گۆڤارا مەتین گۆڤارا مەتین
قەدری شێرو
شانۆگەریا بۆچی مر؟ یا نڤێسەر و دەرھێنەر ھەلکەت ئیدریس، ھەولا بەرجەستەکرنا ھەڤڕکییا مرۆڤی ب ھزرێن مرۆڤایەتێ ب رێکا وان کەلەخێن بەربەلاڤ د ناڤ وی روبەرێ بەرفرە دا دکەت، داکو وێ ھڕھڕا ھەلامەتێ مرنێ ھەناسا وێ د ناڤ خو دا ڤەشارتی بشکێنیت و لەش و کەلەخ ببنە ئالاڤێن شرۆڤەکرنێ ل شوینا پەیڤێن دوبارەکری و وەرگرتی، ژ بۆ دەربڕینێ و سڤکرنا وێ چەندا د ناڤ ناخێ بینەری دا ژ ئێشان و بێزارییا وێ ژیانا پێڤە وەستیایی. ھەمیا دڤێت ژ چارەنڤیسێ خو ب رەڤن، دا کو ل ژیانێ ب ڤەگەرن ل دویڤ ھندەک بنەمایێن نوی و جێواز، بەلکو ژ مرنێ قورتال ببن، ئەو تشتێ کو ھەتا ھەتایێ کەس ژێ قورتال نابیت.
ھەر ئێک ھەول ددەت رێکەکێ ب دەست خو ڤە بینیت دا، کو ژیانەکا دی بژیت، ئەو ژبیر دکەت وەکو وی کەسێ ژ بلنداھییا دۆلێ د کەڤیت دا کو ژ وێ خەونا زیندی یا، کو ئەو بسەردابڕی ھشیارکەت و ل راستیێ بگەریت. و ھندەک ژ وان ھەستەکا بێ مفا پەیدا دبیت، ھەروەکی تام و مفا د ھەمی تشتان دا نەمایە، جوانییا شارستانیەتێ دبوھوژیت و لەشێ مرۆڤی دھەلوەشیت و ھەڤسەنگی د ناڤ جڤاکی دا نامینیت، ھیج دەلیڤەیەک نینە خو ژ مرنێ بڤەشێری. ل ڤێرێ مرۆڤ یێ پێدڤی ھاریکاریێ یە، لێ پسیار ئەوە … کی دێ ھاریکارییا مرۆڤی کەت؟ ئایە ھەر مرۆڤ ب خویە؟ خو بەرسڤ ژی یا ب کفنی پێچایی!
ئارامییا مرنێ و بوونا ب قێژی و ژیانا ب دوماھیک، کفنێ سپی ئەوێ ب رەنگێ کراسێ بویکێ، و پێنوسێ پزیشکێ داد ئەوێ بڕیارا چارەنڤیسێ مریان د دەت، و ئەو تەختێ، کو ئەڤە سیهـ و شەش سالە چ مرۆڤێن ساخ خو ل سەر درێژنەکری ھەتا نە بووینە کەلەخ، ئەڤینییا تەرمان و دانوستاندن د گەل دا. ھەمی بووینە وێنێن دیتنێ، دەرھێنەرێ نمایشێ فرێ دکەت و وەرگر دوەرگریت و ھەول د دەت بچیتە دناڤ کویراتییا ناڤەڕۆکا وێ دا، داکو ل پاشمایێن وێ راستییا ھەلوەریایی ب گەڕیت، و خو ببینیت و رێکەکێ پێ ب گەھیتە ژیانێ، و بەروڤاژی وێ دێ کەڤیتە داڤێن مرنێ، چونکو چێنابیت ھەر بەرھاڤێتنەکا ژنێ ھەمان ئەو زارۆک ژبەر بچیت. ئانکو ھەولدانە ژ بۆ ئاڤاکرنا ھندەک شێەویان، کو دەربڕینێ ژ رامانێ بکەت، و د ئەنجام دا ھەر شێوەک ژ شێوەیێن دی توندترە و رەنگڤەدانا ئازاریێن تاکی یە دجڤاکی دا.
نمایش
دیمەنێ ئێکێ
د ڤێ نمایشێ دا دەرھێنەری ھەولدایە رۆلێ ئارستەکەری بکاربینیت ژبۆ چاوانییا راکرنا پەردێ ل سەر وان ھەمی تشتێن گرێدایی ب چارەنڤیسێ مرۆڤیڤە ب شێوەکێ ئەرێنی، دویر ژ ھەمی وان نەرینییا ئەوێن برینەکا کویر د ناڤ گەشتێن دەرونیێن مرۆڤایەتێ دا چاندی، چ کەس بیت یان جڤاک بیت. نمایش دەستپێدەکەت ب روناھیکرنا دەپێ شانۆیێ و کومەکا تەختێن بەربەلاڤ ل سەر دەپی دیاردبن، ھەر تەختەکی کەلەخەکێ ب پەڕوکێ سپی نخافتی یێ ل سەر، کو نیشانا مرنێ یە، و ھندەک کەلوپەلێن تاقیکرنا کەلەخێن مری یێ ل وێرێ، ھەروەسا ستینکەکا ھەلاویستنا جلکا، وەک دیکور بو شانۆگەریێ کو ناھێتە گوھۆڕین تا دویماھیکا نمایشێ. و لایێ راستێ یێ دەپێ شانۆیێ کورسیکەکە ڤەکۆلەر یێ لسەر روینیشتی، ئەوە ئەوێ ھەیام ھەیام سەرەدانا نوژدارییا داد دکەت، کو دبیتە نوینەرێ دەستھەلاتێ و ھەول د دەت دەستھەلاتا خو ل سەر ھەرتشتەکێ بچەسپینیت، و بڕیار ل سەر چارەنڤیس و ئەگەرێ مرنا ھەر کەلەخەکێ د دەت. کامیرەیەک یا د دەستی دا ئەوان کەلەخا پێ وێنە د کەت، بەلکو ھندەک نیشانێن تاوانێ ب دەست بکەڤن، دا کو بەلگە بکەت. کەسایەتییا پزیشکی ب ئارامی ب ژوور دکەڤیت، د گەل دەنگێ مۆزیکەکا بلند کو نیشانا دەسپێکا ئاریشایە. ل دەمێ ھاتنا پزیشکی ئەو پارچە پەروکێن ل سەر کەلەخێن مرۆڤان ب لڤینەکا ھونەری و کاریگەر بلند دبن بەرەف بوشاییا نمایشێ، کو وێنەکێ جوانیێ بو سینوکرافیا نمایشێ دروست دکەت. و ھەڤسەنگییا گومتل و ئاستا دروست دکەت. ھەروەکی وان کەلەخا دڤێت ب گەرمی پێشوازییا پزیشکی بکەن، ل دەمێ پزیشک رادبیت ب گوھورینا جلکێن خو.. ژنیشکەکێ ڤە دیار دیبیت کو ڤەکۆلەر بەری وی یێ ھاتی. ل ڤێرێ پێدڤییە ئاماژە ب ھندێ بھێتەکرن کو دورستکرنا وێنەی ب رێکا لەشێ زارڤەکەری رەھەندێن پتر بابەتی و ھزری و جوانیێ ھەنە، و ھەروەسا شێوازێ دەرھێنانێ وان ئاستەنگێن تەقلیدی یێن بھا و تێگەھێن جڤاکی شکاندن. کو بوویە رویێ دویێ و دوپاتکرنا ھەوارییا وەرگر تویش د بیتێ ژ ئێشان و توندیێ، ئەو ئێشاندنا دگەل ئێشانێن مرۆڤی دچیت ھەر ژ دەمێ پەیدابوونێ و تاکو مرنێ دگەل یا بەردەوام بیت. دیمەن دست پێ دکەت ب هەڤڕکییەکا کەڤن دناڤبەرا وی یێ نوینەرایەتییا باشیێ دکەت و دگەل وی یێ نوینەرایەتییا خرابیێ دکەت و ب شێوەکێ پێترانکی، ب رێکا وان کەسایەتییا ئەوێن ھەست ب بەرزەبوون و ل خو گەڕیانێ کری، ب ھندەک وێنە و ئاماژەیان، کو مرۆڤی مەندەھوش د کەن. و ل دەمێ پسیار دیار د بیت مرۆڤ دناڤا خو دا د بوھوژیت و ب خو ل بەرسڤا دگڕیت، و وێنەیێن جڤاکەکێ د خەمان دا خەندقی د ئاشۆپێ دا ھزر تێدا د کەت، کو چریسکەکا ھیڤییان یان رێکەکا قورتالبوونێ ژ خەما ب دەست ناکەڤیت. شەڕەدەڤ دناڤبەرا ھەردو کەسایەتییان دا بلند بیت و رویدان مەزن دبیت تا کو پزیشک دەستھەلاتا خو ب کاردئینیت و داخوازێ ژ ڤەکۆلەری دکەت ژ ژوورا پزیشکییا داد دەرکەڤیت، ھەروەکی ئەو ئەگەرێ مرنا ئەوان ھەمی کەلەخان. ب تورەیڤە ڤەکۆلەر دەردکەڤیت و وێ کورسیکا ل سەر روینشتی د گەل خو دبەت. ئاماژە بو نەدەست بەردان ژ دەستھەلاتێ، کو ئەو دەستھلاتدارە ھەمی تشت یێن ل بن کونترۆلا وی، ڤەکۆلەر د گەل خو دئاخڤیت و دبن لێڤلێڤکاڤە ھەر وەکی دبێژن ئەم دێ مینین و دڤێت ھوین ژ ناڤ بچن و دەرکەڤن.
دیمەنێ دویێ
ل دەمێ ھاتنا زارڤەکەرێ سێ یێ دیمەن دەست پێ دکەت، دەربڕینێ ژ کارێکتەرێ کەسەکێ بێ مێشێک د کەت، کو ب خەلەتی ڤە دچیتە د ژوورا پزیشکێ داد ڤە و وەسا خو دیار د کەت کو یێ ل کارەکێ د گەڕیت، ل ڤێرێ نڤێسەر و دەرھێنەر شیا رەوشێ بگوھۆڕیت ژ دیمەنێ بلندبوونا هەڤڕکیێ و تێکچوونێ بو دیمەنێ بھێن فرەھییا بینەری، کو ھەناسەکێ ب ھەلکێشیت و ھەست ب ئارامیێ بکەت، رەوشا بینەری دھێتە گوھؤڕین ژ حالەتێ چاڤەرێبوونێ بو حالەتێ پشتراستبوونا دەروونی، ئەو ژی ب رێکا کومێدیایا رەش، ئەوا زارڤەکەرێ سێ یێ یێ بێ مێشک پێ رابووی ژ ھەلویستێن خوشیێ. کو بەردەوام ھەولددا پزیشکی رازی کەت، ئێ دی ل ئەگەرێن مرنێ نە گەڕیت، چونکو مرنێ چ ئەگەر نینن، مرن قەزا و قەدەرە وشولا خودێ یە، ھەر مرۆڤەک پەیدا دبیت داکو بمریت، و ھەر کەسێ باوەڕی ب ھزرا وی نە بیت ئەو مرۆڤەکێ ڤەقەتیایی و ھاڤییە ژ بیردانکا کۆم یا جڤاکێ، ئەوا زارڤەکرێ بێ مێشک باوەری پێ ھەیی، ئەڤە ژی بو شارەزایی وھوستەکارییا نڤێسەرێ دەرھینەر دزڤڕیت. پاشان ھەول د دەت ببیتە مرۆڤەکێ سادە و سوحبەتا ب ھەستێن پزیشکی د کەت، وەسا خو دیار د کەت، کو یێ بۆ خو یێ ل ژنەکێ دگەڕیت ھەر وەکی ئەڤیندار و کەتییە دبن دەمەکێ توند و نەخوش دا،ویێ پڕی ئەڤینییە و یێ بوویە ژ رابردووی، و جارەکا دی ددزڤڕیت و دبێژیتە پزیشکی:
– ئەز یێ تڕانا دکەم.
– دێ بۆچی ژنێ ئینم و ئەزێ بێ کار؟
ل ڤێرێ، دەرھێنەر کارتێکرنێ ل ھەلچۆنێن بینەری د کەت و د دانیتە بەرامبەری پسیارەکێ ب رێکا وێ کەسایەتیێ دیار دکەت، ئەرێ ئەگەر چییە ئەو نەشێت ئەو ئەڤینا وی خەون پێڤە ددیتن ب کەت؟ ئەرێ ئەو یێ ژ ھەژییە؟ چنکو ئەو ڤان ھەمی راستیێن ب ئێش یێن بھایێ مرۆڤایەتێ کرینە پێکەنین و پێترانک ناببینیت. ھەروەکو دەرھینەری دڤێت ئێش و ئازارێن رێژەکا مەزن ژ گەنجێن جڤاکێ خو ب رێکا ڤی کارێکتەری وب رەنگەکێ ھونەری بو سەر دەپێ شانویێ ڤەگوھێزیت.
پزیشک ھەولددەت ئەوی کەسێ بێ مێشک رازی ب کەت، کو بچیت چونکی وی گەلەک کار یێ هەی، و ل دەمەکێ دی بزڤڕیت و ل دەف کار ب کەت، لێ رەتکر، کو ئەو وێرێ ب جهـ بھێلیت بەری سەحکەتە تەرمێ وی زارۆکێ ل سەر تەختەکی ژ وی وێڤە ئەوێ سەرنجا وی بو خو راکێشای وکارتێکرن ل ھەستێن وی کری. و دبێژیتە پزیشکی:
– گونەھا ئەڤی زارۆکی چییە؟ بۆچی مریە؟
جارەکا دی دەرھینەری ڤیایە پێڤەژوییا ھزرا بینەری بو ناڤا جڤاکی ب زڤرینیت، چەندیین پرسیارێن د مێشکێ وی دا دخەو وبێ ھوشکری ب لڤینیت وھشیارکەت.
دیمەنێ سێ یێ
پزیشک دزڤڕیتە کارێ خو ھەر وەکی ئەڤیندارەک ژ ژڤانێ خوشتڤییا خو گیروبوی، و ب شروڤەکرنا تەرمان رادبیت. ئێک ل دویف ئێکێ، دا کو راپورتەکێ ل سەر ئەگەرێ مرنا ھەر ئێک ژ وان ئامادە کەت، ل ڤێرێ، دانوستاندن دگەل تەرما دەستپێدکەت وەکو گۆتارەکا ئاراستەکری بۆ بینەر و پشکداریکرنا بینەری د رویدانیێن شانۆیێ دا. پزیشک ب بەرچاڤکرنا ھندەک رویدان و ئاریشەیێن رۆژانە یێن روی ب روی ھشیارییا رەوشەنبیری جڤاکی دەستپێدکەت، جڤاکەکێ دیاردەیێن جوان و پویتەپێکرنێ ب ھزرێ و پێشکەفتنێ ناکەت، جڤاکەکە مرۆڤێ مری تێدا گرنگترە ژ یێ زندی و جلوبەرگ گرنگترن ژ لەشی و پارە گرنگترن ژ تەندروستیێ، ھەر ئێک ژ مە سپێدێ ژ مال دەردکەڤیت بەر ب کارێ خو یان ژی بەر ب ھەر تشتێ ھەیی دچیت و ب شەڤ د دزڤڕیت دا کو ھزر د ھەلاتنا رۆژێ دا بکەت و ب دەرکەفتنا ھەیڤێڤە گرێدەت ئەوا، کو دێمێ وێ د ھەمی شەڤان دا دوبارە نابیت. ترس و دو دلی د کەڤیتە د ناخێ وی دا، چنکو نزانیت بۆچی دژیت. ئەڤە ھەمی ب رێکا دانوستاندنێ ل گەل خو و ڤەگێڕانا چیرۆکا وی پیرەمیری ئەوێ ب بەردەوامییا خارنا حەبکێن (ڤییاکرا) مری، پزیشک یێ دودل بوو، کا دێ چ نڤێسیت د راپورتا خو دا؟ دا کو ھەتکا ئەڤی پیرەمێری نەبەت، ئەوێ ژیانەکا نە سرۆشت بۆراندی و ئەو نە ئەگەر. ھەروەسا دەرھێنەر شیا نامەکا دی بو بینەری ب ھنێریت ئەو ژی ب رێکا پرسیارا، ئایە مری پێدڤی سەرەدەریەکا جوان ل گەل بھێتە کرن، و بۆچی؟ ئایە جوداھییەک ھەیە دناڤبەرا مریەکی و مریەکێ دی دا؟ یان دناڤبەرا مریەکێ و کوشتیەکێ و خۆکوژەکێ دا؟و بوچی؟ و ژ نیشکەکیڤە دەنگێ سترانەکا فلکلورێ کوردی یا خەمگین و تراژیدی دھێت، ب دەنگەکێ نازک یێ کچەکێ تەختەکی پالددەت تەرمێ کچەکێ یێ ل سەر خێزانا وێ نەچارکربوو، کو خو ژبەر ھەتکبەریێ و شیشتنا نامیسێ ب سوژیت. داکو دەرھێنەر کێشەیا ژنێ دناڤ جڤاکەکێ خێلەکی ودەمار گرتی و پەیوەندییا وی ب شارستانیەتێڤە و بەراوردکرنا درویشمێن تەیسوک دراگەھاندنێ دا ب کریاریێن پیس و نە جوان ئەوێن ل بەرچاڤێن ھەمییان دھێنە ئەنجامدان بەرچاڤ کەت. جارەکا دی دەرھینەر پسیارا د ئافرینیت، ل دەمێ دادوەر ئەگەرێ تاوانێ بیت و پزیشک ئەگەرێ بەلاڤبوونا نەخوشیا بیت و زێرەڤان ئەشکەنجە دەربیت ل وی دەمی دێ یاسا دارستانێ بەرقرار بیت و دێ دادی کرێت بیت و دێ دەسھەلاتدارییا یێ ب ھێز ل سەر یێ لاواز زاڵ بیت و دێ نەخوشی و نەساخی بەربەلاڤ بن و دێ گەندەلی مشە بیت، ھوسا ژیانێ بھایێ خو نامینیت ودێ یا بێ رامان بیت ودێ مرن ژ ژیانێ باشتربیت. بینەر دکەڤیتە د حێبەتیێ دا و پسیارەک ل دەف پەیدا دبیت.. ئایە مرن دویماھیکە؟ یان ژی دەسپێکەکە بو ژیانەکا دی. زارڤەکەرێ بێ مێشک ئەوێ زنجیرا ھزران دبڕیت و بلەز د ھێتە ژوورڤە و خو درێژ د کەتە عەردی و ب دەنگەکێ بلند دکەتە ھەوار..
– پزیشک بگەھە من !
و داخوازێ ژێ دکەت سەحکەتێ و شروڤە ب کەت و ئەگەرێ مرنا وی دیار ب کەت، جونکی ھەڤسویێن وی گوتبوویێ تو یێ مری.
ل ڤێرێ دەرھێنەر دەلیڤەکا دی د دەتە بینەری و ژ وێ رەوشا تراژیدی یا ئەو تێدا د ئنیتە دەر و د ڤەگوھێزیتە رەوشەکا دی یا بلند تر و باشتر ب رێکا دیالوکێن خوش و ب کەنی ئەوێن د ناڤبەرا پزیشکی و کارێکتەرێ بێ مێشکدا دھێنە گوتن. پزیشک ھەولددەت وی بێ مێشکی رازیکەت ب چوونێ، چونکو ئەو نە مریە، لێ ئەو چوونێ رەت دکەت و یێ رژدە، کو یێ مرییە ژ بەر کو زارۆکا گۆتبوویێ تو یێ ژ برسا دا مری، پشتی گەلەک ھەولدانێن پزیشکی باوەری بو چێبوو، کو نە مریە ژ برسا دا، لێ یێ رژد بوو، کو یێ ھاتیە کوشتن و کچا ھەڤسویێ وان ب جوانییا خو یێ کوشتی. ھەر وەکی دەرھێنەر پسیار دکەت ئایە ئەو ھەمی کەسێن ل سەر دونیایێ دژین د زیندینە، یان ژی گەلەک ژ وان د مرینە، بەلێ ھەست پێ ناکەن. ژ نیشکەکێ ڤە تەرمەک رادبیت و د کەتە ھەوار، ئەوێ بێ مێشک تێکدچیت ژ ترساندا و د رەڤیت، پزیشک ھەول د دەت چارەسەرییا وی تەرمی بکەت و د ھەوارێ بچیت، لێ یا بێ مفا بوو. ھوسا دەرھێنەر پسیاران ژ جۆرەکێ دی پەیدا د کەت، ئەو ژی بوچی مرۆڤێن ساخ ژ مریان د ترسن؟ سەرەرای کو د بێ دەستھەلات و لڤینن، ئایە مرنێ ئاموژگارییەک ھەیە؟ ئایە مری دشێت وانەکێ ب دەتە یێ زندی، کو مفای بو خو ژێ وەربگریت د ژیانا خو یا دوبارەکری و بێزاردا. پزیشک رادبیت ب پشکنینا تەرمێ وی، دا کو جارەکا دی بکەڤیتە د سەرسورمانیێ دا، چ دراپورتێدا بنڤێسیت؟ ئایە بنڤێسیت یێ مری؟ یان ژی بنڤێسیت یێ ھاتییە کوشتن ژ ئەگەرێ دەربڕینێ ژ بیر و بوچونیێن ئازاد و بەرەڤانیکرن ژ دادیێ، بەرامبەر وان ئەوێن دێ ڤەکۆلینێ د دوسێیا وی دا کەن. دا کو جارەکا دی بینەری د چێکرنا بڕیارێدا پشکدارکەت.
دیمەنێ دویماھیێ
پزیشک یێ مژویلی کارێ خو یێ رۆژانەیە، چ نویاتی و گوھۆڕین نینن کو ئەڤرۆ وەکو دوھی یە و سوباھی ژ ئەڤرۆ باشتر نابیت. ڤەکۆلەر ئەوێ د دیمەنێ ئێکێدا ھاتیە دەرێخستن دھێتە ژور، پزیشک لێ ددزڤڕیت..
– ئەرێ ما من نەگوتییە تە نەزڤڕیە ڤێرێ جارەکا دی؟ و کەسەکێ ژ خو پلە بلندتر ل شوینا خو فڕیکە؟
ب پێرفورمانسەکا سەرکەفتی ڤەکۆلەر ب خو تڕانا ب بزیشکی د کەت، و ئەوی لاپەرێ د دەستی دا ل ناڤ چاڤان د دەت، ئەو لاپەرێ فەرمانا ڤەگوھاستنا وی یە بو خەستەکێ ل گوندەکێ ١٠٠کم ژ باژێری دویر. وەکو ئاماژەک بۆ سەرەدەری و دەست تێوەردانا دەستھلاتا جێبەجیکار د دەستھلاتا دادەوەری دا وسەپاندنا خواستێن خو لسەر ھەر دەزگەهەکێ ھەی ب ڤی رەنگی دکەت، دا کو ھوشداریەکێ بدەتە پزیشکی و ل سەر بڕیارێ نەچار کەن. پزیشک ب تونەکا دەنگێ شکەستی پسیارێ ژێ دکەت.
– ئەرێ تورۆمبێل دگەھیتە وی گوندی؟
ڤەکۆلەر ب بێ منەتی و ب بەترانڤە..
– ئەرێ، لێ ژبەر نەخۆشیا رێکێ ھەمی ترومبێل ناگەھنە وێرێ، ئەم یێ د خزمەت دا.
وەکو ئاماژەکە بۆ پزیشکی کو بکەڤیتە بن فەرمانێن ڤەکۆلەری، جونکی ئەون خودانێن بڕیارێ و تشتێ ئەوان بڤێت دێ ئەوبیت. ڤەکۆلەر دەردکەڤیت دگەل دەنگێ مۆزیکەکا خەمگین و ب پێنگاڤێن ھێدی ھێدی، پزیشک بەرەڤ تەرمێ وی زارۆکێ ل سەر تەختێ رەخێ چەپێ یێ شانۆیێ دچیت و دھلگریت، دا کو ل گەل باخڤیت..
– ناڤێ تە چییە؟ یان ژی دەیبابێن تە ھێشتا چ ناڤ نە داناینە سەر تە، تۆ بۆچی مری؟ تە دڤێت ببیە چ د پاشەروژێ دا؟.. تە چ گۆت؟ ھاا؟ پزیشک ! نە. نە. ب خو کارەکێ ب ساناھی و نورمال ب ھەلبژیرە، دا کو ب خۆشی و ئارامی بژی، چونکی ھەمی تشت پێش چاڤێن من تاری و رەش دیاردبن.
ل ڤێرێ، ھەر وەکی ئەوی ب رێکا جوانییا پێرفومانسێ و تونێن دەنگێ خو ڤییا ب چیتە د ناڤ ناخێ بینەران دا و ھەستێن وان و چارچویڤەکێ دروست ب کەت وەکو ھەولدانەک بو پەیداکرنا رامانەکا دی بۆ ژیانا بێ دویماھیک، و سەر ژ نوی دەست پێ ب کەتەڤە و دارشتنەکا دی یا جوان ژ مێژویا تراژیدی دورست بکەت. و دھێتە ڤەگوھاستن جارەکا دی، دا کو ژیانێ بشێوەکێ دی شروڤە بکەت. ئەرێ یا بەر عاقلە، کو زارۆک حەز ب کەت بلەز مەزن ببیت و ژ وێ ژیانا بێ گونەهـ دەرکەڤیت؟! و ژ بەر ھندێ پێلاڤێن مەزنا د کەتە بێخو و زاری وان ڤەدکەت، و ھەروەسا کەسێ مەزن حەزا زڤرینا زارۆکینیێ یا ل دەف ھەی ئەگەر بۆ ماوەکێ کێم ژی بیت، دا ژ ئەڤێ ژیانا درەو و فێلباز قورتال ببیت، ئەرێ راستە د ناخێ ھەر مرۆڤەکێ مەزندا زارۆکەکێ شیم ھەیە؟. دا کو بینەری بکەتە د رەوشەکا ھەڤدژیێدا، و پرسیارێن فەلسەفی ل دەڤ پەیدا بکەت، کەنگی مرۆڤ دشێت پارچەکا لەشی بکەتە دیاری بو کەسێ مری داکو بو ماوەکێ درێژتر بژیت؟! ئەرێ مرۆڤ ژ مریان خەریب د بیت؟ د سەردەمەکی دا کو گورستان یا پێدڤی یە خو ژ زندییا قورتال کەت. جارەکا دی پزیشک ددزڤڕیتە تەرمێ زارۆکی و داخازێ ژێ دکەت ببیتە دادوەر و دادیێ ل سەر وان کەسا ب سەپینیت ئەوێن بوینە ئەگەرێ مرنا وی، و دادیێ ل سەر تاوانبارا ب سەپینیت و ئەو بێگونەھیێن د زیندانان ڤە بھێنە ئازادکرن. و پاشان کەلەخێ زارۆکی د دانیتە سەر تەختی. لاپەرێ خو د ئینیت و دنڤیسیت بتنێ کەسەک یێ مای مە بەحسێ ئەگەرێ مرنا وی نە کری ئەوژی پزیشکە.
– پزیشکی ستران دگوتن دەمێ مری !.. نە. نە. پزیشک مر و ئەوی ستران دگوتن یا گرنگ ئەوی خو کوشت. پزیشک دەست ب گوتنا سترانەکا کوردی کر، وێ لحافا سور ژ ستویێ خو ڤە دکەت و دانیتە سەر تەختی دناڤ وان ئامیران ئەویێن وی بکاردئینان و د گەل گوتنا سترانەکێ دەردکەڤیت. ئەو زارڤەکەرێ بێ مێشک دھێتە ژوور بەرێ خو د دەتە وان لاپەرێن ددەستی دا، دگەل پزیشکی دئاخڤیت ل سەر ژیانا رۆژانە یا دوبارەکری و بێزار ئەوا ل وان دامودەزگەهێن وی سەرەدانا وان دکر، دا کو ناسناما خو بسەلمینت، لێ ھێشتا یێ ل دەسپێکا رێکی، ھەروەکی ھەستا نەتەوەیی ل دەف دەرھینەرێ نڤێسەر دگەھیتە لوتکێ وزال دبیت لسەر ھزرێن وی ودڤێت بێژیت بۆجی ھەمی خەلکێ جیھانێ ناسناما خحو ھیە بوجی بتنێ من نینە، باشە پا ئەگەری َ ڤێ چەندێ کی یە؟ و دێ چەوا ب خو ناسنامەکێ دورست کەم؟
ژ نوی کارێکتەرێ بێ مێشک دبینیت پزیشک نە ل وێرێ یە و لحافا سور یا ل سەر تەختی، ژ نیشکەکێڤە دەنگێ سترانەکێ دھێت و ب دەنگەکێ نازک، کچەک دھێتە ژور و ئەوێ ل حافا سور ھەلدگریت و ل دورحەفکا خو د ئالینیت و دەردکەڤیت، وەکو ئاماژەک بۆ ھەر دوزەکا راستەقینە دێ یا بەردەوام بیت، ئێکسەر ئەو کەسێ بێ مێشک مرنا پزیشکی د راگەھینیت، بلەز کارێ خو دکەت وجلکێت پزیشکی دکەتە بەر خو..
– ئەڤە من بو خو کارەک دیت بێ ھاریکاریا پزیشکی و ئەز دێ ژ وی باشتربم.
ڤەکۆلەر دھێتە ژوور کورسیکا ل دیمەنێ ئێکێ دەرێخستی یا ل سەر ملی و کامیرەیەک یا د دەستی دا وارا پێ وێنە دکەت و پرسیارا پزیشکێ نوی دکەت.
– ئەگەرێ مرنا پزیشکی چبوو؟
پزیشکێ نوی بەرسڤ د دەت (ئەو کەسێ بێ مێشک ئەوێ جلکێن نوژداری کرینە بەر خو).
– ئەگەر ئەوە ئەوا تە دڤێت.
ب دەنگێ سترانەکا فلکلوری یا کوردی دەپێ شانۆیێ تاری دبیت و نمایش ب دویماھیک دھێت.
