گۆڤارا مەتین گۆڤارا مەتین
بەرهەڤکرن: مەتین
“ئەڤ بابەتە ب تنێ پێشبینی نە و دیتن و شرۆڤەیێن هندەک کەسانە”
فەلەکناسی یان ستێرناسی Astrology سیستەمەکە ئارمانجا وی شرۆڤەکرنا کاریگەرییا تەن و پێکهاتێن بۆشاییا ئەسمانی (هەسارە، ستێر، رۆژ و هەیڤ) ل سەر ژیانا مرۆڤان و رویدانێن ل سەر ئەردی چێدبن.
فەلەکناسی کار و دیاردەیەکا کەڤنە ل سەر هێما و چەڤەنگان رادوەستیت و چ بنیاتێن زانستی بۆ نینن.. ژ لایەنی ئایینیڤە، هەر سێ ئایینێن دهێنە نیاسین ب ئایینێن ئەسمانی (جوهیاتی، فەڵەتی و ئیسلام) فەلەکناسیێ رەت دکەن، چونکی دژی باوەڕیێ یە و زانینا غەیبێ ب تنێ ب خودێڤە یا هەڤبەندە. لێ ل سەر هندێ ڕا ژی دبینین، ساڵانە گرنگییەکا مەزن ب پێشبینیێن فەلەکناسان دهێتە دان.
ئەڤ پێشبینییە گولبژێڕەکن ژ هەژمارەکا زۆر یا پێشبینییان ل بیاڤێن جودا جودا دا پێشڤەچوونێن زانستی، پێشهاتێن ئابووری، سروش و ژینگەهـ گوهۆڕینێن سیاسی و جڤاکی زێدەباری هندەک رویدانێن گرنگ و دیار ل سەر ئاستێ جیهانێ.
هەر ل سەر دەمێن دێرین ل سەرانسەری دنیایێ، زانینا پێشبینێن ئاییندەیی، یانکو یێن پاشەرۆژێ، جهێ پویتەدانا مرۆڤی بوویە، ب تایبەتی دەما هندەک ژ پێشبینیێن فەلەکناسان بەری مرنا وان راست دەردکەڤن و پاشڕا پێشبینیێن وان یێن پشتی مرنا وان ژی دبنە جهێ گرنگیپێدانێ.
بۆ ساڵا ٢٠٢٥ێ، وەک هەر ساڵ، پێشبینیێن دو فەلەکناسێن بەرنیاس، بوونە جهێ سەرنجا ناڤەندین راگەهاندن و رۆژنامەڤانییا جیهانی و ب تایبەتی سوشیال میدیایێ. هەرچەندە ئەڤ پێشبینییە ب تنێ بۆچوونن، بەلێ خەلک گرنگییەکا زێدە پێ ددەن!
ل ڤێڕە، دێ هندەک ژ وان پێشبینیێن فەلەکناسان بۆ ساڵا ٢٠٢٥ێ، بەرچاڤ کەین:
نۆستراداموس Nostradamus
ئێک ژ فەلەکناسێن ئەفسانەیی و بناڤودەنگ (نۆستراداموس)ێ فرەنسی یە. ئەڤ فەلەکناسە ل سەرێ لیستا هەمی فەلەکناسان دهێت، چونکی گەلەک ژ وان پێشبینیێن وی یێن کو ل سەدەیێ شازدێ گۆتین، راست دەرکەفتینە. بەری سەدان ساڵان، نۆستراداموسی پێشبینیێن خۆ بۆ سەدان ساڵێن پشتی خۆ د پەرتووکەکێ دا بناڤێ (نۆستراداموس: تەمامییا پێشبینییان ل دۆر پاشەرۆژێ Nostradamus: Complete Prophecies for the Future) نڤیسینە.
ل گۆری رۆژنامەیا هندی (تایمز Times)، ساڵانە ناڤێ ئەڤی فەلەکناسی دبیتە سەرنووچەیێ سەرێ ساڵێ. فەرموون دا ل بەراهيیێ دا بزانین نۆستراداموس کییە؟
میشێل دی نوسترادام Michel de Nostredame یێ ناسیارە ب نۆستراداموس: فەلەکناس و پزیشکەکێ فرەنسی بوو. ژ بەرچاڤترین فەلەکناسێن سەردەمێ رابوونەڤێ Renaissance دهێتە نیاسین. د ژیێ سیهـ ساڵیێ دا ل سەدەیێ شازدێ کارێ پزیشکیێ و دەرمانسازیێ کرییە. دەما پەتایا کولا رەش، یانکو تاعون پەیدابوويی، نۆستراداموس شییا ناڤوبانگەکێ مەزن ل هەردو باژاڕێن ئێیکس Aix-en-Provence و لیۆن Lyon د ناڤبەرا ساڵێن ١٥٤٦ و ١٥٤٧ێ ز. بدەست خۆڤە بینیت. نۆستراداموسێ پزیشک ل ساڵا ١٥٤٧ێ دەست ب بەڵاڤکرنا پێشبینێێن خۆکر و ل ساڵا ١٥٥٥ێ هندەک ژ پێشبینیێن خۆ د پەرتووکەکی دا ب ناڤێ (چەرخ) کو ژ ١٠٠ مالکێن هەلبەستان پێک دهیت، بەڵاڤکرن. ناڤەڕۆکا وێ پەرتووکێ ل گەل هەژمارەکا دی یا پێشبینییان د وێ پەرتووکێدا کۆمکرینە و هەتا نوکە ئەڤ پەرتووکە ل بیاڤێ پەرتووکێن پێشبینییان ئێک ژ پتر فرۆشایە Bestseller ل سەر ئاستێ جیهانێ.
نۆستراداموس، د پەرتووکا خۆ دا یا کو بەری ٤٥٠ ساڵان نڤیسین، پێشبینییا گەلەک تشتان کربوو و راست دەرکەفتبوون، وەکو:
– سەرکەفتنا ئەدۆلف هێتلەری و وەرگرتنا دەستهەڵاتێ ل ئەڵمانیا.
– لێدانا باژاڕێن هێرۆشیما و ناکازاکو ب بۆمبەیێن ئەتۆمی.
– کوشتنا سەرۆکێ ئەمریکی جۆن کنێدی.
– سەرهلدانا پەتایا کۆرۆنایێ.
نۆستراداموسێ فەلەکناس د پەرتووکا خۆ دا، ئەڤ پێشبینییە بۆ ساڵا ٢٠٢٥ێ نڤیسینە:
– سەرهلدانا پەتایا (کولارەش – تاعون) ب رەنگەکێ مەترسیدارتر ژ جارێن بەرێ.
– دروستبوونا کارەساتێن سروشتی، کو دێ هندەک دەڤەر ل بەرازیلێ تویش بن ژ ئەگەرێ پەقینا ڤولکان و چێبوونا لەهییان.
– بنئاڤبوونا دەڤەرێن بەرین و چەند باژاڕێن مەزن یێن جیهانێ ژ بەر رابوونا لەهییان و حەلیان بوهۆژینا بەفرێ ل جەمسەرێ باکۆر.
– دروستبوونا هەڤپەیمانییەکا نەچاڤەڕێکری د ناڤبەرا رووسیا و ئەمریکا دا، زێدەباری ناکۆکیێن دیپلۆماتیک و سیاسی. ئەڤ هەڤپەیمانییە دێ ل دژی ئەورۆپا بیت ب تایبەتی فرەنسا!
– ل ئەورۆپا دێ ئاریشەیێن ئایینی دروست بن د ناڤبەرا فەلەتیێ و ئیسلامێ دا، کو رەنگە ئەو ئاریشە ببنە بناسەیێن ناکۆکیێن ناڤدەولەتی.
– کارەساتێن سروشتی یێن مەزن دێ ل یۆنانستانێ و کرواتییا چێبن.
– ل قودسی شەڕێ دەستهەلاتداریێ ل سەر وی باژاری دێ بەردەوام بیت.
گەلەک کەسان گۆمان ب ڤان پێشبینییان یا هەی، بەلێ ئەو پێشبینیێن نۆستراداموسی ل پشت خۆ هێلاین و قەوومین، یێن بووینە جهێ گەنگەشە و بگرە و بکێشان ل سەر ئاستێ جیهانێ.
ل ئالییەکێ دی، پێشبینیێن فەلەکناسا بولگاری یا کوورە (بابا ڤانگا)، کو ب ناڤێ (نۆستراداموسا بولقانێ) دهێتە نیاسین، بۆ ساڵا ٢٠٢٥ێ، ل گەل وان پێشبینیێن نۆستراداموسێ فرەنسی دیارکرن هەڤناگرن، ئەڤ چەندە ژی ل نک خەلکی دبیتە جهێ ترسێ و پرسێ. هندەک ژ پێشبینیێن فانگایێ بەری ساڵا ٢٠٢٤ێ تەمام ببیت، دروست دەرکەفتبوون، لەوڕا رەنگە پێشبینیێن وێ بۆ ساڵا ٢٠٢٥ێ ژی بجهـ بهێن!
بابا فانگا کییە:
فانگالینا باندیڤا گوشتیرۆڤا Vangelia Pandeva Gushterova کو ب بابا ڤانگا یا ناڤدارە، ل ساڵا ١٩١١ێ ل باژاڕی سترۆمیکا کو نوکە دکەڤیتە د سنورێ مەقەدۆنیا دا، هاتییە سەر دونیایێ. ل ساڵا ١٩٨٦ێ د ژیێ ٨٥ ساڵێ وەغەرکرییە. ناڤوبانگییەکا مەزن ب دەستڤەئینایە ل بیاڤێ پێشبینییان. بەری ب مرین پێشبینییا رێکەفتا مرنا خۆ کربوو کو دێ ل ١١ هەیڤا تەباخێ بیت و دێ ل ١٣ تەباخێ هێتە ڤەشارتن.
گەلەک ژ پێشبینیێن وێ سەرنەگرتینە، بەلێ گەلەک ژی دروست دەرکەفتینە.
ژ پێشبینییێن وێ یێن دروست:
– دروستبوونا گەلەک دەولەتێن عەرەبان
– پەقینا چێرنۆبل ل 26ێ گولانا ساڵا 1986ێ.
– رویدانا ١١ سەپتەمبەرا ساڵا ٢٠٠١ێ.
– پێشبینییا سەرکەفتنا سەرۆکەکێ رەشپیس بۆ کۆچکا سپی، کو راست دەرکەفت باراک ئۆباما بوو سەرۆکێ ئەمریکا.
پێشبینیێن بابا فانگا بۆ ساڵا 2025ێ:
– جەنگێ رووسیا و ئۆکرانیا ژ بەر بێهێزبوونا سوپایێن هەر دو وەڵاتان، دێ ب دویماهی هێت.
– دێ بەفرا جەمسەرێ باکۆر حەلیێت و لەهیێن مەزن دێ هندەک دەڤەران ڤەگرن و ژیان لێ نامینیت.
– جەنگەک دێ د ناڤبەرا دەولەتێن ئەورۆپی دا سەرهلدەت و دێ کاریگەریێن وێ ل سەر هەمی جیهانێ د مەزن بن.
– مرۆڤ بێی بکارئینانا هیچ ئامیرەکی دێ شێین سەرەدەریێ ل گەل ئێک بکەن.
– هندەک چێکریێن بۆشاییا ئەسمانی دێ سەرەدانا ئەردی کەن!
– هندەک ئالاڤ و تەکنیک دێ پەیدا بن، کو ژیانا مرۆڤان دێ ب رەنگەکێ مەزن گوهۆڕیت.
– گوهۆڕینێن سەربازی و سیاسی یێن مەزن دێ ل هندەک دەڤەرێن جیهانی دروست بن.
هەر د ڤی بیاڤی دا، هندەک ژ فەلەکناسێن دی یێن سەردەم ژی پێشبینی هەنە، دێ پێشبینیێن هندەک ژ وان بەرچاڤ کەین:
فەلەکناسێ مسری، د. ئەحمەد شاهین، کو بناڤێ نۆستراداموسێ عەرەب دهێتە نیاسین، پێشبینی دکەت:
– هندەک وەڵاتێن رۆژهەڵاتا ناڤەراست دێ ژ بندەستییا سیاسی یا کو بۆ دەمێن درێژ ژێ دنالین دێ رزگار بن.
– سووریا دێ ئێک گریتەڤە و پارچە نابیت.
– عیراق دێ بهێزڤە زڤڕیتەڤە د مەیدانا سیاسی دا.
– ب پشتەڤانیا بریتانیا، سیستەمی دەستهەڵاتێ ل ئۆردنێ دێ هێتە گوهۆڕین و دێ بیتە کۆماری.
– بزاڤێن چینێ دێ د بەردەوام بن داکو ببیتە سەرکێشا ئابوورییا جیهانی، بەلێ دێ هندەک ئالنگاری کەڤنە پێش چینێ و رکابەر دێ بۆ هەبن وەکو هندستانێ.
– ل ساڵا ٢٠٢٥ێ دێ دەنگۆیێ ئاشکەرابوونا مەهدیێ مونتەزەر، د ناڤ شیعەیان دا زێدەبیت.
فەلەکناسا مسری لەیلا عەبدول لەتیف، پێشبینیێ دکەت:
– هندەک کارەساتێن سروشتی و ژینگەهی یێن مەترسیدار دێ ل چەند وەلاتێن رۆژهەلاتا ناڤین دروست بن.
– قەیرانێن سیاسی دێ ل لوبنان و عیراقێ د بەردەوام بن.
– هندەک ژ کومپانیایێن مەزن ل سەر ئاستێ جیهانێ و ب تایبەتی یێن ئەورۆپی دێ بێپارە بن.
– دێ چەند حالەتێن تێکچوونا ئاسایشێ و ئارامیێ ل هندەک دەولەتان هەبن و دێ دزی و فەرهوود پەیدا بن.
ژێدەر:
https://timesofindia.indiatimes.com/astrology/zodiacs-astrology/nostradamus-predictions-for-the-year-2025-these-zodiac-signs-are-likely-to-become-millionaire-in-2025/articleshow/116030303.cms
https://instaastro.com/blog/baba-vanga-predictions-for-2025/
