ژ دۆستێن كوردان .. شەهرەزایێ رۆژهەلاتا ناڤین و رۆژنامەڤان، جۆن بولۆک

بەرهەڤکرن: حەکیم عەبدوڵا

وەک وەفادارییەک، (مەتین) دێ د هەر هژمارەکێ دا، ئێک ژ دۆستێن کوردان، بۆ خواندەڤانێن خۆ دەتە نیاسین.

ژ رۆژنامەڤان و شەهرەزا و پەیامنێرێن ب ناڤ و دەنگ یێن کار بۆ هەر دو رۆژنامێن بەریتانى (The Daily Telegraph, The Independent) کرى، جۆن ئەنجڵ بولۆک. ل ١٥ى نیسانا ساڵا ١٩٢٨ێ، ل دەڤەرا (وێلز) ل باشوورێ باژێرێ کاردیف ل بەریتانیا ژ دایک بوویە. بابێ وى یێ دەریاڤان، د شەڕێ ناڤخۆیى یێ ئیسپانیا دا ل بەرشەلۆنە هاتییە کۆشتن. بەرى رۆژنامەڤانیێ، بۆ چەندین ساڵا، جۆنى وەک بابێ خۆ کارێ دەریایێ کرییە. پاشى ل ژییێ ٢٣ێ ساڵیێ ل باژێڕێ کاردیف،  وەک پەیامنێر کار د رۆژناما (وێسترن مەیل) دا کرییە. ل ساڵا ١٩٥٨ێ و بۆ دەمێ بیست و پێنج ساڵان، وەک پەیامنێرێ بیانى و نڤێسەرێ دپلۆماسى کار د رۆژناما (دەیلى تێلێگراف) دا، کار کرییە و د دویڤڕا، ل ناڤەڕاستا ساڵێن هەشتێیان ژ چەرخێ بیستێ، ڤێ رۆژنامێ بجهـ دهێلیت و وەک نڤێسەرەکێ خودان سەربۆر د رۆژناما (Independent) دەست ددەتە کارى کو ل ساڵا ١٩٨٦ێ دبیتە نڤێسەرێ وێ یێ دپلۆماسى. نێزیکى دەهـ پەرتوکان ل دۆر وەڵاتێن کەنداڤى و عێراق و کوردستانێ ل سەر شەڕ و ئالۆزى و ئارێشێن ئاڤێ و پەترۆلێ ل ڤان وەڵاتان نڤێسییە. ل دەستپێکا سەرهلدانێ ل ساڵا ١٩٩١ێ، سەرەدانا کوردستانێ کرییە و ل گەل خەلکى و پێشمەرگەى و بەرپرسێن کورد ئاخفتییە. لێ پەرتوکا وى ل ژێر ناڤ و نیشانێن (NO FRIENDS BUT THE MOUTAINS: THE TRAGIC HISTORY OF THE KURDS) ل سەر دیرۆک و خەباتا مللەتێ کورد دهێتە هژمارتن ئێک ژ پەرتوکێن ب ناڤ و دەنگە کو ژ لایێ مامۆستا (حەکیم عەبدوڵڵا)یڤە بۆ سەر زمانێ عەرەبى هاتییە وەرگێڕان و ژ چاپکرییێن کۆڤارا (مەتین)ە ل ساڵا ٢٠٠٩ێ.

 جۆن بولۆک ل ١٨ى چریا دویێ ساڵا ٢٠١٠ێ وەغەر کرییە.