گۆڤارا مەتین گۆڤارا مەتین
سەرنڤیسەر
ل گەل دەستپێکرنا هەر ساڵەکا نوی، مرۆڤ دکەڤیتە بەرامبەر دەلیڤەیەکا دی یا زێڕین دا داکو جارەکا دی پێداچوونەڤێ د پلان و ئارمانج ونەخشەیێن خۆ دا بەکەتەڤە، ئەڤجا ئەڤ پێداچوونە چ ل سەر ئاستێ کەسایەتی بیت یان پیشەیی. هەر ساڵەکا نوی، دەرازینکەکا گونجاییە ژ بۆ دەستنیشانکرنا ستراتیژییەتێن نۆژەن یێن سەرەدەریکرنێ ل گەل ئالنگاری و ئاستەنگان و مسۆگەرکرنا دەلیڤەیان د بیاڤێن جودا جودا دا.
رۆژنامەڤانی، کو کاکلا کار و گرنگیدانا مەیە وەکو ستافی گۆڤارا مەتین، د پێشڤەچوونەکا بلەز و بێ راوەستییان دایە. چونکی رۆژنامەڤانی نەما ئیدی پشدانیێ یانکو پشتبەستنێ ب تنێ ل سەر ئاویز و رێکێن کلاسیک بکەت، بەلکو یا چوویە د سەردەمەکێ نوی یێ دیجیتال و بهەڤگەهشتنا ئێکسەر دا. دبن سیبەرا ڤێ گوهۆڕینێ، رۆژنامەڤانان پێدڤی ب خۆگونجاندنێ هەیە ل گەل دانێن بلەز یێن کو تەکنەلوژیایێ و پێگەهێن میدیایێ ل گەل خۆ ئیناین.
لەوڕا دەما هەر ساڵەکا نوی دهێت، دەمەکێ دروستە داکو هەر تاکەک یانکو مرۆڤەک، دوبارە هزرکرنێ د چەوانییا رەفتارکرنێ ل گەل میدیایێ و سوشیال میدیاێ بکەت. چ ئەو تاک رۆژنامەڤان و میدیاکار بیت یان بەرپرسێ سازییەکا میدیایی، یان هەتا بینەر، خواندەڤان و بکارهینەرێ بەرهەمێ میدیایێ بیت.
مە ل گۆڤارا مەتین، بۆ ساڵا ٢٠٢٥ێ، پلانەکا رژد و تەسەل، دارێشتییە داکو ل گەل پێڤاژوویا ئەڤرۆ یا رۆژنامەڤانی تێدا دەرباز دبیت بچین و بڤی رەنگێ خوارێ:
1 – بارەگایێ گۆڤارێ:
ل دەستپێکا ساڵا نوی، گۆڤارا مەتین بیتە خودان بارەگایێ خۆ یێ تایبەت، کو ب سوپاسیڤە بەرێز مامۆستا ئیحسان ئامێدی، بەرپرسێ ناڤەندا خانی یا رەوشەنبیری و راگەهاندنێ، دەستپێشیکر بۆ دروستکرنا بارەگایەکێ ژ هەژی بۆ برێڤەبرنا کارێ گۆڤارا مەتین د چارچووڤێ ئاڤاهیێ ناڤەندا خانی دا، کو ئەو نێزیکی دو ساڵان بوو، ستافێ گۆڤارێ ب هەڤپشکی ل گەل پشکا رەوشەنبیری یا ناڤەندا خانی، د ئێک جهـێ بەرتەسک دا کارێن خۆ برێڤەدبرن.
2 – دیزاینا گۆڤارێ:
د ئێکەم هەژمارا ساڵا ٢٠٢٥ێ دا، کو هەژمارا (٢٥٥)ێ یە، چەندین گوهۆڕین د دیزاینا گۆڤارێ دا هاتینە کرن، ژ وانا: لۆگۆیەکێ نوی بۆ مەتین هاتییە دروستکرن، بەرفرەهکرنا گۆشەیا (دیتن – سەرگۆتار)، د هەر هەژمارەکێ دا دێ ئاماژ ب چار ژ گرنگترین بابەتێن هەژمارا دویڤ دا هێتەکرن، زێدەکرنا گۆشەیەکێ هەیڤانە بناڤێ (کورت و کرمانج)، کو تێدا هەر جار دێ پەرتووکەکا گرنگ و ناڤدار یا بیانی ب رەنگەکێ کورتکری دەینە نیاسین و دێ بەحسی ناڤەڕۆکا وێ کەین وەکو هاندانەک داکو خەلکێ مە پتر سەرهەلی گرنگییا پەرتووکێ ببیت و بەر ب خواندنا وێڤە بچیت؛ ل گەل چەند گۆهوڕینێن دی.
3 – سوشیال میدیا:
– پلانەک مە هەیە، کو گرنگترین مژار و بابەتێن د هەر هەژمارەکێ دا بەڵاڤ دبن ب رەنگێ (پۆدکاست Podcast)ەکا دەنگی د پەیجێ ل فێسیبوک و ئینستگرامێ دا بەڵاڤ بکەین، زێدەباری بەلاڤکرنا بابەتێن نڤیسەران و تاگکرنا وان.
– ل مالپەڕێ ئەنتەرنێتێ یێ تایبەت ب گۆڤارا مەتینڤە، مە چەند خانە ل سەر زێدەکرینە و بڤی رەنگی:
1- گۆڤارا مەتین یا دیجیتال ب شێوەیێ (کالامۆ calameo) دێ مینیت.
2- شێوەیێ (پی دی ئێف PDF) ل سەر هاتییە زێدەکرن، کو خواندەڤان بکارن گۆڤارێ داونلۆد بکەن.
3- پشکا کوردی ب رێنڤیسا لاتینی ژی هاتییە زێدەکرن، کو مە ل بەرە گرنگترین بابەتێن هەر هەژمارەکێ ڤوەبگۆهێزینە سەر رێنڤیسا لاتینی و د ڤێ خانەیێ دا بەڵاڤ بکەین. هەر وەسا دێ ئەو بابەتێن بۆ مەتین دهێن، کو دبنەرەت دا ب رێنڤیسا لاتینی هاتینە نڤیسین و مە د گۆڤارێ دا ب رێنڤیسا ئارامی بەڵاڤکرین، تێدا بن.
4- پشکا عەرەبی ژی هاتییە دانان، ل دەستپێکێ ژ بلێ وان بابەتێن ژ عەرەبی هاتینە وەرگێڕان، ژ بەر نەبوونا ستاف و شییانان، نەشێین گەلەک دەولەمەند بکەین. بەلێ مە پلان هەیە، پشکا زمانێ عەرەبی چ وەک گۆڤارەکا سێ هەیڤی (مەتین العربي) ب شێوەیێ کاخەزی و دیجیتال بەڵاڤ بکەین.
ل دویماهیێ، داخوازا ساڵەکا بەختەوە و ئارام بۆ خواندەڤانێن خۆ و تەڤایا گەلێ کوردستانێ دکەین، ب هیڤییا گەهشتنێ ب هەمی ئارمانجان.
