پرۆفیسۆر ساڵح مەلا عومەر بۆ مەتین: هەکە هەتا دویماهییا ئەڤساڵە هەلبژارتن نەهێنەکرن، دێ هەرێما کوردستانێ تووشی قەیرانەکا مەزن بیت

دیدار: مەتین

پرۆفیسۆر سالح مەلا عومەر، سەرۆکێ ناڤەندا ڤەکۆلینێن نشتیمانی و مامۆستایێ زانستێن سیاسی ل زانکۆیا سەلاحەددین دیار دکەت، ئالۆزییێن د ناڤبەرا هێزێن سیاسی ل هەرێما کوردستانێ ب تایبەتی ژی ئاریشێن د ناڤبەرا پارتی و ئێکەتیێ دا بووینە ئاستەنگ هەلبژارتنێن هەرێما کوردستانێ د دەمێ خۆ دا نەهێنە کرن، دەستپێشخەرییا ڤێ دویماهیێ یا جەنابێ سەرۆک بارزانی گەلەک گرنگ و د جهێ خۆ دا بوو، دڤێت پارتی و ئێکەتی مفایێ ژ دەستپێشخەرییا سەرۆک بارزانی وەربگرن و دەست ب قۆناغەکا نوی بکەن، چونکی هەکە هەتا دویماهییا ئەڤسالە هەلبژارتن نەهێنە کرن دێ هەرێما کوردستانێ تووشی قەیرانەکا مەزن بیت.

پرۆفیسۆر سالح مەلا عومەر، مامۆستایێ زانستێن سیاسی ل زانکۆیا سەلاحەدین و سەرۆکێ ناڤەندا ڤەکۆلینێن نشتیمانی ل سەرۆکاتییا هەرێما کوردستانێ د دیدارەکا تایبەت دا بۆ کۆڤارا مەتین سەبارەت ب رەوشا نها ل هەرێما کوردستانێ دیار کر: «نها دەڤەرا رۆژهەلاتا ناڤین ب گشتی بەر ب گوهۆرینێن مەزن ڤە دچیت، بێگومان هەر گوهۆڕینەک ل دەڤەرێ روی بدەت کاریگەرییا خۆ ل سەر هەرێما کوردستانێ ژی دکەت، ژ بەر هندێ ژی سەرۆکێ هەرێما کوردستانێ بەرێز نێچیرڤان بارزانی دەمەکە کار بۆ هندێ دکەت دا هەمی هێز و ئالییێن سیاسی یێن هەرێما کوردستانێ پێکڤە کار بکەن، هەتا نها سەرۆکێ هەرێما کوردستانێ گەلەک کۆمبوون ژی ل گەل هێزێن سیاسی یێن هەرێما کوردستانێ گێراینە، لێ مخابن ژ بەر ئاریشێن د ناڤبەرا هێزێن سیاسی یێن ل هەرێما کوردستانێ دا هەتا نها ئاریشێن ل هەرێما کوردستانێ ژی نەهاتینە چارەسەرکرن، ب تایبەتی ژی ئاریشێن د ناڤبەرا پارتی و ئێکەتیێ دا کاریگەرییا خۆ ل پرۆسێسا سیاسی ل هەرێما کوردستانێ کرییە، ئاریشێن پارتی و ئێکەتییێ ل گەل هێزێن دی یێن سیاسی وەسا مەزن نینن، بەلکو ئاریشێن نها یێن کاریگەرییا خۆ ل پرۆسێسا سیاسی ل هەرێما کوردستانێ کرییە، ئاریشێن د ناڤبەرا پارتی و ئێکەتییێ دانە».

سەبارەت ب دەستپێشخەرییا جەنابێ سەرۆک بارزانی ژی ناڤهاتی راگەهاند: «دەستپێشخەرییا جەنابێ سەرۆک بارزانی گەلەک گرنگ و د جهێ خۆ دا بوو، پشتی دەستپێشخەرییا سەرۆک بارزانی مە دیت، هەمی هێزێن سیاسی پێشوازی ل دەستپێشخەرییا سەرۆک بارزانی کرن، هەروەسا د ئاستێ بلند دا پارتی و ئێکەتییێ ژی دەست ب دانوستاندنان کرن دا ئاریشێن هەی د ناڤبەرا خۆ دا چارەسەر بکەن، پارتی و ئێکەتی دو هێزێن سەرەکی و کاریگەرن ل هەرێما کوردستانێ، کاریگەرییا وان ل سەر پرۆسێسا سیاسی ل هەرێما کوردستانێ هەیە، دەمێ ئاریشە د ناڤبەرا هەر دو ئالییان دا دروست دبن بێگومان کاریگەرییا خۆ ل پرۆسێسا سیاسی دکەت، دەستپێشخەرییا سەرۆک بارزانی دشێت ببیتە دەرگەهێ چارەسەرییێ بۆ پرسێن هەی، لێ دڤێت ئەم باش بزانین، پارتی و ئێکەتی دو هێزێن سیاسی و جودا نە، هەر ئێکێ ژ وان سیاسەتا خۆ یا جودا هەیە، نابیت ئەم وەسا هزر بکەین، دڤێت بەری هەلبژارتنان هەمی ئاریشە د ناڤبەرا پارتی و ئێکەتیێ دا بهێنە چارەسەرکرن، چونکی هەر دو هێزێن سەرەکی ل هەرێما کوردستانێ دڤێت پتر کورسیکان بدەستڤە بینن و ئەو یەک ژی سروشتییە، ئانکۆ هەبوونا ناکۆکییان د ناڤبەرا پارتی و ئێکەتییێ دا سروشتییە، لێ هندەک پرسێن گرنگ هەنە دڤێت بهێنە چارەسەرکرن، وەکو بابەتێ هەلبژارتنێن پەرلەمانێ هەرێما کوردستانێ».

پرۆفیسۆر سالح مەلا عومەر سەبارەت ب بزاڤێن سەرۆکاتییا هەرێما کوردستانێ ژ بۆ چارەسەرییا ئاریشێن  نها ل هەرێما کوردستانێ ژی دیار کر: «بێگومان سەرۆکاتییا هەرێما کوردستانێ ب تایبەتی ژی جەنابێ نێچیرڤان بارزانی سەرۆکێ هەرێما کوردستانێ بەردەوام ل سەر خەتە دا ئاریشێن هەی بهێنە چارەسەر کرن، چونکی ئاشکرایە ئاریشێن نها یێن ل هەرێما کوردستانێ ب تایبەتی ژی ئاریشێن د ناڤبەرا پارتی و ئێکەتییێ دا کاریگەرییا خۆ یا خراب ل کارێ حوکمەتێ ژی کریە، بەری نها جێگرێ سەرۆک وەزیران و هندەک وەزیر ژ پشکا ئێکەتیێ پشکداری د کۆمبوونێن جڤاتا وەزیران دا نەدکرن، ئەو یەک ژی کاریگەرییا خۆ ل کارێ حوکمەتا هەرێما کوردستانێ دکر، سەرۆکێ هەرێما کوردستانێ گەلەک بزاڤ کرن دا ئەو ئاریشە بهێنە چارەسەرکرن، د ئەنجام دا جێگرێ سەرۆک وەزیران و وەزیرێن ئێکەتیێ ڤەگەرینە ڤە سەر کارێن خۆ و ئەو یەک ژی بێگومان کارەک گەلەک باش بوو. ل سەرۆکاتییا هەرێما کوردستانێ ژی، هەماهەنگییەکا باش د ناڤبەرا تیما ئێکەتیێ و سەرۆکاتییا هەرێما کوردستانێ دا هەیە، سەرۆکێ هەرێمێ دڤێت د ئاستێ حوکمەتێ دا ژی ئەو ئاریشە نەمینن، چونکی سازییا سەرۆکاتییا هەرێما کوردستانێ نوینەراتییا هەمی خەلکێ هەرێما کوردستانێ دکەت، بەرێز سەرۆکێ هەرێما کوردستانێ هەتا نها شیایە ب رەنگەکێ باش سەرەدەرییێ ل گەل سەرکردایەتییا نوی یا ئێکەتیێ بکەت و رێ نەدایە ئاریشێن نها کاریگەرییەکا خراب ل کار و خەباتا سەرۆکاتییا هەرێما کوردستانێ بکەت، ئەو یەک ژی بێگومان ڤەدگەریتەڤە بۆ بسپۆریا سەرۆکێ هەرێما کوردستانێ کا چاوا دشێت د رەوشێن هەری دژوار دا ژی رێ نەدەت ئالۆزیێن هەی زێدەتر کاریگەرییا خۆ ل بەرژەوەندیێن گشتی یێن هەرێما کوردستانێ بکەن».

سەرۆکێ ناڤەندا ڤەکۆلینێن نشتیمانی ل سەرۆکاتییا هەرێما کوردستانێ سەبارەت ب ئاستەنگیێن ل هەمبەر برێڤەچوونا هەلبژارتنێن پەرلەمانێ کوردستانێ ژی دیار کر: «ئاریشا سەرەکی یا بوویە ئەگەرێ هندێ هەتا نها هەلبژارتنێن پەرلەمانێ کوردستانێ نەهێنە کرن، بابەتێ یاسایا هەلبژارتنان و هەروەسا کاراکرنا کۆمسیۆنا هەلبژارتنێن هەرێما کوردستانێ یە، لێ د راستی دا ئەو یەک ئاریشە نینە، چونکی مە ئەزموونێن گەلەک جودا ل دۆر پرۆسێسا هەلبژارتنان ل ئیراقێ و هەرێما کوردستانێ هەیە، وەکو نموونە هەلبژارتنێن هەری دویماهیێ ل ئیراقێ، کو تێدا زێدەباری گوهۆڕینا سیستەمێ هەلبژارتنان، لێ دیسان ژی پارتی دیموکراتی کوردستان شیا پڕانییا کورسییان بدەستڤە بینیت، لێ نها یا گرنگ ئەوە دڤێت هەلبژارتن ل هەرێما کوردستانێ بهێنە کرن، رەوشا نها ل هەرێما کوردستانێ وەسا بۆ پارتی و ئێکەتییێ ناچیتە سەری، دڤێت هەلبژارتن بهێنە کرن، هەکە ئەم بەرێ خۆ بدەینە ئیراقێ، ل ئیراقێ گەلەک قەیرانێن مەزن هەنە، لێ دیسان ژی هەلبژارتن د دەمێ خۆ دا هاتنە کرن، ئەو یەک گەلەک گرنگە و دڤێت ل هەرێما کوردستانێ ژی ئەڤسالە هەلبژارتن بهێنە کرن، هەکە هەلبژارتنێن پەرلەمانێ کوردستانێ ئەڤسالە نەهێنە کرن وی دەمی دێ هەرێما کوردستانێ تووشی قەیرانەکا مەزن بیت، هەکە مە بڤێت هەرێما کوردستانێ وەکو هەرێم بمینیت و هەروەسا بەغدا، ئەمریکا و وەلاتێن دی یێن جیهانێ ژی وەکو هەرێمەکێ سەرەدەریێ ل گەل مە بکەن وی دەمی دڤێت هەلبژارتن ئەڤسالە بهێنە کرن».

ناڤهاتی ئاماژە ب هندێ ژی کر: «ئەمریکا و بەرپرسێن نەتەوێن ئێکگرتی بەری نها ژی گەلەک بزاڤ کرینە دا هەلبژارتن ل هەرێما کوردستانێ د دەمێ خۆ دا بهێنە کرن، راستە هەتا نها وان نەشیاینە د بزاڤێن خۆ دا سەرکەفتی بن، لێ دڤێت پارتی و ئێکەتی ژی گرنگی بدەنە رۆلێ وان، چونکی هەکە پارتی و ئێکەتی گرنگییێ نەدەنە بزاڤێن وان، سوباهی مەترسی ل سەر هەرێما کوردستانێ دروست ببن، ئەمریکا و وەلاتێن زلهێز ژی هەرێما کوردستانێ ناپارێزن، لێ هەکە هەر دو هێزێن هەرێما کوردستانێ گرنگییێ بدەنە پێشنیازێن ئەمریکا و وەلاتێن دی، بێگومان وی دەمی ئەو دێ پتر شێن هاریکارییا هەرێما کوردستانێ کەن، ژ بەر هندێ ژی هەر هێزەک د خەما هەرێما کوردستانێ دا بیت دڤێت بەرپرسیارییا خۆ ل هەمبەر رەوشا نها بجه بینیت و تنێ د هزرا بەرژەوندییێن خۆ یێن تەنگ دا نەبیت».

پرۆفیسۆر سالح مەلا عومەر د پشکەکا دی یا ئاخڤتنا خۆ دا ئەو یەک ژی دیار کر: «یا نها گرنگ ئەوە پارتی و ئێکەتی بشێن ل سەر هندەک خالان رێکبکەڤن دا هەلبژارتن ئەڤسالە ل هەرێما کوردستانێ بهێنە کرن، دەستپێشخەرییا سەرۆک بارزانی و رۆلێ گرنگ یێ سەرۆکێ هەرێما کوردستانێ ژی دشێن ببنە فاکتەرێن باش و هاریکار دا هەر دو ئالی پتر نێزیکی هەڤدو ببن، براستی ژی بابەتێ هەلبژارتنان نها بابەتێ هەری گرنگە ل هەرێما کوردستانێ، دەمێ ئەمریکا دبێژیت پێدڤییە ئەڤسالە هەلبژارتن بهێنە کرن، دڤێت بەرپرسێن پارتی و ئێکەتییێ ژی باش بزانن، هەکە هەلبژارتن نەهێنە کرن دێ ئاریشێن گەلەک مەزن بۆ هەرێما کوردستانێ دروست بن، ئەمریکا بەرژەوەندییێن خۆ هەنە، وان ژی دڤێت ل ئیراقێ و هەرێما کوردستانێ گەلەک ئاریشە بهێنە چارەسەرکرن، دەمێ ئاریشە هەبن بێگومان ئاستەنگی ژی ل هەمبەر ستراتیژییا ئەمریکا دروست دبن، لێ وەکو من بەری نها ژی دیار کری، ب ناڤبژیڤانییا ئەمریکا و نەتەوێن ئێکگرتی مخابن بابەتێ هەلبژارتنان نەهاتە چارەسەرکرن، من دڤێت ڤێ راستییێ ژی دیار بکەم، دەستپێشخەرییا سەرۆک بارزانی گەلەک گرنگ و د جهێ خۆ دا بوو، لێ ئەو یەک رامانا هندێ نادەت دێ هەمی پرسێن هەی هێنە چارەسەرکرن، گەلەک پرسێن دی دشێن بۆ دەمەکێ بەردەوام بن، چونکی پارتی و ئێکەتی دو هێزێن سیاسی یێن جودانە ل هەرێما کوردستانێ، هەر ئێکێ ژ وان بەرژەوەندییێن خۆ یێن تایبەت هەنە، سروشتییە ل دۆر گەلەک بابەتان ئاریشە د ناڤبەرا وان دا هەبن».

ل دۆر هنــــــدێ کا ســــەرۆکێ هەرێما کوردستانێ دێ چ رۆلەکێ گێریت دا قەیرانا نها بهێتە چارەسەرکرن ژی ناڤهاتی راگەهاند: «ل گۆر دستووری سەرۆکاتیا هەرێما کوردستانێ دشێت دەستهەلاتا خۆ بکار بینیت، دەستهەلاتێن سەرۆکێ هەرێما کوردستانێ ژی بێگومان دیارن، مە دیت ژی سالا بۆری سەرۆکێ هەرێما کوردستانێ ژڤانێ هەلبژارتنان ژی دیار کر، لێ مخابن ژ بەر ئاریشێن د ناڤبەرا پارتی و ئێکەتیێ دا هەلبژارتن د دەمێ خۆ دا نەهاتنە کرن، هەروەسا تەمەنێ پەرلەمانێ کوردستانێ ژی هاتە درێژکرن دا چ ڤالاهیێن دستووری دروست نەبن، بێگومان درێژکرنا تەمەنێ پەرلەمانی ژ ئەنجاما رێککەفتنەکێ د ناڤبەرا پارتی و ئێکەتییێ دا بوو، لێ سەرۆکێ هەرێما کوردستانێ ئەو یەک ئیمزا نەکر، هەر وی دەمی سەرۆکێ هەرێما کوردستانێ راگەهاند ئەو ل گەل هندێ نینە تەمەمێ پەرلەمانێ کوردستانێ بهێتە درێژکرن، بەرێز سەرۆکێ هەرێما کوردستانێ ب رەنگەکێ ئاشکرا داخواز کر هەلبژارتن د دەمێ خۆ دا بهێنە کرن، ژ بۆ هندێ ژی سەرۆکێ هەرێما کوردستانێ ب رەنگەکێ فەرمی داخوازا ژ جڤاتا ئاسایشا نەتەوێن ئێکگرتی ژی کر هاریکارییا هەرێما کوردستانێ بکەن دا هەلبژارتن د دەمێ خۆ دا بهێنە کرن، ژ ئەنجاما وێ داخوازییا سەرۆکێ هەرێما کوردستانێ ژی، چەندین جاران نوینەرا تایبەت یا سکرتێرێ نەتەوێن ئێکگرتی ل ئیراقێ جێنین پلاسخارت ل سەرۆکاتییا هەرێما کوردستانێ ل گەل هەمی هێزێن سیاسی یێن کوردستانێ کۆمبوو، لێ مخابن زێدەباری بزاڤێن نوینەرا تایبەت یا سکرتێرێ گشتی یێ نەتەوێن ئێکگرتی ل ئیراقێ ژی، دیسان ئاریشە بەردەوامن».

سەرۆکێ ناڤەندا ڤەکۆلینێن نشتیمانی ل سەرۆکاتییا هەرێما کوردستانێ د بەردەوامییا ئاخڤتنا خۆ دا ئەو یەک ژی دیار کر: «سەرۆکێ هەرێما کوردستانێ جارەکا دی ژڤانێ هەلبژارتنان بۆ ئەڤسالە دیار کر و چەندین جاران ژی داخواز ژ هەمی هێز و ئالیێن سیاسی یێن هەرێما کوردستانێ کر، ئاریشێن خۆ چارەسەر بکەن و نەهێلن ئاریشێن هەی ببنە ئاستەنگ ل هەمبەر پرۆسێسا هەلبژارتنان ل هەرێما کوردستانێ، چونکی بابەتێ هەلبژارتنێن پەرلەمانێ کوردستانێ براستی ژی نها گەلەک گرنگە، سەرۆکێ هەرێما کوردستانێ ژی گەلەک جاران دیار کرییە دڤێت ئێدی هەلبژارتن نەهێنە پاشخستن و دڤێت ئەڤسالە هەلبژارتن بهێنە کرن، چونکی هەلبژارتن مافێ رەوا یێ خەلکێ هەرێما کوردستانێ یە، نابیت ناکۆکییێن د ناڤبەرا هێزێن سیاسی دا ببنە ئەگەرێ هندێ ئەو مافە بهێتە پێشیل کرن، سەرۆکێ هەرێمێ گەلەک جاران ئاماژە ب هندێ ژی کرییە، نابیت ناکۆکییێن د ناڤبەرا هێزێن سیاسی ل هەرێما کوردستانێ ببنە ئەگەرێ هندێ، کو هەلبژارتن د دەمێ خۆ دا نەهێنە کرن، چونکی پاشخستنا هەلبژارتنان بۆ هەرێما کوردستانێ دێ ئەنجامێن خۆ یێن گەلەک خراب هەبن، سەرۆکێ هەرێما کوردستانێ ژی ڤێ راستییێ باش دزانیت و ژ بەر هندێ ژی سەرۆکێ هەرێما کوردستانێ یێ رژدە دڤێت ڤێجارێ چ بەهانە نەمینن و نابیت ئێدی هەلبژارتن بهێنە پاشخستن، هەتا نها ژی سەرۆکێ هەرێما کوردستانێ بەردەوام ل سەر خەتە دا ئاستەنگییێن هەی نەمینن و هەلبژارتن د دەمێ خۆ دا بهێنە کرن، لێ مخابن ناکۆکییێن د ناڤبەرا هێزێن سیاسی و ب تایبەتی ژی د ناڤبەرا پارتی و ئێکەتییێ دا بووینە رێگر هەتا نها ژی خەلک یێ پشتراست نینە کا دێ ئەڤسالە هەلبژارتن هێنە کرن یان نە، لێ ئەز پشتراستم دێ هەر هەلبژارتن ل کوردستانێ هێنە کرن، چونکی چو رێیەکا دی نینە و هێزێن سیاسی ژی نەچارن ل گۆر راستییا هەی خۆ بۆ هەلبژارتنان بەرهەڤ بکەن».

ل دۆر هندێ هەکە ئەڤسالە هەلبژارتن نەهێنە کرن دێ چ رویدەت ژی پرۆفیسۆر سالح مەلا عومەر راگەهاند: «هەکە هەتا دویماهییا ئەڤسالە ئەو دەمێ سەرۆکێ هەرێمێ دیار کری، هەکە هەتا وی دەمی هەلبژارتن نەهێنە کرن، دێ ئەنجامێن خۆ یێن گەلەک خراب بۆ هەرێما کوردستانێ هەبیت، چونکی دێ دەمێ درێژکری یێ تەمەنێ پەرلەمانێ کوردستانێ ژی ب دویماهی هێت، د رەوشا نها دا ئەز باوەر ناکەم پارتی و ئێکەتی بشێن رێککەفتنەکا دی بکەن دا تەمەنێ پەرلەمانی جارەکا دی درێژ بکەن، هەکە ئەو یەک نەهاتە کرن دێ هەرێما کوردستانێ تووشی ئاریشێن گەلەک مەزن بیت، ژ بەر هندێ‌ ژی ئەز دبێژم چ رێیێن دی نینن و دڤێت هەلبژارتن ل هەرێما کوردستانێ بهێنە کرن، بێگومان ژ بۆ برێڤەچوونا هەلبژارتنان گەلەک ئالییەتێن دی ژی هەنە، چونکی بەری هەر تشتەکێ ل هەرێما کوردستانێ قانوونا هەلبژارتنان هەیە، بەری نها ژی رێککەفتن ل سەر وێ قانوونێ هاتییە کرن، هەلبژارتنێن ژی بەری نها هەر ل گۆر وێ قانوونێ برێڤە چووینە، د قانوونێ دا هاتییە تنێ پەرلەمانێ کوردستانێ دشێت قانوونا هەلبژارتنان هەلوەشینیت، ئانکۆ چ ئاریشە د قانوونا هەلبژارتنان دا نینن، خالا دی بابەتێ بابەتێ کاراکرنا کۆمسیۆنا هەلبژارتنان یا هەرێما کوردستانێ یە، ئەو ژی نابیتە ئاریشە، چونکی هەکە کۆمسیۆنا هەلبژارتنان یا هەرێما کوردستانێ نەهاتە کاراکرن، وی دەمی کۆمسیۆنا هەلبژارتنان یا ئیراقێ هەیە و دشێت وی کاری بکەت، هەرچەندە گەلەک باشە کۆمسیۆنا هەلبژارتنان یا هەرێما کوردستانێ بهێتە کاراکرن و وی کاری بکەت، لێ هەکە ئەو یەک نەهاتە کرن کۆمسیۆنا هەلبژارتنان یا ئیراقێ دشێت سەرپەرشتییا هەلبژارتنێن پەرلەمانێ کوردستانێ بکەت».

ناڤهاتی سەبارەت ب رۆلێ سەرۆکێ هەرێما کوردستانێ د رێککەفتنا ڤێ دویماهیێ یا د ناڤبەرا هەرێما کوردستانێ و بەغدا دا ژی دیار کر: «سەرۆکێ هەرێما کوردستانێ هەتا نها گەلەک بزاڤ کرینە دا هەولێر و بەغدا ئاریشێن هەی ل گۆر دستووری چارەسەر بکەن، ژ بۆ هندێ ژی هەتا نها سەرۆکێ هەرێما کوردستانێ گەلەک جاران سەرەدانا بەغدا کرییە، سەرۆکێ هەرێما کوردستانێ پەیوەندیێن گەلەک باش ل گەل محەمەد شیاع سودانی سەرۆک وەزیرێن ئیراقێ هەنە، هەروەسا سەرۆکێ هەرێما کوردستانێ بەردەوام ل گەل هێزێن سیاسی یێن ئیراقێ ژی دانوستاندنان دکەت دا ئاریشێن د ناڤبەرا هەولێر و بەغدا دا بهێنە چارەسەرکرن، د رێککەفتنا ڤێ دویماهیێ دا ژی رۆلێ جەنابێ سەرۆکێ هەرێما کوردستانێ بەرچاڤە، دڤێت ئەم ژبیر نەکەین دەمێ سودانی وەکو بەربژار بۆ پۆستێ سەرۆک وەزیرێن ئیراقێ هاتە دەستنیشانکرن وی دەمی رەوشا ئیراقێ گەلەک یا ئالۆز بوو، بەرێز نێچیرڤان بارزانی سەرۆکێ هەرێما کوردستانێ ئێکەم کەس بوو پشتەڤانییا خۆ بۆ سودانی دیار کر، هەروەسا سەرۆکێ هەرێما کوردستانێ شییا ب رێیا پەیوەندیێن خۆ یێن ل گەل ئەمریکا، فرەنسا و ئیرانێ وەسا بکەت دا ئەو وەلاتە ژی د هاریکار بن دا هەرێما کوردستانێ و بەغدا بشێن ئاریشێن هەی د ناڤبەرا خۆ دا چارەسەر بکەن، دبلۆماسییا سەرۆکێ هەرێما کوردستانێ ب تایبەتی ژی د پەیوەندییا ل گەل وەلاتێن دەرڤە رۆلەکێ کاریگەر هەبوویە دا هەرێما کوردستانێ و بەغدا بشێن پتر نێزیکی ئێکتر ببن و ئاریشێن هەی د ناڤبەرا خۆ دا چارەسەر بکەن، ژ بەر هندێ ژی رۆلێ سەرۆکێ هەرێما کوردستانێ د رێککەفتنا ڤێ دویماهیێ یا د ناڤبەرا هەولێر و بەغدایێ دا گەلەک گرنگ و کاریگەر بوویە».