گۆڤارا مەتین گۆڤارا مەتین
سەرنڤیسەر
چما ئەم هەمی، هزرێ د وی چەندێ دا ناکەین، داکو ل نک مە هەمییان چەمکێ دیموکراسیێ ژ کەڤلۆژانک و چارچویڤێ وی یێ سیاسی یێ بەرتەسک دەربکەڤیت و بەر ب کەلتۆربوونێڤە بچیت و ببیتە سنج و رەوشەنبیری و سەرەدەرییەکا رۆژانە.
ب دیتنا مە، د شیان دایە ئەڤ گاڤە ژ مالێ و خێزانێ، کو بچویکترین شانەیە دیموکراسییەت تێدا بەرپا ببیت، ببیتە خالەکا گەشەدار و شانەیێن دی یێن جڤاکی ل بەر رۆناهییا وێ، روحا دیموکراسیێ هەمبێز بکەن و دیموکراسی ببیتە رەوشەنبیرییەکا رۆژانە.
هەلبەت ساڵێن درێژە د جڤاکێ مە دا، بەحسی دیموکراسیێ دهێتەکرن و تا رادەیەکێ باش شوین تلێن وێ د گەهێن ژیانێ دا دخۆیانە و نەما ئیدی زاراڤەکێ نامۆ و نەپەژراندی بیت. بهلێ مەرەما مە ل ڤێرە، نە رەهەندێ سیاسی یێ دیموکراسیێ یە، بەلکو تێگەهشتنا پرەنسیپێن وێ یێن مرۆڤینی یە. دەما تاکەکەسێ مە ب دروستی ژ تێگەهێ دیموکراسیێ گەهشت، چەمکێن پێکڤەژیان و هەڤدو قەبویلکرن و لیبۆرین و شارستانیبوونێ ژی، دێ د دیتنا جڤاکی دا پتر گەڵالە بن و ب هێزکەڤن.
ل دۆر ڤێ چەندێ فەیلەسۆفێ ئەمریکی جۆن دیویJohn Dewey1859 – 1952) دبێژیت: «دیموکراسییەت نە ب تنێ فۆرمەکێ دەستهەڵاتێ یە و نە ب تنێ بەرژەوەندییەکا جڤاکی یە، بەلکوهەڤبەندییەکا مەجازییە د نێڤبەرا مرۆڤی و خۆزایێ دا، کو مرۆڤی دکەتە بەرپرسێ سەرەدەریێ ل گەل ناخ و دەردۆرێ خۆ».
