پەرتۆکخانەیا بێبەرامبەر .. پەرتۆکەکێ دانێ و ئێکێ ببە

بەرهەڤکرن:  مەتین

بیرۆکەیا پەرتۆکخانەیا بێبەرامبەر یا بچویک Little Free Library، بزاڤەکا جڤاکی یا نە قازانجدارە، بۆ جارا ئێکێ ل ویلایەتێن ئێکگرتی یێن ئەمریکی سەرهلدایە و پاشڕا ئەڤ بیرۆکەیە بۆ سەرانسەری جیهانێ هاتییە ڤەگوهاستن. مەبەست ژێ بەردەستکرنا پەرتۆکانە د کابینەیێن بچویک دا داکو هەمو ئەندامێن جڤاکی مفای ژێ وەربگرن.

بیرۆکە ژ لایێ (پۆڵ رود Paul Rudd ) و هەڤالێ وی (ریک برۆکس Rick Brooks)ى ڤە هاتییە دانان. ل دەستپێکێ بیرۆکە ل گەل پۆڵ درۆست بوو دەما ڤییای دایکا خۆ یا مامۆستا خەلات بکەت، چونکی حەزژێکەرا پەرتۆکان بوو. بیرۆکە وەکی ئاڤا ل بن کایێ بەڵاڤ بوو. ل ٧ێ ئادارا ساڵا ٢٠١٢ێ گەهشتە ٣٤ ویلایەتان و ١٧ وەڵاتین دی ل جیهانێ.

ل بەراهیێ پۆڵ رود و ریک برۆکس ل باژێڕێ هودسۆن ل ویلایەتا ویسکونسن Hudson, Wisconsin، کابینەیەک ژ داری ل سەر شێوەیێ دەرگەهێ قوتابخانێ دروستکر. ل گەل دەستپێکا شوباتا ساڵا ٢٠١٣ێ، ل ٥٠ ویلایەتێن ئەمریکی، ٢١٥٠ کابینەیێن پەرتۆکخانەیا بێبەرامبەر بەڵاڤبوون.

ل کانوینا دویێ یا ساڵا ٢٠١٤ێ هەژمارا ڤان پەرتۆکخانەیان گەهشتە ١٥٠٠٠ کابینەیان. ل دویماهییا ساڵا ٢٠٢٣ێ هەژمارا ڤان پەرتۆکخانەیان گەهشتە ١٥٠ هزاران، کو ل ١٢٠ وەڵاتان د بەربەڵاڤن.

ژ هەژی ئاماژێ یە، کو ب خۆشحالیڤە ئەڤ کەمپینە ل ١٣ێ چریا دویێ یا ساڵا ٢٠١٩ێ ژ لایێ نڤیسه‌رێ گه‌نج (شیان کانیسارکی) ل دەڤەرا مە ژی پەیدابوو؛ دەما پەرتۆکخانەیەکا بێبەرامبەر ل قوتابخانەیەکا زاخۆ ڤەکری و نوکە هژمارا ڤان پەرتۆکخانەیان ل سەر ئاستێ پاریزگەها دهۆکێ و ئیدارەیا سەربخۆ یا زاخۆ گەهشتییە ٥٨ پەرتۆکخانەیان.

بابەتێن گرێدای