گۆڤارا مەتین گۆڤارا مەتین
سەرنڤیسەر
نڤیسینا پێشەکییێ بۆ پەرتووکەکێ ڤەکرنا دەرگەهەکییە بۆ ناساندنا ئەوێ پهرتووكێ و ئاماژەدانە ب ناڤەرۆکا وێ ب کورتی، کو بۆ خواندەڤانان خویا ببیت، کا دێ چ د وێ پهرتووكێ دا خوینیت. پێشەکی گاڤەکە داکو وەرگر یانکو خواندەڤان ئەوێ پهرتووكێ بپەژرینیت، کو ژ هەژی خواندنی یە.
دیسان پێشەکی رەنگڤەدانا شێوازێ نڤیسینێ یە و ئاستێ نڤیسەری ژی بەرچاڤ دکەت. ب ڤێ چەندێ پێشەکی دبیتە نموونە و سامپڵەکا کورت یا تەڤایا پهرتووكێ.
رەنگە ئەڤ پەیڤێن سڵال تشتەکی ئاسایی بیت و هەر نڤیسەرەک ل سەر ئەوا مە دیار کری؛ یێ سەرهەل و هەڤڕا بیت. بەلێ مەرەما من، ژ نڤیسینا ڤێ (دیتن)ێ ب تنێ نڤیسینا پێشەکییا پهرتووكێن زارۆکایە.
نڤیسین بۆ زارۆکی مافەکێ رەوایێ زارۆکی یە، داکو ژ لایێ هزری و رەوشەنبیری ڤە باشتر پێبگەهیت و وەرارێ بکەت. بەلێ ل گۆری ڤەکۆلینان، تا رادەیەکێ نڤیسین بۆ زارۆکی نە یا ب ساناهییە ژ بەر چەندین فاکتەران، کو نە بابەتی مژارا مە یا ڤێ دیتنێ یە.
دەما هندەک ژ نڤیسەرێن مە، پهرتووكەکێ بۆ زارۆکان دنڤیسن یان ژ زمانەکێ بیانی وەردگێڕن، چ ئەو پهرتووک هەلبەست بن یان کورتە چیڕۆک یان هەر مژارەکا دی یا گرێدایی ب زارۆکی ڤە، پێشەکییێ بۆ دنڤیسن یان کەسەکێ بسپۆر د بیاڤێ رەوشەنبیرییا زارۆکان رادسپێرن بۆ نڤیسینا پێشەکییێ، رەچاڤی هندێ ناکەن، کو دڤێت ئەو پێشەکی بۆ زارۆکی یا ئاراستەکری بیت نە بۆ دایک و بابێن وی، یانکو دڤێت ئەو پێشەکی ب زمانێ زارۆکی بیت و نە یا بارکری بیت ب ئیدیەم و پەیڤێن گران؛ داکو بکاریت زارۆکی قاییل بکەت بۆ خواندنا وێ پهرتووكێ. دڤێت نڤیسەر یان وەرگێڕێ پهرتووكێن زارۆکان رێسایێن نڤیسینێ بۆ زارۆکێ ژ لایێ زمان و شێوازێ نڤیسینێ پەیڕەو بکەت و ئەوان بابەتێن ل گەل تەمەنێ زارۆکی و ئەو دۆرهێلێ تێدا دژیت بگونجن؛ بهەلبژێڕیت، چونکی زارۆکین ئەڤرۆ ل سەردەمی تەکنەلۆژیایێ و سوشیال میدیایێ و ژیرییا دەستکرد دژین و نە هەمان زارۆکێن دوهی نە! زارۆکێ ئەڤرۆ، نەما ئیدی حەز ژ چیڕۆکێن ساندرێلایێ یان دەندک هنارێ یان بویکا بارانێ.. هتد؛ بکەن، بەلکو گەرەکە پهرتووكێن ئەڤرۆ رەنگڤەدانا روحا ئەڤی چاخی بن، کو زارۆک تێدا دژیت.
ئەوا من تێبینی کری، مخابن، پترییا پهرتووكێن زارۆکان ئەوێن ل دهۆکێ دهێنە چاپکرن، پێشەکیێن وان بۆ مەزنان هاتینە نڤیسین نە بۆ زارۆکان.
