گۆڤارا مەتین گۆڤارا مەتین
بەرهەڤکرن: مەتین
ل گۆر هەردو ماڵپەرێن worldpopulationreview.com و armormax.com پێنج مەترسیدارترین باژێر ل سەر ئاستێ جیهانێ بۆ ژیارێ و سلامەتییا گەشتیاران ئەڤێن ل خوارێنە:
- تیوانا – مكسیك Tijuana: هژمارا ئاكنجیێن وێ 2.049.413 كەسن. ڕەڤاندنا مرۆڤان، كوشتن، تالان و شەلاندن ژ تایبەتمەندی و سیمایێن ڤی باژێری نە. ئەو ب ناڤودەنگترین باژێرە ب مرنا مرۆڤان ب مادەیێن هۆشبەر و كوشتنێ. ژ هەر 100.000 مرۆڤان 138 كەس ژ ئەگەرێ بكارئینانا مادەیێن هۆشبەر و كوشتنێ گیانێ خۆ ژ دەست ددەن. ب تنێ ل ساڵا 2022ێ هژمارا تاوانێن هاتینە ئەنجامدان ل وی باژێری، پتر ژ دو هزار تاوانێن كوشتنێ بوون.
- ئەكەپۆلكو – مەكسیك Acapulco: هژمارا ئاكنجیێن وێ 779. 566 كەسن. ژ هەر 100.000 مرۆڤان، مرنا 111 ژ وان ژ ئەگەرێ بكارئینانا مادەیێن هۆشبەرە. سەرەرای وێ چەندێ، كو ژیار گەلەك یا گران و ب مەترسییە، بەلێ باژێر ب خۆ باژێرەكێ گەلەك جوانە، گەشتیار گەلەك حەز ژێ دكەن، هەر ژ بەر ڤێ چەندێ ژی هژمارەیەكا ئێكجار یا پۆلیس و هێزێن ئێمناهیێ ل باژێری د بەر بەلاڤن.
- كاراكاس – ڤەنزوێلا Caracas: هژمارا ئاكنجیێن وێ 2.682.801 كەسن. ژ هەر هەر 100.000 مرۆڤان، مرنا 100 ژ وان ژ ئەگەرێ بكارئینانا مادەیێن هۆشبەرە. ژ ئەگەرێ وێ چەندێ، كو ڤەنزوێلا د قووناغێن گەلەك دژوار یێن هەژاریێ ڕا دەرباز بوویە، لەوما ژی بەرەڵاییەكا گەلەك مەزن د ناڤ خەلكی دا هەیە، ژ ئەگەرێ ڤێ بەرەڵایێ؛ رۆژانە تاوانێن كوشتن و شەلاندنێ دهێنە تۆماركرن. ل ڤێرە یاسا و هێزێن ئێمناهیێ نەشێن زوی ب زوی ب رۆلێ خۆ را ببن.
- سێوداد فكتۆریا – مەكسیك Cuidad Victoria: هژمارا ئاكنجیێن وێ 349.688 مرۆڤن. ژ هەر 100.000 مرۆڤان، مرنا 86 ژ وان ژ ئەگەرێ بكارئینانا ماددێن هۆشبەرە و كوشتن و رەڤاندنێ یە. سەرێ چەندین ساڵایە ئەڤ باژێرە د سەرێ لیستا وان باژێرێن ب مەترسیدارە بۆ ژیانێ. ژ ئەگەرێ ترسا رویدانا تاوانان، هەتا وێ رادەیێ خەلك نەشێت ب شەڤێ ل مالێن خۆ دا ژی بنڤیت. ئەو د رەڤن و هەر شەڤەكێ ل جهەكی. شەڕێ بازرگانێن مادەیێن هۆشبەر و مافیان، گەلەك ژیان ئاسێ و دژوار كرییە ل باژێری.
- سیۆداد كوارێس – مەكسیك Cuidad Juarez: هژمارا ئاكنجیێن وێ 1.512.450 مرۆڤن. ژ هەر 100.000 مرۆڤان، مرنا 86 ژ وان ژ ئەگەرێ بكارئینانا مادەیێن هۆشبەرە و كوشتن و رەڤاندنێ یە. ژ رۆیێ گەشتیاری ڤە گەلەك دا كەتییە و رۆژانە تاوانێن كوشتن و رەڤاندنێ دهێنە تۆماركرن. یێ ب مەترسی یە ب تایبەت بۆ ژنێ.
