بەر ب پتر بھێزکرنا ھوشیارییا نەتەوەیی

سەرنڤیسەر

خۆیایە، کو ھەر نەتەوەیەک دپێڤاژوویا خۆ دا د چەندێن قووناغان دا دەرباز دبیت و خۆ ل گەل پێدڤی و تێگەهـ و رەھەندێن وێ بگونجینیت و سەرەدەرییەکا عەقلانی و کەتواری ل گەل بکەت.. راستە جڤاکێ مە دھێتە پۆڵینکرن وەک جڤاکەک، کو سیمایێن عەشیرەتگەریێ پێڤە ددیارن، لێ دیسان تا رادەیەکێ جڤاکەکێ ھوشیارە و گاڤێن خۆ بەر ب پێشکەفتنێ دھاڤێژیت؛ داکو بگەھتە رێزا جڤاکێن پتر سڤیل و باژێرڤان..

لێرە – ب دیتنا مە – دڤێت بھێزترکرنا بنەمایێن ھوشیارییا نەتەوەیی و پتر گرنگیدان ب ئاڤاکرنا مرۆڤێ کورد، یێ کو بەرژەوەندیێن خۆ یێن نەتەوەیێ  ل پێشییا ھەر بەرژەوەندییەکا دی و ھەر ژێیاتیەکا دی، چ ل سەر ئاستێ دەستھەلاتێ و ئالیێن سیاسی و تاکێ کورد دا دبینیت؛ چونکی مە  کوردان پتر ژ ھەر بەرژەوەندی و ژێیاتییەکا دی، گەلەک پێدڤی ب ھوشیارییا ھەستا نەتەوەیی ھەیە. دیرۆکا دویر و نیزیک ئەڤ راستییە سەلماندی یە، کو نەتەوەیا کورد ھەرگاڤ ژبەر ناسنامە و ھەبوون و مۆرکا خۆ یا نەتەوەیی ھاتییە چەوساندن و جینۆسایدکرن، ب ئەرەبکرن، ب فارسکرن، ب تورککرن و بۆھژاندن، نە ژ بەر ھەر ئەگەرەکێ دی. لەوڕا ژی؛ ھەردەم رێبازا پارتی دیمۆکراتی کوردستان د ئەدەبیات و پەیڕەو و پڕۆگرام  و راسپاردەیێن خۆ دا، داکۆکیێ ل سەر گرنگییا ھوشیارییا نەتەوەیی دکەت..

ئەڤرۆ مە پتر ژ ھەر دەمەکێ دی، پێدڤی ب بلندکرنا ڤێ ھوشیاریێ ھەیە، کو دڤێت ھەمی شییان، ھزر و ھەلسوکەفت بۆ دەستەبەرکرنا ڤێ خالا گرنگ بھێنە تەرخانکرن..

ئەگەر بپرسین، ئەڤ چەندە ئەرک و بەرپرسیارییا کێ یە؟ لێرە ئەم نابینین، کو ب تنێ ئەرکێ سازی و راگەھاندنا پێگیرە – ئەو راگەهاندنا هەستێ ب بەرپرسیارییا خۆ یا ویژدانی دکەت – بەلکو دڤێت ئەڤ ئەرکە دروشم و ئارمانجا ھەر تاکەکێ کورد بیت، کو بەرییا لایەنگیرییا ھەر ھزر و بۆچوونەکێ بکەت، خۆ ژبیر نەکەت کو کوردە و نەحەز و نەیار وەکو کورد ل وی دنێڕن، ھەر چەند ب مخابنیڤە، ئەو د خزمەتا بیانییان دا بیت ژی و ھەلگرێ ھزر و بۆچوونێن ھاوردە ژی بیت، بیانی ھەر دێ ب چاڤێن خۆ لێ نێڕن، ئەڤجا هندی زوی یە، گەرەکه‌ ئەو کوردێن ژ رێبازا نەتەوەیی زەلین ب خۆ دا بچنەڤە و ژێیاتییا ئێکێ و دویماهیێ یا مە هەموویان بۆ نەتەوەیا کورد بیت.