وەک وەفادارییەک، (مەتین) د هەر هەژمارەکێ دا، ئێک ژ دۆستێن کوردان، بۆ خواندەڤانێن خۆ ددەتە نیاسین.

شەهرەزاد مۆ  ………..جاب Shahrzad Mojab ڤەکۆلەر، مامۆستا، ئەکادیمیست و چالاکڤانەکا ئیرانییە و ‌ ئێک ژ کەسایەتیێن دیارە ل بیاڤێ ڤەکۆلینێن گرێدایی ب ژنان، فێمینیزم، کۆچبەری و کاروبارێن کوردی. ل باژێڕێ شیراز ل ئیرانێ هاتییە سەر دونیایێ و خواندنا بەکالۆریۆسێ ل بسپۆریا زمانێ ئینگلیزی ل ئیرانێ تەمامکریە. بەلێ ماستەر و دکتۆرا ل زانینگەها ئەلینۆی Illinois یا ئەمریکی وەرگرتینە.

ل سالا ١٩٨٣ێ چوویە د ناڤ بزاڤێن چەپ یێن ئیرانی و بزاڤا ژنان و لایەنگرەکا بهێز بوویە بۆ دۆزا کوردی.

ل زاینگەهێن تۆرێنتۆ، ویندسۆر، ڕایرسۆن و کونکوردیا وانە گۆتینە. ژ سالا ١٩٨٦ێ وەرە ل گەل هەڤژینێ خۆ یێ کوردێ مهابادی ئەمیر حەسەن پۆر ل تۆرینتۆ دژیت.

هەژمارەکا پەرتووکان نڤیسییە کو پترییا وان ل سەر ژنان و مافێن وان و بەرخۆدانا وان ڕادوەستن. ئێک ژ پەرتووکێن وێ ب ناڤێ « ژنێن ملەتەکی بێدەولەت: کورد Women of a Non State Nation: The Kurds « یە. ئەڤ پەرتووکە ل سالا ٢٠٢١ێ ژ لایێ بەلاڤکرنێن مازدا Mazda Publishers ڤە چاپبوویە و ژ ٢٦٣ێ بەرپەڕان پێک دهێت. کۆمەکا ڤەکۆلینێن نڤیسەرێن جوداجودا ب خۆڤە دگریت و شەهرەزان مۆجاب ب ئەرکێ داڕێژتن و پێداچوونێ بۆ کرییە.

 پەرتووکا ناڤبری، ل دۆر ئەزموونا دیرۆکی و سیاسی یا ژنێن کورد و ڕەوشەنبیرییا گشتی یا کوردان ل پارچەیێن جودا یێن کوردستانێ یە. د ڤێ پەرتووکێ دا، مژارێن وەکی نەتەوەپەروەرییا کوردی، خێزان، باب سالاری، شەڕ، پشکدارییا سیاسی و بزاڤا ژنان ب گشتی هاتینە ئازراندن.

شەهرەزاد مۆجاب، ل درێژاهییا کارێ خۆ یێ ئەکادیمی و نڤیسینێ، هەژمارەکا خەلاتان وەرگرتینە.