گۆڤارا مەتین گۆڤارا مەتین
بەرهەڤکرن: مەتین
ل ڤێ دویماهیێ ژیرییا دەستکرد ِ Artificial intelligence یا بناڤێ ChatGPT ژ پێشخستنا کومپانیا Open Al، بگرە و بکێشەکا بەرفرەهـ ل سەر ئاستێ هەمی جیهانێ دروست کر؛ ژبەرکو ڤی پرۆگرامێ ئەنتەرنێتێ شیانێن گەلەک مەزن هەنە کو بلەز چات و گەنگەشێ بکەت و بەرسڤا پرسیاران ب شێوازەکێ جوان و لۆژیکی بدەت.
نموونەیا ئێکێ ژ چاتا جی پی تی، ل ٣٠ چریا دویێ یا ساڵا ٢٠٢٢ێ ل ئەمریکا هاتە راگەهاندن و هەر زوی بۆ جهێ سەرنجراکێشانا جیهانێ. زێدەباری مفا یێن وێ یێن بێ سنور، بەلێ ژ ئالییەکی دی، گەلەک رەخنە و دژایەتییا ڤی پرۆگرامی دهێتەکرن؛ چونکی ئەڤ جۆرە پرۆگرامە مرۆڤی تەمبەل و بێ بەها دکەت و هەتا وێ رادەیێ، کو مەترسیێ ل سەر مرۆڤی و پاشەرۆژا وی یا ئەفراندنێ دروست بکەت.
ئەڤ پرۆگرامە پشتبەستنێ ل سەر میناکێ ژیرییا دەستکرد GPT3 دکەت، کو ب ب ساناهی ب کارێ شرۆڤەکرنا تێکستان رادبیت هەر وەکی مرۆڤی و کاری گەلەک ساناهی دکەت و ژ باتی، کو مرۆڤ ل ژێدەر و پەرتووکان ل بەرسڤەکێ یان دارێژتنا بیرۆکەیەکێ بگەرێت یان ل دویڤ چارەسەرییا گرفتەکێ یان هەڤکێشەیەکا ئالۆز بچیت، ب تنێ دێ ژ پرۆگرامی خوازیت ب ڤی ئەرکی راببیت و دەم ل دەست دی باشترین بەرسڤ و چارەسەری دێ دانێتە بەر دەستێ مرۆڤی!
هەروەسا ئەڤ پرۆگرامە، دکاریت ئەوا د خەیالا مرۆڤی دا و بێی، کو مرۆڤ خۆ زەحەمت بدەت بۆ مرۆڤی بکەت، ژ وانا:
– دروستکرنا CV یان بۆ هەر بسپۆرییەکێ.
– بەردەستکرنا ژێدەر و زانیارییان ل سەر هەر بابەت و مژارەکێ.
– نڤیسینا کارێن ئەفراندی و تێکستێن پەخشان و هەلبەستان.
– نڤیسین پەیڤێن سترانان و دانانا نۆتە و ئاوازان.
– دروستکرنا سیناریۆیان بۆ دراما و شانۆگەرییان.
– رێنیشاندان و دانا رێنماییان بۆ نیگاکێشیێ.
– ڤەکرنا کۆدێن پرۆگرامان و شرۆڤەکرنا کێشەیان.
– نڤیسینا ڤەرێژا فیلمێن ڤیدیۆیی.
– هەر داخازی یان پرسیارەک، کو ل دەمێ بەرێ لێ هاتبیتە کرن، ل بیرا بەرنامەیە و دێ تە ئاگەهدار کەت هەر وەکی پرۆگرام کەسەکە ل گەل تە دپەییڤیت!
