هەر گۆڤارەکا ڕەوشەنبیری نە ب تنێ کۆمەکا تێکست، گۆتار، ڤەکۆلین و هەڤپەیڤینایە؛ بەلکو بەری هەر تشتی، وێنەیەکە چاڤێن خواندەڤانی ڤێدکەڤن و ل گەل بۆرینا دەمی ناسنامەیەکا دیتنێ د بیردانک دا دروست دکەت. کا چاوا  ناڤەڕۆکا گۆڤارێ پشکداریێ د ئاڤاکرنا ناسنامەیا وێ یا هزری و ڕەوشەنبیری دا دکەت، بەرگ، جۆرێ فۆنتی، شێوازێ بەلاڤکرنا ناڤونیشانان، قەبارەیێ وێنەیان، بیاڤێ د ناڤبەرا تێکستان دا، ڕێکخستنا پشکان و هەتا شێوەیێ نڤیسینا هەژمارێن بەرپەڕان ژی، هەمی پێکڤە پشکداریێ د ئاڤاکرنا مۆرکا گۆڤارێ دا دکەن.

ژ بەر هندێ، ئەو گۆڤارا بۆ سالێن دوور و درێژ ل سەر هەمان دیزاین بەردەوام دبیت، چێدبیت ناسنامەیا خۆ بپارێزیت، بەلێ د هەمان دەم دا دکەڤیتە د خانەیا هندێ دا کو ئەڤ ناسنامەیە ببیتە نەریتەکێ دیتنا چاڤی و جوداهییەکا مەزن د ناڤبەرا جێگیربوونا ناسنامەیێ و سنگەپێبوونا د شێوەیێ هەیی دا.

هەلبەت، ناسنامەیا گۆڤارێ پێدڤییە بمینیت، بەلێ د شییان دایە شێوەیێ دەرئیخستنا وێ گوهۆڕینێ ب خۆ ڤە ببینیت و شێوازەکێ دی وەربگریت.

هەر گۆڤارەکا ڕەوشەنبیری یا کو ژییەکێ درێژ هەبیت، خودان سیمایەکێ وەسایە کو مرۆڤ دشێت ب “بیردانکا وێ یا دیتنێ” پەسن بکەت، چونکی خواندەڤان ل سەر ڕادهێت و  دشێت ژ دوورڤە بنیاسیت، چ ژ ڕەنگێ ناڤی، شێوەیێ لۆگۆیێ یان ژی شێوازێ بەرگێن وێ. ئەڤە ژی تایبەتمەندییەکا وەسایە کو نابیت ژ بیرا مرۆڤی بچیت دەمێ هزرا نووکرنێ دکەت.

بەلێ پاراستنا بیردانکا دیتنێ وێ چەندێ ناگەهینیت کو دیزاین بۆ هەتا هەتایێ نەهێتە گوهۆڕین، ژ بەر کو جڤاک، تاما دیتنێ، پالدەرێن خواندنێ هەرتم دگوهۆڕینێ دا نە و ئەو نڤشێن گۆڤارێ دخوینن ژی دهێنە گوهۆڕین. ئەو خواندەڤانێ کو بەری چەند سالان سەرەدەری  ل گەل گۆڤارێ دکر وەک ژێدەرەکێ زانین و خۆ ڕەوشەنبیرکرنێ، ئەڤڕۆ د ناڤ جیهانەکا مەزن یا وێنە، شاشە و سەکۆیێن دیجیتالی دا یە. ئەو ڕۆژانە ب سەدان دیزاین، ناڤونیشان و وێنەیان دبینیت، ژ بەر هندێ ژی چاڤێن وی ل هەمبەر شێوازێ پێشکەشکرنا بابەتان هەستیارتر لێ هاتینە.

پێدڤییە ستافێ هەر گۆڤارەکێ، دەم بۆ دەمی ژ خۆ بپرسیت: ئەرێ هێشتا وێنەیێ بەلاڤۆکا مە یێ دیتنێ دەربڕینێ ژ ناڤەڕۆکا مە دکەت؟

چێدبیت ئەڤ پرسیارە گرنگتر بیت ژ وێ پرسیارێ کو بێژین: ئەرێ دیزاینا مە یا ڕێکوپێک و لهەڤهاتییە یان نە؟

چونکی دیزاینا سەرکەفتی ب تنێ خەملاندن و نەخش و نیگار نینن، بەلکو وەرگێڕانەکا دیتنێ یە بۆ کەسایەتییا گۆڤارێ.

دەما دیزاینا گۆڤارەکێ بۆ چەندین سالان بەردەوام دبیت، ل دەڤ خواندەڤانی دبیتە تشتەکێ نەریتی و نیاسیار. ڕاستە ئەڤ هەستێ نیاسیاریێ یێ ب مفایە، چونکی ناسنامەیێ دروست دکەت، بەلێ چێدبیت ب شێوەیەکێ هێدی هێدی ببیتە ڕۆتین و بێزاری. چاڤێ مرۆڤی ب سروشتێ خۆ بەر ب جوداهی و نووبوونێ ڤە دچیت و ئەوا بەری چەند سالان یا سەرنجڕاکێش، چێدبیت نوکە ژ بەر بەردەوام دیتنێ ببیتە تشتەکێ ئاسایی.

ئەڤە وێ چەندێ ناگەهینیت کو دیزاینا بەرێ یا لاواز بوویە. بەلکو چێدبیت دیزاینەکا سەرکەفتی بووبیت و ئەرکێ خۆ د قۆناغا خۆ دا ب دروستی ئەنجام دابیت، بەلێ سەرکەفتنا وێ د دەمێ بۆری دا، واتەیا وێ ئەو نینە کو بۆ بەردەوامبوونا وێ هەمان تام هەبیت.

گوهۆڕینا دیزاینێ پاش چەندین سالان وەک نووژەنکرنا ناڤمالییا مالەکێ یە کو ئەم حەز ژێ دکەین؛ بەلێ ئەم ناڤمالیێ تێک نادەین، ژ بەر کو نە یا ڕێکوپێکە، بەلکو ئەم گیانێ وێ دپارێزین و پەنجەرەیێن وێ بەرانبەر ڕۆناهییەکا نوو ڤەدکەین.

ژ ئالییەکێ دی، گوهۆڕین ئانکو پێداچوونەڤە د ئەوا هاتییە کرن و پەخشینا ڕەهەندەکێ دی بۆ گۆڤارێ، داکو خواندەڤان بزانیت کو گۆشەیێن جودا بۆ دیتنێ یێن هەین و داکو دوبارە دیزاینکرن، هەلسەنگاندنەکا دی یا ڕەوشەنبیری بیت بۆ گۆڤارێ.

پشتی چەندین سالان ژ دەرکەفتنا هەر بەلاڤۆکەکا ڕەوشەنبیری، داخواز ل سەر خۆ نووکرنێ دبیتە نێڕێنەکا ڕەوا و ڕەنگە ببیتە گاڤەکا پێدڤی ژی، چونکی لێگەڕیان ل دووڤ سیما و شێوازەکێ نوو، ڕەنگە پتر ل گەل دانێن ڤی چەرخی بگونجیت.

ئەم ب گرنگ دبینین کو ئەڤ گوهۆڕینا د دیزاینا “مەتین” دا هاتییە کرن، بەردەوامییا ڕێبازا وێ یا بەرێ بیت نە وەکی ڤەقەتیانێ بەرێ خۆ بدەینێ و نەبیت پشتگوهکرنا ڕابۆریێ وێ. ل دووماهیێ دبێژین کو ئەڤە هەر گۆڤارا “مەتین”ە ل بەر دەستێن هەوە، بەلێ ب شێوەیەکێ دی یێ دیزاینێ.