بابەت

ژ دۆستێن كوردان.. گۆتفرید یۆهانس موللەر (1914 – 2009)ێ

بەرهەڤکرن: مەتین

 

وەک وەفادارییەک، (مەتین) دێ د هەر هژمارەکێ دا، ئێک ژ دۆستێن کوردان، بۆ خواندەڤانێن خۆ دەتە نیاسین.

گۆتفرید ییۆهانس مولله‌ر Gottfried J. Müller، د سه‌ره‌دانا وی یا ئێكێ دا بۆ كوردستانێ د ساڵێن سیهێن چه‌رخێ بۆری دا (١٩٣٦)، ئه‌و و ئێك ژ هه‌ڤالێن خۆ‌ پشتی سه‌ره‌دانا فه‌له‌ستین و پاشی عیراقێ كرين، ل به‌غدا چاڤێن وی ب شێخ مه‌حموودێ حه‌فید كه‌فتن، كو ئه‌وی ئه‌و هنارتن بۆ كوردستانێ (ده‌ڤه‌رێن كه‌ركووك و سلێمانی)ێ. ل وێرێ ژ نێزیكڤه‌ هایدارى ره‌وشا كوردستانێ و گه‌لێ كورد و سروشتێ وێ یێ جوان بوون.

مولله‌ر د ساڵا ١٩٣٧ دا پشتی ڤه‌گه‌ڕیانا خۆ بۆ ئه‌لمانیا، په‌رتووكه‌ك ده‌رباره‌ی وێ گه‌شتا خۆ بۆ كوردستانێ نڤیسی ب ناڤێ (گه‌شته‌ك بۆ كوردستانا گرتى) به‌لاڤكر.

ئاخا كوردستانێ وه‌كو حه‌زه‌كا وى، بیردانكا وی تژی كربوو، له‌وا سێ جاران سه‌ره‌دانا كوردستانێ كر. یا ئێكێ د ساڵا 1936ێ دا د گه‌شته‌كا ڤه‌دیتنێ دا بوو، كو د قووناغا ژييێ خۆ يێ ساڵێن بیستان دا بوو. یا دويێ گه‌شته‌كا سه‌یر بوو د ساڵا ١٩٤٣ێ دا ل گه‌ل گه‌نجێ كورد یێ ئه‌فسانه‌یی (ره‌مزی نافع ره‌شید ئاغا)، كوڕەكێ چه‌له‌نگ یێ هه‌ولێرى و دو ئه‌فسه‌رێن دی یێن ئه‌لمانی د ئه‌ركه‌كێ سه‌یر و خه‌یالی دا.

سه‌ره‌دانا سێیێ د ساڵا ١٩٩٢ دا بوو، وه‌كو وه‌فاداريیه‌كێ بوو، بۆ بیرئینانا ره‌مزی (برایێ روحی) هه‌ر وه‌ك مولله‌رى حه‌ز دكر ب وى ناڤى گازى وى بكه‌ت.

مولله‌رى دو په‌رتووك ل دۆر كوردستانێ نڤيسينه‌، ب زمانێ ئه‌لمانى و ئينگليزى هاتينه‌ چاپكرن، سه‌يدايێ ئه‌ندازيار يونس عه‌بدولعه‌زيز هه‌ردو په‌رتووك وه‌رگێڕاينه‌ سه‌ر زمانێ عه‌ره‌بى و چاپكرى نه‌:

1.«ل رۆژهه‌لاتێ گڕگرتی»، ساڵا 1937ێ، وه‌رگێڕانه‌كا گرنگه‌ ژ زمانێ ئینگلیزی بۆ زمانێ عه‌ره‌بى، چاپا دويێ 2023.

2.گه‌شته‌ك بۆ كوردستانا گرتى: د ساڵا ١٩٣٧ دا هاتیه‌ به‌لاڤكرن وه‌رگێڕایه‌ كو ئه‌وژی ب زمانێ ئه‌لمانی د ساڵا ١٩٥٩ دا به‌لاڤكربوو. سالا 1995 هاتييه‌ وه‌رگێڕان بۆ زمانێ عه‌ره‌بى، چاپا دويێ سالا 2023ێ.

 

ڤان بابەتان ببینە

فرێدریک بارت (١٩٢٨ – ٢٠١٦) مرۆڤناسەکێ نەرویجی یێ دیار بوو. د سەدەیێ بیستێ دا، ئێک …