گۆڤارا مەتین گۆڤارا مەتین
بێگومان، ئەزموون و شەهرەزایی ب درێژاهییا ساڵان مرۆڤێ داهێنەر پتر سەقا دکەن و رۆژ بۆ رۆژێ ماددەیا مەعریفی ل نک مرۆڤێن ئافرێنەر کەلەکە دبیت و ل سەر ئێک کۆم دبیت و گەنجینەیەکێ د هشێ وان دا دروست دکەت، هەتا وێ رادەیێ باندۆری ل سەر کەسایەتی و سنج و رابوون و روینشتن و بەرهەمێن وان دکەت. ئەڤ کەسێن داهێنەر، مەبەستا من ل ڤێرە نڤیسەرن، د بنە مولکێ جڤاکێ خۆ و هندی چەندایەتییا وێ مەعریفەیێ بەرفرەهتر دبیت، خەلەکەیێن داهێنانا نڤیسەران ژی دڤێت مەزنتر لێ بهێن و نڤیسین و بەرهەمێن وان ژ سنورێ جڤاکێ لۆکاڵ دەرباسی جڤاکێ مەزنێ مرۆڤایەتیێ ببن. بەلێ ئەڤە وێ ڕامانێ نادەت، کو داهێنەر دڤێت پاڵا خۆ ڤەدەن و وەسا هزر بکەن، کو ئێدی یێن گەهشتینە دامێ و لوتکەیێ! بەلکو، ل ڤێرە بارەکی قورستر دکەڤیتە سەر ملێن وان، چونکی مانەڤەیا ل لوتکەیێ گەلەک ب زەحمەتترە ژ سەرکەفتنێ!
نڤیسەرێن داهێنەر ل ڤی سەردەمێ بلەز و بەز، دڤێت هەرتم بزاڤێ بکەن، وێ ڤاڵاهییا د نێڤبەرا خۆ و نڤشێن ل پشت وان دا هاتین، ب خۆ نویکرنەڤێ و ئەپدێتکرنێ تژی بکەن. دڤێت خۆ فێری زمانێ گەهاندنێ ب تەکنیک و تەکتیکێن هەڤچەرخ بکەن و بزانن کا ئەڤ نڤشە چ دخوازن و ئاسۆ و ئاراستەیێن وان چ نە؟ چەوا، نڤیسەرێن هەنێ یێن تژی ژ گەنجینەیا دوهی، کو د مەژییێ وان دا تەخێن مەعریفی و ئەپستمی دروست کرینە، دێ کارن پرەکێ د نێڤبەرا خۆ و نڤشێن نوی دا دروست کەن داکو دابڕیان و ڤەقەتیان د نێڤبەرا دوهی و ئەڤرۆ دا پەیدا نەبیت!! داکو داهێنەرێ دوهی ژ دان و پێشهات و پێشکەفتنێن تەکنەلۆژیایا ئەڤرۆ یێ ڤەدەر نەبیت، کوڕێن ئەڤرۆ ژی بکارن مفایی ژ بەرهەمێ کالەنڤیسەران وەرگرن.
ب دیتنا من، پێدڤی و ئەرکە ئەڤرۆ، تەڤ نڤیسەر نەمازە یێن خودان بەرهەمەکێ زۆر و پاشخانەیەکا مەعریفی یا زەنگین، خۆ ل گەل پێلێن رۆژەڤێ بگونجینن و ژ نڤشێن، ل دویڤ وان هاتین، دویر نەکەڤن.
سەرنڤیسەر
