پرۆژه‌يێ‌ كوردستانێ‌ ل بەر كێلبێن هژمارەكا پرۆژه‌يان

عه‌بدو‌للا كۆڤلی

هەڤڕكیيا دەولەت و پێكهاتێن سیاسی كەڤنارە و ب پەیدابوونا ژیانێ‌ دروست بوویە و دێ‌ یا بەردەوام بیت، چەند مرۆڤی حەز و ڤیان و ئارەزوویێن كونترۆلكرنێ‌ هەبن، ئالاڤێن هەڤڕكيیێ‌ ژ دەمەكی بۆ دەمەكی دهێتە گوهۆڕین. هەروەسا ژ جهەكی بۆ جهەكێ دی، ئانكو بۆ هەر قووناغەكێ‌؛ بەرنامە و ئالاڤێن گونجايی بۆ ئەوێ‌ قووناغێ هەنە.

ئەو لایەنێ‌ شارەزابیت د رێڤەبرن و كونترۆلكرنا ئەوان بەرنامە و ئالاڤان دا و بزانیت رەفتارەكا باش ل گەل بكەت، دێ‌ یێ‌ سەركەفتی بیت و گەهیتە ئارمانجێن خۆ.

دەڤەرا رۆژهەلاتا ناڤەراست، دەڤەرەكا جوگرافیيا ستراتیجيیا گرنگە ل جیهانێ‌، رۆلەكێ‌ مەزن و بەرچاڤ د دارشتنا بەرنامە و سیمایێن سیاسەتا نێڤدەولی و هەرێمایەتی ژ ئاليیێن جۆراوجۆرڤە هەیە، لەوما ئەو بخۆ هەڤڕكيیێ‌ ل گەل ئێك دكەن، زێدەباری حەز و بەرنامێن دەولەتێن زلهێز بۆ كونترۆلكرنا ئەڤێ‌ دەڤەرێ‌ و برێڤەبرنا وێ‌ ل دویڤ بەرژەوەندييێن خۆ، وەكی هەڤڕكیيا صه‌فه‌وی و ڕۆمانی بەری هزاران ساڵان و هەڤڕكیيا ئیرانى و ئوسمانی و هه‌تا نوكە یا بەردەوامە.

ل ئەڤى ماوه‌يێ‌ بووری، ئەڤێ‌ دەڤەرێ‌ چەندین گوهۆڕین و رویدان بخوڤە دیتینە وەك گوهۆڕینا هژمارەكا رژێمێن سیاسی یێن دەستهەلاتدار و پەیدابوونا گرۆپ و هێزێن توندڕەو وگوهۆڕینێن بنەڕه‌تی د شەنگستە و دیتن و تێگەهشتنا خەلكێ‌ دەڤەرێ‌ دا، زێدەباری ئەو پێشكەفتنا زانستی و تەكنۆلۆجی ئەوا هاریكار بۆ ئەڤان گوهۆڕینا و جێبەجێكرنا پرۆژه‌يێن هەيی.

خواندنەكا بلەز بۆ دیمەنێ‌ سیاسی یێ‌ نوكە، دێ‌ گەهینە وێ‌ چەندێ‌ د شيیان دا بیت چەند پرۆژه‌يێن هەڤڕك ل دەڤەرێ‌ دەستنیشان بكەین، كو كاریگەریيەكا مەزن ل سەر رەوشێ‌ ب گشتی هەیە و خودانێن هەر پرۆژەيه‌كی بزاڤێ دكه‌ن كونترۆلا پتر بكەن و بەرژەوەندييێن خۆ بپارێزن و مەترسیا ژ خۆ دویر بكەن، هەبوونا خالێن هەڤپشك د ناڤبەرا ئەڤان پرۆژه‌يان دا، وێ ڕامانێ‌ ناگەهینیت، كو نێزیكی ئێكن یان ئالاێی سپی بۆ ئێكودو بلند كريیە، بەلكو ئارمانجێن ئەوان دخوازن نێزیكی ئێك ببن، ئەڤ پرۆژە ئەڤەنە:

  • پرۆژەيێ ئیرانى:

پرۆژەيه‌كێ‌ كەڤنارە و پشتبەستنێ‌ ل سەر چەند ئالاڤا دكەت. گرنكترین ئالاڤ تائيفەگەریيا مەزهەبيیە، كو ب رێكا بكار ئینانا هێزا زڤر و نەرم جێبەجێ‌ دكەت، د ئەڤان بیست ساڵێن بووری دا، تایبەت پشتی ئازادیيا ئیراقێ‌ ل ساڵا 2003ێ، شیا ب رەنگەكێ‌ بەرچاڤ بەرفرەهـ ببيت و كونترۆلا سووریا و لوبنان و عیراق و یه‌مه‌ن بكەت. د بەرنامێ‌ ئەوان دا بوو ل پاشەرۆژێ‌ پتر بەرفرەهـ ببیت، بەلێ‌ ئەڤ پرۆژەيه‌ تووشی چەندین ئالنگاریا بوو، كو ژ كوشتنا (قاسم سلێمانی و مه‌هدی موهه‌ندس) دەستپێكر، پاشى كوشتنا چەندین سەركردەیێن دی و توپبارانكرنا جهێ‌ میلیشيیاتێن سەر ب ئیرانێ‌ ڤە، ب شێوەيه‌كێ‌ پراكتیكی ئەڤ پرۆژە كەفتە د كۆنەكا تاری دا پشتی (بزاڤا حه‌ماس) وەك هێزەكا نێزیكی ئیرانێ‌ هێرش كريیە سەر ئسرائیلێ‌ ل 7/10/2023ێ و هژمارەكا كەسا كوشتن و هنده‌ك ژى وەكو بارمتە گرتن و شەڕی دەستپێكر، پاشى رویدانێن مەزن دروست بوون و (حزب الله) شەڕ دژی ئیسرائیلێ‌ راگەهاند. ل دویڤ پلانەكا دارشتی (ئيسماعیل هه‌نیيە) ل ئیرانێ‌ هاتە كوشتن و (حه‌سه‌ن نه‌صروللاهـ) ئەمیندارێ‌ حزب الله ل لوبنانێ هاتە كوشتن و رۆژ بۆ رۆژێ‌ ستێرا ئەڤی پرۆژەيی بەر ب ئاڤابوونێ‌ دچیت، تایبەت پشتی نەمانا رژێما (به‌شار ئه‌سه‌د)ی ل سووریا ل 8/12/2024ێ.

نوكە ئیران یا هەمی بزاڤا دكه‌ت ناڤخۆیا خۆ بپارێزیت و رژێما وێ‌ بمینیت و نوكە يا ئامادەیە دەستا ژ هەمی گرۆپێن نێزیكی خۆ بەردەت. هەروەسا دروستكرنا چەكێ‌ ئه‌تۆمی پاش بێخیت یان ب ئێكجاری دەستا ژێ‌ بەردەت، رەوشا ئەڤی پرۆژەی بەر ب خرابتر دچیت، تایبەت پشتی گەف ل عیراقێ‌ هاتینەكرن (بەرەی مقاوه‌ما ئیسلامی) و (حه‌شدا شه‌عبی) نەهێلیت و خۆ ژ بن كونترۆلا سیاسەتا ئیرانێ‌ قورتال بكەت، رەوشا پرۆژەيی بەر ب لاوازبوونێ‌ دچیت، بەلێ‌ دویر نینە ل دەمەكێ‌ نێزیك جارەكا دی بەر ب بهێزبوونێ‌ بچیت دەمێ‌ بەرژەوەندييێن نێڤدەولەتی بخوازن.

  • پرۆژەيێ تركی:

پرۆژەيه‌كێ‌ كەڤنە و بەردوام د هەڤڕكیێ‌ دایە، تایبەت ل گەل پرۆژه‌يێ‌ ئیرانی و خەونا ب دەمێ‌ دەولەتا ئوسمانی ڤە دبینت و بزاڤێ دكه‌ت ب رێكێن زڤر و نەرم كونترۆلا دەڤەرێ‌ بكەت و هەژموونا خۆ ب سەپینیت و بەرنامە و ستراتیجيیێن دۆمدرێژ هەنە بۆ ب گەهشتنا ئەڤێ‌ ئارمانجێ.‌ ل هەیڤا 11/2024ێ لاوازبوونا رژێما ئەسەدی ل سووريێ‌ ب دەلیڤە دیت و د ماوەكێ‌ كورت دا ب هەمی رێكا پشتەڤانيیا گرۆپێن نێزیكی خۆ كر، ئانكو چەند رۆژا ئەڤان گرۆپا كونترۆلا دیمه‌شقا پایتەخت كر و حكومەتەكا بەروەخت دامەزراندن و دووماهیك ب هەژموونا ئیرانێ و روسیا ل سووریايێ ئینا. دەمێ‌ باژێرێ حه‌له‌بێ ژ لایێ‌ ئەوان گروپا ڤە هاتيیە كونترۆلكرن، راگەهاندنا تركی دیار كر پشتی حه‌له‌بێ؛‌ گەها میسل و كەركووكێ‌ یە.

رەوسا ئەڤێ‌ پرۆژەيی بەر ب باشتر دچیت و رۆژا وی گەشتر دبیت، تایبەت وەسا دهێتە هزركرن، كو نێزیكیيەكا باش هەبیت ل گەل پرۆژه‌يێ‌ ئەمریكی و پشتەڤانيیا ئێكدو دكەن، بەلێ‌ خالا جهێ‌ راوەستیانێ‌ د ئەڤی پرۆژەى دا، ئەوە كو هزرا وی ئیسلامەكا ئیخوانی یە ب هەڤپشكی ل گەل دەولەتا (قەتەر) ب دیتنا رۆژ ئاڤا، ئەڤە جهێ‌ مەترسیيێ‌ يه‌ و نوكە بزاڤ دهێتە كرن كو گرنگیيێ‌ ب سعودیە و ئیماراتێ‌ و مسرێ‌ بدەن بۆ سنورداركرنا پرۆژه‌يێ‌ تركی، ئانكو ئەڤ پرۆژە نەگەهیتە هەمی ئارمانجێن وان بۆ خۆ دارشتین.

  • پرۆژەيێ ئیسرائیلی:

پژۆژەيه‌كێ‌ گرێدایی دروستبوونا دەولەتا ئیسرائیلێ‌ یە ل ساڵا 1948ێ، كو ژ نیلی هەتا فۆراتی یە، بەردەوام ل گەل دەولەتێن دەوروبەر و ئیرانێ‌ د هەڤڕكیێ‌ دایە، ژ بەر كو ئەڤ دەولەتە وى ب كیانەكێ‌ هاڤى ل قەلەم ددەن و پەیوەنديیێن ئاشكرا ل گەل نینن و ل راگەهاندنێن خۆ دا بەردەوام هێرشی ئیسرائیلێ‌ دكەن، راستە هزرا بەرفرەهبوونێ‌ هەیە، بەلێ‌ ئەڤە چەند ساڵ بوون، تنێ د قووناغا بەرگريیێ‌ دا بوو، بزاڤ دكرن ب رێكا گڤاشتنێن نێڤدەولەتی؛ تایبەت ئەمریكا و ئه‌ورۆپا، پەیوەندیێن خۆ ئاسایی بكەت ل گەل ئەڤان دەولەتان و تنێ سنورێن خۆ ل گەل لوبنان و غه‌زە دپاراستن، بەلێ‌ پشتی رویدانێن  7/10/2023ێ، ئەڤ بیروكەیە هاتە گوهۆڕین بۆ بەرفرەهبوونێ‌ و دەست ب هێرشكرنێ‌ كر ل غه‌زە و لوبنانێ، ب هاریكاریيا پێزانینێن هەواڵگری شيیا ئارمانجێن مەزن ب جهـ بینیت و بزاڤا (حه‌ماس و حزب الله) زۆر لاواز بكەت و مەرجێن خۆ بسەپینیت بۆ راگەهاندنا ئاگربەستێ‌. پشتی كەفتنا به‌شار ئەسەدی، شییا ڕۆبەرەكێ‌ مەزن كونترۆل بكەت وگەف و مەترسیيا ژ خۆ دویر بكەت و دەڤەرەكا ئارام ل پشت سنورێ‌ خۆ دروست بكەت و ئەمریكا و ئه‌ورۆپا پشتەڤانێن ب هێزن بۆ ئەڤی پرۆژەی وگەشەكرنا وی و بەرگريیەكا كێم وێنە ژێ‌ دكەن.

  • پرۆژەيێ ئەمریكی:

 پرۆژەيه‌كێ‌ نێڤدەولەتی و كاریگەر و بهێزە، پرۆژه‌يێ‌ پاراستنا بەرژەوەندييێن ئەمریكانە، ژ بەركو بەروڤاژی پرۆژه‌يێن دی یێ‌ بێ‌ ئەردە ل دەڤەرێ‌ و تنێ دەولەت و گرۆپێن نێزیكی خۆ هەنە، بەلكو بهێزترین پرۆژەیە ل دەڤەرێ‌ و زۆربەی پرۆژه‌يێن دەڤەرێ‌ هێزا خۆ ژ ئەڤی پرۆژەی وەردگرن دەمێ‌ بەرژەوەندييێن هەر دو پرۆژه‌يان جوت دبن. ئەڤ پرۆژە ئالاڤێن زڤر و نەرم بكار دئینیت، بەلێ‌ پتر پشتبەستنێ‌ ل سەر هێزێ‌ دكەت و وەكو هێزا ئێكانە ل جیهانێ‌ خۆ دیار دكەت.

پرۆژە‌يێ‌ ئەمریكی هژمارەكا هێلێن سۆر هەنە، نابیت چ كەس و لایەن نێزیك ببن یان ببنە گەف و مەترسی ل سەر ئەڤان هێلا و ژ ئەوان ژى:

– ئێمناهيیا دەولەتا ئیسرائیلێ: یا خویا یە كو ئەمریكا، ئیسرائیلێ‌ ب دەولەتەكا زۆر نێزیكی خۆ ل دەڤەرێ‌ ددانیت و ب كویراتیيا خۆ یا ستراتیجی ژ لایێ‌ سیاسی و لەشكری و ئابووریڤه‌ دزانیت و هەمی دەما یا ئامادەیە بەرگریێ‌ ژێ‌ بكەت ب رێكێن یاسایى و لەشكری و سیاسی و بزاڤێ دكه‌ت ب رێكا ئاسایيكرنا پەیوەنديیێن وێ‌ ل گەل دەولەتێن عەره‌بی، گەف و مەترسیيا ل سەر نەهێلیت. دیارە دەمێ‌ پرۆژه‌يێ‌ ئیرانی بوویە گەفەكا راستەقینە ل سەر ئیسرائیلێ‌، بیر ل سنورداركرن و لاوازكرنا وێ هاتە كرن و هاتە جێبه‌جێكرن، ب كورتی هەر دەولەتەك یان گرۆپەك ببیتە مەترسی ل سەر ئێمناهيیا ئیسرائیلێ‌، دێ بۆ ئەمریكا بیتە ئارمانج.

– ئێمناهیا گازێ: گومان تێدا نینە، كو هژمارەكا كۆمپانيیێن ئەمریكا یێن تایبەت ب دەرئێخستن و ڤەگوهاستنا گازێ‌ ل دەڤەرێ‌ هەنە، بۆ ب هێزكرنا پرۆژه‌يێ‌ ئەمریكی و ئابوورێ‌ وێ‌ كار دكەن، هەر كەس و لایەنێ‌ ببیتە گەف ل سەر بابەتێ‌ گازێ‌ و كۆمپانيیێن ئەمریكی، دێ بۆ ئەمریكا بیتە ئارمانج و دێ‌ هێزێ‌ دژی وان  بكار ئینیت.

– دژاتیيا تیرورێ: ئەگەرێ‌ سەرەكی و ئاشكرا بۆ هەبوونا ئەمریكا ل دەڤەرێ‌، شەڕێ‌ دژی تیرۆرێ‌ یە و تایبەت داعش، ئەڤجا ب چ شێوازا رێكێ‌ نادەت ئەڤ گرۆپێن تیرۆری گەشێ‌ بكەن تایبەت پشتی هێرشا تیرۆری ل سەر ئەمریكا ل 11ى سبتمبەرا 2001ێ، ئارمانج گرتنا تاوەرێن بازرگانیيا جیهانی. ئەمریكا پلانەكا دارشت ل ژێر ناڤێ‌ بۆ پاراستنا ئێمناهيیا نافخۆ ل ئەمریكا، پێدڤيیە شەڕێ‌ تیرۆرێ‌ ل دەرڤەی ئەمریكا بهێتە كرن و ل ئەفغانستان و عیراقێ‌ دەستپێكر و هەر لایەنەكێ‌ پشتەڤانیيا گرۆپێن تیرۆری بكەت ل دەڤەرێ،‌ دێ بیتە ئارمانج بۆ ئەمریكا، بەروڤاژی ئەڤێ‌ چەندێ‌ هەر لایەنەكێ‌ شەڕی دژی تیرۆرێ‌ بكەت ب هەڤالبەند و نێزیكی خو ددانیت، بێ‌ گومان ئەڤ پره‌نسیپە ل دویڤ بەرژەوەندييێن ئەمریكا دهێتە گوهۆڕین.

– ئێمناهیا بازرگانیيا جیهانی د دەریا دا: ئانكو پێدڤییە چ مەترسی ل سەر بازرگانيیا جیهانی نەبن و ب ئازادانە هاتنوچوونا بارهەلگرا ل دەریا بهێتە كرن، هەر گرۆپەكێ‌ ببیتە گەف ل سەر بزاڤا بازرگانی، دێ‌ بیتە ئارمانجا ئەمریكا ب هەڤپشكی ل گەل لایەنێن دی ب تایبەت به‌ریتانیا.

– سنورداركرنا چینێ: دیارە هەڤڕكیيەكا نە راگەهاندی د ناڤبەرا ئەمریكا و صینێ‌ دا هەیە، تایبەت د بوارێ‌ ئابووری دا، هەر ئێك هەولدەت هەژموونا خۆ پتر ب سەپینیت ل سەر دەڤەرێ‌ و هەر لایەنەكێ‌ خۆ نیزیكی چینێ‌ بكەت وگرێبەستێن ئابووری و زانستی ل گەل مۆر بكەت، دێ‌ بیتە ئارمانج بۆ ئەمریكا و رێكێ‌ نادەت چین شوین پێ يێن خۆ ل دەڤەرێ‌ بكەت.

  • پرۆژەيێ بهریتانیا:

 هەر چەندە به‌ریتانیا و ئەمریكا زۆر دنێزیكن د پروژێن خۆ دا ل دەڤەرێ،‌ بەلكو به‌ریتانیا ب پلان دارێژەرێ‌ پرۆژەی دهێتە نیاسین، ئەمریكا جێبەجێ‌ كارە، بەلێ‌ به‌ریتانیا ژی پرۆژه‌يێ‌ خۆ هەیە و تایبەت خۆ ب خودانا دەڤەرێ‌ دزانیت، نه‌خاسمه‌ پشتی شەڕێ‌ جیهانى یێ‌ ئێكێ‌ و دەڤەرا پارچەكری ل گەل فره‌نسا، وەكو هێزەكا سەرەكی خۆ د هەڤپەیمانا دا دبینیت بۆ شەڕێ‌ تیرۆرێ‌ و كارگەریيەكا مەزن هەیە بۆ پاراستنا بەرژوەندييێن خۆ، ئەڤی پرۆژە‌ى سیاسەتەكا نەگوڕ هەیە ل گەل دەولەتێن دەڤەرێ‌.

  • پرۆژەيێ چینی:

 وەكو هێزەكا ئابووری و زانستی هاتیيە گوڕەپانا هەڤڕكیيێ‌ ل گەل پرۆژه‌يێن دی، پتر ژ لایەنێ‌ لەشكری و ب رێكا كۆمپانیيا و مۆركرنا گرێبەستێن دۆمدرێژ، هەولددەت كونترۆلا دەڤەرێ‌ بكەت و هەژموونا خۆ ب سەپینیت و دەڤەرێ‌ وەك بازارەكێ‌ سەرەكی بۆ بەرهەمێن خۆ دروست بكەت، ئەڤ پرۆژە یێ‌ نوییە ل دەڤەرێ،‌ هەر چەنده‌‌ هەڤڕكيیا وی یا كەڤنە ل گەل پرۆژه‌يێن دی، بەلێ‌ ل دەڤەرێن دی نە ل دەڤەرا مە.

  • پرۆژەيێ ئێكەتيیا ئهورۆپی:

 هژمارەكا دەولەتێن مەزن و كاریگەرن تایبەت فره‌نسا و ئەلمانیا خودان پرۆژە و بەرنامە نە ل دەڤەرێ‌، سیاسەتا خۆ هەیە بۆ كونترۆلكرنا دەڤەرێ‌ و ئامرازێن خۆ هەنە و د چارچووڤێ‌ هەڤپەیمانا دا رۆلێ‌ خۆ دگێڕن.

  • پرۆژەيێ روسی:

ئەڤ پرۆژەيه‌ یێ‌ دیرۆكییە ل جیهانی و بەردەواميیا پرۆژه‌يێ‌ ئێكەتیيا سۆڤیێتا بەرێ‌ یە وكارتێكرنا خۆ هەبوو وەك پشتەڤانەك و هەڤالبەندەكێ‌ سەرەكی بۆ پرۆژه‌يێ‌ ئیرانی، بەلێ‌ پشتی نەمانا رژێما به‌شار ئەسەدی ل سووريێ‌ و لاوازبوونا ئیرانێ‌ ل دەڤەرێ‌ و مژویلبوونا روسیا ب شەڕێ‌ ئوكراینا ڤە، رۆل و پێگەهێ‌ ئەڤی پرۆژەی زۆر لاواز بوویە، بەلێ‌ پتر كاریگەریيا خۆ ل سەر ئه‌ورۆپا هەیە تایبەت ژ لایێ‌ ئابووری و ووزێ‌ ڤە.

  • پرۆژەيێ كوردستانی:

 پرۆژەيێ‌ ئاڤاكرنا دەولەتا كوردستانێ‌ یە، پرۆژەيه‌كێ‌ دیرۆكی و مافێ‌ چارەنڤیسە، ژ بەر كو هەمی مەرجێن پێدڤی وەك (ئاخ وگەل و دەستهەلات) هەنە، چەند جارا بزاڤ هاتینە كرن و دەولەت هاتیيە راگەهاندن، بەلێ‌ ژ بەر لاوازيیا پشتەڤانيیا دەرڤە و نەگونجاتیيا ئاڤاكرنا دەولەتا كوردستانی ل گەل بەرژەوەندييێن دەولەتێن زلهێز، پیلان هاتینە دارشتن و رێكەفتن هاتینە كرن بۆ هەلوەشاندن و ژناڤبرنێ، زێدەباری نە ئێككرێزیيا نافخو، بەلێ‌ گەلێ‌ كوردستانێ‌ خودان ئیرادەكا ب هێزە و چ جارا دەست ژ مافێن خۆ یێن رەوا نەبەرداینە و ئالایێ‌ سپی بلند نەكریيە و بلند ناكەت، هەمی دەما ل دەلیڤەیێن گونجايی دگەریێت بۆ ب ده‌ستڤه‌ ئينانا مافێن خۆ یێن یاسايی و گرنتی بكەت.

ب دیتنا مە پێدڤيیە سەركردایەتیيا سیاسيیا گەلێ‌ كوردستانێ،‌ ئەڤان گوهۆڕینێن ل دەڤەرێ‌ دروست بوین و چەند پرۆژە ب هێز كەفتین و هندەك لاواز بووین، ب دەلیڤەيه‌كا زێرین بزانیت و هەول بدەت دەستڤاڵا ژ ئەڤێ‌ كێش و ڤەكێشی دەرنەكەڤیت و مافێن خۆ مسۆگەر بكەت، ئەڤ چەندە دێ‌ ب ئەڤان خالا هێتە كرن:

خالا ئێكێ: ئێكرێزيیا خەلكێ‌ كوردستانێ‌، كو ب هەمی بیروبۆچوون و رەنگان و دەڤەران، ببنە ئێك هەلویست و ئێك بڕیار، د نوكە دا پێنگاڤ و دەستپێشخەريیێن جەنابێ‌ سەرۆك (مه‌سعود بارزانی) بۆ ئێكرێزييا مالا كوردستانی، جهێ‌ دلخۆشی و شانازیيا هەر كوردەكی نە ل جیهانێ‌ و كومبوونا جەنابێ‌ وی ل گەل (مەزلووم عەبدی كۆبانی) ل هەڤلێرا پایتەخت ل 16/1/2025ێ رەنگڤەدان و دەنگڤەدانەكا مەزن ل دویڤ خۆ هێلایە و بوویە جهێ‌ ئومێدا خەلكی، كو ئەم ل بەر دەرازینكا پاشەرۆژەكا گەشین بۆ گەلێ‌ كوردستانێ‌.

خالا دویێ: سەركردایەتیيا سیاسيیا كوردستانێ،‌ خواندنەكا كویر و هویر و ژیرانە بۆ ئەڤرۆ و سوبەهی هەبیت و هەلسەنگاندنەكا زانستى و دروست بۆ به‌لانسا هێزێن ل دەڤەرێ‌ بكەت ل دویڤ بەرژەوەندييێن خۆ یێن گونجای بڕیارێ‌ بدەن، نەكو ل دویڤ حەز و ڤیانا، ژ بەر كو جیهانا ئەڤرۆ جیهانا پاراستنا بەرژەوندایە و هەر نێزیك بوونەك ژ هەر پرۆژەكی ل دویڤ رێكەفتنەكا موكۆم بیت و دێ‌ چەند بەرژەوەندييێن كوردستانێ‌ پارێزن، ژ بەر كو رۆل و پێگەهێ‌ كوردستانێ‌ یێ‌ دیار و بەرچاڤە و چ پرۆژە نەشێن دەستا ژێ‌ بەردەن.

خالا سیێ: ل هەرێما كوردستانێ‌ لەز ل پێكئینانا حكومەتێ‌ بهێنەكرن ل دویڤ ئەنجامێن هەلبژارتنێن 20/10/2024ێ هاتینە كرن و رێكەفتن ل سەر بەرنامە وستراتیجيیەتەكا ب هێز وگونجای بهێتە كرن و دابەشكرنا پۆستێن وەزاری نەبنە ئەگەرێ‌ گیرۆبوونێ‌ ژ بەر كو رویدان بلەزن و چاڤەرێى مە نابن.

پرۆژە‌يێ‌ كوردستانی، پرۆژەيه‌كێ‌ گرنگ و ب سەنگە، دەلیڤەكا زێرینە، هەروەسا لاوازبوونا پرۆژەيه‌كی؛ ئەڤرۆكە ئەوێ‌ چەندێ‌ ناگەهینیت، كو دێ‌ بەردەوام یێ‌ لاوازبیت و بۆ یێ‌ ب هێز ژی هەمان بیروكەیە، راستە هەر پرۆژەيه‌ك دێ‌ بزاڤێ كه‌ت پتر مانا خۆ ب پارێزیت و دەستكەفتا ب دەست بێخیت چ راستەوخۆ یان نەراستەوخۆ.

هیڤیێن مە دگەشن و نێزیكە دێ‌ رۆژا كوردستانێ‌ هەلێت و گەلێ‌ مە دێ‌ ب ماف و دەولەتا سەربەخۆیا كوردستانێ‌ شاد بیت و رۆلێ‌ خۆ یێ‌ سروشتی د ئاڤاكرنا شارستانیيەتێ‌ و خزمەتا مرۆڤایەتیێ‌ دا گێڕيت.

ڤان بابەتان ببینە

زمان و کەلتۆرێ کوردان

ئەحمەد ئۆنال وەرگێران ژ تورکی: هۆشەنگ تاجر   زمانێ کوردی ئێکە ژ زمانێن هەر کەڤن …