتین گۆڤارا مەتین
سەرنڤیسەر
ل ڤان ساڵێن دویماهییێ، پێلەکا چاپکرنا کتێبان ل دەڤەرا مە سەرهلدایە، کو کارەکێ گەلەک ئەرێنی و دلخۆشکەرە، نەمازە دەما هژمارەکا ناڤێن گەنج ژ هەردو ڕەگەزان، ل سەر بەرگێن ڤان کتێبێن نوی چاپ دبن دبینین.
پرۆسەیا چاپکرنا کتێبان، بیاڤێ هزری و رەوشەنبیری بەرفرەهتر لێ دکەت و دبیتە رێک و ئامرازەک داکو زڤڕین بەر ب کتێبێ و حەزا خواندنا کتێبان د ڤی سەردەمێ تەکنەلۆژیا و سۆشیال میدیایێ دا پتر بەربەڵاڤ ببیت و کتێب هندەکێ ژ بەهایێ خۆ یێ بەرێ بزڤڕینیت.
بەلێ دڤێت ژ بیر نەکەین، کو چ پرۆسەیێن داهێنانێ، ب دروستی سەرناگرن، بێی هەبوونا رەخنەیەکا ئاڤاکار و ئەکادیمی ژ لایێ کەسێن بسپۆر و شەهرەزا و خۆدان سەربۆڕڤە.
رەخنەیا ئەدەبی، یانکو کارێ دویڤچوون و هەلسەنگاندنا تێکستان و دانان و ڤەوژارتنا، بەرهەمێن نوی چاپ دبن و دکەڤنە بەر دەستێ خواندەڤانان و جهەکی د پەرتۆکخانەیان دا دگرن، چ دیوانێن هەلبەستان بن یان پەخشان ب هەمی ژانڕێن وێڤە، یان بەرهەمێن وەرگێڕایی ژ زمانێن دی بۆ سەر زمانێ کوردی، ب رێکا تەرازویەکا رەخنەیی یا چالاک و کاریگەر.
رەنگە هندەک هەبن، پرۆسەیا رەخنەگرتنێ وەک شکاندن و کێمکرنا بەهایێ کتێبەکێ یان نڤیسەرێ وێ بزانن، بەلێ د بنەڕەت دا، رەخنە بەرۆڤاژی ڤێ بۆچوونێ یە. رەخنەیا ئاڤاکار، د دویربینا وەرارا ئەدەبێ جیهانی دا گرنگییا خۆ هەیە، ژبەرکو:
– رەخنە هاریکارییا وەرگرتن و تێگەهشتن و شرۆڤەکرنا کارێن ئەدەبی دکەت، یانکو رێکخۆشکەرە بۆ دەربازکرنەکا نەرم بۆ ئەوی پەیامێ نڤیسەری دڤێت بگەهینیتە خواندەڤانان.
– رەخنە هاریکارییا خواندەڤانان دکەت، داکو رەوشەنبیرییا ئەدەبی ل نک وان بەرفرەهتر ببیت و بگەهنە ئاسۆیێن هزری یێن پێشکەفتیتر، چونکی ب رێکا ڤێ پرۆسەیێ، بەرهەمێن ئەدەبی دکەڤنە بەر بگرەبکێشەکا کویر.
– رەخنەگر، ب رێکا رەخنەیێن خۆ یێن بێئالیسەنگی، دکارن بەهرە و شیانێن نوی ببینن و ئامۆژگاری و دیتنێن خۆ ئاراستەی وان بکەن، داکو بکارن هێشتا رێکا خۆ ببینن و پێشڤە بچن.
– خالا هەری گرنگ، پێدڤییە رەخنەگرێن مەلەڤان و دەستهەل، د وێرەک و د راستگۆ بن و ب ئاشکەرایی ببێژنە، هندەک ژ وان کەسێن ناڤێن خۆ ل سەر بەرگێن کتێبان داناین، کارێ وە نە نڤیسینە یان باشترە خۆ پتر ماندی بکەن و پاشی بەرهەمان چاپ بکەن.
