نڤیسەر، جڤاكناس، ڤەكۆلەر و سیاسەتمەدارێ ب رەگەز تورك (ئیسماعیل بێشكچی) ژ دایكبوویێ سالا 1939ێ یە ل قەزا ئیسكەلیپ یا سەر ب پارێزگەھا چۆرۆمێ ڤە. وی تێزا خۆ یا دكتۆرایێ ل سەر كوردان و پێكھاتا وان یا جڤاكی ب ناڤێ،»كێشە و گوھۆرینێن پێكھاتەیی ل رۆژھەلاتێ، عەشیرەتا عەلیكان یا كوردان وەكو نموونە»» ل سالا 1969ێ تەمام كرییە.

ئەو ل سەر ھەلویستێن خۆ یێن تایبەت دەربارەی كوردان و ل سەر بەرەڤانیكرن ژ وان ل بەرامبەر سیاسەتا توركیا یا رەت و ئینكاركرنا كوردان، ب گشتی 17 سال و 3 مەھێن ژیانا خۆ د زیندانێن توركیا دا د بوورینیت. بێشكچی، ل سەر ڤان ھەلویستێن خۆ یێن دژوار بوویە جھێ دلگرانییا دەولەتا تورك و د ھەمان دەم دا بوویە خۆشتڤی و جھێ رێزێ ل دەڤ كوردان.  وی پتری 50 پەرتووكان ل سەر ئێش و ئازارێن كوردان نڤیساینە و ژ بلی ب ھزاران گۆتار و ڤەكۆلینێن دی یێن جودا جودا.

ناڤبری پشتی چەندین سالێن دەستەسەركرن و زیندانێ و پشتی قەدەغەیا چوونا وی بۆ ژ دەرڤەی وەڵاتی ھاتییە راكرن ژ لایێ دەولەتێ ڤە، ئەو ئێكەم سەرەدانا خۆ بۆ دەرڤەی وەڵاتی د ئینیتە كوردستانا ئازاد ل سالا 2013ێ ژ لایێ سەرۆك بارزانی ڤە دھێتە پێشوازی و خەلاتكرن ب مەدالیا بارزانیێ نەمر.

ل سالا 2016ێ سەنتەرێ بێشكچی بۆ ڤەكۆلینێن مرۆڤایەتی ل زانكۆیا دھۆكێ دھێتە دانان.

ل سالا 2019ێ پەیكەرێ وی ل ناڤ زانكۆیا دھۆكێ دھێتە دانان.

ل سالا 2022ێ ژ لایێ زانكۆیا سۆران ڤە پەیكەرێ وێ دھێتە دانان.

ل سالا 2022ێ و ب ھەلكەفتا سیھ سالییا دامەزراندنا زانكۆیا دھۆكێ، دكتۆرا شاناز پێ دھێتە دان.

ھەژمارەكا باش ژ پەرتووكێن وی بۆ گەلەك زمانان و ب تایبەتی ژی بۆ زمانێ كوردی ژ لایێ مامۆستا وەڵات تۆفیق ڤە ھاتینە وەرگێران، ھندەك ژ وان بەرھەمان:

– كوردستان كۆلۆنییا نێڤدەولەتی.

– ڤەژینا كوردستانا خەیال.

– بزاڤێن داگیركەران ل سەر دابەشكرنا كوردستانێ.

– شرۆڤەكرنا خۆپیشاندان و نەرازیبوونێن باشوور و باشوورێ رۆژھەلاتا توركیا.

– رەوشەنبیرەك، رێكخراوەك و پرسا كوردان ل توركیا.

– نامەیەك بۆ یۆنیسكۆ دەربارەی كوردان.