رۆژنامەڤانییا كاغەزی نامریت..!

مخابن، هەنە دبێژن، کو رۆژا سەردەمێ خواندنا رۆژنامە و کۆڤارێن کاغەزی ئاڤابوویە؛ بەهانەیا وان ژی ئەوە، کو دەم دەمێ لەزێ یە وئیدی نەما مرۆڤی هند دەمێ ڤاڵا هەبیت چونکی مرۆڤ بەر ب خواندنا دیجیتالی چوویە، بەلێ رۆژنامەڤانێ ئەمریکی یێ ناڤدار بێنجامێن برادلی Benjamin Bradlee دبێژیت: «ئاخڤتن و کومێنتێن کەسێن رەشبین ل دۆر رۆژنامەڤانییا کاغەزی، کو پێشبینییا ئاڤابوونا رۆژا وێ دکەن، ئاخڤتنێن بێ ڕامانن».
ل گۆڕی بۆچوونا سەری، ئەم د شاشین؛ ئەگەر مه‌ بەربەڵاڤبوونا تەکنەلۆجیایێ، تۆڕێن جڤاکی و سوشیال میدیا کرە بەهانەیا نزمییا رێژەیا خواندەڤانان ل جڤاکێ مە. ب رەنگەکێ گشتی رێژەیا خواندنا پەرتۆک، کۆڤار و رۆژنامەیان ل جڤاکێ مە بەری نها ژی، وەک پڕانییا جڤاکێن رۆژهەڵاتا ناڤین، یا کێم بوو ب بەراورد ل گەل جڤاکێن رۆژائاڤایی. بەری پێلا خورتا نێت و سوشیال میدیایێ ب سەر جڤاکێن جیهانێ دا بگریت، ل رۆژئاڤا و وەڵاتێن پێشکەڤتی، خواندنێ پایە و جهەکێ ژ هەژی هەبوو، بەلێ ئەم د بیاڤێ خواندنێ دا د تەمبەل بووین و نها ژی ئەو هێشتا یێن ل سەر یا خۆ و ئەم هەر د تەمبەلین و یا ژ ڤێ کمباختر، تەکنەلۆجیایێ بۆ خۆ دکەینە بەهانە، داکو ژ خواندنێ بڕەڤین!