گۆڤارا مەتین گۆڤارا مەتین
سەرنڤیسەر
دەما ئەم ١٢٧مین ساڵڤەگەڕا دەرچوونا رۆژنامەیا داییک «کوردستان»، کو ل ٢٢ێ نیسانا ساڵا ١٩٩٨ێ ل دوورە وەڵات ل قاهیرەیا پایتەختێ مسرێ دەرکەفتی ساخ دکەینەڤە، گەرەکە ئەم ب چاڤەکێ سەردەمیانە ل رەوشا رۆژنامەڤانییا کوردی د دەمێ نها دا بنێڕین. سەد و بیست هەفت ساڵ، نە دەمەکێ کێمە، بەلکو ساڵێن درێژن و د ڤان ساڵێن بووری دا، پێڤاژوویا رۆژنامەڤانییا کوردی د گەلەک ئەڤرازی و نشیڤییان دا دەرباز بوویە. ویستگەهـ هەبووینە، رۆژنامەڤانییا کوردی ل هەر چار پارچەیێن کوردستانێ ب ئێکجاری قەدەغەبوویە و ویستگەهـ ژی هەبووینە، ئازادییا رۆژنامەڤانیێ و دەربڕینێ ل پارچەیەکێ یان پتر یا قەدەغە بوویە یان ب شێوەیەکی رێژەیی بوویە. مخابن، ئەم د سەدەیێ بیست و ئٍکێ داینە و هەتا نها ژی، ل هندەک پارچەیان رۆژنامەڤانی یا ئازاد نینە و پرۆسەیا رۆژنامەڤانيیێ ل وان دەڤەران دئیخیتە هەمبەر گەلەک ئاڵنگارییان.
د رۆژەڤا ئەڤرۆ دا، دڤێت رۆژنامەڤانی خۆ ل گەل دانێن سەردەمی و پێشکەفتنێ بگونجینیت، بەرۆڤاژی دێ کاروانێ وێ ڤەمایی مینیت و نەشێت خۆ ژ چارچووڤەیێ کلاسیک رزگار بکەت و نەشێت ل گەل وی ئاستێ ئەڤرۆ رۆژنامەڤانی ل جیهانێ گەهشتیيێ یا هەڤتەریب بیت.
ئەم ل ڤێرێ، ب تنێ دێ ئاماژێ ب گۆڤارا مەتین دەین، کو ل گۆری پێزانین و داتایێن ل بەر دەستێ مە، رەنگە دێرینترین گۆڤار بیت، ل دەڤەرا بەهدینان ب گشتی، هەتا نها دهێتە وەشاندن؛ چونکی مە ژ کەسێن هەڤبەندیدار پرسییە، مەتین ل سەردەمێ شۆڕشا ئیلونێ دەست ب وەشانێ کرییە، کو ل بەراهیيێ ب زمانی عەرەبی و ب شێوەیێ بەڵاڤۆکەکێ د ناڤ پێشمەرگەیێ کوردستانێ دا دهاتە دەرئیخستن و بەڵاڤکرن. پاشڕا و ل سەردەمێ شۆڕشا گولانێ، ل سالا ١٩٨١ێ ل بارەگەهی لقی ١ێ تێکۆشەر ل (کۆماتە)ی، جارەکا دی و ب بزاڤ و هیمەتا هەژمارەکا پێشمەرگەیێن خۆدان قەلەم و خەمخۆر، مەتین وەکو بەڵاڤۆکەک کو ب ئامیرێ رۆنیۆ دهاتە چاپکرن، د کەفتە د خزمەتا خواندەڤانێن خۆ دا.
بەلێ وەرچەرخانا مەزن و بەردەوام، ئانکو دێ شێین بێژین سەردەمێ زێڕین بۆ گۆڤارا مەتین، پشتی سەرهلدانا گەلێ مە ل بوهارا ساڵا ١٩٩١ێ بوو. ژ بەر کو دەرکەفتنەڤا مەتین ل پشتی سەرهلدانێ، ب رەنگەکی رێکخستیتر و ب رێکا ستافەکێ خۆدان شیان و ناڤێن بريسقه‌دار بوو، ئەو قووناغ ب خولا سێ یێ یا دەرکەفتنا مەتین هاتییە هەژمارتن.
هەر ژ دەستپێکا وەشانا مەتین، ل سەر دەمی شۆڕشا ئیلونێ و پشتی هنگی ل شۆڕشا گولانێ (خولێن ئێک و دو)، ڤێ گۆڤارێ شییا یە جهێ خۆ د بیاڤێ رۆژنامەڤانییا کوردی دا بکەت و ل خولێن سێ و چار یێن دەرکەفتنا وێ و هەتا ساڵا ٢٠١٥ێ، مەتینێ شەنگست و بنیاتەکێ ب هێز و بەرفەرەهـ بۆ خۆ ئاڤاکر و ب شێوەیەکێ رێکوپێک و ب دیزاینەکا تا رادەیەکی باش دەرکەفت. تەڤایا ئەو سەیدایێن ل دەستپێکێ مەتین دەردئیخست و ستافێن خولێن بۆری یێن مەتین، ل جهێ شانازییا مە نە و ئەم ب وان د سەربلندین. ئەوێن ماڵئاڤاهییا داويیێ کرین، بەهەشتا بەرین جهی وان بیت و ئەوێن د ژیانی دا ماین ژی داخوازا تەندروستی و ژییەکێ درێژ بۆ دخوازین.
خولا پێنجێ یا گۆڤارا مەتین ل هەیڤا ئادارا ساڵا ٢٠٢٣ێ دەستێیکر، پشتی کو هەژمارەکا هەڤالێن خەمخۆرێن بیاڤێ رەوشەنبیریێ، پێشنیازا دەرئیخستنەڤا گۆڤارا مەتین گەهاندینە لێڤەگەڕی نەتەوەیا کورد سەرۆک مەسعوود بارزانی، پاشڕا ب رێنماییا بارەگایێ بارزانی، (مەتین)ێ جارەکا دی رۆناهی دیتەڤە و ل ناڤەندا خانی یا رەوشەنبیری و راگەهاندنێ ل دهۆکێ درێژی ب کاروانی خۆ دا. نە ئەڤە ب تنێ، بەلکو ئەم دبینین کو ئەو چەند پەیڤێن سەرۆک بارزانی ل بەرگێ (٤) یێ پەرتووکا خۆ (بارزانی و بزوتنەوەی ڕزگاریخوازی کورد) دا، د بەرپەڕێ (١٣٨) دەرحەقی گۆڤارا مەتین گۆتین دما کەرەم کری: « مەتین ئێستاش بەردەوامە و بە گۆڤارێکی سەرکەوتوو دەژمێردرێت»، دڤێت ب زێڕی بهێنە نڤیسین؛ چونکی پەسەند و باوەڕنامەیەکا مەزنە بۆ مەتین، کو شییایە ب ڤی رەنگی هەتا نها یا خۆڕاگر و بەردەوام بیت.
ل گەل سەرهلدانا شۆڕشا تەکنەلۆژیایێ و ئەنتەرنێتێ، رۆژنامەڤانییا دیجیتال رۆلەکێ گەلەک ب هێز و کاریگەر دگێڕیت و یا بوویە چاڤکانییا سەرەکی یا دەنگوباسان چونکی ماڵپەڕ و پێگەهـێن سوشیال میدیایێ، جهەکێ بەرچاڤ د دروستکرنا دیمەنێ رۆژەڤێ دبینن وب رێکا رۆژنامەڤانییا دیجیتال، بکارهێنەرێن رۆژنامەڤانییا دیجیتال و سوشیال میدیایێ دکارن بگەهنە بنگەهەکێ بەرفرەهێ وەرگران.
لەوڕا ژی گۆڤارا مەتین گرنگییەکا زێدە ب ئالیيێ دیجیتالکرنا مەتینێ ددەت و هەمی هەژمارێن د خۆلا پێنجێ دا، کو ب هەژمارا ٢٣٣ دەستپێدکەت و ئەڤ هەژمارا ل بەر دەستێن وە یێن هێژا هەژمارا ٢٥٨ێ، ب شێوازی کاخەزی هاتینە دەرئیخستن، هەر هەمی هەژمار ب شێوازی دیجیتال ژی د وێبسایتێ گۆڤارا مەتین https://govarametin.com/ و ل فیسبووکا گۆڤارا مەتین Govarametîn هەنە. هەر وەسا، مە وەکو ستافی گۆڤارێ و ل گۆر رێنمایێن بەرپرسێ بەشێ رۆشنبیری و راگەهاندنێ، پرۆژەیەک ل بەرە بۆ دیجیتالکرنا هەمی ئەرشیفێ گۆڤارا مەتین هەر ژ هەژمار ١ هەتا هەژمار ٢٣١ێ، داکو خواندەڤان و ڤەکۆلەر ل هەر قورنەت و جهەکێ ڤێ جیهانێ مفای ژی وەربگرن.
د ڤێ قووناغێ دا و ل گۆری رێنماییێن بەرێز د. سالار عوسمان، بەرپرسێ بەشێ رۆشنبیری و راگەهاندنا پارتی دیموکراتی کوردستان، دێ داکۆکيیێ ل سەر هندێ کەین، کو ئاراستەیا گۆڤارێ بەر ب رەوشەنبیرییەکا کوردستانییا گشتی ڤە ببەین و بێی رەچاڤکرنا کا کێ بابەت نڤیسییە بەلکو چ نڤیسییە کەینەڤە. لەوڕا بەرپەڕین گۆڤارا مەتین بۆ هەمی نڤیسەر و ئەکادیمیستان یێ ڤەکرییە و دی خۆشحال ژی بین کو پێنڤس و شییانێن نوی و گەنج ژی ب بابەتێن خۆ بیاڤەکی د ناڤ مەتین دا ببین.
