ئەلیزابێت لایەرد Elizabeth Laird، نڤیسەرەکا بەریتانی یا ناڤدارە. ل سالا ١٩٤٣ێ ل نیۆزیلەندا ژ دایک بوویە و ل بەریتانیا مەزن بوویە. پشتی خواندنا ئەدەبیاتان، بۆ چەندین جاران سەرەدانا وەلاتێن رۆژهەلاتا ناڤین و ئەفریکا کرییە و ژ نیزیکڤە پەنابەر و قوربانیێن جەنگێ دیتینە و بزاڤکرینە کو دەنگێ وان بگەهینیت. 

ئەلیزابێت لایەرد ب کارێن خۆ د بیاڤێ مافێن مرۆڤی یا ناسیارە و ل گەل هەژمارەکا رێکخراوێن پەنابەران ب خۆبەخشی کارکرییە. لەورا ژی رێژەیەکا باش ژ پێڤاژوویا خۆ یا نڤیسینا ئەدەبی ژ بۆ ئەدەبیاتێن مرۆڤایەتی یێن ئاراستەکری بۆ گەنج و سنێلەیان تەرخانکرییە. هەردەم بزاڤا هندی کرییە کو دۆزین جەنگ و شەڕان، پەنابەریێ، توندوتیژیێ و مافێن مللەتێن بندەست د نڤیسینێن خۆ دا بەرچاڤ بکەت. 

رۆمانا وێ Kiss the Dust

ل سالا ١٩٩١ێ رۆمانەک ل سەر کوردان ل ژێر ناڤێ تۆزی ماچی بکە Kiss the Dust   نڤیسییە و تێدا بەحسی کۆچا میلیۆنی و هێرشێن لەشکرێ عیراقێ بۆ سەر کوردان دیار کرینە. هەمی رویدانێن رۆمانا خۆ ژ دیدارێن وێ ل گەل پەنابەرێن کورد ئەوێن ژ ئەنفال و بۆردومانا کیمیایی و کۆچا میلیۆنی رزگار بووین  وەرگرتینە.

د ڤێ رۆمانێ دا، چ شرۆڤەکرنێن سیاسی بەرچاڤ نەکرینە؛ بەلکو چیرۆکا سەرەکی یا رۆمانێ ژ مالەکا کورد یا پێکهاتی ژ دایک و چەند زارۆکان کو د ناڤ ترسا رۆژانە  و رەڤینا د ناڤ چیایان دا پێکدهێت. قارەمانا رۆمانێ کچەکا بچویک یا کوردە کو جیهانێ د چاڤێن زارۆیەکی دا دبینیت. نڤیسەر  ئەلیزابێت لایەرد، کوردان و خێزانا کوردی ب شێوەیەکێ جوان و رەوشەنبیر ددەتە نیاسین. گرێدانا کوردان ب خاک، دۆز، فولکۆر و داب و نەریتێن جوانێن خۆ بەحس دکەت.  

ئەڤ رۆمانە ل گەلەک قوتابخانە و زانکۆیێن جیهانێ وەکو پرۆگرام دهێتە خواندن چونکی ئەدەبەکێ مرۆڤایەتی یێ گرێدایی ب پەنابەرانە کو دەرگەهەکە تێدا رۆژئاڤایی دچنە د ناڤ دۆزا گەلی کورد دا. ئەڤێ رۆمانی، رۆلەکێ باش هەبوویە  چونکی کوردان ژ وی جۆرێ ژیانێ یێ رۆژهەلاتا ناڤین پێ دهێتە نیاسین جودا دکەت و دیار دکەت کو کورد خودان دیرۆکەکا دەولەمەندن و رۆلێ ژنێ جڤاکێ کوردی دا گەلەک یێ بهێزە.