گۆڤارا مەتین گۆڤارا مەتین
سەرنڤیسەر
ساڵانە، هەژمارەکا باش یا فەستیڤاڵ و پێشانگەهێن جودا جودا ل سنورێ پارێزگەها دهۆکێ برێڤە دچن، کو جهێ خۆشحالییێ نە. ژ بەر گرنگییا فەستیڤاڵ و پێشانگەهان ب رەنگەکێ گشتی، گۆشەیا (دیتن) دێ بۆ ڤێ گاڤا شارستانی تەرخان کەین.
هەر ژ فەستیڤاڵا رەوشەنبیری بگرە؛ هەتا دگەهیتە فەستیڤاڵا دهۆکێ یا فیلمان و فەستیڤاڵا گەشت و گۆزاری و پێشانگەها تری و هنگڤینی، چەند فەستیڤاڵ و پێشانگەهێن دی یێن هەمووڕەنگ ل دهۆکێ برێڤە دچن، کو هندەک ژ وان ساڵانە دهێنە گێڕان و ڤەکرن، هندەکێن دی؛ ل گۆری هەلکەفت و پێدڤیبوونێ جهێ خۆ د لیستەیا ڤان فەستیڤاڵ و پێشانگەهان دا دگرن.
ژ بلی فەستیڤاڵ و پێشانگەهێن ساڵانە، مە ل سەری ئاماژە پێدای، ئەڤ ساڵە هندەک پێشانگەهـ و فەستیڤاڵێن دی ژی برێڤەچوون و هەندەکێن دی ژی د سرایێ دانە. ژ ئالییێ رەوشەنبیری و جڤاکی و ئابۆری ڤە، فەستیڤاڵان جهەکێ پایەبلند هەیە، کو دکارین د ڤان خالێن خارێ دا بەرچاڤ بکەین:
– بهێزکرنا هونەر و رەوشەنبیرییێ، چونکی ب رێکا فەستیڤاڵان خەلک دێ سەرهەلی شێواز و ئەزموونێن رەوشەنبیری و هونەری یێن جودا جودا بیت و دێ کارلێکییا رەوشەنبیری د نێڤبەرا جڤاکان دا بهێزکەڤیت.
– هەڤگرتنا خەلکی و موکۆمکرنا پێکگەهاندنێ د نێڤبەرا تاکێن جڤاکی پتر بەرپا دبیت، چونکی فەستیڤاڵ هەموویان ب هەڤ دجەمینیت و روحا پشکداری و هەڤکارییێ د نێڤ تاکێن جڤاکی دا بهێز دکەت.
– کەرتێ گەشتیاری و ئابۆرییا ناڤخۆیی پتر ل گەشێ ددەت، چونکی فەستیڤاڵ گەشتیاران ژ دەڤەرێن جودا ڕادکێشیت، کو دێ داهاتێ دەڤەرێ، تا راددەیەکێ باش زێدەکەت و هۆتێل و مۆتێل دێ ژ مێهڤانان تژی بن. دیسان فەستیڤال دبیتە دەلیڤەیەکا باش ژ بۆ دانەنیاسینا بەرهەمێ لۆکاڵ و ناڤخۆیی.
– چەسپاندنا ناسنامەیا چاندی و کەلتۆرێ میللی ژی سیمایەکێ دیارێ فەستیڤاڵایە، کو پرەکێ دروست دکەن، داکو نڤشێن نها و یێن پاشەڕۆژێ ژ دوهییا مللەتێ خۆ نەڤەقەتیێن.
دەستخۆشیێ ل وان هەموو خەمخۆرێن ل پشت سازکرنا ڤان فەستیڤاڵ و پێشانگەهان دکەین و هیڤیدارین ساڵ بۆ ساڵێ پویتەیەکێ باشتر پێ بهێتەدان، داکو ئەڤ گاڤ و پرۆسەیا شارستانی پتر بەرپا ببیت.
