گۆڤارا مەتین گۆڤارا مەتین
بەرهەڤکرن: رێكێش ئامێدی
ئەڤە ئێكە ژ سەرهاتیێن ب ناڤ و دەنگ، سەرهاتییا دو ئەڤیندارا، دێ بوو هەوە یێن بەرێز ڤەگێڕین، ئەو ژی سەرهاتییا (حەسۆ و نازێ) كو بوویە ستران و گەلەك سترانبێژا ئەڤ سترانە یا گۆتی. ئەڤ سەرهاتییە نێزیكێ 100 سەد ساڵانە هاتییە رویدان ل دەڤەرا سەرحەدێ ل دەوروبەرێن باژێرێ وانێ ل باکوورێ كوردستانێ.
(حەسۆ) نە ناڤێ وی یێ دورستە، ناڤێ وی یێ دورست (حسێن ئاغا)یە برایێ (قولیخان ئاغا)ی، ژ عەشیرەتا ئادەمیە، ژ (گوندێ حەسەن عەبدالێ) یە، خەلكێ (قەزا ئەردیشێ) یە ب سەر (وانێ) ڤە ل (دەڤەرا سەرحەدێ)، ل (گەلیێ زیلانێ)، نێزیكی 90 نوت كم دویرە ژ باژێرێ وانێ و 60 كم یێ دویرە ژ قەزا (ئەردیشێ)، كو مەزنترین باژێرێ دەڤەرا وانێ یە، دكەڤیتە هنداڤی بەحرا وانێ و هەتا نۆکە ئەو باژێر یێ ئاڤایە و نۆکە نەڤیێن (قولیخان ئاغا)ی یێ ل وی گوندی دژین.
ل دویڤ پەیڤێن سترانان، دبێژن (قولیخان ئاغا) ژ (قەبیلا حەمۆ)یی نە، ژ عەشیرەتا (ئادەمی) نە.
هندەك دبێژن (حەسۆ و نازێ) دوتمام و پسمام بوون، هندەك ژی دبێژن ئەو نە مرۆڤێن ئێك و دو بوون، یانكو (حەسۆ و نازێ) چی یێن ئێكو دو نەبوون، هەما خەلكێ ئێك گوندی ژی نەبوون.
هندیكە (حەسۆ)یە ژ قەبیلا ئادەمی یە، لێ (نازێ) ژ (قەبیلا مكائیلا) یە، كو هەردو قەبیلە دكەڤنە سەر چەمێ (ریبارێ حەسەن عەبدالێ).
سەرهاتییا وان هۆسا دەست پێدكەتن:
ل (قەزا ئەردیشێ) دەڤەرا وانێ كەسەكێ زەنگین هەبوو، ناڤێ وی (قولیخان ئاغا) بوو، وی بەس برایەك هەبوو ناڤێ وی (حسێن) بوو ژ وی بچیكتر بوو.
(قولیخان ئاغا)ی گۆتە برایێ خۆ؛ بۆ خۆ سەحكەتە كچكەكێ، دا داوەتا وی بكەتن.
(حسێن)ی، كو پشتی هنگی دهێتە نافكرن (حەسۆ)، ئەو رادبیتن سەح دكەتە گوندی چ كچك نەكەفتنە دلێ وی.
پشتی ئەو ژ گوندی بێ هیڤیی بووی، رابوو چوو، هندەك گوندێن دی یێن نێزیك، دا كچكەكا ب دلێ خۆ ببینیتن، لڤی گوندی، گوندێ هە گەڕییا، ل گوندەكی نێزیكی وانێ، دلێ وی گەلەك كەفتە كچكەكێ.
پشتی (حەسۆ)ی پرسیاركری، زانێ ناڤێ وێ (نازێ)یە، كچا (حەسەن)یە.
دبێژن (نازێ) جانەكا بناڤ و دەنگ بوو و گەلەك یا ب ئاقل و مەعریفەت ژی بوو، ئەو ژ (عەشیرەتا مكائیل) ی بوو.
ئەو زڤڕی نك برایێ خۆ و گۆتێ؛ من بخۆ كچكەك دیت ل فلان گوندی و ناڤێ باب و باپیرێن كچكێ بۆ برایێ خۆ گۆتن.
دبێژن (قولیخان ئاغا) مروڤەكێ زەنگین و دەولەمەند بوو.
ئەو رابوو، چەند مرۆڤێن رهسپی و ماقویل دگەل خۆ برن و چوونە گوندێ وان خوازگینییا، بابێ كچكێ پشتی پرسیارا كچا خۆ كری و زانی ب دلێ وێ یە، فاتحەك هاتە خواندن و نەخت هاتە ڤەبڕین و شرینی هاتە خوارن و خوازگینی ب دلەكێ خۆش زڤڕینە ڤە.
پشتی چەند رۆژەكا، مالا زاڤای كاروبارێ داوەتێ دورستكر،
(قولیخان ئاغا)ی كاروبارەكێ مەزن كر، بۆ داوەتا (حەسۆ)ی، ب سەدان دوست و نیاس ژ دوور و نێزیك گازی كربوونە سەر داوەتێ، داوەتەكا خۆش و بۆش بۆ برایێ خۆ كر، ل ئالێ ژنكا چەندین دەنگبێژێن ژن ناریكێن بووكا دگۆتن و سترانێن داوەتێ، ل ئالێ زەلاما ب دەهان دەنگبێژا ستران ب زاڤای دگۆتن و دەنگێ دەهول و زڕنا بسەر وان گەلی و چیان دا دەنگ ڤەددا، حەفت رۆژ و حەفت شەڤا داوەت یا بەردەوام بوو.
هەردو ئاشق گەهشتنە مرادا خۆ و رۆژ بوو رۆژێ ئەوان پتر حەژ ئێكودو كرن.
پشتی چەند هەیڤەك بسەرڤە چوین سەد مخابن ئێشەكا گران دهێتە (حەسۆ)ی، ئەو ئێش گەلەك یا ترسناك بوو، دەردەكێ بێ دەرمان (حەسۆ) گرت، ئێشەكا ڤەگر و ترسناك بوو.
(قولیخان ئاغا)ی چەند حەكیم و لقمانێن ب ناڤ و دەنگ ئینان، دا چارەسەریا برایێ وی بكەن، لێ خۆدێ وەسا حەزكر وێ ئێشێ چ دەرمان نەبوون.
وان هەمی حەكیم و لقمانا گۆتێ ئێشا برایێ تە ئێشەكا بێ دەرمانە، ئێشەكا ترسناك و ڤەگرە، یا باش ئەوە تو وی ژ ناڤ عەیالی ببەی دەرڤە، ئەڤ ئێشە گەلەك زوی ڤەدگریتن و هەچیێ ڤەگریتن زوی دمریتن.
(قولیخان ئاغای) گۆتە وان حەكیمان، باشە ما چێنابیتن (حەسۆ)ی بكەمە دژوورەكێ ڤە بتنێ، گۆتێ بەلێ درستە.
(مەنجو) ژنا (قولیخان ئاغای)، كو ئەو ژ مالەكا گەلەكا زەنگین بوو، باب و برایێن وێ ب هێزتر بوون ژ مێرێ وێ، هەر وەكو دبێژن مێرێ وێ بخێرا مالا خەزیرێ خۆ زەنگین ببوو، (مەنجو)یێ وەنەكر، كو (حەسۆ) د مال دا بیتن، هندی مێرێ وێ هاتێ؛ پا كیڤە ببەم، گۆتێ؛ ببە فلان شكەفتێ و هەرۆژ خوارنێ و ئاڤێ دگەل خۆلاما بوو ڤرێكە.
(قولیخان ئاغا)؛ ئێ باشە مانێ برایێ منە، ما دێ چەوا ژ مال كەمە دەرێ؟
هەما بلا د ژوورا خۆڤە بیتن و تە شولەژێ نینە و نێزیكی وی نەبە.
(مەنجو)یێ گۆتێ: بخۆدێ ئەز وەناكەم ئەو دڤێ مالێ دا بیتن، هەكە تو وی نەكەیە دەرێ، ئەز دێ عەیالێ تە هێلم و چمە مالا بابێ خۆ.
(قولیخان ئاغا): باشە نێ گونهەكا مەزنە، ئەم وی ژ مال بكەینە دەرێ و دیسا دێ هەتكا مە چیتن ل ڤێ دەڤەرێ، هەمی مرۆڤێن مە دێ بێژن ڤی برایێ خۆ یێ نەساخ و بێ چارە ژ مال دەرێخست، دێ لنك خۆدێ ژی گونەهبار بین بین.
(مەنجو)یێ گۆتێ: هەما بەس باخڤە تە بڤێتن و تە نەڤێتن دێ ئەو بیتن یا ئەز دبێژم.
نە هەرێ (قولیخان ئاغا) مەجبۆر بوو برایێ خۆ یێ نەساخ ژمال برە دەرێ، ڤرێكرە شكەفتەكا نێزیكی (چیایێ حەسەن عەبدالێ) و هەرۆ نان و ئاڤ دگەل خۆلامێن خۆ بوو دهنارتن، خۆلاما ژ دویرڤە ددانە ڤێ و دزڤرین.
پشتی دەمەكێ گەلەكێ نەخۆش بسەرڤە چووی، (حەسۆ و نازێ) گەلەك پەریشان بوون و ژ ئێك دویركەفتن.
(مەنجو)یێ هزرا خۆ كر و ددلێ خۆدا گۆتی: بخۆدێ (نازێ) گەلەكا جوان و ژێهاتییە و ل دویڤ گۆتنا حەكیم و لقمانا مسوگەر مێرێ وێ دێ زوی مریتن.
ئەز دترسم، پشتی (حەسۆ) دمریتن، مێرێ من (نازێ) ل خۆ مەهر كەتن، رابوو پلانەك دانا و گۆتە مێرێ خۆ مانێ تو دزانی (حەسۆ) ئێدی چێنابیتە ڤە و دێ هەر مریتن، ڤێجا یا باش ئەوە تو (نازێ) ڤرێكەیەڤە مالا بابێ وێ گەلەك باشترە، ما دێ د مالا مە دا چ كەتن، وێ چ زارۆك ژی نینن، كو بمینیتە سەر زاروكێن خۆ.
(قولیخان ئاغا) گەلەك عاجز بوو و گۆتە ژنا خۆ: باشە دێ چەوا ژنا ب مێر ڤرێكەمە مالا بابێ وێ، ئەڤە چێنابیتن، مانێ هێشتا مێرێ وێ یێ ساخە، هەكو (حەسۆ) مر پاشی بلا بچیتە مالا بابێ خۆ.
(مەنجو)یێ گۆتێ: تە شولەپێ نینە، ئەز دێ رێكەكا باش بۆ بینم و وێ ڤرێكەینە مالا بابێ وێ، بلا د ڤێ مالێ دا نەمیتن.
(مەنجو) رابوو ب دزیكی ڤە جابا مەلایەكی ڤرێكر و گۆتێ:
دێ بوو من شولەكێ كەی و ئەز دێ گەلەك پارا دەمەتە بەرامبەری هندێ.
نە هەرێ مەلا ب پارا تەماع كر و مەلا رازی بوو وێ پیلانێ بحه بینیتن.
پشتی دو رۆژا مەلا رابوو چار رهسپی دانە دگەل خۆ و چوونە نك (نازێ)
و گۆتێ: (نازێ) سەرێ تە یێ ساخ بیتن، (حەسۆ) مر، خۆدێ جهێ وی بكەتە بحەشتا بەرین، نازێ باوەر نەكر.
مەلای قورئان دانا و دەستێ خۆ دانا سەر قورئانێ و گۆتێ مانێ ئەز مەلا مە، ئەز بڤێ قورئانا پیروز كەم (حەسۆ) مر و مە بر شویشت و ڤەشارت و ئەڤ هەردو جامێرە ژی دگەل من بوون، ما وەنینە، وان هەردو زەلاما ژی سویندخوار و گۆتە نازێ مە (حەسۆ) یێ ب دەستێن خۆ ڤەشارتی، خۆدێ وی عەفو كەتن وجهێ وی بحەشت بیتن، نازێ باوەر ژ وان مەلا و رهسپیا كر ئەو كەفتە تازی و نیهاری و چاڤێن وێ ژ روندكا زوها نەبوون.
(نازێ) نەزانی ئەو پیلانا (مەنجو)یێ یە.
(مەنجویێ) پارە دابوونە مەلای و وان هەردو زەلاما دا پیلانا وێ بجهبینن.
وی مەلای و وان رهسپیێن بێ وژدان پێگڤە سویندخوار، كو (حەسۆ) یێ مری و گۆتێ مە ب دەستێن خۆ جەنازێ وی یێ ڤەشارتی و ئەم زڤڕینە ڤە، ب چ رەنگێ بیتن وان (ناز) بهەمیڤە بێ هیڤی كر.
پشتی چەند رۆژا (مەنجویێ) گۆتە مێرێ خۆ (قولیخان ئاغای): دێ ڤێجا (نازێ) ڤرێكەڤە مالا بابێ وێ، مانێ وێ چ عەیال نینە بمینیتە سەر، ئەڤە تازی ژی رابوو، بەسسە، مانێ ئەو ما بێ مێر، ئێدی چ شولێ وێ ل مالا مە نەما
(قولیخان ئاغا)ی گۆتێ كا دێ راوەستە ما هەوارە، هێشتا تازیدار خلاس نەبوینە، هەما شەرمە ئەم وێ نۆکە ڤرێكەینە مالا بابێ وێ، بلا ساڵەك یا چەند هەیڤەك بسەر تازیێ ڤە بچن، پاشی دێ ڤرێكەینە مالا بابێ وێ.
(مەنجو) گەلەك یا خۆڕت بوو، چونكی بابێ وێ ژی ئاغایەكێ زەنگین بوو، لەوا ئەو شیا مێرێ خۆ (قولیخان ئاغا)ی مەجبۆر كەتن، بۆ هەر تشتەكێ وێ دڤیا ئەو بجهبینیتن.
نە هەرێ (قولیخان ئاغا) نەچار بوو، جاب هنارت بوو مالا بابێ (نازێ)، كو (حەسۆ) یێ مری و بلا بهێن خیشكا خۆ ببەنەڤە، ئینا برایێن (نازێ) مەجبۆر بوون هاتن خیشكا خۆ برەڤە.
هنگی (نازێ) كرە گری و كرە هەوار برا من نەبەنەڤە، درەوە مێرێ من نەمرییە (حەسۆ) هێشتا یێ ساخە نەهەرێ وان هزر دكر (نازێ) هایش خۆ نینە و یا ژ بەر دئاخڤیتن.
ب هەر حالێ هەبیتن برایێن وێ چنگلێن وێ گرتن و بخۆڕتی ژ مالا (حەسۆ)ی دەرێخست و زڤڕاندە مالا بابێ وێ.
هەلبەت ناڤ و دەنگێن جوانیا (نازێ) و ئاقلداریا وێ ل هەمی دەڤەرێ بەلاڤ ببوون، نەكێشا چەند حەفتییا، كو (ناز) زڤراندییە مالا بابێ وێ، هەر هادر خوازگینێن وێ هاتن.
(حەسەن ئاغایێ چالدیران)ی ل دویف وان ناڤ و دەنگا هات و (نازێ) بوو برایێ خۆ خاست.
(حەسەن ئاغایێ چالدیران)ی چوو مال و پشتی دو رۆژا چەند رهسپی دگەل خۆ ئینان و هاتنە خوازگینییا، بابێ نازێ خوارنەكا خۆش بۆ وان دانە چێكرن، پانێ ئەو ژی ئاغانە و زەنگینن.
پشتی شیڤخواری نەختێ (نازێ) هاتە ڤەبرین، هنگی ژی بابێ (نازێ) یێ فەقیر بوو و هەر ئێكسەر وان گەلەك پارە دانە بابێ (نازێ) و پشتی چەند رۆژان داوەتی هاتن بویكێ ڤەگوهێزن.
خواندەڤانێ هێژا:
هندەك مرۆڤێن دهەین، بۆ مالێ دنیایێ بەخت و وژدانا خۆ هشك و زوها دكەن.
ئەو مەلایێ بەختێ خۆ خراب كری و درەو ل (نازێ) كری، بۆ هندەك پارا وی ب ڤێ چەندێ زانی و هەر وەكو وژدانا وی پیچەك لڤلڤی و پێشەمان بوو، كو وی ئەو درەو ل (نازێ) كری و ب خەلەتییا خۆ حەسییا.
دبێژن مەلا پێشەمان بوو. هەول دا، كو جابەكێ بدەتە (نازێ)، كو ئەو درەو بوو ل وێ كری و (حەسۆ) یێ ساخە.
مەلای ژنكەك هنارتە نك (نازێ) و گۆتێ؛ بێژێ: بلا من عەفوكەتن، گەردەنا من ئازا كەتن، (حەسۆ) یێ ساخە و من درەو لێكربوو و من گۆتبوویێ (حەسۆ) یێ مری، چونكو (مەنجویێ) ژنتییا وێ ئەز نەچاركربووم وێ درەوێ لێ بكەم. (حەسۆ) یێ یێ ساخە و یێ ل شكەفتێ.
دیسا ب رەنگەكێ دی دبێژن:
وەختێ بوویە شەڤا نیشانیێ، ژنا شڤانێ گوندی ژی چووبوو ناڤ نیشانیێ، شڤان هاتە ڤە یێ وەستیای و یێ برسی و ژنا وی ل مال نینە و ئەو گەلەك عاجز بوو، پشتی بێهنەكێ ژنا وی زڤڕی مال، مێرێ وێ گۆتێ تە خێرە تو لكیڤە بوی حورمەت؟
وێ گۆت مانێ ئەز چووبوومە ناڤ نیشانیا جیرانا مە (نازێ).
شڤان ما هەیبەتگرتی ما، چەوا نازێ شیكر و هێشتا (حەسۆ) یێ ساخە.
ژنێ گۆتێ نە نە ئەڤە هەیامەكە (حەسۆ) یێ مری.
شڤانی گۆت: نە واللە (حەسۆ) یێ ساخە و دوهی ژی من تاسەكێ شیرێ پەزی یێ دایێ.
پشتی شڤانی شیڤخواری، ژنا وی رابوو زڤڕی ناڤ داوەتێ و خۆ گەهاندە (نازێ) و گۆتێ:
والله (حەسۆ) یێ ساخە و دوهی ژی مێرێ من تاسەكێ شیری یێ دایێ، وان مروڤا درەوا ل تە كری، كو گۆتیە تە (حەسۆ) یێ مری.
ب ڤێ جابێ، ئەو گەلەك عاجز بوو و هەر ئێكسەر وێ بەردا گریێ، لێ ئێدی فایدە ناكەتن، (نازێ) یا دایە شوی و نەختێ وێ یێ ڤەبڕی و یا مەهر كری و شرینیێ وی یێ گێراندی.
(نازێ) گەلەك عاجز بوو، هزار ئاوازا خۆ ل دلی دان، یا خۆدێ ئەڤە چییە هاتییە سەرێ من، بۆچی ڤان هۆسا بێ بەختی ل من و (حەسۆ)ی كرن.
مانێ خلاس رۆژا پاشتر سپێدێ دێ نازێ ڤەگوهێزن و بەنە گوندەكێ دی.
(نازێ) زانی رێكا وی گوندی د بەر وێ شكەفتێ را دچیتن.
داوەتی ژ رویبارێ (چەمێ حەسەن عەڤدالێ) دەربازبوون، دەما ئەو نێزیكی شكەفتێ بوین، نازێ گۆتە داوەتییا بەختێ خۆدێ من داخوازیەكا هەی دلێ من نەهێلن.
برایێ زاڤای گۆتێ كەرەمكە ببێژە، تە چ داخوازی هەیە؟
(نازێ) گۆتێ هەوە ئەز یا خاستیم و هەوە ئەز یا مەهركریم و من چ نەمایە، لێ مانێ (حەسۆ) مێرێ منە، ئەز حەلالا وی مە و هێشتا یێ ساخە و نەمرییە، ژنكا مەهركری ناهێتە مەهركرن ڤە، خائین و بێ بەختا ژ قەستا ناڤێ مرنا وی گێڕا بوو، ڤێجا ل دویڤ شریعەتێ ئیسلامێ، هێشتا ئەز یا ل سەر زمەتا وی و بێی تەلاق نابیتن هوون من ببەن، بهێلن دا بچمە شكەفتێ بێژمێ من تەلاق دەتن و گەردەنا من ئازا كەتن، پاشی من ببەن.
هەلبەت مەلایەك دگەل داوەتییا بوو، بەربویكێ گۆتە مەلای (بووكا مە یا ڤێ داخوازێ دكەتن، داوتییا هەمییا زانی، داوەتی بوونە دو جوین كانێ وێ ببەنە شكەفتێ ڤە یان نە، هندەكا گۆتی نە هیچ ئەڤ شولە چێنابیتن.
لێ مەلای و وان هەمی دیندارێن دگەل دا گۆتی، بلا بچیتە نك مێرێ خۆ و ل دویڤ شریعەتی دڤێتن ئەو خۆ تەلاق دەتن دورستترە.
داوەتی نێزیكی وێ شكەفتێ بوون، كو نۆکە دبێژنێ (شكەفتا حەسۆی).
(نازێ) ژ هەسپی هاتە خوارێ، هەر ل دەرێ شكەفتێ دیت (حەسۆ) یێ كەفتیە حالەكێ گەلەكێ نەخۆش، یێ پەریشان و بەلەنگاز بووی، كورمێن كەفتینە برینێن وی، ئەو یێ ژ بەر برینێن خۆ دنالیتن و كەسەك ل دۆرێن وی نینە، دلێ (نازێ) ئێكجار پێ سوت و رۆندكێن وێ هاتنە خوارێ.
(نازێ) گازی كرێ
ها (حەسۆ)
(حەسۆ) ڤەجنقی و گۆتێ: جان نازێ، بەس تە خۆدانی ل من دكر، تو ژی ژ من دویر بووی !
(نازێ) گۆتێ: نە ئەز ژ تە دویر نەدكەتم، لێ خراب ببیتن مالا بێ بەختیێ. برایێ تە ئەز دا مە شوی و سوارا ئەز یا سیاركریم، نۆکە دەما خاترانە، ئەزا هاتیم خاترا خۆ ژ تە بخوازم.
(حەسۆی) گۆتێ: خۆزی تە ئەز نەدیتبامە، لێ دلێ وی شەوتی
(دەنگبێژ كازۆ) دبەندەكا ڤێ سترانێ دا ژ زاردەڤێ (نازێ) دبێژیتن:
دەمێ ب دەورانە
دەمێ ب دەورانە
دەمێ ب دەورانە
هێ هێ هێ
بەژنا من كچكێ مینا تاكا رحانا ل ناڤ باغێ گولا ل سەرێ هەمو چیانە
هەی مالا تە خرابۆ، منێ بالا خۆ دایێ چ دهێتە سەرێ جانكان و جەحێلان
ب تەقدیرا من نینە ب تەقدیرا رەبێ رەحمانە
نازێ كرە گازی (حەسۆ) مالا تە بشەوتە دەما خاترانە
برایێ تە دمالا مەدا خوازگینی دانە رژداندنێ قەلەنێ من هلدانە
كورۆ مالمیراتۆ تو زمانێ خۆ دەینە ئەز بمژم
خالقێ عالیێ ئەو دەردێ دای تە
بەلكی وی دەردی بكەڤیت جان و بەدەنا و من دانە
هەی ژارێ ئەم بوین ئێخسیرێن بەر دیوارە
حەسۆ كورمالۆ
دە لێ لێ نازێ
؟؟؟؟؟
تو بخۆدێ هندەك گیایی ل شكەفتێ رائێخە
دەمێ خەوا (حەسۆ)ی بەلەنگازە
وێ هێ هێ بلا رازێ
دهەمبەری گۆتنا (نازێ) كا (حەسۆ) چ ژێرا دبێت.
دیسا (دەنگبێژ کازۆ) دبەندەكا ڤێ سترانێ دا ژ زاردەڤێ (حەسۆ)ی دبێژیتن:
دەمێ ب دەورانە
دەمێ ب دەورانە
دەمێ ب دەورانە
هێ هێ
دە لێ لێ (نازێ) وەزێ ل دیارێ (حەسەن عەڤدالێ)
ب گەلیێ زیلان دا كەتم
دلێ من هێلینا تەیرێ ناری
هەی مالخرابێ چ دهێتە سەرێ جانكان و جەحێلان
ب تەقدیرا رب العالمین
ب تەقدیرا رەبێ باری
چوینا تە سەر هەردو چاڤێن من
ل من زۆر نایێ
وەختا دەمێ خاترانە
تو خاترا خۆ ژ من دخوازی
هۆسا ل من زۆر تێ، مینا ئەیوب پێغەمبەرێ كرمان خواری
ژارۆ (حەسۆ)
وەی برا پیس و بێ كەسۆ
دە لێ لێ نازێ
تو ل دەشتا قایلا زێ
تو خۆدێ حەبەكێ (پیچەكێ) دەما تو دچی
گیایێ بنێ شكەفتێ رایێخە
خەوا (حەسۆ)ی، كو دهێت بلا رازێ
***
دلێ (نازێ) شەوتی كا ژ (حەسۆ) را چ دبێژە
(دەنگبێژ كازۆ) دبەندەكادی ژڤێ سترانێ دا ژ زاردەڤێ (نازێ) دبێژیتن:
«(نازێ) دگۆت
دەمێ ب دەورانە
دەمێ ب دەورانە
دەمێ ب دەورانە
هێ هێ هێ
دەلۆ لۆ (حەسۆ) تو یێ نە دیاری
(حەسەن عەڤدالێ) دگەلیێ زیلانێ دكەتم
لۆ لۆ مالمیراتو دلێ من هێلینا تەیرێ پەڕ بەلەكە
لۆ لۆ مالمیراتو
بۆ تە زەمانێ خائینە
ئو فەلەكا ل تە غەیریە
رەنگێ ئەسمەر چاڤێ رەش و بەلەكە
ب شەوتە مالا بێ بەختیێ
برایێ تە ئەز دامە مێر
دەما خاترانە
تو زمانێ خۆ دەینە
ئەز بمژم رب العالمینێ مەزنە
ئەو دەردێ دایی تە
بەلكی نیڤێ وی دەردی
ب جان و بەدەنێ من بكەڤە
هەی مالا تە خرابە
هەی تو نزانی ب مەرا
هزار زەمان خائینە كوچا فەلەكە
هەوی ژارۆ
وەی ئێتیمێ بەر دیوارۆ
كورمالۆ، شێتۆ، هارۆ
دە لێ لێ (نازێ)
تو سۆز و بەخت ل دەشتا قایلا زێ
تو خۆدێ حەبەكێ (پیچەكێ) دەما تو دچی
گیایێ بنێ شكەفتێ رائێخە
خەوا (حەسۆ)ی ئێتیمێ بەلەنگاز تێ بلا رازێ
***
دەردەكێ گەلەكێ زورە ، خۆدێ نەدەت سەرێ كەسێ، داوەتی ل بەندا نازێ نە ،دلێ (نازێ) دشەوتیت
دە كا دا سەحكەینێ كا (حەسۆ) ل هەمبەری (نازێ) چ دبێژیت:
هەر وەسا (دەنگبێژ کازۆ) دبەندەكا ڤێ سترانێ دا ژ زاردەڤێ (حەسۆ)ی دبێژیتن
(حەسۆ) دگۆت
دەمێ ب دەورانە
دەمێ ب دەورانە
دەمێ ب دەورانە
هێ هێ هێ
هەی مالا تە خرابە
ئەزێ ب دیارێ (حەسەن عەڤدالێ) گەلیێ زیلانێ كەتم
دلێ من هێلینا بەلێ چما تەیرێ پەر بەلەكە
(حەسۆ) دگۆت دە لێ لێ (نازێ)
ب دیارێ حەسەن عەڤدالێ دكەتم
منێ بالا خۆ دایێ چەمێ حەسەن عەڤدالێ دكشە هوڕە هوڕە
مالا بابێ تە شەوتیێ
نە دارە نە گەجە نە بوهڕە
چووینا تە سەر هەردو چاڤێن من
ل من من ئەسەر ناكە
وەختێ دەما خاترانە
تو خاترا خۆ ژمن بخوازە
مینانێ قەسابەكێ
كێرێ هەلدە ناڤا دل و جگەرێ من ببڕە
ژارۆ ، ئێخسیرێ بەر دیوارا
كورمالۆ، شێتۆ، هارۆ
دە لێ لێ نازێ
تە سۆز و بەخت ل (دەشتا قایلازێ)
تو بخۆدێ حەبەك گیای ل بنێ شكەفتێ رائێخە
خەوا (حەسۆ) یا دهێتن بلا رازێ
***
دەردەكێ پڕ گرانە، كا داویێ كا (نازێ)چ دبێژیت
هەر وەسا (دەنگبێژ کازۆ) دبەندەكا دی ژ ڤێ سترانێ دا ژ زاردەڤێ (نازێ) دبێژیتن
(نازێ) دگۆت:
دەمێ ب دەورانە
دەمێ ب دەورانە
دەمێ ب دەورانە
هێ هێ هێ
دەلۆ لۆ (حەسۆ) ئەزێ ب دیارێ (حەسەن عەڤدالێ)
ب گەلیێ زیلانێ كەتم ب دار و بینە
مالا تە ب شەوتە
خائینێ برایێ تە د مالا مە دا
خوازگینیێن من دانە رژداندنێ
چما قەلەنێ من بڕینە
لۆ لۆ مالمیراتو
خوازگینیێن من هاتن
من سوار كرینە
ل دەرێ شكەفتێ بەربووك ل بەندا مەنە
تو دەستێ خۆ راكە
ئەمێ بێژین ئامینە
دعایەكێ بخوازین ژ پادیشاهێ ژوورینە
بەلكی ب ئەمرێ مەلایكەتێ
ب سەر مە فێم بكەن ئینسانیەتێ
قەبزێ رحا مە قەبیل بكەت
قەتلێ رحێ مە هەردوكا ل دەرێ شكەفتێ بكشینە
نازێ نەچە بال مێرێ تازە
چایدانی بدە دەست
هەڕە كانیێ ژ من را ئاڤێ بینە
(حەسۆ) دەستێ خۆ راكرن
گۆت ئامینە
رەب العالمین مەزن ئەمرێ مەلایكەتا كر
ب دقیقێ دا د سانیێ دا
قەبزا رحا هەردوان ددەرێ شكەفتێ دكشینە
من دیت بەربویك درەڤە
گۆتن مەلا وەرە مالا تە خرابۆ
بلا چاڤێ مە ل هاتنا رێیا بویكێ نەمینە
تو وەرە ل سەر وان بخوینە دەور و تلقین و یاسینە
دە لێ لێ (نازێ)
ئەز ب دیارێ حەسەن عەڤدالێ ل گەلیێ زیلان دكەتم
لۆ لۆ مالمیراتۆ
خۆدێ ب هەلواسی
من كەسەك نەدیت مینا (حەسۆ و نازێ)
دكرن داوەتەكێ بلەز و بەزە
(حەسۆ و نازێ) ل سەرێ شكەفتێ
بونە بووك و زاوا هەتا رۆژا قیامەتێ
ددلێ گوهدارا دا
نەبیتە چ كول و چ دەرد و چ مەرەزە
(نازێ) گازی كرێ (حەسۆ) كا چاڤێن خۆ ڤەكە و سەحكە من، ئەز یا هاتیم خاترا خۆ ژ تە بخوازم.
لێ موخابن ئێشا وی گەلەك یا گران بوو، خۆ ئەو نەدشیا چاڤێن خۆ ڤەكەتن.
دەمێ بەندا سترانێ هاڤێتە بەر (حەسۆ)ی، (حەسۆ)ی ئەو دبێژیتی خۆزی من زانیبا كا تو یا سیاری یان تو یا پەیای؟
ئەڤە نیشانا هندێ یە، كو (حەسۆ) خۆ نەدشیا چاڤێن خۆ ڤەكەتن ژ بەر ئێشێ.
لێ هەكە ئەم باش سەحكەینێ دێ بینین (نازێ) دڤییا بمینیتە نك (حەسۆ)ی، وێ نەدڤییا خۆشتڤیێ خۆ بهێلیتە د وی حالی دا و بچیتن شوی كەتن، وێ دڤیا ئەو و خۆشتڤیێ خۆ پێكڤە بمرن.
سترانبێژ (فازل كوفرچی) دبەندەكێ دا دبێژیتن:
لێ دوتمامێ دلێ من لیانێ
ب هەمی جزیێن قورئانێ
ب ئومەتا محەمەدێ موسلمانێ
ب الله كولێن من پڕن، دەردێن من دگرانن
ئەڤە سێ رۆژ و سێ شەڤێن من قەتیانە
ئاڤ د باریك و قودیك و دەبۆكێ من نەمانە
والله دلێ من كەلە كەلە
والله ل بیرا عەمیانێ
واللە ل ڤێرە كا تو رابە ل سەر گاڤ و نیڤێ
ب چنگلێ خۆ بەردە والله
تاسەكا ئاڤێ بینە ب وان تلییا، ب وان دەستانە
دا تە وەكو بەرێ بوكا شەش هەیڤی ببینم
ئەزێ رابم تاسەكا ئاڤا تە ڤەخۆم
بەلكو اللە قادرێ مەزنە
جوت مەردی مەولانە
بەلكی ئاڤا دوتماما من
ببیتە علاج و مەلهەم و قودیك و دەرمانە
لێ نازێ بەلایێ لێ لێ نازێ
بەر مالیێ لێ نازێ
خانمێ لێ نازێ لێ نازێ
تە وەر خۆ خەملاند
من گۆت دێ هێی ل بەر من رازی
ئەڤ گیایێ ل بن من یێ شلە
حەسۆیێ بریندارە
من گۆت ئێكێ دی ل بن بكە خاتینێ
دێ ل بەر كوڕكێ خەلكی رازی
لێ نازێ لێ نازێ
(حەسۆ) ل وێ باوەرێ بوو، كو (نازێ) یا خۆ خەملاندی، كارێ خۆ جوان یێ كری و یا هاتی بێهنەكێ ل دەف وی روینیتە خوارێ و دێ خۆ ل دەف درێژكەتن و یا هاتییە سەرەدانا وی، دێ سەبرێ وی ئینیتن، لێ (حەسۆ) دبێژیتن (نازێ) من گۆت تو بۆ من یا هاتی، من نەزانی تو یا هاتی خاترا خۆ ژمن بخازی.
(دەنگبێژ صالح كۆبانی) دبەندەكا ڤێ سترانێ دبێژیت:
دەورانە دەورانە دەمێ دەورانە
لێ لێ نازێ وەزێ ل گەلیێ زیلانێ
ل چەمێ حەسەن عەبدالێ دلێ من هێلینا تەیرێ سیمرە
ل سەر من هاتییە گڕە گڕە
حەیران دەردێ من زەحفە
كولێ من ل هوندرە
لێ لێ نازێ دەما تو بەحسی چوونا خۆ دكی
ب كێر و مقەسا جەگەرا من دبڕە
لێ (نازێ) ئاخ لێ نازێ وەز بریندارم
(حەسۆ)ی گۆت (نازێ)
تە بچووكێ بەژن بلندێ
شرینێ گەردەن گازێ
كەچێ بلا بخێرا بابێ تە بیت
دەما تو خاترا خۆ ژ من دخوازی
تو گیایێ بن من تازەكە
ببێژە بریندارو سەرێ خۆ دانە و رازێ
(حەسۆ)ی دبەندەكا خۆ دا دبێژیت:
لێ (نازێ) د بەختێ من و تەڕا
ئیساڵ ژ ئەسمانا ئاگر باری
دلێ من بوویە هێلینا تەیرێ ناری
بلا هێلینا خۆ چێنەكربا ل گەلیێ زیلان
لوی جهێ رەشێ و تاری
دیسا سترانەك دبێژیت:
وی عەورێ رەش و تاری
تو ئەغر و فەلەكا خۆ ببینە و هەڕە
ل مەخسەد و مرادا خۆ شاد ببە
ئەوا رەبێ عالەمێ ئینایە سەرێ پسمامێ تە
نەئینایە سەرێ ئەیوبێ كرما خواری
وەكی (سترانبێژ حسێن فارێ) دبەندەكا ڤێ سترانێ دا دبێژیت:
لێ لێ دەورانە دەورانە دەورانە
دەمێ ب دەورانە
دەمێ ب دەورانە
(نازێ) دگۆ (حەسۆ) سبەیە وەزێ ب گەلیێ زیلانێ
ب چەمێ حەسەن عەبدالێ كەتم
دلێ من ب دومانە
خوازگینچیێن من رەبەنێ هاتنە
د ئێڤارا خۆدێ دا، دمالا بابێ من دا ل هەڤ جڤیانە
لۆ لۆ من حەیرانۆ
گۆتنێ گۆتنبێژا دبێژن شرینیكا من خوارنە
رەهن و دینا نیڤا قەلەنێ (نەختێ) خۆ دانە
نە نە نە والله
وەزێ ڤێ سبێ وەزا هاتیم
خاترا خۆ ژ پسمامێ دلێ خۆ بخوازم
ئەز قەرزارم
ب حال و دەم و برینێن تە
تو چەوانی سوارۆ
(دەنگبێژ حسێنێ فارێ) دبەندەكا ڤێ سترانێ دبێژیت:
لێ لێ دەورانە دەورانە دەورانە
دەمێ ب دەورانە
(حسو) دگۆ لێ لێ لێ (نازێ)
واللە من گۆت
ژ بەختێ من و تەرا ل ئەسمانا ئاگر باری
ل دلێ من سێوی عەبدالێ
بخۆدێ ژ هێلینا تەیرێ ناری
بلا وێ هێلینا خۆ چێنەكربا
ل گەلیێ زیلانێ ل سەر چەمێ حەسەن عەبدالێ
وەی رەبەنێ ژ بۆ تاری
نە نە والله سێ جارا مرۆڤ فەلەكا خۆ ببینە
ژ خۆرا مرۆڤ ب مەغسەد و مرادێن خۆ شادبە
ئەوێ كو رەبێ عالەمێ ئانی سەرێ پسمامێ تە
نە ئانی سەرێ وی ئەیوبێ كورما خواری
نازێ هەیلێ نازێ
هەیلە نازێ نازێ
تە چاڤ رەشێ، بەژن بلندێ، گەردەن گازێ، بێ مرازێ
والله تو یی گاڤا خاترێ ژمن دخوازی
هندەك ژ گیایێ بهارێ ل بن من رایخینە
والله (حەسۆ) بریندارە حالێ وی چ نینە
بلا قاسەكێ سەری داینە
هێ هێ لێ ژ خۆڕا رازێ
هەر وەسا (دەنگبێژ حسێنێ فارێ) دبەندەكادی دا یا ڤێ سترانێ دبێژیت
لێ لێ دەورانە دەورانە دەورانە
دەمێ ب دەورانە
(نازێ) دگۆ (حسو) پسمامۆ
سبەیە وەزێ ب گەلیێ زیلانێ
ب چەمێ حەسەن عەبدالێ كەتم
دیسا ل هەسەكە
دسەریا من و تەدا دەشت و زوزانە مالخرابوو
دبنیا مە دا هێلینا تەیرێ باز بەلەكە
ب سوندا قەسەمێ
خوازگینچیێن من یێن مالا بابێ من دا
ژ ئێڤارا خۆدێ دا درونشتینە
دبێن شرینكا خۆ خوارینە
مایی دەعوا شەكر
هیڤیا من هەیە ژ رەبێ عالەمێ
ژ میرێ میرا رەبێ عالەمێ
ل پەی پسمامێ من را چجار قەدەرا من
ل ئەنیا لاوێ بابا نەكر
لۆ لۆ مالخرابوو
والله چیە والله ڤێ سبێ
قاسەكێ سەرێ خۆ دانە سەر چۆكا دوتماما خۆ داینە
ئەو دەردێ كو ب جانێ پسمامێ من كەتی
بلا بەلكی رەبێ عالەمێ
بگریت ب جانێ من كەت
سوارۆ های های های
دیسا (سترانبێژ حسێن فارێ) دبەندەكا ڤێ سترانێ دا دبێژیت:
لێ لێ دەورانە دەورانە دەورانە
دەمێ ب دەورانە
سبەیە وەزێ ب گەلیێ زیلان
ب چەمێ حەسەن عەبدالێ ب كەتم
ئەسمانێ بلند و چیا
ل بەژنا (نازێ) زراڤە تاكێ ریحانا
سەرێ حەفت نەوالا ل دوانزدە رییا
شەڤەكێ ژ شەڤێن پائیزێ هەتا نمێژا سەرێ سبێ
والله (نازێ) ب سوند خواری
چوو بەر دەڤێ (حسوی)
سەرێ وی ب سەر چۆكا خۆ دانی
هێدی هێدی یەواش یەواش
ب سەردا دگریا هایێ هایێ
ب ئەمرێ رەبێ عالەمێ
قاسدێ رۆژ بەلەكە
ل سەر سینگێ پەیا دبوو
دگۆ رحێ وان هەردویان
نە نە واللە من گۆ دبە گازندەێ و
دبێ مەكانێ (حەسۆ) و (نازێ)
ل ناڤا چەمێ (حەسەن عەبدالێ)
بوو زیارەتا تاویان و باویان
هەیلا نانێ نازێ
تە چاڤ رەشێ، بەژن بلندێ گەردەن گازێ
د بەر من رازێ
لێ لێ مالخرابێ واللە دەمە خاترا خۆ ژ من دخوازی
جارەكا دی (حەسۆ) باوەرناكەتن، ئەو دبێژیت نازێ:
رابە تو هندەك گیایێ بهارێ ل بن من رایخە و جهێ من خۆشكە و تو هەڕە وەغەرا تە خێربیت
سترانبێژ (شاه ئیسماعیلێ میرانی) د بەندەكێ دا هۆسا دبێژیت
(نازێ) ل چیایێ حەسەن عەبدالێ
ئاڤا ل چەمێ زیلان ؟؟؟؟
(نازێ) مالا بابێ تە شەوتی
هەكە تو هەڕی كەسەكێ من تونە
بدزیڤە نان و ئاڤ بدە (حەسۆ)
(حەسۆ) دگۆت لێ لێ نازێ
هەیلێ نازێ وەلا تە چاڤ رەشێ
گەردەن قازێ
قیزێ سینگ و بەرێن تە ژ من رابوون
بینانێ چیایێ بینگولێ
بخێرا بابێ تە بە دەما تو هاتی
خاترا خۆ ژ من دخوازی
من ژبیرنەكە گیایەكێ دی دەینە
بلا (حەسۆ) رازێ تێر خەو ببە
پشتی ڤێ هەمیێ باوەری بوو (حەسۆ)ی چێنە بوو، كو (نازێ) یا هاتی خاترا خۆ ژێ بخوازیتن، بەلكو یا هاتی گیانێ خۆ گۆری (حەسۆ)ی بكەتن، وێ دڤیا دگەل خۆشتڤیێ خۆ بمریتن، لێ (حەسۆ)ی باوەر ژێ نەدكر.
دبەندەكێ دا ژ ڤێ سترانێ دەمێ (نازێ) دچیتە دەف (حەسۆ)ی، (حەسۆ) پشتی باوەردكەتن، كو نازێ یا هاتی خاترا خۆ ژێ بخازیتن، (حەسۆ) دبێژیتێ:
پا دێ تو بێهنەكێ چۆکا خۆ دانە، دا ئەز سەرێ خۆ دانمە سەر چۆکا تە، كو بەری هنگی دبێژیتێ چ ئاڤ دئامانێن من نەمایە، كا تو بڤێ خەمل و جوانییا خۆ هەڕە كانییا شرین، تو قودیكەكا ئاڤێ بۆ من بینە، دا (حەسۆ) تێر وێ ئاڤێ ڤەخۆتن، بەلكو ئەڤ ئاڤە ژ لایێ خۆدێ ڤە ل برینێن من ببیتە دەرمان و ئەز پێ ساخ ببم.
(نازێ) داخواز ژ داوەتیا كر و گۆتێ رێكێ بدەنە من ئەز بچمە كانییا شرین، ئامانێن حەسۆی تژی ئاڤ بكەم گەلەك یێ تێهنیە، هەر چەندە ئەو كانی پیچەك یا دویرە ژ شكەفتێ، لێ (نازێ) كرە غار و چوو ئاڤێ بۆ حەسۆی ئینا.
پشتی (حەسۆ)ی ئەو ئاڤ ڤەخواری، وی گۆتە (نازێ) خۆزی تە مرادەكا دژی یا من حاسل كربا، (نازێ) گۆتێ ئەز گۆری ببێژە كا چ مرادە؟
(حەسۆ)ی گۆتێ كا تو چۆکێ خۆ دانە دا ئەز پیچەك سەرێ خۆ دانمە سەر چۆکا تە، دا بیرهاتنێن خۆ یێن بەرێ بینمە بیرا خۆ.
(نازێ) چۆکا خۆ دانا و (حەسۆ)ی سەرێ خۆ دانا سەر چۆکا (نازێ) و دگەل هندێ، دەنگێ خڕێنا مرنێ ژ (حەسۆ)ی هات و (حەسۆ) دچیتە بەر دلوڤانییا خۆدێ.
دبێژن كەف ب سەر دەڤێ (حەسۆ)ی كەفت، (نازێ) تڤلا خۆ ل وێ كەفێ دا و كرە دەڤێ خۆ و هندەك ئاڤ ژی دیفرا ڤەخوار.
(نازێ) دڤییا ئەو ئێشا (حەسۆ)ی وێ ژی ڤەگریتن و وێ نەدڤییا پشتی (حەسۆ)ی بژیتن، نەهەرێ (حەسۆ) چوو بەردلوڤانییا خۆدێ و (نازێ) داخواز ژ داوەتیاكر، كا كی دزانیتن دا سورەتا یاسینێ و قورئانێ ل سەر (حەسۆ)ی بخۆینن و (حەسۆ) خلاس چوو بەر دلوڤانییا خۆدێ.
هندەك دبێژن: هەردو ئاشقا دەستێن خۆ بلندكرن و دوعا ژ خۆدێ خواستن و دگەل وان دوعا ئزرائیلی رحا هەردو پێكڤە ستاندن و هەردو بوون كوترەكا سپی و چوونە ئاسمانا.
یا دورست جەنازێ (حەسۆ)ی ڤەشارت.
(نازێ) ژی چوو سەر وەغەرا خۆ و خۆدێ چار پێنچ زاروك دانێ و دبێژن هەتا نۆکە نەڤی و نەڤچركێن (قولیخان ئاغای) یێ قەزا (ئەردیشێ) ماین.
بوو زانین، ئەو جهێ (حەسۆ) لێ ڤەشارتی یێ بوویە مەزار، خەلك دچنە سەر دوعا بخۆ دكەن و نەساخا دبەنە وێرێ دا خۆدێ ئێشا وان سڤك بكەتن.
پەیاما سەرهاتییا حەسۆ و نازێ دا
1- لایەنێ غەدرێ: (مەنجوی) و مەلای و رهسپییا بێ بەختی و درەو دگەل (نازێ) كرن، هەتا شیاین مالا وێ خراب كەن.
2- لایەنێ ئابۆری: هندەك مەلا یێن هەین، دەما پارە بگەهنێ، ئەو بەخت و وژدانا خۆ خراب دكەن و خۆدێ و پێغەمبەرا ژی ژ بیر دكەن.
3- لایەنێ خیانەتێ: (مەنجوی) خیانەت ل (نازێ) كر و ب زۆری و حیلە هنارتە مالا بابێ وێ.
4- لایەنێ دینداری: ل نك (نازێ) مەلای قورئان دانا و دەسەتێ خۆ دانا سەر و گۆتی بڤێ قورئانێ (حەسۆ) یێ مری، من و ڤان هەردو زەلاما بدەستێن خۆ یێ ڤەشارتی، لەوا نازێ باوەر ژ وان كر.
5- لایەنێ دینداری: ل دویڤ شریعەتی مەلای رێ دا (نازێ) دا بچیتن (حەسۆ)ی ببینیتن و خۆ ژێ خلاس كەتن (تەلاق) دەتن و بێی گەردەن ئازاكرن نەدشیا شوی بكەتەڤە، یانكو ژنا مەهركری ناهێتە مەهركرن ڤە.
6- لایەنێ دلسۆزی: وەفادارییا ژنا كورد، بۆ زەلامێ خۆ (نازێ نەدڤیا حەسۆی بهێلیتە د وی حالی دا و وێ دڤیا هەتا مرنێ دگەل مێرێ خۆ بیتن، دگۆتێ: حەسۆ دێ ئەز زمانێ تە مێژم دا ئێشا تە من ژی ڤەگریتن، چونكی وێ نەدڤییا پشتی زەلامێ خۆ بژیتن، وێ دڤییا پێكڤە بمرن.
7- لایەنێ جڤاكی: (مەنجوی) حوكم ل مێرێ خۆ (قولیخان ئاغای) دكر، چونكی ئەو كچا ئاغەیەكێ زەنگین و بهێزتر بوو ژ مێرێ وێ.
8- (دلپیسی): مەزن دبێژن (ئەو مالا ژنك خراب نەكەن، كەس نەشێتن خراب كەتن) مەنجو ژنەكا دل پیس و پڕ قرێژ بوو، وێ مالا (حەسۆی و نازێ) خراب كر، دیسا وێ حوكم ل مێرێ خۆ دكر.
9- (لایەنێ جوانیێ): هەكە (نازێ) وەسا یا جوان و ژێهاتی نەبا، بەلكو مەنجوی كەرب ژێ نە راكربا، چونكی ژ بەر جوانییا وێ، ئەو ژ مێرێ خۆ دترسییا، نەكو ژنبرا خۆ مەهر كەتن.
10- (لایەنێ زۆرداریێ): باب و برایێن (نازێ) ئەو ب زۆری برەڤە و هەر زوی ژ نەدلی وێ دا شوی و نەختێ وێ ژی خوار.
ل دوماهیێ هیڤیدارم ئەم بخۆ مفایەكی ژ ڤێ سەرهاتیێ وەرگرین، دلێن خۆ دگەل كەسێ رەش نەكین و كەرب و كینا ژ كەسێ نە هەلگرین، دیسا پێتڤییە ئەم زۆرداریێ ل كچ و ژنا نەكەین و رێزەكا تایبەت بدەینە وان چونكی مەزن دبێژن: (مال ژنە و بنیات خانی).
