دەستپێک:

   نڤیسینا دیرۆکا گەلێ کورد ب شێوازەکێ ئەکادیمی و بێلایەن، ئێک ژ زەحمەتترین و گرنگترین کارێن ڕەوشەنبیری و نەتەوەیی یێن سەدسالا بیستێ و بیست و ئێکێ بوویە، ژ بەر بێباربوونا کوردان ژ دەولەتەکا ئازاد و سەربخوە کو بشێت دیرۆک و کولتوورێ خوە بپارێزت، لەوما پشکەکا مەزن ژ دیرۆکا گەلێ کورد کەفتیە بەر مەترسییا ژ بەرزەبوون و تێکدان و ژ ناڤبرنێ. د رەوشەکا ب ڤی ئاوایی دا، ڕۆلێ دیرۆکنڤیس و زانایێن خەمخوەر و وەلاتپارێز دەرکەفت کو بارێ پاراستن، زێدەکرن و سەراستکرنا دیرۆکێ بێختە سەر ملێن خوە و بۆ دیرۆکا گەلێ خوە ببنە پارێزڤان و گەلەک رویدان و بۆیەران جارەکا دی بنڤیسنە ڤە و راستیان دیار بکن و د ڤی واری دا دیرۆکڤانێن خودان شیانێن زانستی هاتنە مەیدانا نڤیسینێ.

   یا خویایە کو دیرۆکا کوردان ژ کەڤن وەرە یا ب دەستێن داگیرکەرێن کوردستانێ ل هەر چار پارچەیان هاتیە نڤیسین، ئەوان ژی ل دویڤ بەرژەوەندیا گەل و وەلاتێ خوە تۆمارکرییە. کەڤنترین ژێدەرێ دیرۆکی یێ کوردان کو ب دەستێ کوردەکی هاتییە نڤیسین (شەرەفنامە) یا میر شەرەفخانێ بەدلیسی یە (1543-1603) زایینی.

    ئێک ژ دیارترین و ناڤدارترین دیرۆکنڤیس، زانا و ئەکادیمیێن کورد د وارێ دیرۆکا هەڤچەرخ و ئەرشیفکرنا کوردستانێ دا، پڕۆفیسۆر دکتۆر عەبدولفەتاح عەلی یەحیا بۆتانی (1950 – 2026) بوویە. ئەوی وەکو مامۆستایێ ئامادەیی و زانکۆیێ کار کرییە، ب دەهان قوتابیان و خودانێن باوەرنامێن بلند (ماستەر و دکتۆرا) پەروەردە کرینە و ل سەر دەستێن وی دەرچووینە. بەرهەمێن چەندین پەرتووکێن پڕ ب بها و ڤەکۆلینێن رەسەن یێن زانستی بووینە کو ب زمانێن کوردی و عەرەبی نڤیسینە و دەستنڤیس و بەلگەنامەیێن دیرۆکی ل نک خوە پاراستینە و شرۆڤە کرینە.

    د ناڤ پێڤاژۆیا نڤیسینا دیرۆکا کوردان دا و ب شێوەیەکێ ئەکادیمی، دکتۆر بۆتانی، پێگەهەکێ بلند و تایبەت یێ ڤێ مەیدانێ داگیر کرییە. ئەو نە ب تنێ وەکو مامۆستایەکێ زانکۆیێ بوو، بەلکو وەک ڤەکۆلەرەکێ ڕاستەقینە و ئەرشیفکەرەکێ خەمخوەر، ڕۆلەکێ بێهەمپا د نڤیسین و ڕاستڤەکرنا دیرۆکا هەڤچەرخا کوردستانێ دا گێڕایە. خزمەتا وی ب تایبەت د ئاشکراکرنا و دویڤچوونا بەلگەنامەیێن ئەرشیفی بوویە کو بووینە ژێدەرەکێ موکم بۆ ب دەهان ڤەکۆلینێن زانستی یێن دیرۆکی د پەرتووکخانا کوردی دا و ئەڤرۆ قوتابیێن وی دیدەڤانیێ بۆ ڤێ چەندێ ددن کو دیتن و بۆچوونێن وی چ ل دەمێ سەرپەرشتیکرن یان وەک سەرۆک و ئەندامێ لژنەیێن گەنگەشەیا نامەیێ (ماستەر و دکتۆرا)یێ، د دیار و ئاشکرنە، راستڤەکرن و زێدەکرنا بۆچوونێن وی ل نک قوتابیان جهێ دلخوەشیێ و مفاداریێ بوون. ڕۆلێ وی د کۆمکرن و پاراستنا بەلگەنامەیان دا گەلەکی گرنگ خویابوو، هەروەسا ئێک ژ مەزنترین خزمەتێن بۆتانی بۆ نڤیسینا دیرۆکا کوردی، خەبات و ماندووبوونا وی بوو د وارێ کۆمکرنا ژێدەرێن رەسەن و ڕاستڤەکرنا بەلگەنامەیێن دیرۆکی دا، ژ بەر کو ل دەمێ نفیسینا دیرۆکا راستەقینە هەکەر بەلگە و دویکیۆمەنێت ل بەردەست نەبن، ئەو نڤیسین دێ وەکو داستان و ئەڤسانەیان بن و چو مفایێن خوە یێن دیرۆکی نابن و هەروەسا نابنە جهێ باوەریێ جهێ باوەریا خواندەڤان و ڤەکۆلەرانە ژی.

ئێک؛ بنەکۆکا مالباتا دکتۆر عەبدولفەتاح بۆتانی:

بنیاتێ بنەمالا دکتۆر عەبدولفەتاح بۆ گوندێ شاخێ ل دەڤەرا جزێرا بۆتان دزڤڕت کو دکەڤتە ئێک ژ گەلیێن چیایێ جودی. گوندێ وان د ناڤ دێرۆکا سەربخوەیا خەباتا نەتەوی یا کوردی دا گرنگیەکا خوە هەبوویە، ژ بەر کو ئەو ژی ل گەل باژێڕێن مەزن یێن کوردان، ژ ئالیێ داگیرکەرێن کوردستانێ ڤە تووشی تالانکرن و وێرانیێ و دەردەرسەریێ ببوو.

بنەمالا وان ل سەر دەمێ دەستهلاتداریا میرێن بۆتان ژ گوندی هاتبوونە باژێڕێ جزیرێ، مەزنێ وان مەلا محەمەدێ کوڕێ ئیسماعیل بوو، ئەوێ ب ناڤێ (محەمەدێ قوتک) هاتیە نیاسین، ئه‌و زانایەکێ دینی یێ ناڤدار بوو، گەلەک زمان دزانین وەک (عەرەبی، فارسی و تورکی) زێدەباری زمانێ دایکێ یێ کوردی، نوکە گۆڕا وی یا ل نک گۆڕا مەلایێ جزیری ل گۆڕستانا باژێرێ جزیرێ.

پشتی نەمانا میرگەها بۆتان ل سالا 1847ێ ل سەر دەستێ دەولەتا ئوسمانی، کوڕێن میر بەدرخان بەگێ چەند بزڤێن چەکداری کرن ژ بۆ ڤەگەراندنا دەستهلاتا میرگەهێ، لێ هەمیان شکەستن ئینا و ب سەرنەکەتن. پاشی هێزێن دەولەتا ئوسمانییان هێرش کرە دەڤەرێ و ب هۆڤاتی و دڕندەیی سەرەدەری ل گەل خەلکی کر، ب ڤی ئاوایی گەلەک ژ خەلکێ دەڤەرێ نەچاربوون و دەربەدەری باژێڕێن مووسل و دیاربەکرێ بوون. هۆسا مەزنێ بنەمالا دکتۆری، عەلی محەمەد قوتک ل گەل برایێ خوە محەمەد میرزا ب کوتەکی خوە رزگارکرن و خوە گەهاندنە باژێڕێ مووسل.

  عەلی ل گوندێ هوستان ل ناڤ بارزانیان بۆ دەمەکێ درێژ خوەجهـ بوو، لێ برایێ وی ل گوندێ زێناوا میری خوەجهـ بوو. پشتی مانا عەلی محەمەد قوتک ل چەند گوند و دەڤەرێن کوردستانا عێراقی (مووسل و هەولێر)ێ، گەلەک کوڕ و کچ هەبوون کو دبنە نڤشێ ئێکی یێ ڤێ بنەمالێ، پاشی نڤشێ دویێ دەستپێ دکت، ئەوی ژی ژ کوڕان؛ عەلی (بابی دکتۆر عەبدولفەتاح) و محەمەد ڕەشاد، عاصم، عەزیز و سەعید کو ئەڤە کوڕێن یەحیای بوون.

نڤشێ سێیێ یێن کوڕێن مەلا عەلی یەحیای ژی ئەڤە بوون: عەبدولغەنی (2019 مالئاڤاهی کرییە)، ئیبراهیم، عەبدولفەتاح (2026 مالئاڤاهی کرییە)، تەحسین، عامر کو (ل سالا 1982 د رویبارێ دیجلە دا خەندقیە)، ئەڤە و چەند کوڕ و کچێن بنەمالێ یێن مام و برا و …هتد، دکتۆری یێن هەین. بنەمالا وان پتر یێن ل پارێزگەهێن مووسل و هەولێرێ ژیاین و ب تایبەت ل گوندان و ژیانا خوە یا ب جۆتیاری و خودانکرنا تەرش و کەوالى ڤە بۆراندییە.

دو: ژ دایکبوونا دکتۆری:

ل دووماهیا سالا 1948ێ ل گوندێ گردەپان سەر ب ناحیا بەردەرەش ڤە هاتیە سەر دنیایێ (ل دۆر ژ دایکبوونا دکتۆری د ژێدەران دا چەند مێژوو بۆ هاتینە نڤیسین وەکی: 1948، 1949، 1950) لێ یا دروست ل دووماهیا سالا “1948”ێ یە، هەر وەکی ئەوی ب خوە د پەرتووکەکا ل سەر ژیانا خوە دا نڤیسی، دیسان مالباتا وی ژی دوپات کرییە، لێ د بەلگەنامەیێن فەرمی دا سالا “1950” هاتیە نڤیسین). ل سالا 1954 مالا وان هاتیە ڤەگوهاستن بۆ باژێڕێ مووسل ل پارێزگەها نەینەوا، بابێ وی کارێ دکانداریێ کریە، هەتا ڕۆژا وەغەرکرنا وی ل دەستپێکا سالێن نۆتان دا. بۆتانی ل ژییێ حەفت سالیێ چوویە قوتابخانێ، ژ بەر کو ناسنامە (دفتر النفوس) نەبوو، لەوما نەچاربوو ل گوندێ گوگجەلی ل نک کەسەکێ نیاسێ وان دەست ب خواندنێ بکت، پاشی ل بێنڤەدانا نیڤا سالێ ژ قوتابخانا گوندێ هاتە ڤەگوهاستن بۆ ناڤەندا باژێڕێ مووسل. ل سالا 1966ێ قۆناغا ناڤنجی ب دوماهی ئینا و ل ئامادەیا (المستقبل) درێژی ب خواندنا خوە دا، پاشی ل پشکا مێژوویێ ل زانکۆیا مووسل هاتە وەرگرتن و ل سالا 1972ێ ژ زانکۆ دەرچوو.

ل دەمێ دەرچوونا وی ژ زانکۆیێ، یێ ئێکێ بوو ل سەر کۆلێژا ئادابێ پشکا مێژوویێ. ل هاڤینا 1973ێ باوەرنامەیا دبلۆما پێشەییا بلند ژ زانکۆیا بەغدا وەرگرت، هەروەسا ل وی دەمی نڤیسەر بوو ژی ل ڕۆژنامەیا (التآخي) زمانحالێ پارتی دیموکراتی کوردستان کو ل بەغدا دەردکەفت.

ل دووماھیا سالێن حەفتیان وەکی مامۆستایێ ئامادەیی ل چەند قوتابخانەیێن ژ دەرڤەی باژێڕێ مووسل و ب تایبەت ل دەڤەرا بەردەرەش مامۆستایی کرییە، د دویڤ را بۆ ناڤەندا باژێڕێ مووسل هاتیە ڤەگوهاستن. ل سالا 1979ێ ل باژێرێ مووسل ژیانا هەڤژینیێ ل گەل (بەدریە خالد ئەحمد) کو کچا پسمامێ بابێ وی یە پێکئینایە. ئەوی دو کوڕ (بەردل و باهۆز) و چار کچ (دلین، زۆرین، کوردین و دلبرین) یێن هەین.

مالا وان ژ بەر رەشا دکتۆری یا سیاسی د ناڤبەرا پارێزگەهێن (مووسل، هەولێر و دهۆکێ) دا خوەجهبوویە و ل دووماهیێ ل باژێرێ دهۆکێ بنەجهبوویە. بۆتانی گەلەک حەز ژ باژێرێ مووسل دکر، ژ بەر کو ل وێرێ هاتبوو سەر دونیایێ و پتریا ژیانا خوە ل وی باژێری بۆراندبوو، هەتا رۆژا تێدا وەغەر کری ژی هەر ل باژێرێ مووسل بوو.

ل رۆژا 1/9/2026ێ، دلێ وی یێ مەزن و دلۆڤان یێ تژی ڤیانا گەل و وەلات و مرۆڤانی د سەرەدانەکێ دا ل باژێرێ مووسل ژ نشکەکی ڤە مالئاڤاهی کر..

سێ: چەند ویستگەهێن گرنگ د ژیانا بۆتانی دا:

– ل سالا 1990 باوەرنامەیا ماستەرێ ژ زانکۆیا مووسل ب دەست خوه ڤە ئینایه.

– ل سالا 1995 باوەرنامەیا دکتۆرایێ ژ زانکۆیا مووسل ب دەست خوه ڤە ئینایه.

– ل 1 / 10 / 1995ێ وەک ماموستا ل زانکۆیا دهۆکێ دەستبکار بوویه.

– ل 1 / 10 / 1996ێ بوویه ڕاگرێ کۆلێژا ئادابێ ل زانکۆیا دهۆکێ.

– ژ سالا (1996 – 2002).ئەندامێ نڤیسینگەها ڤەکۆلین و خواندنێن ناڤەندی یێ پارتی دیموکراتی کوردستان بوویە.

– ڕاگرێ سەنتەرێ ڤەکۆلینێن کوردی و پاراستنا بەلگەنامەیان بوویە ل زانکۆیا دهۆکێ (2006 – 2014).

– سەرنڤیسەرێ گۆڤارا دهۆک بوو، ژ (1997 – 1999).

– سکرتێرێ نڤیسینێ بوویە ل گۆڤارا زانکۆیا دهۆک، ژ (1998 – 2000).

– ل سالا 2005ێ پلەیا پڕۆفیسۆریێ وەرگرتییە.

– ژ سالا 2007ێ وەرە ل ئەکادیمیا کوردی ئەندامێ کارا بوویە.

– ژ 2007 – 2009ێ سکرتێرێ نڤیسینێ بوویە ل گۆڤارا ئەکادیمیا کوردی.

– ژ سالا 2007 – 2014ێ سەرۆکێ لژنەیا بەلگەنامە و دەستنڤیسان بوویە ل ئەکادیمیا کوردی.

– ژ سالا 2014 – 2016ێ پڕۆفیسۆرێ وانەبێژ بوو ل پشکا پەیوەندیێن نێڤدەولەتی ل زانکۆیا نەورۆز.

– ل 2015ێ هاتە هەلبژارتن وەکی سەرۆکێ ئەکادیمیا کوردی، هەروەسا بۆ جارا دوویێ دوبارە ژ (2019-2023)ێ هاتە هەلبژارتن.

– پتر (40) پەرتووک ل سەر مێژوویا عێراقێ و کوردان یێن نڤیسین و چاپ و بەلاڤکرینە و سێ ژ وان ب هەڤپشکینە.

– سەرپەرشتیا چەندین نامەیێن ماستەر و دکتۆرایێ کرییە، هەروەسا پشکداری د گەلەک خولێن زانستی ل ناڤخوەیا هەرێما کوردستانێ و ژ دەرڤە دا کرییە.

– ب دەهان گۆتار و ڤەکۆلین د ڕۆژنامە و گۆڤارێن هەرێمێ و عێراقێ دا بەلاڤکرینە.

– پتر ژ (29) کتێبان خواندن و ڤەکۆلین (تحقیق) و پێشکێشکرن بۆ کرییە.

– ل رۆژا 23/11/2023ێ، مەزنترین پەرتووکخانە ب ناڤێ (پەرتووکخانا بۆتانی) ل باژێرێ دهۆکێ ڤەکرییە کو بوویە چاڤکانییەکا گرنگ بۆ خواندەڤان و قوتابی و ڤەکۆلەران.

 

چار: پرتووکێن وی یێن بەلاڤکری:

1- الملامح الاساسية لشخصية مصطفى البارزاني القيادية والانسانية، (دهوك، 1996).

2- جريدة الحقيقة، راستي أول جريدة عربية كوردية في مدينة الموصل، دراسة وتوثيق، (دهوك، 1998).

3- موقف الاحزاب السياسية العراقية من القضية الكوردية 1946-1970، (أربيل، 1997). ط2، دهوك 2007، وترجم الى اللغة الكوردية.

4- مدرسة 11 اذار أول مدرسة كوردية في مدينة الموصل، مع نبذة تاريخية عن التعليم في كوردستان – العراق، ط1 (أربيل، 1999)، ط2 (أربيل، 2002).

5- وثائق عن الحركة القومية الكوردية التحررية، ملاحظات تاريخية ودراسات أولية، (أربيل، 2001).

6- الحياة الحزبية في الموصل 1926-1958، (أربيل، 2003).

7- الحركة القومية الكوردية التحررية دراسات ووثائق، (أربيل، 2004).

8- من كان ورا‌ء حوادث الموصل وكركوك الدامية 8 اذار، 14 تموز 1959؟ (أربيل، 2004).

 9- بدايات الشعور القومي الكوردي في التاريخ الحديث. (دهوك، 2005)، ط2، (أربيل، 2005) ترجم الى اللغة الكوردية (أربيل، 2007)، الطبعة الثالثة مزيدة ومنقحة، (أربيل، 2019) .

10- الكورد والاحداث الوطنية في العراق خلال العهد الملكي 1921-1958، بالاشتراك مع أ. د. غانم محمد الحفو، ط1 (أربيل، 2005)، ط2 (دمشق، 2007).

11- لمحات من المسار السياسي للحزب الديمقراطي الكردستاني، (دهوك، 2005)، صدر باسم الفرع الاول للحزب الديمقراطي الكوردستاني.

12- دراسات ومباحث في تاريخ الكورد والعراق المعاصر، (أربيل، 2007).

13- التطورات السياسية والداخلية في العراق 14 تموز 1958- 8 شباط 1963، (دهوك،2007)، ط2، (دمشق، 2008).

14- وثائق بريطانية عن تشكيل دولة كردية مستقلة 1924-1927، (دهوك، 2008).

15- من أرشيف جمهورية العراق الاولى، الحركة الشيوعية في تقارير مديرية الامن العامة 1958-1962، (أربيل،2010).

16- أمير أمرا‌ء كوردستان، ابراهيم باشا الملي 1845-1908 (دراسة وتحقيق مخطوط)، (أربيل،2009)، بالاشتراك مع علي صالح الميراني.

17- المعلم والشاعر والكاتب والصحفي بشير مصطفى عبدالله الدركزلي 1917-1979، صفحات من حياته، مع ديوانه الشعري (الحان قلبي)، (دهوك، 2010).

18- صفحات من الذاكرة الموصلية، مجموعة مقالات ومقابلات ومواضيع عن تاريخ الموصل القريب، (دهوك، 2010).

19- وثائق بريطانية عن مشاركة كوردستان – سوريا في ثورة ارارات 1927-1931، (دهوك، 2010)، بالاشتراك مع علي صالح الميراني.

20- مەلا مستەفای بارزانی سەركردە و رێبەری شۆرشی كورد، وەرگیران: مەحمود زامدار، (أربیل، 2011).

21- الاسلام السياسي في اقليم كوردستان – العراق ملاحظات وانطباعات تأريخية وسياسية، (دهوك،2012)، (ط2، دهوك 2015، ط3، دهوك 2017، ط4، أربيل 2022).

22- ملا مصطفي البارزاني قائد الثورة الكوردية وملهمها، (دهوك،2012).

23- اتفاقية 10 شباط 1964 بين الحكومة العراقية وقيادة الثورة الكوردية، الاسباب والنتائج، دراسة تأريخية وثائقية، (دهوك، 2013)، بالاشتراك مع الدكتور شيرزاد زكريا محمد.

24- بادينان في سالنامات ولاية الموصل العثمانية، بالاشتراك مع الاستاذ الدكتور خليل علي مراد، (أربيل، 2013).

25- في الذكرى الـ(62) لرحيل الامير جلادت بدرخان، (دهوك، 2013).

26- صفحات من تاريخ الكورد في الوثائق العثمانية 1840-1915، بالاشتراك مع الأستاذ الدكتور خليل علي مراد، (أربيل، 2014).

27- ثلاث سنوات دراسية في بردەرش: نبذة تاريخية، ذكريات، مشاهدات، ملاحظات، (دهوك، 2015). ط2، (أربيل، 2019).

28- منطقة بادينان 1925-1970 دراسة في الوقائع السياسية، ج 1-2، (أربيل، 2017).

29- في الكوردولوجيا العربية، الكورد وكوردستان في المخيال السياسي العربي، (أربيل، 2018).

30- حول اشكالية الوعي القومي الكوردي المعاصر، (أربيل، 2019).

31- أبطال الفصل المفجع، المأساوي والاليم في تاريخ الكورد العاصر، (أربيل، 2020).

32- نبذة اجتماعية وسياسية عن تاريخ اسرتنا ولمحات من ارشيف حياتي وذكرياتي، (أربيل، 2020).

33- من أرشيف جمهورية العراق الاولى: حوادث الموصل وكركوك وتداعياتها 8 اذار 1959 – 14 تموز 1959، دراسة تاريخية وثائقية سياسية، (أربيل، 2020).

34- ثورة 11 أيلول 1961 في كتابات ومذكرات عدد من كبار ضباط الجيش العراقي 11 أيلول 1961 – 11 اذار 1970، (أربيل، 2021).

35- القريب من تاريخ الموصل: قرا‌ءات في نصوص تأريخية معاصرة، (أربيل، 2021).

36- چەند بابەتێن كوردناسی، (أربيل، 2022). (بالاشتراك)

37- تاريخ الحزب الشيوعي العراقي في لوا‌ء الموصل 1934- 1969 دراسة تاريخية سياسية وثائقية.

38- الموقف الامريكي من الثورة الكوردية 8 شباط – 26 تشرين الاول 1965 دراسة تاريخية وثائقية، (دهوك، 2025).

39- عمر محمد الياس والحركة الشيوعية في الموصل 1934-1960، مذكرات، (أربيل، 2025).

40- دراسة عن تركيا وموقفها من المسألة الكوردية، (دهوك، 2025).

 

پێنج: پێشنیار

1- کۆمکرنا هەمی بەرهەمێ وی: پێشنیار دکن ئەکادیمیایا کوردی یان زانکۆیا دهۆک پڕۆژەیەکێ نەتەوەیی بۆ کۆمکرن، ڕێکخستن و سەرنوی چاپکرنا هەمی بەرهەم، ڤەکۆلین و ئەرشیفێن نڤیسکی یێن د. عەبدولفەتاح بۆتانی د ناڤ چەند بەرگەکێن ئێکگرتی دا.

2- دامەزراندنا ناڤەندەکێ ب ناڤێ وی: دروستکرنا سەنتەرەک یان ب ناڤکرنا پەرتووکخانا مەلبەندی یا زانکۆیا دهۆک د ناڤ زانکۆێ دا ب ناڤێ (د. عەبدولفەتاح بۆتانی)، دیسان ئەو بەلگەنامەیێن وی کۆمکرین هەمی بکەڤنە د خزمەتا قوتابیێن ماستەر و دکتۆڕایێ دا.

3- وەرگێڕانا بەرهەمێن وی بۆ زمانێن جیهانی: وەرگێڕانا گرنگترین کتێبێن وی یێن دیرۆکی بۆ زمانێن ئنگلیزی و فەرەنسی و… هتد، دا کو ناڤەندێن کوردناسیێ یێن نێڤدەولەتی ژی ب شێوازەکێ ڕاستەوخوە مفای ژ بەلگەنامە و ڤەکۆلینێن وی وەربگرن.

 

پشتی د. عەبدولفەتاح خانەنشین بوویی، ئەو ل رۆژا 17 ئادارا 2024ێ ل ئەکاونتێ خوە یێ فێسبۆکێ نڤیسینەک بەلاڤکربوو کو ئەڤا ل خوارێیە:

((ل ڤی دەمێ ئەز ئەرکێ خوە بجهـ دهێلم

پشتی ڤێ گەشتا کار کرنێ یا نێزیکی (50) سالان ڤەکێشای: (27) سال وەکو مامۆستا و (14) سال وەکو راگرێ کۆلیژەکێ و سەنتەرەکێ ڤەکۆلینان و (8) سال و چەند هەیڤەک وەکو سەرۆکێ ئەکادیمیا کوردی (کۆڕێ زانیاری کورد)، د ڤی ماوەیی دا، ئەز یێ پڕی چالاکی و بەرهەم بووم، ب تایبەتی د نڤیسینێ و دانانا پەرتووکان دا کو شیام نێزیکی (40) پەرتووکان و (450) گۆتار و ڤەکۆلینان ل پاش خوە بهێلم. زێدەباری پێشکێشکرن و پێداچوونا ب دەهان پەرتووکان و ب شایستەیی ڤە من پتری (35) سوپاسنامەیان وەرگرتینە و ژ لایێ چەندین سازیێن زانستی ڤە هاتیمە رێزلێنان.

ل 7ی ئادارا 2024ێ، ب وژدانەکا ئارام ڤە من ئەڤ ئەرکە بجهـ هێلا، من د ڤی ماوەیێ درێژێ خزمەتکرنێ دا ب هەمی راستگۆیی و دلسۆزی دەربڕین ژ دیتن و باوەریێن خۆ کر، نابێژم ژی کو هەمی جارا ئەز یێ راست بووم، چونکو ژیان هندەک ئەزموونن و تێدا مرۆڤ دکەڤیتە ل ژێر فشاران، هەلبەت هەر کەسەکێ چالاک و خودان دیتن، دێ تووشی شاشیا بیت کو خۆ دەمێ ئەز تووشی شاشیەکێ ژی دبووم، من پێداچوونا خۆ دکر و من خۆ راستڤەدکر، ل ڤێرێ داخوازا لێبۆرینێ ل وان بەرێزان دکەم یێن من ل گەل کارکری و من هندەک دیتن و بۆچوونێن جودا ژ یێن وان هەین)).

ژێدەرێن مفا ژێ هاتیە وەرگرتن:

1- نبذة اجتماعيّة وسياسيّة عن تاريخ اسرتنا ولمحات من ارشيف حياتي وذكرياتي، أ. د. عبدالفتاح علي يحيى بۆتاني، أربيل، 2020/2019.

2- ثلاث سنوات دراسية في بردرش، أ. د. عبدالفتاح علي البوتاني، أربيل، 2019.

https://www.facebook.com/share/p/1H2utTHpWq/?mibextid=wwXIfr-3

4- هندەک ژ ئەرشیفێ پ. د. عەبدلفەتاح بۆتانی، ب رێیا مالباتا وی.