گۆڤارا مەتین گۆڤارا مەتین
سەرنڤیسەر
پێشڤەچوونا پرۆسەیا ئەدەبی – هونەری یا گرێدایە ب هەبوونا رەخنەیەکا رژد، چونکی نە د شییان دایە ئاستێ هەر کارەکێ ئەدەبی – هونەری بگەهیتە ئاسۆیەکێ گەش بێی هەبوونا بزاڤەکا رەخنەگرتنێ یا هەڤتەریب. ل ڤێرێ مەبەستا مە ژ “رەخنەگرتنێ” ئەو پێڕابوونن یێن، کو رەخنەر سەرێن داڤان ب دەتە دەستێ خواندەڤانی داکو چێژ و خۆشییەکێ ژ دەقێ ئەدەبی وەربگریت و ڤەجنقینێ ل نک دروست بکەت، ب رەنگەکی، کو خواندەڤان سەرهەلی جوانیێن نەپەن یێن تێکستێ و ئەو ئاماژە و رەهەندێن تێکست د نێڤ رستەیێن خۆ دا ڤەدشێریت ببیت. ئەڤ چەندە بەها و رێزێ ددەتە خواندەڤانی دەما هەستێن وی دلڤن و وی پاڵ ددەت داکو بچیتە د ناخ و کویراتییا تێکستی دا. ب چەند پەیڤێن دی، چەند تێکستێن ئەدەبی و بەرهەمێن هونەری د ساکار و ئێکسەر بن، دێ یێن دویر بن ژ پرۆسەیا داهێنانێ، بەلکو دێ بنە رێزکرنا پەیڤان و لێکئینان و ڤەگێڕانەکا کۆلانکی و سەرپێ.
رەخنە دادوەرە ل سەر ئەدەب و وهونەری، بەلکو ب ئەرکێ سەرپەرشتکارییێ رادبیت؛ چونکی رەخنە پایەبلندترین خواندنێن مرۆڤایەتییە و ئەگەر رەخنە نەبا، پرۆسەیا داهێنانێ دا یا ئیفلیج بیت و چ جاران بەر ب وەرارێڤە نە دچوو.
ب نەبوونا رەخنەیەکا ئەدەبی – هونەری یا رژد ل دەڤەرێ، کو مینا روانگەیەکێ بیت، بەرهەمێ دەردکەڤیت ب وێرەکی بهەلسەنگینیت و سەراد و بێژینگ بکەت، ئاستێ ئەدەب و هونەرێ مە ژی دێ یێ سنگەپێ بیت و ل جهێ خۆ نالڤیت، چونکی ئەگەر مە ئەدەب و هونەرەکێ ئاست بلند بڤێت، دڤێت ل بەراهییێ ب سینگەکێ ڤەکری و بێی لێکدانەڤەیێن ل سەر بنیاتێ کەرب و شکاندنا هەڤدو، رەخنێ بپەژرینین و قەبوول بکەین، ئەز باوەڕ دکەم د دەمەکی کێم دا، دێ زیوان ژ گەنمی هێتە ڤاڤارتن، داهێنەر دێ پتر هێنە هاندان داکو داهێنانێن باشتر بکەن و ئەوێن بووینە بارگرانی ل سەر ئەدەب و هونەری، بەرییا بەرهەمەکی بەڵاڤ بکەن یان چاپ بکەن، دێ چەند جاران ل خۆ زڤڕن، چونکی ل وی دەمی دێ رەخنەگر هەبن بێژنێ: “کەکو هەرە بۆ خۆ ل کارەکێ دی بگەڕه و ئەدەب و هونەر نە کارێ تە یە!!”.
