وەدیع جوايدە: Wadie Jwaideh ل ١٩٢٦ ژ دایک بوویە و ل سالا ١٩٩٦ وەغەر کریە. دیرۆکناس، مامۆستایێ زانکۆیێ و ڤەکۆلەرەکێ دیارێ عیراقی، ئەمریكی بوو. ئەو وەک ئێک ژ ئێکەم ڤەکۆلەرێن ئەکادیمی دهێتە نیاسین کو ب شێوەیەکێ زانستی، گشتگیر و سیستماتیک ل سەر بزاڤا نەتەوەیی یا کوردان ڤەکۆلین کریە. ئەو ل بەغدا ژ دایک ببوو و خواندنا خۆ یا بلند د بوارێن زانستێن سیاسی و دیرۆکی دا ب دووماهی ئینا، ل وێرێ ب هویری ئاشنای گوهۆڕینێن سیاسی و جڤاکی یێن رۆژهەلاتا ناڤین بوو. پشتی ب دووماهی ئینانا خواندنێ، جوایدە کۆچ کرە ئەمریکا و ل زانکۆیێن ب بەرنیاس یێن وی وەلاتی دەست ب وانەگۆتن و ڤەکۆلینان کر.

گرنگترین خال د کارێ وی دا پرسا کوردی بوو؛ وی بزاڤ دکر ئەڤێ مژارێ نە ب تنێ وەک کێمە نەتەوەیەکێ، بەلکو وەک بزاڤەکا نەتەوەیی کو رەگ و ریشالێن دیرۆکی و سیاسی یێن کویر هەیین بدەتە نیاسین. ب پشتبەستن ب ژێدەرێن دیرۆکی، بەلگەنامەیێن فەرمی، یێن دبلۆماسی و ڤەکۆلینێن مەیدانی، وی گوهۆڕینێن سیاسی و جڤاکی یێن کوردان ل عیراقێ و دەڤەرێن دی یێن کوردستانێ ڤەکۆلین ل سەر دکر و رۆلێ وان د دارشتنا سیاسەتا دەڤەرێ دا روون کر.

پەرتوکا وی یا هەری گرنگ و بەرنیاس بناڤێ: بزاڤا نەتەوەیی یا کورد: رەگ و گەشەکرنا وێ The Kurdish National Movement: Its Origins and Development ئەڤ پەرتووکە ئێکە ژ ئێکەم و گشتگیرترین ڤەکۆلینێن ئەکادیمی دەربارەی بزاڤا نەتەوەیی یا کوردان. جوایدە د ڤی بەرهەمی دا، رەگ، گەشەکرن و گوهۆڕینێن بزاڤا کوردان ل عیراقێ و دەڤەرێن دی یێن کوردستانێ ژ دووماهیا سەردەمێ عوسمانی هەتا نیڤا دویێ یا سەدێ بیستێ ڤەکۆلینێ دکەت.

پەرتووک پێکدهێت ژ شرۆڤەکرنەکا دیرۆکی و سیاسی ل سەر بنیاتێ ژێدەرێن سەرەکی، بەلگەنامەیێن دبلۆماسی و ڤەکۆلینێن مەیدانی. هەروەسا رۆلێ کوردان د دارشتنا سیاسەتێن دەڤەرێ و پەیوەندیێن دەسهەلاتێ ل رۆژهەلاتا ناڤین روون دکەت. جوایدە هەول دایە پرسا  کوردان ژ چوارچۆڤێ کێمە نەتەوەیەکێ سادە دەربێخیت و وەک بزاڤەکا نەتەوەیی ب ئارمانج و پێکهاتەیەکا سیاسی یا دیار بدەتە نیاسین. گرنگییا پەرتوکێ: ژێدەرەکێ کلاسیک یێ ئەکادیمیە د خواندنا کوردی (کوردۆلۆجی) دا، ئێکەم بەرهەمێ ئەکادیمی یێ گشتگیر دەربارەی بزاڤا نەتەوەیی یا کوردان.