مارگرێت کان، زمانناس و نڤیسەرەکا ئەمریکی یە ل نیویورک ژ دایک بوویە. بەکالوریوسا ب زانستێ زمانێ ل کۆلیجا بارنارد  Barnard College وەرگرتییە و پاشی ل زانینگەها میشیگان University of Michigan ماستەر و دکتۆرایا زمانناسییا تیۆری بدەستڤەئینایە.

ل دەمێ خواندنێ، کار ل سەر دەنگسازی و فۆنەتیکێ دکر و ڤەکۆلینەک ل سەر «جوداهیێن ڕەگەزی د زمانێ عەرەبی دا»  gender differences in pronunciation کر، کو ئێک ژ وان بیاڤان بوو د وی سەردەمی دا کێمتر کار ل سەرهاتبوو کرن.

پشتی هینگی، کان چوو ئیرانێ و ل وێ دەڤەرا کو ل ئورمیێ دەست ب وانەگۆتنا زمانێ ئنگلیزی کر بۆ قوتابیێن چاندنێ و هەر ل وێرێ ڤەکۆلینا خۆ یا مەیدانی دەربارەی ئاخفتنا کوردی ئەنجام دا.

پشتی دکتۆرایێ، وەک ڤەکۆلەرەکا سەر ب پشکا پەیوەندیێن ئاخڤتنێ ل تاقیگەهان، ڤەکۆلینێن ئەلکترۆنی ل زانینگەها MIT کار کر، ل وێرێ ل سەر دەنگ و تەکنۆلۆژیایا ئاخڤتنێ کار دکر.

هەروەسا ل سالا 1978ێ ل زانینگەها ئەسکەندەریە Alexandria University ل مسرێ وەک مامۆستایا فۆنەتیکا زمانێ عەرەبی کار کریە.

ئێک ژ بەرهەمێن وێ یێن گرنگ کو ل سەر کوردان نڤیسینە پەرتووکا وێ یا ناڤدار«زارۆکێن جینان: لێگەریان ل دۆر کوردان و وەلاتێ وان «Children of the Jinn: In Search of the Kurds and Their Country کو ئێکەم جار ل سالا 1980هاتییە چاپکرن و ل وەشانەک دی یا نوی ل سالا 2020 هاتییە بەلاڤکرن. ئەڤ پەرتووکە بەحسا گەشت و ڤەکۆلینا وێ د ناڤ کوردان دا دکەت. 

دچیتە ناڤ کوردێن رۆژهەلاتێ کوردستانێ دا داکو ل سەر زمانێ کوردی ڤەکۆلینێ بکەت. بۆ دەمەکێ درێژ ل باژێرێ ئورمیێ دژیت و ل گەل کوردێن خۆجهـ و هەروەسا پەنابەرێن کوردێن باشوورێ کوردستانێ تێکهل دبیت. نڤیسەر د ژیانا خۆ یا ڕۆژانە دا ل گەل خەلکی ب تایبەتی ژنان، سەرهەلی کەلتوور، زمان، داب و نەریت و ئاریشەیێن سیاسی یێن کوردان ژ نێزیک دبیت و تاقی دکەت و دەربارەی کارتێکرنا حکومەتان ل سەر ژیان و ناسنامەیا وان د ئاخڤیت.