گۆڤارا مەتین گۆڤارا مەتین
سەرنڤیسەر
نڤیسین، پرۆسێسەکا داهێنانێ یە و شیانا وێنەکرنا هزرایە ب پەیڤان. ژ بەر جوداهیێن تاکە کەسی و پاشخانەیا پێزانینێن مرۆڤ ب درێژاهییا ژییێ خۆ ب دەستڤە دئینیت و پاشڕا د خانەیێن بیردانکا مرۆڤی دا جهێ خۆ دگرن و کورشە (کەلەکە) دبن، لەوڕا ژی هەمی نڤیسەر ب ئێک ئاست و ستایل نا نڤیسن و هەمییان ژی هەمان شیان و پێزانین نینە؛ داکو هەر نڤیسەرەک دەرحەقی هەمی شێواز و جۆرێن نڤیسینان دەربکەڤیت. نە یا بەرعاقلە ژی، کەسەک بکاریت د هەمی بیاڤان دا بنڤیسیت، ئەگەر نڤیسی ژی، دێ سەرێن داڤان ژ دەست دەت و دێ د هندەک بیاڤان دا سەتمیت و دێ ب نڤیسینێن لەنگ و نە د ئاست دا، بەرپەڕێن رۆژنامە و کۆڤار و پەرتووکان ڕەش کەت و کارێ وی ب تنێ دێ زەعێکرنا مەرەکەبی، یانکو حوبری بیت.
مخابن، نها هندەک نڤیسەر هەنە و بەری نها ژی هەر هەبووینە، مینا (خوێ) نە، کا چەوا د پڕانییا خوارنان دا بکار دهێت، ئەو ژی سەرێ خۆ د هەمی بیاڤان دا ڕادکەن، هەر وەکو دڤێت ببێژن: ئەم دئینسایکلۆپیدیایی نە و د تەکۆزین و دشێین مەلەڤانییا د هەر ئاڤەکێ دا بکەین. ل ڤێرە، من دڤێت ببێژم، ئەڤ (دیتن)ە نە یا گشتگیرە و هەمی نڤیسەران ناڤەگریت؛ چونکی نڤیسەرێن خودان شیان هەنە د گەلەک بیاڤان دا د مەلەنە و تا رادەیەکێ دکارن خۆ ل بابەتێن جودا جودا راست بینن، بەلکو من دڤێت ببێژم: راستە مە نڤیسەرێن فرەڕەهەندی هەنە، بەلێ نە هەمی نڤیسەر د ڤێ چەندێ دا د سەرکەفتینە!
