گۆڤارا مەتین گۆڤارا مەتین
ئیحسان ئامێدی
یا سروشتییە هەمی سەرۆک وەسا خۆ نیشا بدەن، کو خۆشتڤییێن مللەتی نە و دەربڕینێ ژ ئیرادا مللەتی دکەن و یێ هاتی دا خزمەتا گەل و وەڵاتی بکەت، بەلێ د ڕاستی دا کێم سەرۆک هەنە ب ڕاستی سەرۆکێ مللەتی بن و خۆشتڤییێ هەمییا بن و دەربڕینێ ژ ئیرادا مللەتی بکەن، حەتا ل رژێمێن دیموکراتی، ئەوێن سەرۆکێن وان ب هەلبژارتنێن گشتی وی پایەیی ب دەستڤە دئینن، کو ڕەوایا خۆ ژی هەیە، بەلێ خۆشتڤییێن پترییێ نینن، چونکی ئەو د قالبداینە د چارچووڤەکێ یاسیی دا و هاتینە د ماوەیهکێ دیارکری دا؛ ئەرکێن خۆ یێن یاسایی بجهبینن، هەمی گاڤا هندەک بەرهنگار هەنە و بۆ یێن دی ژی؛ هند گرنگ نینە کی سەرۆک بیت، تنێ چاڤێ وان ل بەرژەوەندییێن وانە و ژێ دخوازن ئاسایش و سەقامگیرییێ و پێدڤییێن بنەکى یێن ژیانێ بۆ د دابینکری بن.
خۆ ل وەڵاتێن رۆژهەلاتا ناڤین، هەمی رژێم و سەرۆک ب کۆدەتایان هاتینە و خۆ سەپاندییە و دەنگێن نەرازیبوونێ سەرکۆتکرینە!. لەوان پترییا وان د ڕاستگۆ نینن و شرعيەت نینە و دەربڕینێ ژ ئیرادا مللەتی ناکەن.
هەر ل بەراهییا سەرهلدانا سەرۆک مهسعود بارزانی، هێشتا گەنج و بوویە پێشمەرگە، خۆ د ناڤ مللەتی و دامەزراوێن پارتی و شۆڕەشێ و پێشمەرگەیى دا دیت و سەرەدەرییەکا بەرپرسیارانا و هەڤالانە د گەل دا کر. ئیدێ بوو سەرکردەیەکێ شۆڕەشگێرێ مللی و سەرنجا هەر ئێکی دیتی؛ بۆ خۆ ڕاکێشا و کارتێکرنا خۆ لێکر و بۆ خۆشتڤییێ وان.
سەرۆک لەو بوو سەرۆک و ڕابەر، چونکی سەرکردەیهکێ شۆڕەشگێرێ سەرکەفتی بوویە، کەسایهتییەک ب هێز و بیرمەند و دووربین و گەشبینە، د سەختترین کاودان دا، خۆ د ناڤ مللەتی دا دبینیت و مەیدانێ چۆل ناکەت، هەردهم سەرکردەیهکێ کاریزمایێ ئومێدبەخشە، خودانێ دۆزا مللەتییە و خەمخورێ خواست و پێدڤی و دەرد و ژانێن خەلکییە.
سەرۆک ئەو تاکە سەرکردە بوو، یێ خۆ ل بەر پیلانا جەزائیرێ ڕاگرتی و خۆ ل خەلکێ لێ قەومی کرییە خودان و هەر زوی پارتی رێکخستییەڤە و شۆڕەشا گولانێ بەرپاکری و باوەری ڤەگەراندی و هیڤی و ئومێد زیندی کرین.
سەرۆک بارزانی ل سەر رێبازا بابێ روحی مەلا مستەفایێ بارزانی، خۆ پێگەهاند و پێگیرکر، دا خویا بکەت ڕێبازا بارزانی، ڕێبازا ڕزگارییا وەڵاتی و ئازادیێ و دیموکراتیێ و دادپەروەریێ یە، گۆتنا بارزانیێ نەمر بجهـ دئینیت؛ دەمێ دبێژیت: دڤێت مال و ژیان و ئاقل و زانست و هەر چ یا مە هەبیت، بۆ ڤی مللەتی ب مهزێخین، تاکو ئازادییێ بدەستڤە بینین، دەستێ دژمنێ غەدار و زۆردار ل سەر ڕاکەین. ب ڕاستی سەرۆکی؛ بکریار هەمی ئەڤ گۆتنه بجهـ ئیناینە و هەر چ یا هەی یا کری و پێشکێشکری پێناڤی ڕزگارکرنا وەڵاتی و ئازادییا خەلکی، د ڤێ ڕێبازێ دا، یێ خۆ وەکو پێشمەرگە، فەرماندە، سەرکردە، سەرۆک، ڕابەر و هەڤال نیشادایی، د هەمی وان بیاڤان دا ژیایە، ل سەنگەرێن بەراهییێ یێن پێشمەرگەیی و ل گەل بەرپرس و فەرماندەیان ل بەروکێن شەڕان، وەکو سەرکردهیا بۆ دانانا پلانێن ڕزگارکرنێ و بەڕەڤانیکرنێ، وەکو سەرۆک و ڕێبەر بۆ ب رێڤەبرنا کاروبارێن گەل و وەڵاتی ل ئاستێن ناڤخۆ و دەرڤە، هەڤالێ هەمییان بوو، دەرگەهێ دانوستاندنێ بۆ هەمییان یێ ڤەکرییە، کو هەر ئێک یا دلێ خۆ بێژیتێ ژ پێشمەرگەیان و ئەندامێن پارتی و خەلکێ سادە، هەر ئێکێ ل دیدارەکا وی ئامادەبوویی و گوهداریا وی کری دەملدەست یێ پێ داخباربوویی و باوەرییا وی یا بهێزتر لێکری و وورەیا وی یا بلندتر لێکری، چونکی دلسۆزی و ڕاستگۆیا وی یا بۆ دیاربوویی، لەوان خۆشتڤییێ هەمیانە.
سەرۆک گەلەک حەز ژ مللەتی دکەت و هێزا خۆ ژ مللەتی وەردگریت و گۆتنا بارزانیێ نەمر ل بیر دئینیت دەمێ دبێژیت: هێزا من ژ گەلێ منە؛ من سەرۆکایەتی نەڤێت، بەلێ گەلێ من دڤێت ئەز خزمەتکارێ وان بم. ئها هۆسا سەرۆک بارزانی، هەست ب بەرپرسیارییا خۆ دکەت و پێ ڕادبیت و خۆ ب خزمەتکارێ مللەتی دزانیت. هەردەم د گەل دایە و ویژدانا وی ل گەل مللەتییە و کار دکەت پێناڤی دادپەروەریێ و یەکسانیێ و داکۆکییا وی ژی ل سەر ئازادییێ و دیموکراتیێ و دادپەروەریێ و پێکڤە ژیانێ دەربرینێ ژ فەرمودا بارزانیێ نەمر دکەت دەمێ دبێژیت: مروڤ دڤێت یێ ب ویژدان بیت و لایەنگیرێ دادپەروەرییێ و یەکسانییێ بیت د ژیانێ دا.
بەلێ ئەڤە سەرۆک بارزانى یە، سەرۆک و خزمەتکارێ مللەتییە، لەوان هەمیشە د ناڤ مللەتی دایە و هەلگرێ ئارمانج و هیڤی و داخوازێن وانە و خۆ ب هەڤپشکێ خەم و دەردێن وان دزانیت.
ل نەخۆشترین کاودانێن سەخت و دژوار دا، ل سەردەمێن خەباتا نهێنی و چەکداری و شۆڕەشان، خەلکێ کوردستانێ ب باوەری؛ دبوونە رێکخستییێن پارتی و گەردەنا خۆ بۆ خلفا سێدارێ بهرههڤ دکر، هەروەکو د بوونە پێشمەرگە و سینگێ خۆ دکرنە مەتاڵ بۆ تۆپ و تڤەنگێن دژمنی، ل دەمێ دچوو سەرەدانا گوندهکی یان باژێڕەکی هەمی خەلک ل پێشوازییا وی بوون و دلشاد و کەیفخۆش دبوون ب دیتنا وی، ب هیڤی و شانازی ڤە؛ وێنە ل گەل دگرتن و نیشادان. ل سەردەمێ ڤەگوهاستنا دەستهەڵاتێ ژ شۆڕەشگێریێ بۆ یاسایێ هەر ئەو ل بەراهییێ بوو و پترییا دەنگان ب دەستڤە دئینان.
سەرۆک ل سەر دەمێ شۆڕەشگێریێ پترییا مللەتی د گەل دا بوو، ل سەر دەمێ ئازادییێ، پترییا مللەتی د گەل دا نە، نیشانا هندێ یە، کو خۆشتڤییێ مللەتییە.
سەرۆکێ خۆشتڤی مهسعود بارزانی، هەردەم یێ ئامادەیە و ئاگەهـ ژ خواست و پێدڤی و گیروگرفت و ئارێشەیێن خەلکی هەیە و خۆ لێ دکەتە خودان، پەیامێن سەرۆکی ب هەلکەفتنێن نیشتمانی، ئایینی، مروڤایەتی و سیاسی یێن گشتی، یێن تایبەت ب بوونەیێن کەسۆکی؛ نیشانەکا زیندینە، کو سەرۆک د ناڤ خەلکی دایە و ژ دل حەز ژ خەلکی دکەت و دەربڕینێ ژ هەست و دید و بۆچوونێن وی دکەت.
بەلێ سەرۆکێ هەردەم ئامادە و ئاگەهـ ژ مللەتی هەیی، بۆ جارەکا دیتر ل هەیڤا تەباخا ٢٠٢٣ێ، سەرەدانا دەڤەرێ دکەت و راستەوخۆ دهێتە د ناڤ خەلکی دا، داكو روی ب روی پەیاما خۆ بۆ دبێژیت و گوهدارییا پەیامێن خەلکی بکەت.
سەرۆک هەر ژ دەستپێکا خەباتا وی، وەکو سەرکردەیەکێ جەماوەری بوو، ل یاد و بیرەوەرییێن نەتەوەیی، نیشتمانی و پارتی ئامادە دبوو، ل کەرنەڤالێ ڕاگەهاندنا رێکكەفتناما ١١ی ئادارا ساڵا ١٩٧٠ێ، ل ئاهەنگێن نەورۆزێ، ل دامەزراندنا پارتی و شۆڕەشا ئیلونێ و گولانێ و مەراسیمێن مالئاڤاهییا بارزانیێ نەمر و ئیدریسێ جانەمەرگ، ل کارەساتێن کۆمەڵکوژییا فەیلییان و بارزانییان و زێوە و ئەنفالان، ل سەرهلدانێ و سەرەدانێن تایبەت بۆ باژێڕ و گوندان هەردهم د ناڤ حەشامەتا جەماوەری دا دهێتە هەمبێزکرن، وەکو سەرکردەیەکێ باوەری ب خۆ مللەتێ خۆ هەی و یێ نێزیکی هەمییان، پەیاما خۆ دگەهینیت.
سەرۆک ل شۆڕەشا گولانێ، ل سەنگەرێن پێشمەرگەیی ژ قەندیلی بۆ لولانێ و دەڤەرا بەهدینان و خواکورکی گەڕیایە و راستەوخۆ ل گەل پێشمەرگەیی د سەنگەران دا بوویە، ل نێزیک ئاگەهـ ژ هەر رەوشەکێ هەبوویە و فەرمان و ئامۆژگاری پێداینە و هەردهم هۆیێ پێگیرییێ و گوهدارییێ و وورە بلندکرنێ بوو.
کۆنگرەیێن پارتی، وەکو کەرنەڤالێن جەماوەری نە، سەرۆک وەکو سەرۆک و هێما و ئەندام ب ڕێ دئێخیت و برێڤە دبەت.
خویایە حکۆمڕانی و کارگێڕی و رێڤەبرنا گەل و وەڵاتی، کارەکێ گران و بەرپرسیارییەکا مەزن و پڕی ئاستەنگ و ئارێشەیە، هەر تشتەک وەکو بەرنامە بۆ دارێشتی، ناهێتە بجهئینان، ئێدی دێ رەخنە و گازندە هێنەکرن، یا گرنگ د ڤێ رەوشێ دا دەستهەڵاتدار و خودان بڕیار هەست ب بەرپرسیارییا خۆ بکەن و خۆ ل ڤان پرسا بکەنە خودان، خۆشبەختانە کەسێ ئێکێ ل کوردستانێ، کو سەرۆک بارزانى یە، خۆ ب بەرپرس دبینیت و ب ئەرکێ خۆ ڕادبیت بۆ هندێ ئاسایشێ و سەقامگیرییێ بجهـ بینیت و دلخۆشییێ و ئارامییێ پەیدا بکەت، ل بەر روناهییا شیرەت، ئامۆژگاری، رێنمایی، کار و کریارێن بەرێزی، کاربدەستێن مللەتی؛ ئەوێن ل سەر ڕێبازا پارتی و بارزانی د هەمی ئاستان دا ب بەرپرسیارانە ب ئەرک و کارێن خۆ ڕادبن و خزمەتا خەلکی دکەن، ئەوێن خەمسار و گەندەل ژى، بەر ب لێپرسینێ و پێڕابوونێن یاسایی دکەڤن.
سەرۆکێ خۆشتڤی بەردەوام د ناڤ مللەتی دایە و پەیاما خۆ ب زەلالی دگەهینیت، سەرەدانا رێزداری ڤێ جارێ بۆ دەڤەرا بەهدینان، د کاودانەکێ هەستیار و ئالۆز دا دهێتەکرن، ل دەمەکی دایە، کو ناڤمالییا هەرێما کوردستانێ نە یا ئێکخستی و هەڤگونجایە، پێدڤیێن بنەکی یێن خەلکی بووینە کێشە، دەلیڤەیێن کاری، مۆچە، گرانییا بهایێ نەفت و پانزین و کارەبێ، نەسەقامگیرییا بازاڕی بارگرانییەکا دیترە، گڤاشتنێن حکۆمەتا عیراقێ د زێدەبوونێ دانە، یا خۆ ڤە ددزیت ل بجهئینانا دەستوری و رێکكەفتنێن هەرێمێ و عیراقى، زێدەباری گەف و دەستدرێژییێن دەولەتێن هەرێمایەتی، بزاڤ و چالاکییێن پ.ک.ک یێن رێگر بۆ ئاڤەدانکرنا گوندان، ئەڤجا ژی جمۆجۆلێن لەشکەری یێن هێزێن بیانی و هەڕەشەیێن وان ل هەڤدو و باندۆرا وان ل سەر دەروونێ خەلکی، رەوشەک مەترسیدار نیشا ددەت و ترسەک ل نك خەلکی دروست کرییە، ئەڤی بارودۆخی، پێدڤییا هەبوونا سەرۆکی د ناڤ خەلکی دا سەپاند، رێزداری ژی ئەڤ پێدڤییە بجهئینا ژلایەکی ڤە وەکو دلنیاکەر و پشتراستکەر بو خەلکێ خو نیشادا، هەروەکو دبێژیت، ئەڤە ئەز یێ ل گەل وە، پشتڕاست بن چ مەترسی نینن، ئەڤ هەرێمە ب خوینێ و ب رۆندکان هاتییە دامەزراندن و هەر دێ مینیت و کەس نەشێت ژ ناڤ ببەت، کێشە و گرفت ژی دێ هێنە چارەسەر کرن. هەروەکو سەرۆک بارزانی د هەمی کۆمبوونێن خۆ ل گەل هەڤال و چین و تەخ و پێكهاتێن جڤاکی؛ ب ڕۆنی و زەلالی باسێ رەوش و بارودۆخێ هەرێمێ و عیراقێ و دەڤەرێ دکر و بەرهەڤیێن پارتی و حکومەتا هەرێمێ بۆ هەر پێشهاتەکێ نیشا ددا، هۆسا جەماوەر دلخۆش و پشتڕاست و وورە بلند دکر.
ژ لایەکێ دی ڤە سەرۆک بارزانی پشتی کۆنگرەیێ چاردێ یێ پارتی ئەوێ ل ٣ێ چرییا دویێ ٢٠٢٢ێ ل باژێڕێ دهۆکێ هاتییە بەستن، ئەو گوهۆڕین د هەیکەلییەتا دامەزراوێن پارتی دا کرین، هاتە دەڤەرێ دا پیرۆزباهییێ ل کاربدەستێن نوی بکەت و دویڤچوونا کارێ وان بکەت و بزانیت پێدڤی و داخواز و کێشە چنە دا بۆ چارەسەر بکەت.
ژ لایەکێ دیتر ڤە هاتییە، داکو بزانیت کا کارنامهیا کابینا نەهێ یا حکومەتا هەرێما کوردستانێ چاوان دهێتە بجهئینان و چ دی پێدڤییە بهێتەکرن و چ کێم و کاسی هەنە.
هەروەسا هاتییە و خەلکێ دەڤەرێ ب تەخ و توێژ و پێکهاتێن وێ یێن ئایینی و نەتەوەیی ڤە دیتی نە و دەلیڤە بۆ خۆشکرییە، داکو یا دلێ خۆ بۆ بێژن و ئامادەبوویا ژی ئەوا ڤیای ب ئازادی یا بۆ گۆتی، وی ژی دویڤچوونا رێڤەچوونا ژیانا وان کرییە.
سەرۆک خۆشتڤییێ مللەتییە و ل گەل مللەتییە، وێ گۆتنا بارزانی بجهدئینیت، (شانازییە مروڤ خزمەتکارێ مللەتێ خۆ بیت)، هەروەکو رێزدار ژی دبێژیت: (ڕێبازا پارتی و بارزانی ڕێبازا خزمەتکرنا مللەتییە).
ل نێزیکبوونا سەرۆکی ژ جەماوەرێ مللەتی و خەمخورییا وی بۆ پرسێن وان و گوهدارییا وی بۆ گۆتنێن خەلکی، دلێ خەلکی بۆ خۆ ڕادکێشیت و گۆتنا بارزانیێ نەمر بجهدئینیت، دەمێ دگۆت: (ئەگەر دلێ مللەتی ل گەل مە دا بیت، دژمن هزار جاران هێزا وی زێدەتر بیت، نەشێت مە بشکێنیت، ئەگەر دلێ مللەتی ل گەل مە نەبیت، هزار جاران ژ نوکە بهێزتر بین، ئەم دێ شکێین و نەشێین سەرکەڤتنێ بدەستڤە بینین).
ژ بەر هندێ بۆ پارتی و سەرۆک بارزانی، مللەت مەبەستە و هێز و وورەیا خۆ ژ مللەتی وەردگرن و ئەڤە رێکا دروستە یا سەرکەفتنا هەر بزاڤەکا سیاسییا جڤاکی، لەوان بۆ پارتی رازیکرنا مللەتى و خزمەتکرنا وی ئەرکەک پارتی و جڤاکی و مروڤی و نەتەوەیى یە.
سەرۆک بارزانی، دلسۆز و خەمخورێ مللەتییە، پێشبینیکەر، گەشبین، ئومێدبەخش و دلخۆشکەرە، وەکو د ناڤ خەلکی دا دەردکەڤیت، ڤان پەیاما دگەهینیت، خەلک پێ پشتڕاست و دلخۆش و وورە بلند دبیت.
سەرۆک بارزانی خۆ ژ خەلکی دبینیت و گوهدارییا خەلکی دکەت. لێ دزانیت و فێر دکەت و بڕیارێن باش و ئێکلاکەر ددەت و سەرکێشییا سەرکەفتیانە د هەمی بیاڤێن ژیانێ دا دکەت.
هاتنا رێزداری و دیدارێن وی، وان بەربەستان دشکێنیت، ئەوێن د ناڤبەرا جەماوەرێ مللەتی و سەرکردایەتیێ دا، نەمازە دەمێ داخوازێ ژ ئامادەبوویا دکەت ئەوا دلێ خۆ بۆ بێژن.
ئەڤ ئامادەبوویێن بەرفرەهێن جەماوەری، ئەڤ حەزا خەلکی ب دیتنا سەرۆکی شاد ببن و ئەو شانازی و سەرفهرازییا ب خەلکی دهێتەدان، کو یا خۆ بۆ بێژن و وێنەیان ل گەل بکێشن، نیشانا خۆشتڤییاتییا وی و مللەتییە بۆ هەڤدو.
هاتنا سەرۆکی، پێدڤییەک بوو، پەیام گەهاند، خەلک پشتڕاست و دلخۆشکر، چاڤەرێی ئەنجامێن باشترن.
هەر ساخلەم و تەمەن درێژ بیت سەرۆکێ خۆشتڤی مهسعود بارزانی. سلاڤ ل خەلکێ دلسۆز و خۆڕاگرێ کوردستانێ. گیانێ شەهیدان شاد بیت.
