گۆڤارا مەتین گۆڤارا مەتین
پەیڤین نسرەت بادی
نەتەوەیا کورد ئێکە ژ نەتەوەیێن هەرە کەڤنارێن جیهانێیە، کو بێ دەولەتەکا سەربەخۆیە و بەردەوام کەڤتییە بەرامبەر هێرش و تالان و کریارێن نە مرۆڤانە ژ لایێ هەمی ئەوان هێز و دەولەتێن، کو هیڤییا ئەوان نەمانا نەتەوەیا کوردە و ب سەرداگرتنا ئەردێ کوردانە. د سەدێ بیستێ دا، پشتی کوردستان هاتییە پارچەکرن و کەڤتییە ژێر دەستهەلاتا چار دەولەتان؛ هەر دەولەتەکێ ل دویڤ بیروباوەر و مەرەمێن خۆ؛ ڕەفتارێن جودا بەرامبەر نەتەوەیا کورد ئەنجامدان، ژ ئەوان ژی ڕژێما بەعسا عیراقێ، ئێک ژ دڕندەترین و نەمرۆڤانەترین کریار ب ناڤێ ئەنفال، کو ب شێوەیەکێ ب ڕێک و پێک و پلان بۆ دارێژتی، د هەشت قووناغێن جودا دا ل سالا 1988 بەرامبەر خەلکێ کوردستانا باشۆر ئەنجامدان و ئارمانج ژی بنبڕکرن و نەهێلانا کوردان بوو.
دەستپێک:
ل ڤێرە دو خالێن گرنگ یێن هەین ئاماژە پێبدەین؛ ئەو ژی یا ئێکێ: ئەنفال و عەرەبکرن د ئێک دەم دا بەرامبەر کوردان و ب تایبەتی کوردێن دەوروبەرێن باژێرێ کەرکووکێ هاتینە ئەنجامدان. یا دویێ: ئەو هزر و ئایدۆلۆژییا ئەوی سەردەمی، هەتا نوکە ژی یا بەردەوامە و وانە ژێ نەهاتینە وەرگرتن.
ئەنفال چییە؟
پەیڤا (ئەنف) ژ لایێ زمانی ڤە، کو ژ پەیڤا (نفل)ە د زمانێ عەرەبی دا هاتییە و ب ڕامانا (غنیمة)، ئانکو دەستکەڤت دهێت، کو د دەمێ جەنگان دا ب دەست شەڕکەران دکەڤیت(١).
ژ لایێ زاراڤی ڤە، چەندین پێناسە ژ لایێ ڕێکخراو و کەسانێن جودا ڤە بۆ زاراڤێ ئەنفالێ هەنە، وەکی (ڕێکخراوا چاڤدێرییا مافێ مرۆڤی، پشکا ڕۆژهەلاتا ناڤین – MEW) دبێژیت: ‹›ئەنفال ناڤەکە، بۆ زنجیرەیەکا هێرشێن سەربازی یێن ژ ئێک جودا، کو ب گشتی هەشت هێرشن، ل شەش دەڤەرێن جوگرافی یێن جودا هاتنە کرن، فەرماندەیا گشتی یا ئەڤان ئۆپەراسیۆنان د دەستێ نڤیسینگەها باکۆر یا حزبا بەعس دا بوو و بنگەهێ ئەوێ ل کەرکووکێ بوو، پشتی ئادارا ١٩٨٧ عەلی حەسەن ئەلمەجیدی سەرۆکایەتییا ئەوێ کر»(٢).
هەروەسا نڤیسەرێن کورد، ب ئەڤی شێوەیی پێناسەیا ئەنفالێ دکەن: ‹›ئەنفال نە کارەساتەکا سروشتی بوو، نە بیڤەلەرزەک و بۆرکان و نەخۆشییا تاعۆن و لافاو و ئاگری بوو، بەلکو سیاسەتا قڕکرنا ب دەهان هزار مرۆڤێن کورد بوو، ل سەر ئاخا ئەوان ژ لایێ کۆمەلەکا دڕندێن ب ناڤێ مرۆڤایەتییێ ئەنجامداین»(٣).
ژ هەژی گۆتنێیە، ب کارئینانا پەیڤا ئەنفال ژ لایێ حکومەتا بەعس ڤە، گەلەک مەرەمێن جودا پێ هەبوون.
قووناغێن ئەنفالێ(٤):
ئەنفال د چەندین قووناغێن جودا دا دەرباز بوویە و ئەو کریار و ڕەفتارێن حکومەتا بەعس بەرامبەر کوردان بکارئیناین گەلەک ب ئاشکرایی دیار دکەن، کو مەرەما حکومەتا بەعس ژناڤبرن و قڕکرنا نەتەوەیا کوردە، لەوڕا د پترییا قووناغێن ئەنفالێ دا؛ چەکێ کیمیایی یێ قەدەغەکری هاتییە بکارئینان. هەروەکی د پەرتووکا (قرار محکمة الأنفال: وثیقة قانونیة – سیاسیة – تاریخیة)* دا هاتی، کو «ئەو خالێن د بڕیارا (١٦٠) یا ٢٩ ئادارا ١٩٨٧ هاتین و ئەو ڕێنمایێن پێ دەرچووین، کو ب کیتابا ژمارە (٤٠٠٨) بەرنیاسە. د ٢٠ حزیرانا سالا ١٩٨٧دا، پەرتووکێن گرێدایی ب کارئینانا گازا کیمیایی ل کوردستانێ دیار دکەن، کو پلانەک یان سیاسەتەکا ل سەر ئاستێ نیشتمانی یا هەی بۆ قڕکرنا کوردان، وەک کۆمەلەکا نەتەوەیی ژ لایێ ئەنجوومەنێ فەرماندەیێ شۆڕەشێ و فەرماندەیێ حزبا بەعسڤە دارێژتییە»(٥).
هەر وەکی گەلەکا دیارە، کو پلانا ئەنجامدانا ئەنفالێ پێشوەخت هاتبوو دارێژتن و ب تایبەت پشتی بڕیارا (١٦٠) یا سالا ١٩٨٧ هەمی ئامادەکاریێن خۆ بۆ هێرشان ل سەر کوردستانێ کرن، کو ب هەشت قووناغان ئەو هێرشە هاتنە ئەنجامدان و ئەو هەر هەشت قووناغە؛ ئەڤەنە:
قووناغا ئێکێ:
ل ڕێککەفتی ٢٣ شۆباتا ١٩٨٨ ب هێرشکرن بۆ سەر دۆلا جافایەتی و ب تایبەت بۆ دەڤەرین سەرگەڵو و بەرگەڵو ب هێزێن پەژایی دەستپێکر، هەتا ١٩ ئادارا ١٩٨٨ یا بەردەوام بوو.
قووناغا دویێ:
ل ٢٢ ئادارا ١٩٨٨ ب هێرشا ئەسمانی و ب بۆمبەرانکرنا کیمیایى ل سەر چیایێن دەڤەرا قەرەداغ دەستپێکر، هێزێن پەژایی ژی هاتنە بکارئینان و هەتا ١ نیسانا ١٩٨٨ یا بەردەوام بوو.
قووناغا سێیێ:
ل ٧ نیسانا ١٩٨٨ ب هێرش بۆ سەر دەڤەرا گەرمیان دەستپێکر، ئەنفالا قووناغا سییێ ب خوێناویترین ئەنفال دهێتە نیاسین و هەتا ٢٠ نیسانا ١٩٨٨ یا بەردەوام بوو.
قووناغا چارێ:
ل ٣ گۆلانا ١٩٨٨ هێرش بۆ سەر دۆلا زێی بچویک ب فرۆکەیێن ئاسمانی و چەکێ کیمیایی دەستپێکر، هەروەسا هێزێن پەژایی ژی هاتنە بکارئینان و هەتا ٩ گۆلانا ١٩٨٨ یا بەردەوام بوو.
قووناغا پێنجێ و شەشێ و حەفتێ:
ل ١٥ گۆلانا ١٩٨٨ هێرشێن ڕژێمێ بۆ سەر دۆلێن سەخت و دژوارێن دەڤەرا شەقلاوە و رەواندۆز دەستپێکر و هەتا ٢٥ تەباخا ١٩٨٨ یا بەردەوام بوو.
قووناغا هەشتێ:
ل ٢٥ تەباخا ١٩٨٨ ئەنفالا بەهدینان دەستپێکر و هەتا ٦ ئەیلوولا ١٩٨٨ یا بەردەوام بوو.
قووناغێن ئەنفالێ ب دانا بڕیارا لێبۆرینا گشتی ل ٦ ئەیلوولا ١٩٨٨ ب دویماهیک هاتن، ڕاستە ئەنفال ب دویماهیک هات، بەلێ کارتێکرنا ئەنفالێ هەتا نوکە ژی ل سەر خەلکێ کوردستانێ یا بەردەوامە.
ئەنفالا بەهدینان:
ئەنفالا بەهدینان، قووناغا هەشتێ یا ئۆپەراسیۆنێن ئەنفالان بوو، کو ب (خاتمة الانفال) دهێتە بناڤکرن. ل ڕێککەفتی ٢٥ تەباخا ١٩٨٨ دەستپێکا ئەنفالا بەهدینان بەری هێزێن لەشکەری لڤینێ بکەن، حکومەتا بەعس چەکێ کیمیایی ل دەڤەرێ بکارئینا، ئەڤ چەندە ژی بۆ ئەگەر، كو چ ڕێک نەبوون بەرگرییا خۆ و مللەتێ خۆ ژ چەکێ کیمیایی بکەن. ئامیرێن پێدڤى یێن خۆ پێ پاراستنێ ل بهر دهست نهبوون.
هەتا شەڤا ٢٨ تەباخا هەمان سال، لەشکەرێ حکومەتا بەعس ب هێز و ئامادەکارییەکا زۆر هێرشا پەژایی کرە سەر دەڤەرێ. بەلێ ژ ئەگەرێ چەکێ کیمیایی ترسەکا گەلەک ل دەڤ خەلکی پەیدا ببوو و حکومەتا بەعس ژی ڕێكێن سنوری د گەل دەولەتێن دەوروبەر گرتبوون، ژ بەر ئەڤێ چەندێ گەلەک ژ خەلکی خۆ رادەستی حکومەتێ کر و هندەک ژی ڕژێمێ بخۆ گرتن و کۆمکوژی ل گوندێن (کۆرێمێ و گیزێ) هاتنە ئەنجامدان، د دویڤ دا حکومەتێ خەلک بۆ سەنتەرێن دەمکی، کو چەندین جهـ و کەلایێن دەڤەرێ بوون بۆ ماوەیێ چەند ڕۆژێن کێم ڤەگوهاستنێ و مانە ل ئەوان جهان و گەلەک خەلک بۆ قوربانی و ب تایبەتی زارۆک، د دویڤ دا هەر پشکەک ژ ئەوی خەلکی بۆ جهەکی ڤەگوهاستن، ژ ئەوان جهان ژی (سەلامیە، نوگرە سەلمان).
هەتا ٦ ئەیلوولا ١٩٨٨ حکومەتێ بڕیارا لێبۆرینا گشتی دا. ئێدی ئەو پلانا دارێژتی بۆ ئەنفالێ بجێبەجێکرنڤە ب دویماهیک هات. بەلێ ئەو ژن و زارۆکێن ل سەربازگەها سەلامیە ژ زەلامێن ئەوان هاتینە جوداکرن و ماینە ل سەربازگەهێ، پشتی ئەڤێ بڕیارێ بۆ کۆمەلگەهێن جێژنیکان (بەحرکێ) و گردە چال هاتنە ڤەگوهاستن، بێی هەر هاریکارییەکا مرۆڤایەتی یان جهێ ژیانێ بۆ دابین بکەن، لەوڕا مرنەکا گەلەک کەڤتە ناڤ خەلکی و ب تایبەت زارۆکان. ئەگەر هاریکارییا خەلکێ هەولێرا خودان شەرەف و ئاستێ کوردایەتییا بلند ل دەڤ نەبا، ئەڤێن مایین ژی نەدمانە زیندی، سەرەرای ڕێگریێن حکومەتێ، کو هاریکارییان نەگەهیننە خەلکی، لێ ئەو هەر د بەردەوام بوون. هەتا پشتی داگیرکرنا دەولەتا کوێتێ ژ لایێ عیراقێ ڤە، حکومەتا بەعس ڕێک دا خەلک بزڤریتە دەڤەرێن خۆ، پشکەک ژ ئەوی خەلکی زڤڕین و پشکەک مانە ل جهێن خۆ(٦).
ئەنفالا بەهدینان د ڕاپۆرتەکا ڤەشارتییا سەربازییا حکومەتا بەعس دا:
ئەڤ ڕاپۆرتە بەلگەنامەیەکا گرنگە و شرۆڤەکرنا ئۆپەراسیۆنا قووناغا هەشتێ و دوماهییێ یە ژ ئەنفالێ، کو ئەو ژی ئەنفالا بەهدینانە، ژ لایێ لیوا روکن (یونس محمد الذرب) ڤە قائێدێ فەیلەقا (٥) پێنج بۆ سەرۆکاتییا ئەرکانێن لەشکەری ب ناڤێ شرۆڤەکرنا شەری هاتییە نڤیسین(٧).
د پێشەکییا ڕاپۆرتێ دا ئاماژە ب ئەوێ چەندێ دکەت، کو «ڕێنما ژ لایێ فەرماندەیێ گشتی یێ هێزێن چەکداری ڤە دەرچوویه، د ئێکەم کۆنفرانس دا، کو سەرۆکێ ئەرکانێ سۆپایی ل کەرکووکێ ل ٧ تەباخا ١٩٨٨ ئەنجام دا. ئەڤ کۆنفرانسە ئاماژە ب ئەنجامدانا ئۆپەراسیۆنێن بەرفرەهـ ل هەردو کەرتێن فەیلەقا ئێک و پێنج، ل گەل ئەڤان تێبینیێن ل خوارێ:
١- دڤێت ئارمانج ژناڤبرن و نەهێلانا تێکدەران* (پێشمەرگە) بیت.
٢- بجهئینانا گرتن و دورپێچکرنێ.
٣- بکارئینانا دڕندایەتییەکا بێ وێنە ل گەل تێکدەران (پێشمەرگەی) و هەڤکارێن ئەوان»(٨).
ئەگەر ئەم سەحکەینێ، ئەڤ گۆتنە و کۆمبوونێن ڕژێمێ بۆ مە ئەوێ چەندێ دیار دکەن، ئەنفال ئۆپەراسیۆنەک بوو، یا پلان بۆ دارێژتی بوو، نەک تاوانەکا د دەمێ شەڕی دا بوو، چونکی د دەمێ ئەنجامدانا ئەنفالا بەهدینان دا شەڕێ ئیران و عیراقێ ل ٨ تەباخا ١٩٨٨ ب دویماهیک هاتبوو، لەوڕا ئەڤ چەندە بۆ ڕێکخۆشکەر، ڕژێما بەعسا عیراقێ هێزا خۆ ژ سنوری عیراق – ئیرانێ بۆ دەڤەرا بەهدینان ڤەگوهێزیت، هەروەکی د کۆمبوونا خۆ ژی دا ئاماژە ب ئەوێ چەندێ دا، کو فەیلەقا پێنج (ل دەڤەرا بەهدینان بوو) ئۆپەراسیۆنەکا بەرفرەهـ ئەنجام بدەت. لێ نەشیان هەمی پلانێن خۆ وەک وان دڤیا بجهـ بینن، وەکی تێبینییا دویێ، نەشیان هەمی خەلکی دورپێچ بکەن و بگرن. ژ بەر دەڤەر نێزیکی سنورێ تورکیا بوو، لەوڕا گەلەک ژ خەلکی خۆ ڕزگارکرن و ل ئوردوگایێن (مۆش- ئامەد- مێردین) خۆجهبوون.
ئێک ژ خالێن دی د ئەڤێ ڕاپۆرتێ دا لیوا رکن ( یونس محمد الذرب) ل سەر ڕاوەستیایی ئەو ژی:
ئەو وانەیێن ژ شەڕی هاتینە وەرگرتن (الدروس المستنبطة). کو ژ چەندین خالێن جودا پێکدهێتن، بەلێ ئەم دێ ل سەر سێ خالان ڕاوەستین و ئاماژە پێکەین، ئەو ژی:
1 – پێزانینێن هویر ل سەر دوژمنی (هەواڵگیری):
«ئەو هەولێن هاتینە بکارئینان بۆ کۆمکرنا پێزانینان ژ بارەگایێن تێکدەران (پێشمەرگە) و ڕێکێن گەهشتنا ب ئەوان بارەگایان، زێدەباری هژمارا تێکدەران ژی ل ئەوێ دەڤەرێ، دا بشێین ب شێوەیەکێ هویربینانە مفایی ژ ئەوان پێزانینان وەرگرین، بۆ دانانا پلانەکا ب ڕێک و پێک بۆ ژناڤبرنا ئەوان و سەرکەڤتنێ ل سەر. ئەڤ پێزانینە ژ لایێ هەمی کەرتێن سەربازی و جهێن ئەمنی، سەربازی و سڤیل ڤە دهاتنە کۆمکرن، بۆ هاریکاریکرنا بجهئینانا پلانێ ب شێوەیەکێ گشتی و ئەڤە بۆ ئەگەرێ سەرکەڤتنێ»(٩).
وەک یا دیار د ئەڤێ خالێ دا، کو پێزانین ب شێوەیەکێ باش ل دۆر پێشمەرگەی ژ لایەنێن جودا جودا ڤە گەهشتینە دەستێ رژێمێ. هەتا بارەگایێن ئەو پارتێن ل دەڤەرا بەهدینان د جێگیر، ب شێوەیەکێ هویربینانە جهێن ئەوان گەهشتینە دەستێ حکومەتا بەعس، بێگومان هەمی لایەنێن هەواڵگیری و ب تایبەت جاشان و سیخۆران پێزانینێن ئاشکەرا ل دۆر دەڤەرێ و پێشمەرگەی گەهاندینە ڕژێمێ.
2 – ئاریشەیێن ڕێکان ل کەرتێن سەربازی:
«کەرتێن سەربازی ل دەڤەرەکا بەرفرەهـ و ئەردەکێ گەلەک نەخۆش د بەلاڤەبوون، دەڤەر ژ ڕێکێن خۆش بۆ ڤەگوهاستنا ترۆمبێلا و ڕێکا پێیان و ڤەگوهاستنا بارێن کەلوپەلان یا ڤالا بوو، ئەڤە دبیتە ئاریشەکا مەزن بۆ گەهاندنا پێدڤیاتییێن سۆپای ژ کەرەستێن وەکی چەک و تەقەمەنی و خوارن و هەتا کێمترین تشت. بەلێ گەهاندنا پێدڤیاتییێن ئەوان کەڤتە سەر هەلیکیۆپتەرێن (سەمتی)، لێ دڤێت هزر بهێتە کرن، کو بۆ ڤەکرنا ڕێکان و ڤێکگەهشتنا پەژایی ب ڕێکێن ساناهی ل گەل کەرتێن سەربازی ل جهێن ئەوان دا کاربهێتە کرن»(١٠).
ئەڤ ئاماژەدانا سەرکردێ فەیلەقا پێنج ب ڕێکێن ڤەگوهاستنێ ل دەڤەرا بەهدینان، ئەوێ چەندێ دیار دکەتن، کو ئاستەنگ د ڕێکان دا هەبووینە و داخواز کرییە رێک ل دەڤەرێ بهێنە دروستکرن دا بۆ جارێن داهاتی ب ساناهیتر دەڤەرێ کونترۆل بکەن.
3 – فەوجێن بەرگرییا نیشتیمانی (أفواج خفيفة – فەوجێن جاشان):
«فەوجێن بەرگرییا نیشتیمانی بۆ ئەو کارێ هاتییە دانان گەلەک د جۆش و خرۆش و سەرگەرمکر بوون. ل بەری کەرتێن سەربازی بۆ ژناڤبرنا تێکدەران (پێشمەرگەی) دچوون، ژ بەر شارەزاییا ئەوان ل ڕێکێن چیایی و هەبوونا شیانان بۆ سەرکەڤتنا ل سەر چیایان و لێگەریان ل دەڤەرێ و ل گەل سۆپایی د دەمەکێ گونجایی دا ب ئەوان ئارمانجێن بۆ هاتینە دانان گەهشتن. پشکداری د ژناڤبرنا گوندان و کۆمکرنا دەستکەڤتنان دا کرن. ڕاوێژکارێن (مستشار) فەوجان ل سەر چەکدارێن خۆ کونترۆل هەبوو، د گەل دا د پەیوەندیێن بەردەوام دا بوون. هەڤکاری د ناڤبەرا ئەڤان فەوجێن بەرگرییا نیشتیمانی و ڕێکخستنێن سەربازی، یێن کو ئەو ل ژێر دەستێ ئەوان کار دکەن، پەیوەندی د بەردەوامبن»(١١).
هەبوونا جاشان د ناڤ گەلێ کورد دا دشێین بێژین پترییا جاران ئێک ژ ئەگەرێن سەرنەکەڤتنا شۆڕەش، بزاڤ و هەولێن جودا جودا یێن کوردان بۆ سەربەخۆیی بووینە. هەروەسا ژ لایێ دۆژمنی ڤە هەردەم جاش وەک چەکەکی بووینە بەرامبەر کوردان ب خۆ هاتینە بکارئینان، هەر وەکی د ئەڤێ بەلگەنامەیا حکومەتا بەعس دا دیار دبیتن، کو جاشان ڕۆلەکێ گەلەک نەرێنی و دیار هەبوویە د بجهئینانا ئەڤێ ئۆپەراسیۆنێ دا و ل گەل سەرکردێن ڕژێمێ بۆ ژناڤبرنا هەر برایێن خۆ یێن کورد د پەیوەندیێن بەردەوام دا بوون، ب ڕاستی ژی جهێ شەرمزاریەکا مەزنە و ڕویڕەشییە مرۆڤ هەر هزر ژی د ئەوێ چەندێ دا بکەتن، کو یێ ژ خوینا خۆ و برایێ خۆ یێ نەتەوەیی تاوانەکا نە مرۆڤانە یا وەکی ئەنفالێ بەرامبەر ئەنجام بدەتن! کو ب تنێ بۆ پیچەکا نانی یان تشتەکێ ماددی یان پلە و پۆستەکا دەمکی بیتن.
ژێدەر:
١- سالح، عەدالەت عومەر (٢٠٠٢). ئەنفال و ئافرەتی کورد. هەولێر: دەزگای چاپ و بڵاوکردنەوەی ئاراس. ل٧.
2 – Human Rights Watch (1993). Genocide in Iraq: The Anfal Campaign Against the Kurds. Available at:
https://www.refworld.org/reference/countryrep/hrw/1993/en/91717 Accessd (2/6/2024). p.27.
٣. مستەفا، زۆزان ناسر (٢٠١٢). ئۆپەراسیۆنین ئەنفالێ ل کوردستانێ. ناما ماستەرێ، نەبەلاڤکری. زانکۆیا دهۆک: کۆلیژا ئاداب. ل ٤٤.
٤- بۆ پتر پێزانینان ل دۆر قووناغێن ئەنفالێ بنێرنە ئەڤان ژێدەران:
1- Human Rights Watch (1993). Genocide in Iraq: The Anfal Campaign Against the Kurds.
٢- سالح، عەدالەت عومەر (٢٠٠٢). ئەنفال و ئافرەتی کورد. هەولێر: دەزگای چاپ و بڵاوکردنەوەی ئاراس.
٣- ادم، بهزاد علی (اشراف و اعداد)(٢٠١٤). قرار محکمة الأنفال: وثیقة قانونیة – سیاسیة – تاریخیة. دهوک: من منشورات محافظة دهوک.
* پەرتووکا (قرار محکمة الأنفال: وثیقة قانونیة – سیاسیة – تاریخیة) ژ تۆمارا دادگەها ئەنفالێ پێکدهێتن و دادگەها ئەنفالێ ب سەرۆکایەتییا دادوەر (محمد العریبی) هاتییە بڕێڤەبرن. کو یاساناس (بههزاد عهلی ئادەم)ی ب مفا وەرگرتنەکا ڕاستەخۆ ژ دادوەر (محمد العریبی) ئەڤ پەرتووکە دانایە.
٥- ادم، بهزاد علی (اشراف و اعداد)(٢٠١٤). قرار محکمة الأنفال: وثیقة قانونیة – سیاسیة – تاریخیة. دهوک: من منشورات محافظة دهوک. ص ٣٢٤.
٦- مفا وەرگرتن ژ بەرێز نصرهت بادی کو بەرکەڤتیێ ئەنفالێیە و نموونەیەکا زیندییە.
٧- بنێرە وێنەیێ ژمارە (١) ، (٢).
* پەیڤا (تێکدەر) ژ لایێ حکومەتا بەعسڤە بۆ پێشمەرگەی هاتییە بکارئینان لەوڕا دپترییا نڤیسارێن حکومەتا بەعس دا و ب تایبەت د ئەڤێ ڕاپۆرتا سەربازی یا (لیوا رکن یونس محمد الذرب)دا ل هەمی جهان پەیڤا تێکدەر ل جهێ پەیڤا پێشمەرگەی بکارئینایە.
٨- بنێرە وێنەیێ (٣).
٩- بنێرە وێنەیێ (٤).
١٠- بنێرە وێنەیێ (٥).
١١- بنیرە وێنەیێ (٦).
